Cuifi ñi huiringeel pengeli cheu mülequefui quiñe troquiñ israelche

Ti Biblia feipi pu israelche ngünenierpuingün ti Feipicünuelchi Mapu ca hudamfingün ti mapu. Mari familia Manasés ñi troquiñche llohuingün quiñeque troquiñ mapu inafül Jordán leufü mu mülelu, conhue antü püle. Üyeu huichu mülerquefuingün caquelu Israel ñi pu troquiñche (Josué 17:1-6). Tañi peel pu arqueologo, ¿pengeli ñi rüfngen tañi feipin ta Biblia?

Feichi 1910 tripantu Samaria mapu, pu arqueologo rüngafingün chi mapu, fei peingün pichiquen trafon ceramica, ostraca pingelu. Tüfa engün niei quiñeque huirintucun hebreo quehun dungu mu, feipilei ñi elelngen pulcu, feichi aceite pu che ñi tucuqueel cuerpo mu ca caquelu falinque chemcün tati rey ñi ruca mu, Samaria huaria meu. 102 pichiquen trafon ceramica pengei, 800 tripantu petu ñi mülenon Jesús deumangerquei, huelu 63 müten pepi papeltufalngei. Trapümngelu ñi huirintuculeel feichi 63 pichiquen trafon ceramica, pengei tuntepu ñi huiringen, quiñeque üi tati pu familiahuen ca feipilei inei ngen tati pu che huercuquelu falinque chemcün palacio mu ca tati pu llouquelu.

Doi falin-ngei ñi feipilen tüfa, com tati familiahuen ñi üitungeel tati pichiquen trafon ceramica mu coneltulei Manasés ñi troquiñche. Tüfa pengeli Manasés ñi troquiñche rüf mülerqueingün cheu ñi feipiel Biblia, femngechi ca pengeli tati Biblia de Estudio Arqueológica.

Ñi feipilen pichiquen trafon ceramica ostraca pingelu, pengeli ñi rüfngen Biblia ñi feipilen. Quiñe huentru huirintuculu Biblia Amós pingelu, feipi ñi chumquefel tati pu ricungechi che feichi antü mu. Quisu feipi: “Fütraque metahue mu putuqueingün pulcu ca quiñe cüme nümün aceite tucuqueingün tañi cuerpo mu” (Amós 6:1, 6). Feichi pichiquen trafon ceramica pengeli ñi rufngen ñi puuquefel tüfachi chemcün cheu ñi mülen Manasés ñi mari familiahuen.