Tami tucutuhun meu, ¿püramyengepei mai ta Chau Ngünechen?

1, 2. Iñchiñ pu testigo, ¿chemu am falintuquefiyiñ taiñ chumngechi tucutuucüleal? (Inaduamnge ti hunen adentun).

TRAHULUULU quiñe troquiñ loncolechi religioso, quiñe periodista holandes feipi: “Fente tañi arengen mu fentren che müte cüme adelcalerquelai tañi ropa engün”, huelu ca feipi pu testigo ñi fütra trahun mu trürngelai pu loncolechi religioso mu. Feipi: “Pu huecheque huentru ca füchaquelu yeniequeingün chaqueta ca corbata, cafei ti pu üllcha ca ti pu domo rume pichiquelai tañi pu pollera, cüme adniequefingün”. Tañi cüme tacutuyahun mu fentren rupa saquingequei tati pu testigo, femngechi pengelingün tañi “mallmangenon ca ñi nien cüme raquiduam” ca “ñi poyequefiel ta Chau Dios” (1 Tim. 2:9, 10). Tüfa mu Biblia ngülamtufi tati pu domo, huelu ca coneltulei com pu huentru.

² Jehová rume falintuquefi taiñ chumngechi adcüleal ca taiñ chumngechi tacutuucülen, feimu iñchiñ inaquefiyiñ tañi raquiduam (Gén. 3:21). Biblia quimfalcünufi chem raquiduamquei Chau Dios tañi chumngechi tacutuucüleal tañi pu inanieteu. Feimu lle, petu taiñ dullinon quiñe ropa taiñ tucutuhual ngelai iñchiñ taiñ cüme duamcüleal müten, huelu mai ñi chem raquiduamqueel Chau Dios taiñ ayühulafiel.

3. Tati ley ñi elungeel pu Israel che, ¿chem quimeleiñmu ropa mu?

³ Jehová ñi ley cuñiutucuquefui tati pu Israel che ñi connoal pod cudumuhun dungu chumngechi ñi femquefel caquelu troquiñche. Tüfa pengeli Dios tañi fente üdequefiel ñi müte quimfalngenon ropa mu quiñe huentru tañi huentrungen cam quiñe domo ñi domongen (papeltunge Deuteronomio 22:5). Tüfachi huercün dungu pengeli Chau Dios ayüquelai quiñe huentru tañi ropa mu ñi domo femfaluhual cam quiñe domo ñi huentru femfaluucüleal.

4. Taiñ chem tacutuucüleal, ¿chem quelluafeyu pu cristiano?

⁴ Biblia ngülamtuqueiñmu taiñ chumngechi tacutuucüleal, fei inaniequefiyiñ cheu rume müleliyiñ cam chem tuhun-ngeliyiñ rume. Biblia eluñmaqueiñmeu taiñ dullial chem ropa taiñ tacutuucüleal taiñ cüme duamcüleal, feimu duamfal-lai fillque ley taiñ obligayaeteu tüfachi dungu mu. Tüfachi chillcatun mu peaiñ chumngechi “Chau Ngünechen tañi piel” quellueiñmu tañi chum tacutuucüleal (Rom. 12:1, 2).

QUIMFALCÜNUQUEIÑ TAIÑ SERFIQUEFIEL CHAU DIOS

5, 6. ¿Chem raquiduamelafuiñ pu che taiñ tucutuucülen mu iñchiñ?

⁵ Ti apostol Pablo quimfalcünui chem raquiduamquei Chau Dios tüfachi dungu 2 Corintios 6:⁠4 mu (papeltunge). Taiñ chumngechi adcülen pengelquei chem chengeiñ pu che ñi adquiñ meu (1 Sam. 16:⁠7). Feimu lle taiñ tucutuucüleal, Jehová ñi pu che raquiduamquelaiñ taiñ cüme duamcüleal müten. Inanieliyiñ Chau Dios ñi piel, famentuafiyiñ cam dullilayaiñ ropa rume pilolcülelu cam rume pünalelu. Taiñ tucutuucülen mu huesa duamlayafiyiñ ta caquelu.

⁶ Taiñ quimfalcünuafiel caquelu pu che ñi rüf inaniefiel Chau Jehová, taiñ ropa mülei ñi lifcüleal ca cüme adcüleal. Ca ayüafuingün chi ñi doi quimafiel Chau Jehová. Ca tati pu che cüme raquiduamai Jehová ñi troquiñche mu. Fei doi eluucüleafuingün ñi allcütuafiel ti cümeque dungu.

7, 8. ¿Chumül doi falin-ngei taiñ cuñiltucuhual tucutuhun mu?

⁷ Cüme tucutuucüleliyiñ püramyengeai ti huercün dungu ca taiñ lif huenu Chau. Cafei yamafiyiñ taiñ pu peñi ca lamngen ca itrocom che (Rom. 13:8-10). Tüfa doi falin-ngei petu taiñ trahuluhun mu iñchiñ ca taiñ amuldungual. Taiñ tacun meu quimfalcünuaiñ taiñ poyequefiel ta Chau Dios (1 Tim. 2:10). Pu testigo iñchiñ respetaquefiyiñ fill huimtun müleyechi mapu meu. ¿Chumngelu am? Quiñeque ropa cümei taiñ tucutuhual quiñeque lof mu huelu cüme pengelngelayafui caque quiñeque troquiñ mapu meu.

⁸ (Papeltunge 1 Corintios 10:31). Amun mu fütra trahun mu iñchiñ, mülei ñi lifcüleal taiñ ropa ca taiñ adelcaleal, tüfa femqueiñ taiñ inaquenofiel mapu müleyechi huesaque huimtun. Cheu miyauliyiñ rume, petu tañi amulcünuel ti fütra trahun ca afle rume cuñiltucuuqueiñ chem taiñ tucutuuquen. Tüfa lle taiñ yamquefiel iñchiñ taiñ testigo ngen ca pepi amuldunguafuiñ cütu.

9, 10. Taiñ tacutuucüleal, ¿Chumngechi quelluafeiñmeu Filipenses 2:4?

⁹ (Papeltunge Filipenses 2:⁠4). ¿Chumngelu cümei raquiduamal chem ropa taiñ dullial? Taiñ ropa mu raquiduamelafuiñ cümeque dungu cam huesaque dungu taiñ pu peñi ca pu lamngen. Feimu lle Biblia feipi: “Com quiñepülecünuafimün tamün cuerpo ñi illutuel, femngechi conlayaimün pod cudumuhun, ünufal dungu, ca rume illulayaimün cudumuhun dungu” (Col. 3:2, 5). Iñchiñ culpaconafuiñ quelluntucunoliyiñ taiñ pu peñi ca lamngen tañi huehuafiel tüfachi dungu mu. Quiñeque engün quiñepülecünufingün pod cudumuhun cafei petu chaftuniefingün feitichi dungu, feimu ¡quelluafiyiñ llemai! (1 Cor. 6:9, 10).

¹⁰ Taiñ tucutuucülen quelluafui ti trahunche ñi lifcüleam tati pod huimtun müleyechi mapu mu, tüfa lle trahunhue ruca mu cam adngelluucüleliyiñ taiñ pu peñi ca lamngen engün. Iñchiñ lifrengeiñ taiñ dullial chem ropa taiñ tucutuucüleal huelu mai, mülei taiñ raquiduamtucunieafiel caquelu, tüfa lle tañi feyentuafiel Chau Dios ñi feipin, taiñ lif chengeal, cüme raquiduamcüleal tañi dungun ca tañi femquen (1 Ped. 1:15, 16). Feimu Biblia feipi “ti piuqueyechequelu yamchequei, quisu duamuuquelai” (1 Cor. 13:4, 5).

CHEM CHUMMEQUELIYIÑ RUME, CÜME TUCUTUUCÜLEAIÑ

11, 12. Tucutuhun mu, ¿chem mülei taiñ raquiduamtucunieal?

¹¹ Jehová ñi pu che iñchiñ, quimnieiñ chem femliyiñ rume ca chem antü ngele rume caquerumeafui taiñ ropa (Ecl. 3:1, 17). Amulele ti tripantu arengeafui cam hutrengeafui, feimu caletuafui chum taiñ tucutuuquen. Taiñ mongen mu fillque dungu caletuafui ca femngechi taiñ tucutuuquen, huelu Jehová ñi ngülam turpu caletuquelai (Mal. 3:⁠6).

¹² Ti mapu cheu ñi rume arengequen cüdaungeafui ñi cüme dullial chem tucutuhual ca pengelal cüme raquiduam. Huelu tucutuulayaiñ pilolcülechi ropa, rume pünalelu cuerpo mu ñi huesa duamelnoafiel taiñ pu peñi pu lamngen (Job 31:1). Amuliyiñ lafquen cam leufü mu taiñ müñetumeal, müte pilolquiyaulayaiñ (Prov. 11:2, 20). Caquelu che pilolquiyaule rume, pu testigo iñchiñ quimfalcünuaiñ taiñ poyequefiel taiñ Huenu Chau.

13. Taiñ cüme dullial chem tucutuhual, ¿chumngechi quelluaiñmu 1 Corintios 10:32, 33?

¹³ Taiñ tucutuhun mu huesa duamel-layafiyiñ chem che no rume, femngechi quimeltuqueiñmu Biblia (papeltunge 1 Corintios 10:32, 33). Tüfa rume falin-ngei. Feimu ti apostol Pablo huirintucui: “Caque quiñeque iñchiñ mülei taiñ duamtuafiel taiñ chafche. Femngechi cümelcayafiyiñ ca nehuentucuafiyiñ”. Ca feipi: “Cristo quisu duamuulai” (Rom. 15:2, 3). Jesús doi falintufi ñi cüme duamelafiel caquelu che ñi quisutu duamuhual mu. Femlu tüfa femürpui chem ñi ayünieel Dios. Ñi inayentuafiel Jesús ñi femün, tucutuulayaiñ chem rume taiñ catrütuafeteu ñi amuldungucheal.

14. Pu chau, ¿chumngechi quimeltuafui tañi pu pichiqueche ñi cüme dullial tañi ropa?

¹⁴ Pu chau cristianongelu mülei ñi quellunieafiel tañi familia ñi femal chem pin Biblia chumngechi cüme tucutuucüleal ca adelcaleal, ñi ayühulafiel Jehová ñi piuque (Prov. 22:6; 27:11). Hunelu meu pu chau cüme tucutuuquei, piuqueyen mu quimeltuquei tañi pu pichiqueche ñi yamnieafiel taiñ Huenu Chau. Saquifalngei pu chau quellufilu tañi pichiqueche ñi cüme dullial tañi ropa femngechi ñi cüme duamcüleal engün ca quimfalcünual ñi serfiquefiel Jehová.

CÜME RAQUIDUAMAIÑ CHEM TAIÑ DULLIAL

15. ¿Chem raquiduamtucunieaiñ dulliliyiñ ropa?

¹⁵ Tati Biblia quelluqueiñmu taiñ cüme dullial femngechi taiñ ayühulafiel Jehová. Dulliafuiñ tacun taiñ ayüel ca taiñ pepi culliafiel. Huelu rumel mülei ñi lifcüleal, adelcaleal, yamfalngeal ca ayüfalngepe cheu taiñ mülen mu.

16. Taiñ cüme tacutuucüleal cüdaungele rume, ¿chumngelu rume fali?

¹⁶ Quiñeque mu cüdaungeafui dullial rüf tutelcalechi ropa. Fentren negocio mu müleyei ropa tañi ayüquefiel epe com che, feimu rume cüdaungei ñi peal pollera, vestido, pantalon ca chaqueta ñi müte pilolcülenoal ti che. Huelu, taiñ pu peñi taiñ pu lamngen ayüucüleafui pefiel mu iñchiñ taiñ cüme dulliquefiel adcülechi ropa, cüdaungele rume. Ca doyelchi mai, taiñ piuque ayüucüleai taiñ püramyefiel Jehová.

17. Taiñ yenieal cam yenienoal payun, ¿chem mülei taiñ raquiduamtucunieal?

¹⁷ Quiñe cristiano ñi payun-ngeal, ¿cümeafui cai? Moisés ñi ley feipiquefui pu huentru ñi yenieal payun, huelu famülque meu inaquelafiyiñ feitichi ley (Lev. 19:27; 21:5; Gál. 3:24, 25). Quiñeque troquiñ mapu mu cüme troquingequei yeniengeal payun, huesa duamelquelafi pu che amuldungun mu. Quiñeque peñi yeniequei payun, loncolelu ca siervo ministerial yenieafui cütu. Huelu caquelu cüpa yeniequelaingün (1 Cor. 8:9, 13; 10:32). Ca quiñeque mapu meu cüme troquingequelai ti pu huentru ñi yenieal payun, feimu lle pu testigo yeniequelai. Femfule quiñe peñi, huesa dunguyengeafui ca püramyengelayafui Chau Dios (Rom. 15:1-3; 1 Tim. 3:2, 7).

18, 19. Taiñ tacutuucülen mu, ¿chumngechi quelluafeiñmu Miqueas 6:8 taiñ ayühulafiel ta Jehová?

¹⁸ Rume mañumcüleiñ Chau Jehová taiñ obliganoaeteu iñchiñ taiñ chumngechi tacütuucüleal, doi mai eluqueiñmu ngülam Biblia mu taiñ quisutu dullial. Femngechi pengelaiñ taiñ checahun-ngenon taiñ tacun mu, ca ñom piuquengeal Jehová ñi adquiñ mu (Miq. 6:8).

¹⁹ Pengelaiñ taiñ rüf checahun-ngenon ca ñom piuquengen ngüneduamuuliyiñ taiñ inaniefiel Chau Jehová tañi huercün dungu, cüme quimlu iñchiñ am ñi falin-ngen inchiñ mu. Taiñ ñomchengen ca coneltulei caquelu tañi chum duamcülen ca tañi raquiduam. Feimu lle pengelaiñ taiñ ñompiuquengen Jehová ñi adquiñ mu feyentuniefiliyiñ Jehová ñi huercün ca ayühulnieafiyiñ caquelu che ñi piuque.

20. Taiñ ad ca taiñ tacun, ¿chem mülefui ñi raquiduamelafiel caquelu?

²⁰ Taiñ ropa tacutuhun mu mülefui ñi pengelafiel ta caquelu taiñ inaniefiel ta Jehová. Taiñ pu peñi, pu lamngen ca pu testigongenolu ñi adquiñ mu quimfaluhuaiñ taiñ poyequefiel ta Chau Dios. Fei müten niei nor rüpü, ca inchiñ ayühunquechi inaquefiyiñ. Saquifalimün tamün ayühulniefiel ta Chau Jehová ñi piuque ca tañi püramyequefiel ñi huercün dungu ¿chemu am? Tamün tacun ca tamün femquen mu. Cuidahuaiñ taiñ ad, femngechi taiñ püramyeafiel tati pengelquelu ñi rume afmatufalngen ca rume cüme adi, taiñ Chau Jehová llemai (Sal. 104:1, 2).