Cutrancauliyiñ, ti lifru Job quelluafeiñmu

1, 2. ¿Chemu fente falin-ngei Job pingechi lifru?

¿PAPELTUQUEFIMI Job pingechi lifru? Fütra cuifi mu rume huirintucungefulu, fantepu mu fentrenque che feipiquei ñi rume cüme lifrungen. Quiñeque che püramyefi tati huirintuculu feitachi lifru, afmatulqueyu chumngechi ñi huiriconcülen, adümfali ca rume ayüfali tañi feipin. Moisés rume huirintuculu feitachi lifru, Jehová llemai feipieyu chem tañi huirintucual (2 Tim. 3:16).

² Job pingechi lifru rume falin lifru fel Biblia mu. ¿Chemu? Feita pengeli tati pu cümeque püllü ca tati pu che mülelu mapu mu dulliafui ñi incayafiel Jehová tañi üi. Quimeltuqueiñmu Jehová ñi chumngen: tañi piuqueyechen, tañi quimün-ngen, tañi norngen ca tañi nehuen-ngen. Job pingechi lifru fentren rupa tati Com Nehuen Nielu pifi ta Jehová. Feitachi lifru ca pengeli chemu Jehová catrütulafi ñi rupayal huesaque dungu, caque falinque dungu ñi ramtuuqueel pu che ca huiñoldunguquei.

3. ¿Chem quimeltuafeiñmu Job pingechi lifru?

³ Raquiduamnge tüfa: papeltufiel Job pingechi lifru trürümafuiñ pürayal quiñe fütra huincul mu. Püran mu quiñe fütra huincul mu, doi cüme pequeiñ taiñ pequenoel nageltu. Ca femngechi papeltufiel mu Job pingechi lifru, doi cüme quimqueiñ taiñ quimquenofel: chem raquiduamquei Jehová taiñ cutrancahun mu. Feitachi troquiñ mu ngüneduamaiñ chumngechi Job tañi rupan quelluafui chi tati pu Israel che cuifi mu ca chumngechi quelluafeiñmu iñchiñ fachantü. Ca ngüneduamaiñ chumngechi quelluafuiñ ta caquelu papeltulelfiel mu feitachi lifru.

DIOS CATRÜTULAFI JOB ÑI HUESA RUPAYAL

4. ¿Chemu Job trürümfal-lafui pu Israel che mu?

⁴ Pu Israel che esclavolefulu Egipto mu, Job mülequefui Uz pingechi mapu mu, ¿püllelequepelafui Arabia mapu mu? Egipto mapu mu quiñeque Israel che poyefingün coilaque dios, huelu Job femlafui. Quisu poyequefi Jehová müten (Jos. 24:14; Ezeq. 20:8). Jehová raquiduamün mu Job mu feipi: “Mapu meu ngelai inei no rume fei reque” (Job 1:8).a Job ricu huentru fel ca doi respetangequefui com caquelu che mülelu feichi troquiñ mapu mu (Job 1:3). Rume lladcülequepelafui Huecüfü tüfachi falin huentru ñi serfifiel mu Jehová.

5. Jehová, ¿chemu elcünui Huecüfü ñi cutrancayafiel Job? (Job 1:20-22; 2:9, 10).

⁵ Huecüfü feipi Job rupale huesaque dungu mu, püntütripayai Jehová mu pifui (Job 1:7-11; 2:2-5). Jehová rume piuqueyefui ta Job, huelu eluñmafi Huecüfü ñi pengelal ñi rüfngepen mai ñi feipin (Job 1:12-19; 2:6-8). ¿Chumi ta Huecüfü? Müntuñmafi Job com tañi pu culliñ, langümüñmafi tañi 10 yall ca cutranelfi ta Job. Com tañi cuerpo mu pitru reque tripai. Huecüfü cutrancafilu rume ta Job, quisu amulei ñi serfiafiel Jehová (papeltunge Job 1:20-22; 2:9, 10). Rupachi antü mu, Jehová elutufi ta Job com tañi niequefel, tremoltufi ca huiño elufi 10 yall. Ca elufi doi tripantu tañi mongeleal, femngechi quimpafi fentren tañi pu cüpanche (Job 42:10-13, 16). Tañi rupan ta Job, ¿chumngechi quellufi pu serfiquefilu ta Jehová cuifi? ¿Chumngechi quelluqueiñmu iñchiñ? Peafiyiñ.

6. Job ñi rupan, ¿chumngechi quellufi chi tati pu Israel che? (Ca inaduamnge ti adentun).

⁶ Job ñi rupan, ¿chumngechi quellufi chi pu Israel che? Fei engün rume cutrancauquefuingün Egipto mapu mu. Quiñeque tüfa Josué ca Caleb, esclavolequefuingu fentren tripantu mu. Ca miyauquefuingu 40 tripantu mu huellin mapu mu, caquelu tañi feyentunon mu. Pu Israel che allcüingün chi Job tañi rupan, feita rume yafültucupelaeyu. Job tañi rupan pengelelfi chi tati pu Israel che Chau Dios mu cüpalai huesaque dungu, doi mai Huecüfü mu cüpai. Ca quimürpuingün chi chumngelu Chau Dios catrütuquelai ñi huesa rupayal ta che. Cafei Jehová rume falintuquefi pu che tañi serfiqueteu cüdaungefule rume.

7, 8. ¿Chumngechi quellufi ti lifru Job pu rupamequelu huesaque dungu?

⁷ Job ñi rupan, ¿chumngechi quelluafeiñmu? Fachantü fentrenque che pequefi ñi sufriquen pu che cüme yenielu ñi mongen. Fei feyentuhuelai Dios mu, caquelu duamtuchequelai piqueingün. Peaiñ ñi rupan ta Hazelb Ruanda mu mülelu. Üllcha domongelu, feyentuquefui Dios mu, huelu rupai huesaque dungu tañi mongen mu. Tañi chau ca tañi ñuque hudaingu. Tañi ñuque ca huentru engu nieutuingu, fei tañi padrastro huesalcaquefeyu. Rupachi antü mu, quiñe huentru nüntucaeyu. Amun mu tañi iglesia mu, inei no rume yafültucuquelafeyu. Quiñe antü, feipifi ta Dios: “Iñche llellipuquefeyu. Re cümeque dungu femquefun, huelu eimi huesalcaqueen müten. Feula famentuhuan eimi mu, feman iñche tañi ayühulqueteu müten” pifi ta Dios. Fachantü fentren che ca feipingequei coilaque dungu Dios mu, feimu “Chau Dios mu cüpai cutrancahun” piqueingün. ¡Hueñancün-ngei llemai! Rume ayüqueiñ taiñ quelluafiel engün.

⁸ Job pingechi lifru mu quimiyiñ Chau Dios mu cüpalai cutrancahun, Huecüfü mu mai cüpai. Ca quimürpuiñ huesa rupan mu ta che, “huesa fempelaingün, feimu huesaque dungu mu ruparupangei” pilayaiñ. Doi mai Biblia feipi inei rume ruparumeafui huesaque dungu cheu rume mülele (Ecl. 9:11; Job 4:1, 8). Job pingechi lifru mu, ca quimiyiñ püntütripanoliyiñ Jehová mu huesaque dungu rupale, pengelqueiñ Huecüfü ñi coilatufengen (Job 2:3; Prov. 27:11). Acordayaiñ ñi rupan ta Hazel. Chillcatulu Biblia pu testigo engün, quimürpui Chau Dios mu cüpalai ti cutrancahun. Fei feipi: “Llellipufiñ Jehová com tañi piuque mu. ‘Famentuhuan eimi mu pifeyu. Quimquelafeyu, feimu ta feipieyu. Feula quimürpueyu’ pifiñ. Quimlu iñche tañi piuqueyenieteu ta Jehová, rume ayüucülen”. Rume falintufali taiñ quimürpufiel chemu ñi rupaquen huesaque dungu.

JOB ÑI RUPAN, ¿CHUMNGECHI QUELLUAFEIÑMU TAIÑ NEHUENCÜLEAL?

9. ¿Chem raquiduamcülefui Job ñi cutrancahun mu? (Santiago 5:11).

⁹ Raquiduamnge chumte tañi huesa rupamequen ta Job. Anülei huente trufquen mu, tañi cuerpo apolei pitru mu, fei rume cutrantuquefui. Job nehuen-ngehuequelafui. Job anülei, fei nüi quiñe triran metahue ñi carüfafiel tañi allfen. Eyütulequefui fente tañi cutrantunieteu mu. Huelu Job re raquiduamcülelafui ñi mongetripayal, doi mai raquiduamcülefui ñi poyenieafiel ta Jehová ca maneluucülefui quisu mu müten (papeltunge Santiago 5:11). Peaiñ chem quellueyu.

10. ¿Chumngelu feipiafuiñ Job ñi fente cüme hueniyefiel Jehová?

¹⁰ Job feipifi ta Jehová tañi chum duamcülen (Job 10:1, 2; 16:20). Capitulo 3 mu, Job feipifi fente tañi hueñancülen tañi huesa rupamequen mu. Quisu hueluraquiduamcülefui Jehová tañi huesalcamequeteu. Ca tañi 3 pu hueni feipieyu tañi huesalcamequeteu Jehová tañi huesa femün mu, huelu Job incañpehui quisu ñi nor huentrungen. Quiñeque dungu feipi ta Job quisu ñi doi norngen ta Dios mu (Job 10:1-3; 32:1, 2; 35:1, 2). Job ca feipi tañi fente tañi incañpehun mu, huesa entui tañi feipin (Job 6:3, 26). Capitulo 31 mu, Job feipi Chau Dios tañi cutranpiuqueyeateu ca tañi perdonayaeteu (Job 31:35). Huelu Job ngelafui tañi feipifeipiyeafiel ta Dios tañi quimelaeteu chemu tañi cutrancaumequen.

11. ¿Chumi Jehová tañi feipieteu mu Job?

¹¹ ¿Chemu Job femngechi entudungulelfi Jehová? Tañi cüme hueniyefiel mu Jehová ca maneluuquefui tañi nor juzgayaeteu. Rupachi antü, Jehová entui quiñe fütra cürüf ca dungufi ta Job, huelu feipilafi chemu tañi cutrancaumequen. Ca Jehová castigalafi ta Job tañi entudungun mu ca tañi quisu incañpehun. Doi mai, chumngechi ñi femquen quiñe poyen-ngechi chau, Jehová piuqueyenquechi norümtufi Job tañi raquiduam. Femngechi doi cüme quellufi. ¿Chumi cai Job? Ñom piuque mu quimtucui ñi ancapuunon Jehová tañi quimün mu ca repentiutui tañi huesa entudungun (Job 31:6; 40:4, 5; 42:1-6).

12. Job tañi rupan, ¿chumngechi quellufi chi pu Israel che?

¹² Job ñi rupan, ¿chumngechi quellufi chi pu Israel che? Raquiduamaiñ Moisés mu. Cüdaungefui tañi adnieafiel pu Israel che. Fentren rupa famentuquefingün tañi feipieteu Jehová ca Moisés. Huesa rupan mu, pu Israel che culpatuquefuingün Jehová. Huelu Moisés quintuquefui Jehová tañi quelluaeteu, fei llellipuquefui (Éx. 16:6-8; Núm. 11:10-14; 14:1-4, 11; 16:41, 49; 17:5). Quiñe antü, Moisés ca duamniefui tañi norümaeteu Jehová. Petu ñi conpunon ti Feipicünuelchi Mapu mu, Moisés illculcaeyu pu Israel che, fei huelulcai ñi entual tañi feipin. Feichi mu püramyelafi Jehová (Sal. 106:32, 33). Feimu Jehová eluñmalaeyu ñi conpual tati Feipicünuelchi Mapu mu (Deut. 32:50-52). Moisés huesa duami, huelu ñom piuquengefui, feimu eluhui Jehová tañi norümaeteu. Rupan mu com feitachi dungu, Moisés rume quellueyu chi ñi quimfiel Job tañi rupan. Ca femngechi pu Israel che serfiquefilu Jehová deu lalu ta Moisés, ¿rume quellupelaeyu quimürpufiel mu Job tañi rupan? Quimürpuingün chi chumngechi ñi feipiafiel Jehová tañi chum duamcülen, ca ñi raquiduamnoal tañi doi norngen Jehová mu. Ca mülefui tañi ñom piuque mu eluhual Jehová tañi norümtuaeteu.

13. Job ñi rupan, ¿chumngechi quelluafeiñmu taiñ nehuencüleal? (Hebreos 10:36).

¹³ Job ñi rupan, ¿chumngechi quelluafeiñmu? Taiñ pu cristianongen duamnieiñ taiñ nehuencünuhual (papeltunge Hebreos 10:36). Quiñeque cutrancüleingün chi, nieingün depresion cam ansiedad cutran, huesaque dungu rupamequeingün chi tañi familia mu, layeluhuingün chi cam rupamequeingün caquelu dungu mu. Rupan mu cüdaungechi dungu, doi huesa duamelafeiñmu ñi feipin ca ñi femün caquelu pu che (Prov. 12:18). Huelu Job pingechi lifru quimeltuqueiñmu taiñ com feipiafiel Jehová chem ñi mülen taiñ piuque mu ca maneluhuafuiñ taiñ allcütuaeteu (1 Juan 5:14). Quiñeque mu, Job reque, taiñ raquiduamnon mu entuafuiñ taiñ feipin. Huelu Jehová illcutulayaiñmu, doi mai eluaiñmu quimün ca nehuen taiñ serfinieafiel (2 Crón. 16:9; Sant. 1:5). Jehová ca norümtuafeiñmu chumngechi ñi femfiel ta Job. Ngülamtuafeiñmu Biblia mu, taiñ publicacion mu ca taiñ feipieteu quiñe loncolelu cam quiñe cüme hueni (Heb. 12:5-7). Inayentuafiyiñ Job. Fei rume cüme tripai ñom piuque mu allcütufiel Jehová tañi norümeteu. Iñchiñ ca femliyiñ, llohuaiñ fentren cümelcan (2 Cor. 13:11).

¿CHUMNGECHI QUELLUAFUIÑ CAQUELU CHE JOB ÑI RUPAN MU?

14. Ramtungen mu chumngelu ñi mülen cutrancahun, ¿chem piquei fentren amuldunguquelu?

¹⁴ Amuldungun mu fentren che ramtuqueiñmu: “¿Chumngelu fente mülei huesaque dungu?”. Femngechi ramtungen mu, quiñeque amuldunguquelu nütramcaquei chem ñi rupan Edén pingechi lof mu. Huecüfü coilatufi Adán ca Eva ñi allcütunoafiel ta Chau Dios (Gén. 3:1-6). Ñi huesa femün mu, mülerpui huesaque dungu ca lan dungu com mapu meu (Rom. 5:12). Chau Dios elcünui ñi rupayal tiempo ñi pengelal Huecüfü ñi coilatufengen. Ca quimeltuquefi tati pu che ñi afal com cutrancahun ca ñi nierpuafel engün rumel mongen (Apoc. 21:3, 4). Femngechi nütramcan mu fentren amuldunguquelu quimeltuquei chumngelu ñi mülen cutrancahun.

15. Ñi feipin ti lifru Job, ¿chumngechi quimeltuafuiñ pu che chumngelu ñi mülen cutrancahun? (Ca inaduamnge ti adentun).

¹⁵ Ca quiñe dungu feipiafuiñ ti che ramtueliyiñmu chumngelu ñi mülen cutrancahun. Hunelu mu saquiafuiñ ti che tañi entuel feitachi falin ramtun. Ca feipiafuiñ: “Cuifi mu quiñe cüme huentru ca femngechi dungu ramtui, Job pingequefui. Quisu raquiduami Dios tañi cutrancamequeteu” (Job 7:17-21). “Ahuem, fütra cuifi ñi ramtungequen feitachi dungu” piafui ti che. Ca feipiafuiñ ti lifru Job pengeli Dios ñi cutrancanofiel Job, Huecüfü mai ta femi. Huecüfü ca feipi tati pu che serfiquefi ta Dios re tañi cümelcahual müten. Huelu rupale huesaque dungu, püntütripayai Chau Dios mu pi Huecüfü. Huelu Chau Dios maneluuquei ñi müleal che ñi serfiaeteu rüf piuque mu. Feimu eluquefi tiempo ñi pengelal engün Huecüfü tañi coilatufengen. Chau Dios cümelcafi Job tañi turpu püntütripanon quisu mu. Femngechi feipiafuiñ pu che Chau Dios mu cüpalai tañi huesa rupamequen, tüfa yafültucuafeyu.

16. Ti lifru Job, ¿chumngechi quellufi quiñe huentru cutrancaumequelu?

¹⁶ Job pingechi lifru quellufi quiñe huentru Mario pingelu. Feichi 2021 tripantu mu, quiñe lamngen amuldungui telefono mu. Ti hunen numero ñi mütrümfiel fei ta Mario. Fei papeltulelfi quiñe texto, pengeli Chau Dios allcütuñmaqueiñmu taiñ llellipun ca cüpalechi antü mu eluaiñmu cüme felen. Taiñ lamngen ramtui chem raquiduameleyu ti texto. Mario feipi ñi huirintucumequepen quiñe carta, fei ñi feipiafiel tañi familia ñi piuqueyefiel. Fei hula langümuhuan pilefui. Mario ca feipi: “Iñche feyentuquefun Dios mu, huelu quisucünueneu troquihun”. Ca antü, taiñ lamngen nütramcafi Mario com ñi rupan ta Job. Feimu Mario eluhui ñi com papeltuafiel ti lifru Job. Feimu taiñ lamngen huercüleyu quiñe enlace ñi papeltual Biblia taiñ pagina internet mu. Fei, ¿chem rupai? Mario quimtucui Chau Dios tañi duamtunieteu, feimu eluhui ñi quimeltulelngeal Biblia tañi doi cüme quimafiel.

17. ¿Chumngelu mañumniefimi Jehová ñi elcünuel Job pingechi lifru? (Job 34:12).

¹⁷ Biblia rume quelluchequei ca yafültucuquefi pu cutrancaumequelu (Heb. 4:12). Rume mañumniefiyiñ Jehová ñi elcünufiel Job ñi rupan Biblia mu (Job 19:23, 24). Job pingechi lifru cüme quimfalcünui “Chau Ngünechen femquelai huesaque dungu” (papeltunge Job 34:12). Ca quimeltuqueiñmu chumngelu Chau Dios catrütuquelafi huesaque dungu ca chumngechi taiñ nehuentuleal. Ca quelluqueiñmu taiñ yafültucuafiel pu cutrancaumequelu. Cüpalechi troquiñ mu ngüneduamafiyiñ chumngechi Job pingechi lifru quelluafeiñmu taiñ cüme ngülamtucheal.