Domingo 28 conchi septiembre
Feichi antü llellipuli tañi quellungeal, huiño trecatuai tañi pu caiñe. Rume maneluucülen tüfa mu: Chau Dios afcadinieneu (Sal. 56:9).
David, ¿chumi tañi llicalenoal? Cuñihun mu mülelu tañi mongen, raquiduami ñi chumal ta Jehová cüpalechi antü mu. Jehová feipifi ta David tañi lonco ülmencünuafiel. Feimu maneluucülefui Jehová tañi montulaeteu (1 Sam. 16:1, 13). David quimniefui Jehová ñi femürpual tañi feipicünuel. Iñchiñ cai, ¿chem feipicünueiñmu Jehová? Jehová feipilaeiñmu taiñ rupanoal huesaque dungu ta fachantü. Doi mai ti hue mapu mu, Jehová feipieiñmu ñi ngehuenoal huesaque dungu (Is. 25:7-9). Jehová niei com nehuen ñi huiñomongeltuafiel com pu layelu, ñi tremoltuafiel com tati pu cutrancülelu ca ñi apümcayafiel com taiñ pu caiñe (1 Juan 4:4). w24.01 pag. 6 parr. 12, 13
Lunes 29 conchi septiembre
Ayüucülequei ti che perdonangelu tañi huesa femün, ayüucülequei ti che perdonangelu tañi culpan mu (Sal. 32:1).
Raquiduamafuiñ chumngelu hultucuiñ taiñ mongen Jehová mu ca fautizahuiyiñ. Femiyiñ taiñ quelluntucuafiel ta Jehová. Raquiduamnge chumngelu quimimi tami mülen ti rüf dungu mu. Cüme quimürpufimi ta Jehová, yamnierpufimi ca piuqueyerpufimi. Cafei doi feyentufimi ta Jehová ca repentiuhuimi tami culpan mu. Famentufimi com tañi üdequeel ta Jehová. Femimi Jehová tañi ayüqueel. Doi cüme duamtuimi perdonaeteu ta Jehová ta eimi (Sal. 32:2). Ca eluhuimi tami amual trahun mu ca tami amuldungual. Hulcünulu eimi tami mongen Jehová mu ca fautizaulu eimi, feimu conimi ti cüme rüpü mu, turpu elcünulayafimi (Mat. 7:13, 14). Eluucüleaiñ taiñ piuque mu taiñ piuqueyenieafiel Jehová ca taiñ inayafiel ñi huercün dungu. w23.07 pag. 17 parr. 14; pag. 19 parr. 19
Martes 30 conchi septiembre
Chau Ngünechen manelfali, fei femcünulayai tamün rupayal chem tamün pepi hueuquenofiel. Doi mai huesa rupalmün, quelluaimünmeu tamün hueutripayal ca tamün nehuentuleal (1 Cor. 10:13).
Raquiduamliyiñ taiñ feipicünufiel ta Jehová, quelluaiñmu taiñ connoal huesaque dungu mu. Quiñe ejemplo, ¿quiñe huentru daquelcantuafui quiñe fütangechi domo? Cam, ¿quiñe domo daquelcantuafui quiñe curengeelchi huentru? Femlai llemai. Hulcünulu iñchiñ taiñ mongen Jehová mu, feipicünufiyiñ taiñ chumcaunorume taiñ femnoal. Eluuliyiñ taiñ foliluunoal feitachi huesaque raquiduam taiñ piuque mu, cüdautulayaiñ taiñ famentuafiel. Femliyiñ, famentuhuaiñ huesaque che ñi rüpü mu (Prov. 4:14, 15). Inayentuafuiñ ta Jesús. Quisu eluucülefui tañi ayühuelafiel tañi Chau. Iñchiñ ca femngechi femaiñ. Nehuentun mu famentufemafiyiñ com ñi ayüquenoel ta Jehová. Iñchiñ deu eluntucuiñ Jehová mu (Mat. 4:10; Juan 8:29). Huesaque dungu rupaliyiñ cam ngüchaltucungeliyiñ taiñ huesa femal, pengelafuiñ taiñ eluucülen taiñ inayafiel ta Jesús. Jehová quelluaiñmu taiñ femal. w24.03 pag. 9, 10 parr. 8-10