Tati Biblia, ¿chem feipipei mai fillque calcu dungu meu?

1. ¿Tunte puhui ti calcu dungu?

“ÁFRICA mapu mu pütrülei pu calcu che. Cafei fentren che ricu cam pofrengepe rume falintuquefi ti calcu dungu”. Femngechi feipilei ti lifru African Traditional Religion (La religión tradicional africana). Alün che nienolu educacion cam nielu rume, feyentuquei calcu dungu meu, ca quiñeque loncolelu Islam pingechi religion mu cam tati cristiano troquiuquelu.

2. ¿Chem feyentuquei fentren che?

² Pu África che feipiquei Chau Ngünechen ñi ngüneniefiel quiñe fütra nehuen, tati pu püllü ca cuifique che yem pünequei tüfachi nehuen. Quiñeque che ca pepilquei tüfachi nehuen ñi cümelcacheal cam huesalcacheal.

3. ¿Chemu femngequei calcu dungu?

³ Femngequei calcu dungu ñi huesalcayafiel pu caiñe. Tati adümquefilu calcu dungu huercüafui murcielago, üñüm, pülü cam caquelu pichique culliñ ñi huesalcacheal. Pu che feipiquei femngele calcu dungu quiñe che, müleafui yafcahun, ti che pepi nielayafui yall cam püñeñ, cutranafui cam layafui cütu.

4. ¿Chem feipingequei pu bruja meu? ¿Chem feipiquei quiñeque che elcünulu ti calcu dungu?

⁴ Quiñeque che feipiquei pun meu pu bruja elcünuquei tañi cuerpo. Müpütripaqueingün ñi trahuluhual caquelu bruja engün, fei ñochiquechi huesalcamequefi pu che. Huelu pu bruja ñi cuerpo amuli ñi umaucülen ngütantu mu. Femngechi nütramcaquei pu che elcünulu ñi calcu dungu. África mu quiñe revista pengelquei ñi feipin quiñeque domo brujangefulu epe com üllchaque domongei. Feipi engün: “Huesalcafiñ 150 che ñi chocayal tañi auto, langümfiñ engün”. “Nentufiñ com ñi mollfüñ quechu pichiqueche, fei langümfiñ”. Feichi cüla novio ñi elcünueteu iñche, langümfiñ”.

5. ¿Quiñeque che chumngechi femquei ti calcu dungu?

⁵ Quiñeque che adümquefi calcu dungu, cüpa cuidaquefi ta che. Tüfa engün yeniei pulsera ca ihul cuhu tañi cuñiutucuhual, pütocoquei fillque lahuen cam tucuquei chi lahuen tañi cuerpo mu. Cafei tañi ruca mu engün ellcacünuquei fillque chemcün ñi cuñiutucungeal cam cheu ñi miyahun engün yeniei texto tripalu Biblia mu cam ti Corán, com tüfa cuñiutucuafeneu piqueingün.

Fillque coila dungu

6. ¿Chumquei Satanás ca tañi pu huecüfü? ¿Chem raquiduamaiñ fei engün ñi nehuen mu?

⁶ Satanás ca tañi pu huecüfü cuñihun-ngei. Caiñetuquefingün tati pu che, huelulcayafui chem ñi raquiduam cam tañi mongen. Cuifi contuquefingün quiñeque che cam quiñeque culliñ, ca ngüneniefingün (Mateo 12:43-45). Felei, pu huecüfü niei fentren nehuen, huelu rumeñma llicaquelayafiyiñ.

7. ¿Chem cüpa raquiduamelqueiñmu ti Huecüfü? ¿Chem dungu mu trürümngeafui ñi femün?

⁷ Satanás müna cüme quim ngünencachequei, raquiduamelquefi pu che ñi com nehuen-ngen, huelu felelai. Ca femngechi femi pu soltau hueichalu quiñe pais África mapu mu. Petu ñi hueichanon, pu soltau adcünuingün fütraque parlante, femngechi ñi nehuentu allcütungeal fillque tralca ca fütraque arma, fei ñi llicalcayafiel tañi pu caiñe. Ca femngechi femquei ti huecüfü ñi llicalcayafiel ta che, fei ñi femnoal engün Jehová tañi ayüqueel, doi mai Huecüfü ñi ayüqueel. Peaiñ cüla coila dungu Huecüfü taiñ cüpa raquiduameleteu.

8. ¿Chem coila dungu cüpa raquiduamelqueiñmu huecüfü?

⁸ Huecüfü cüpa raquiduamelqueiñmu ngünam rupaquelai huesaque dungu. Quimnolu iñchiñ chumngelu ñi rupan quiñe huesa dungu, Huecüfü cüpa raquiduamelqueiñmu ñi rupan quiñe huesa nehuen tañi duam mu. Raquiduamnge quiñe pichi huentru ñi lan malaria cutran mu. Tañi ñuque quimniei quiñeque pülü cüpalniei tüfachi cutran. Huelu ca raquiduamafui tañi pichi huentru ñi femngen calcu dungu ñi ünatuaeteu quiñe pülü nielu malaria.

9. ¿Huecüfü ñi duam mu rupapei mai com huesaque dungu? ¿Chem pi Biblia?

⁹ Feingei, Huecüfü huesalcayafeiñmu, huelu com taiñ huesaque rupan cüpalai quisu mu. Biblia feipilei: “Tati pu matu lefquelu rumel hueuquelaingün ti cuden, tati pu nehuen-ngelu rumel hueuquelaingün ti hueichan, tati pu quimchengelu rumel niequelaingün iyael, tati pu pepiluhun-ngelu rumel ülmenchengequelaingün, ca pu quimün nielu rumel cüme tripaquelaingün rume, com engün am huesa ruparumeafuingün” (Eclesiastés 9:11). Quiñe che doi matu lefle rume, hueulayafui ti cuden. Ruparumeafui quiñe huesa dungu, tranafui, cutranrumeafui cam ngülngodafui tañi chang. Com tüfachi huesaque dungu rupaquelai Huecüfü ñi duam mu cam femngelu calcu dungu, inei rume femngechi ruparumeafui.

10. ¿Chem feipingequei pu bruja meu? ¿Chumngechi quimnieiñ ñi rüfngenon?

¹⁰ Tüfa ta cangelu coila dungu ñi feipiel ta Huecüfü: tati pu bruja elcünuquei tañi cuerpo, fei amui ñi trahuluhual caquelu bruja engün cam ñi langümafiel quiñe che. Huelu ramtuunge: ¿chumngechi elcünuafui cai tañi cuerpo? Chumngechi quimnieiñ, nielaiñ quiñe püllü cam quiñe alma tripayalu taiñ cuerpo mu.

11. ¿Pu bruja rüf elcünupei mai tañi cuerpo? ¿Chem pimi eimi?

¹¹ Ti püllü cam ti alma tripaquelai taiñ cuerpu mu ñi cümelcacheal cam huesalcacheal rume. Feimu ti pu bruja elcünuquelai ñi cuerpo. Fei com tañi feipiel ñi femün engün, rüf femlaingün, rüf femlu troquiuqueingün rume.

12. ¿Huecüfü chumngechi ngünencaquefi tati pu che?

¹² ¿Chumngelu cai femngechi feipiquei pu brujangefulu? Satanás raquiduamelafui ta che ñi rupan quiñe dungu rüf rupanofule rume. Femafui afmatun dungu, fei pu che raquiduamafui ñi femün, ñi allcütufiel cam ñi pefiel quiñe dungu rüf rupanolu. Femngechi cüpa püntünentuquefi pu che Chau Jehová mu ca cüpa raquiduamelfi engün ñi huelulcalen ti Biblia.

13. a) ¿Mülepei mai cüme calcu dungu? b) ¿Chem feipilei Biblia calcu dungu meu?

¹³ Tüfa ta cangelu coila dungu: ñi mülen cüme calcu dungu, tüfa cümelcaquefi ta che ca cuidaniequefi ñi huesalcangenoal. Huelu Biblia feipilai ñi mülen cüme calcu dungu ca huesa calcu dungu, com huesalcalei. Ngüneduamnge ti ley Chau Jehová ñi huercüfiel tati pu Israel che, tüfa pengeli chem raquiduamquei Chau Dios tati calcu dungu mu.

• “Femquelayaimün calcu dungu” (Levítico 19:26).

• “Pu pelontuchequelu ca tati pu rangiñelhuelelu pu che ca tati pu püllü meu rüfcünu mülei ñi layal, huentru cam domongepe rume” (Levítico 20:27).

• “Ngelai ñi müleal eimi meu [...] adümcantuquelu ti calcu dungu, pehutuhun, calcu che, inei no rume dauquelu, inei no rume ramtuquelu tati rangiñelhuelelu ta pu huesaque püllü meu ca pu che engün meu” (Deuteronomio 18:10-14).

14. ¿Chumngelu Chau Jehová feipi tañi pu che ñi femnoal calcu dungu?

¹⁴ Tüfa pengeli Chau Jehová ayüquelai tañi pu che ñi femal calcu dungu. Fei rume piuqueyefi tañi pu che, feimu pilai ñi ngünenieaeteu engün ti llican, coilaque feyentun ca ti pu huecüfü.

15. ¿Biblia chumngechi pengeli Chau Jehová doi fütra nehuen-ngei ta Satanás mu?

¹⁵ Biblia feipilai com ñi pepi femquen ca com ñi pepi femquenon pu huecüfü. Huelu pengeli Chau Jehová doi fütra nehuen-ngei ta Satanás ca tañi pu huecüfü mu. Chau Jehová huemünentufi ta Satanás huenu meu (Apocalipsis 12:9). Cafei Satanás pedifi permiso ta Chau Jehová ñi ngüchaltucuafiel Job. Chau Dios feipieyu ñi langümnoafiel ta Job, fei Satanás femi ñi feipingeel (Job 2:4-6).

16. ¿Inei mu maneluhuaiñ taiñ cuñiutucungeal?

¹⁶ Proverbios 18:10 feipilei: “Jehová ñi üi quiñe nehuen-ngechi ellcaupeyüm reque felei. Üye mu lefmauquei tati norngechi che, fei cuñiutucungequei”. Feimu maneluhuaiñ Chau Jehová mu taiñ cuñiutucungeal. Chau Jehová ñi pu che maneluuquelai fillque chemcün meu ñi cuñiutucungeal pu huecüfü mu ca llicaquelafi pu calcu che. Maneluuquei ñi feipin Biblia 2 Crónicas 16:9: “Jehová lelimequelu am com huall Mapu meu ñi pengelal tañi nehuen ñi füreneafiel feichi che poyequeteu com tañi piuque mu”

17. Ñi feipin Santiago 4:7, ¿chem maneluhuafuiñ?¿Chem mülei taiñ femal iñchiñ?

¹⁷ Eimi cüdahuelfilmi ta Chau Jehová, ca maneluhuafuimi fei mu. Santiago 4:7 feipilei: ‘Eluucülemün mai tamün feyentuafiel ta Ngünechen. Nehuentuumün tamün ngünecanoaeteu ta Huecüfü, fei tüfa lefmautuai ta eimün meu’. Feimu serfiniefilmi ta Chau Jehová ca eluucülelmi tami ngünenieaeteu, fei rüf cuñiutucuaimu llemai.