Huesaque dungu rupale rume, ¡maneluhuafuiñ llemai!

“Epe puucülele ñi afal ta antü müleai ta cuñihun-ngechi dungu” (2 TIMOTEO 3:1).

EIMI, ¿allcüqueimi cai ñi rupan tüfachi huesaque dungu?

● Fentren che lai quiñe huesa cutran meu.

● Fentren che lai fente tañi ngüñün meu.

● Fentren che lai quiñe fütra nüyün mu, caquelu niehuelai ruca.

Feula ngüneduamaiñ cayu huesaque dungu ñi rupamequen famülque mu, Biblia feipicünui ñi rupayal tüfa.

Inaduamfiliyiñ tati fillque huesaque dungu ñi rupamequen fachantü, quelluaiñmu taiñ maneluucüleal. ¿Chumngechi am tüfa? Tüfachi huesaque dungu ñi rupamequen, pengeli ñi epe puucülen ñi afal ti huesaque dungu. Cafei ngüneduamaiñ chem ñi raquiduamqueel quiñeque che tüfachi dungu meu. Ca chumngelu maneluhuafuiñ ñi cüme feletual ta dungu.

1. Fütraque nüyün

“Müleai ta fütraque nüyün” (LUCAS 21:11).

● Haití mapu meu quiñe fütra nüyün rupai. Quiñeque che cüdauquelu noticia mu, petu mülelu Haití mu, allcüingün ñi huirarmequen quiñe pichi domo, mülequefui miñche mu cheu ñi teifünagün ti ruca. Ti pichi domo müten montui, tañi pu chau lai.

¿CHEM QUIMNGEQUEI? 2010 tripantu meu rupai tüfachi fütra nüyün. Rume fentren che lai, ca doi fentren che ñami ñi ruca. Huelu tüfachi fütra nüyün müten rupalai, 2009 tripantu puulu 2010 tripantu meu, 18 fütraque nüyün rupai huall Mapu meu.

QUIÑEQUE CHE ÑI FEIPIQUEEL. Famülque mu, doi fütraque nüyün rupaquelai ta cuifi meu. Cuifi nehue quimngequelafui cheu ñi rupan ti fütraque nüyün. Fantepu mu cai, ti tecnologia ñi duam mu, fente cüme quimngequei cheu ñi rupan.

¿CÜMEPEI MAI ÑI FEIPIQUEEL TA CHE? Raquiduamnge tüfa: Biblia feipilai tunten fütraque nüyün ñi rupayal. Doi mai feipi fill püle rupayai fütraque nüyün müten (Marcos 13:8; Lucas 21:11).

¿CHEM PIMI CAI? ¿Femtripapei mai ñi feipicünuel Biblia?

Biblia re feipicünulai müten ñi rupayal fütraque nüyün. Ca dungu feipicünui ñi rupayal. Peafiyiñ.

[Feipin]

“Iñchiñ fütraque nüyün feipiqueiñ, huelu tati pu che feipingequei llicafalngechi nüyün” (KEN HUDNUT, SERVICIO GEOLÓGICO DE ESTADOS UNIDOS).

[Cheu tuhui]

© William Daniels/​Panos Pictures

2. Ngüñün

“Müleai ta ngüñün” (MARCOS 13:8).

● Níger mapu mu, quiñe huentru lefmahui tañi huaria mu ñi peal iyael ca lof meu. Fei ca femngechi femi tañi familia. Fei tüfachi huentru tranacünuhui pülli meu, ¿chumngelu am? Tati loncolelu feichi lof meu feipi: “Tüfachi huentru müna huesa duamcülei tañi pepi elunofiel iyael ñi familia”.

¿CHEM QUIMNGEQUEI? Huall Mapu meu, regle che meu, quiñe entrilequei. Huelu África mapu meu doyeli ta ngüñün. Cüla che meu, quiñe entrilequei. Raquiduamnge ñi rupaquen fentren familia África mu: Quiñe chau, ca quiñe ñuque nielu quiñe pichiche, fill antü ramtuuqueingün: “¿Inei am ilayai fachantü?”. Femngechi ramtuuqueingün, nielu cai iyael epu che ngealu müten. Tüfachi dungu meu rupaquei fentren familia.

QUIÑEQUE CHE ÑI FEIPIQUEEL. Tati Mapu hulquei fentren iyael. Fei duamnieiñ ñi cüme adniengeal müten, femngechi com pu che ñi nieal iyael.

¿CÜMEPEI MAI ÑI FEIPIQUEEL TA CHE? Feingei llemai, fantepu meu doi fentren iyael mülerpui Mapu meu. Fei pu gobierno cüme adcünufule ti iyael ñi puhulafiel tati pu che, entrilelafuingün. Huelu fantepu mu, quimfali pu gobierno ñi pepi apümnofiel ti ngüñün.

¿CHEM PIMI CAI? Ñi feipin Marcos 13:8, ¿rüf ngepei mai? Ca tati pu che doi adümuulu rume, ¿apümpeingün mai chi ngüñün?

Fütraque nüyün ca ngüñün pengeli ñi pichilehuen ñi afal huesaque dungu. Huelu fei ca müten no. Caquelu dungu ca rupayai. Peafiyiñ.

[Feipin]

“Mülei fentren pichiqueche laquelu niequelu cai engün pechai cütran, ponon cütran cam caquelu femngechi cütran. Huelu tüfachi pichiqueche entrilenofule engün fentren engün mongetripayafuingün” (ANN M. VENEMAN, EX DIRECTORA EJECUTIVA DE UNICEF).

[Cheu tuhui]

© Paul Lowe/​Panos Pictures

3. Fillque cutran

“Fill püle müleai [...] fill huesaque cutran” (LUCAS 21:11).

● Quiñe troquiñ mapu, África mu, tati pu che cüdauquelu mina mu contueyu quiñe rume huesa cutran. Fei quiñe huentru lahuentuchequelu, Bonzali pingelu, eluhui tañi quelluafiel tüfa engün. Fei fillque rupa quimelelfi pu autoridad chem ñi rupamequen, femngechi ñi quellungeal pu cutrancülelu. Huelu meli cüyen rupalu hula huiñoldungungei. Fei puulu hula chi quellun, tati pu autoridad ngüneduamingün ñi ca tueteu ti cutran ta Bonzali, fei quisu ca larpui.

¿CHEM QUIMNGEQUEI? Mülei quiñeque cutran tañi doi huesalcaqueteu tati pu che, fei tüfa, tati sida, tuberculosis, paludismo, pechai cutran ca chafo cutran. Fei 2004 tripantu, tüfachi puque cutran ñi duam meu doi 11 millon che lai.

QUIÑEQUE CHE ÑI FEIPIQUEEL. Doi mülen mu che Mapu meu, feimu doi che cutrancülequei.

¿CÜMEPEI MAI ÑI FEIPIQUEEL TA CHE? Feingei llemai, fantepu meu doi che mülei Mapu meu. Huelu ca famngechi doi lahuen mülei ca pu doctor doi adümuucülerpuingün ñi pepilal ti cutran. Huelu tunte felefule rume, doi huesaque cutran peufaluuquei.

¿CHEM PIMI CAI? Ñi feipin Biblia huesaque cutran meu, ¿femtripapei mai?

Fütraque nüyün, tati ngüñün ca fillque huesaque cutran, huesalcaquefi ta rume fentren che. Huelu fei ca müten no, ca mülei fentren che tañi huesalcaqueteu ta caquelu che. Peafiyiñ chem pin Biblia tüfachi dungu meu.

[Feipin]

“Quiñe trapil eluucülele taiñ lumuaeteu, rume llücaleafuiñ tati, fei ca llicafali nieliyiñ quiñe cütran taiñ huedalcaeteu ponhui taiñ cuerpo meu” (MICHAEL OSTERHOLM, EPIDEMIÓLOGO).

[Cheu tuhui]

© William Daniels/​Panos Pictures

4. Cutranpiuqueyechehuelai che

“Tati pu che [...] cutranpiuqueyechelayai” (2 TIMOTEO 3:1-3).

● Quiñe domo, Cris pingei, cüdauquei quiñe troquiñche mu incañpefilu tati pu che ñi huesalcaeteu ñi familia. Tüfachi domo feipi: “Quiñe antü quiñe domo fülconpaeneu, huelu fente tañi hulelcangen mu, cangentufiñ”. Cris ca feipi: “Caquelu domo potrongquiyahui fente ñi huesa duamcülen meu”.

¿CHEM QUIMNGEQUEI? África mapu mu, cüla domo mu, quiñe ta nüntucangei petu tañi pichican mu. Ca fentren huentru cümelu troquiquefi ñi hulelcangeal pu domo, “huesa dungu no tati” piqueingün. Huelu pu domo müten huesalcangelaingün. Canadá mapu mu, fentren huentru huesalcayu ñi domo.

QUIÑEQUE CHE ÑI FEIPIQUEEL. Tüfachi dungu, famülque mu müten no. Afquentu hulelcangequei pu familiahuen. Famülque mu, doi nütramcangequei tüfa.

¿CÜMEPEI MAI ÑI FEIPIQUEEL TA CHE? Feingei, tati pu che doi nütramcaquei tüfachi dungu meu. Doi nütramcangelu rume, ¿feipipei mai ñi huesalcangehuenon pu familia? Femlai. Fantepu meu, pu familia cutranpiuqueyeuquelaingün.

¿CHEM PIMI CAI? ¿Femtripapei mai ñi feipin Biblia? ¿Chem pengeli pu familiahuen ñi cutranpiuqueyeuquenon?

Feula inaduamaiñ chumngechi ti Biblia feipicünui ñi huesalcangeal ti Mapu.

[Feipin]

“Müte denunciangequelai mülen mu quehuan ruca meu. Quiñe domo 35 rupa quehuatungeafui, fei hula ngellu  denunciaquei” (PORTAVOZ DEL SERVICIO DE AYUDA CONTRA EL MALTRATO DOMÉSTICO DE GALES).

5. Huesalcangequei ta Mapu

‘Chau Dios apümcayafi tati pu huesalcaquefilu ta mapu’ (APOCALIPSIS 11:18).

● Nigeria mapu meu, mülei quiñe huentru, Pirri pingei. Quisu cüdauquei ti mapu. Huelu tañi lof püle, podümngequei ti co petroleo meu, feimu pepi cüdauhuelai tañi mapu meu. Quisu feipi: “Ti petroleo langümquefi pu challhua, podümquefi tati leufü, ca huesalcaqueiñmu iñchiñ. Niehuelan ta cüdau”.

¿CHEM QUIMNGEQUEI? Fentren quimche feipiquei rume fentren pod ütrüftucungei lafquen mu. Doi ütrüftucungei plastico lafquen mu. Mülei ñi rupayal fentren tripantu ñi aftual tüfachi plastico. Huelu fei ca müten no. Tati pu che pürüm müten apümcaquefi tati fillque chemcün ñi mülen Mapu meu. Raquiduamnge tüfa: quiñe tripantu mu, tati pu che apümquefi fillque chemcün mülelu Mapu mu. Huelu ti Mapu duamniei doi quiñe tripantu ñi huiño hultual feitachi chemcün ñi apümcangeel. Quiñe diario feipi: “Femngechi amulecale ta dungu, 2035 tripantu meu, duamnieaiñ epu Mapu, femngechi müten nieafuiñ com taiñ duamnieel” (Sydnei Morning Herald).

QUIÑEQUE CHE ÑI FEIPIQUEEL. Tati pu che fente cüme puucülei ca niei adümuhun ñi norümtual tüfachi huesa dungu ñi femngeel ta Mapu.

¿CÜMEPEI MAI ÑI FEIPIQUEEL TA CHE? Mülei fentren troquiñche cüdauquelu ñi mülehuenoal pod Mapu mu. Femlu rume, amulecai ñi podümmequengen ti Mapu.

¿CHEM PIMI CAI? Taiñ norümtual tüfa, ¿duamniepeiñ mai taiñ quelluaeteu Chau Dios?

Deu ngüneduampeiñ quechu dungu ñi feipicünuel Biblia. Huelu feula inaduamaiñ cümeque dungu tripalu Biblia meu.

[Feipin]

“Rume adelcalefui tañi lelfün, feula rume ngünüfalngetui” (TÜFA ÑI FEIPIN ERIN TAMBER, HUITRUNAGLU TI PETRÓLEO TAÑI MAPU MEU, QUIDU MONGELEI ESTADOS UNIDOS MAPU MEU).

[Huichulechi dungu]

¿Culpantucuafuiñ ta Chau Dios?

Fentren tripantu cuifi mu, Biblia mu feipicünungei ñi femngechi rupayal. ¿Culpatufalngepei mai ta Chau Dios? ¿Feingepei mai quisu taiñ cutrancaqueteu? Tami quimal tüfa, peafuimi ti capitulo 11 ti lifru Tati Biblia ñi rüf kimeltukeel ñi entuel pu Dunguquelu Ineingen Jehová.

[Cheu tuhui]

U.S. Coast Guard photo

6. Quimelngequei Biblia huall Mapu meu

“Tüfachi cümeque dungu [...] quimelngeai ta com Mapu meu” (MATEO 24:14, Traducción del Nuevo Mundo, [TNM]).

● Vaiatea pingei quiñe domo, quisu mülei quiñe pichi huapi mu, rangiñ lafquen meu mülelu. Cüdaungei tañi puhual üyeu meu. Alü camapulefulu rume, pu Dunguquelu Ineingen Jehová puhuingün tüfachi domo meu. ¿Chumngelu fente alü camapu puhuingün? Ayünieingün ñi quimelelafiel tati pu che Chau Dios tañi dungu, alü camapulefule rume tati pu che.

¿CHEM QUIMNGEQUEI? Chau Dios ñi dungu itrocom Mapu mu quimelngequei. 2010 tripantu mu, pu Dunguquelu Ineingen Jehová rume fentren hora amuldunguingün, 236 pais mu. Cafei rume fentren revista ca lifru hulingün, femngechi ñi quimeltucheal Biblia ñi dungu.

QUIÑEQUE CHE ÑI FEIPIQUEEL. Huarancaquechi tripantu ñi amuldungungequen Biblia ñi dungu.

¿CÜMEPEI MAI ÑI FEIPIQUEEL TA CHE? Fentren che eluuqueingün ñi quimeltual Biblia, huelu epe com engün pürüm afeluuqueingün ca puuquelaingün fentren che meu. ¿Pu Dunguquelu Ineingen Jehová cai? Fütra caiñetungequelu rume engün, fentecünuquelaingün ñi amuldungual huall Mapu meu (Marcos 13:13).⁠a Cafei hulqueingün lifru, revista, ca cofraquelafingün ta che.

¿CHEM PIMI CAI? ¿Huall Mapu mu quimelngepei mai Biblia ñi feipin? Femtripalu cai tüfa, ¿maneluhuafuimi tami doi cüme feletual?

[Quimngeal dungu]

[Feipin]

“Jehová petu feipinole ‘fentecünumün tamün amuldungun’, iñchiñ fillque dungu femaiñ taiñ amuldungulelafiel ta che tati cümeque dungu” (ANUARIO DE LOS TESTIGOS DE JEHOVÁ 2010).

Pichiñma mu cümeque dungu rupayai

“Ca pichin antü mu, ti huesaque che ngehuetulayai engün [...]. Huelu pu ñomngelu ngen Mapu ngeai engün, ca rüf ayüucüleaingün ñi mülen fentren tüngün” (SALMO 37:10, 11).

¿AYÜAFUIMI ñi ngehuenoal huesaque dungu? “Felei llemai” piafuimi. Peafiyiñ quiñeque dungu pengelquelu ñi pichilehuen ñi femngechi feletual ta Mapu.

Deu quimnieiñ ñi pichilehuen ñi afal huesaque dungu (2 Timoteo 3:1-5). Chau Dios llemai eli ñi huirintucungeal fillque dungu Biblia mu, femngechi taiñ maneluucüleal (Romanos 15:4). Com ñi rupamequen fachantü pengeli pichiñma mu com taiñ cutrancaqueteu ngehuelayai.

Afle hula huesaque dungu, ¿chem rupayai? Chau Dios ngünenietuafi tati pu che (Mateo 6:9, 10). Peafiyiñ ñi chem pin Biblia:

● Ngüñühuelayai che. “Fentren iyael müleai tüfachi Mapu meu; huente huincul cütu huefpayai ti fün” (Salmo 72:16).

● Cutranhuelayai che. “Inei no rume feipilayai: ‘Iñche cutrancülen’” (Isaías 33:24).

● Ayüfalngetuai ta Mapu. “Tati desierto ca tati anquen mapu rume ayühun nieai, ca tati laf mapu ayüucületuai ca rume rayületuai” (Isaías 35:1).

Tüfa quiñeque dungu müten pengelquelu ñi femtripayal Biblia ñi feipicünuel. Doi cüpa quimülmi ramtuafuimi quiñe Dunguquelu Ineingen Jehová, chumngelu maneluhuafuimi ñi femtripayal tüfa.