Chillcatual Biblia rume ayühulqueiñmu, huelu quiñeque mu cüdaungeafui taiñ femürpuafiel. ‘Fei doi cümeafui tañi fentecünual tañi chillcatuafiel Biblia’ piafuimi chi, huelu ¿chumngelu cümeafui tami amuleal eimi tami chillcatuniefiel Biblia? Ca, ¿chem quelluafeimu tami afeluunoal?

1. ¿Chumngelu rume cümei tami chillcatual Biblia?

Estudiafilmi Biblia, doi quimafimi ta Chau Dios ca quimtucuaimi fente tami piuqueyenieteu. Fei tüfa quelluaimu tami cüme hueniyeafiel. Huelu tüfa müten no, cafei doi quimchengeafuimi ca maneluucüleafuimi tami cüme feleal. Feimu Biblia feipi: “Chau Ngünechen ñi dungu niei mongen ca nehuen-ngei” (Hebreos 4:12). Felei llemai, Biblia tañi feipin quelluafeimu tami rüf ayüucüleal tami mongen meu.

2. ¿Chumngelu falintuafuimi Biblia ñi feipin?

Ñi quimeltuqueel Chau Ngünechen ñi Dungu rume falin-ngei. Feimu Biblia feipi “niefinge tati rüf dungu ca elcünulayafimi” (Proverbios 23:23). Feimu falintuniefilmi Biblia tañi quimeltuqueel, fentecünulayaimi tami chillcatuniefiel, rupalmi rume huesaque dungu meu (papeltuaimi Proverbios 2:4, 5).

3. Jehová, ¿chumngechi quelluafeimu?

Jehová cüpa hueniyeimu, feimu ‘quelluaimu tami yafüluucüleal’, femngechi tami doi cüme quimafiel (papeltuaimi Filipenses 2:13). Quiñeque mu afeluhuafuimi chi tami estudiayafiel Biblia, cam cüdautuafuimi chi tami inanieal Biblia ñi feipin. Femngechi rupalmi, Jehová quelluaimu. Ca femngechi rupalmi huesaque dungu meu Jehová quelluaimu tami nehuentuleal. Fei, ¿ca chem chumafuimi tami fentecünunoal tami chillcatufiel Biblia? Ngillatuafimi ta Jehová tami quelluaeteu (1 Tesalonicenses 5:17).

DOI QUIMAIMI

4. Doyümniefinge tami chillcatuniefiel Biblia

Quiñeque mu fillque duam nieafuiñ, feimu ‘nielan tiempo ñi chillcatual Biblia’ piafuiñ. Fei femngechi rupaliyiñ, ¿chem chumafuiñ? Papeltuaiñ Filipenses 1:10, ca ngüneduamaiñ tüfachi epu ramtun:

• ¿Chem dungu troquifimi tati doi falin-ngelu mongen meu?

• ¿Chumafuimi doyümnieafiel tami chillcatuniefiel Biblia?

1. Hunelu meu tucufilmi cuyüm quiñe palti meu, fei hula tuculfilmi ti cura, feilayafui llemai.

2. Huelu hunelu meu tucufilmi ti cura ti palti meu, ca fei hula tucufilmi ti cuyüm, fei queta feyafui. Ca femngechi, huneltucuafimi ti doi falinque dungu tami mongen meu, fei diturpuafimi feichi falinque dungu ca nieaimi tiempo tami femal caquelu dungu ca.

Com duamnieiñ quimafiel ca püramyeafiel ta Jehová, femngechi taiñ adnieaeteu. Fei Biblia quelluqueiñmu taiñ diturpual tüfa. Papeltuaiñ Mateo 5:3, ca ngüneduamaiñ tüfachi ramtun:

• Doyümniefilmi tami chillcatuniefiel Biblia, ¿chumngechi quelluaimu?

5. Catrütungelmi, ¡nehuentulenge!

VIDEO: Fütra cümelcangen tañi afeluunon meu (5:22)

• Francesco feipifiel mu tañi pu che ca tañi pu hueni ñi chillcatumequen Biblia, ¿chem chumi engün?

• Francesco tañi fentecünunofiel tañi chillcatun Biblia, ¿chem cümeque dungu rupai?

Papeltuaiñ 2 Timoteo 2:24, 25, ca ngüneduamaiñ tüfachi epu ramtun:

• Tami pu che ca tami pu hueni, ¿chum duamnagquei tami chillcatumequen Biblia?

• Quiñe che ayünole tami chillcatumequen Biblia, ¿chumngechi inayafuimi Biblia ñi ngülam?

6. Maneluunge tami quelluaeteu Jehová

VIDEO: Jehová ñi quellun mu cüme elcünutuafuiñ taiñ mongen (3:56)

• Jim, ¿chem chumi tañi cüme elcünutual tañi mongen?

• ¿Chem doi afmatuleimu tañi rupan?

Papeltuaiñ Hebreos 11:6, ca ngüneduamaiñ tüfachi epu ramtun:

• Afeluunolmi tami maneluucülen Jehová meu, ¿chumai quisu?

• Jehová quimniei tami chillcatumequen Biblia, fei ¿chum duamquei Jehová tami afeluuquenon?

TAMI QUIMEL

Cüdaungele rume, amulepe tami chillcatuniefiel Biblia, femngechi ayüucüleaimi. Ca fentecünunolmi tami maneluucülen Jehová meu, quisu rume cümelcayaimu.

¿Chem piafuimi?

• ¿Chumngelu falintuquefimi Biblia ñi quimeltun?

• ¿Chem mülei tami doyümnieafiel tami mongen mu? Ca, ¿chumngechi femafuimi?

• Cüpa fentecünunolmi tami chillcatuafiel Biblia, ¿chumngelu cümeafui tami ngillatuafiel ta Jehová tami quelluaeteu?

CA PEAFUIMI

Ngüneduamnge meli dungu chumngechi pu che doi cüme adcünuquei tañi tiempo.

“¿Chumafuimi tami cüme adcünual tami antü?” (¡Tami quimafel! febrero, 2014)

Quiñe huentru catrütufi tañi domo ñi poyeafiel ta Jehová. Huelu ngüneduamnge chumngechi Jehová quellufi ta tüfachi domo tañi poyeaeteu.

Jewba kellukeeiñmu taiñ chaftuafiel chem weda dungu rume (5:05)

Quiñe domo fentecünulai ñi poyefiel ta Jehová. Ñi femün quellufi tañi füta. Ngüneduamnge tañi rupan.

Cüdautulu rume, eluhun ñi quimafiel Biblia ñi rüf dungu (6:30)

Quiñeque che feipiquei pu Dunguquelu Ineingen Jehová hudamquefi pu familia, huelu ¿rüfngepei mai ta tüfa?

“Pu Dunguquelu Ineingen Jehová, ¿hudamquepefi mai pu familia?” (Troquiñ internet mu)

Fillque dungu mülei taiñ dullial taiñ mongen meu. Raquiduamnge tüfachi dungu: com iñchiñ mülei taiñ dullial cheu taiñ mongeleal ca chem chumaiñ ñi nierpual taiñ duamnieel. Cafei caque quiñeque iñchiñ dulliafuiñ taiñ nierpual afcadi cam taiñ nienoal. Cüme dulliliyiñ, cüme feleaiñ ca cüme hueniyeafiyiñ ta Jehová. Huelu huesa dulliliyiñ, cüme rupalelayaiñ llemai.

1. Tati Biblia, ¿chumngechi quelluafeimu tami cüme dullial?

Petu tami dullinon, ngillatufinge ta Jehová tami quelluaeteu ca papeltuafimi Biblia tami quimürpual chem raquiduamquei Jehová (papeltuaimi Proverbios 2:3-6). Quiñeque mu Jehová müna cüme feipiquei Biblia meu chem tami chumal, fei müna cümeafui tami inayal ñi feipin.

Quiñeque mu, pelayafuimi quiñe huercün dungu Biblia meu tami feipiaeteu chem tami chumal. Huelu Jehová ca quelluaimu tami quimal “chem rüpü meu tami miyahual” (Isaías 48:17). ¿Chumngechi quelluafeimu? Biblia meu Jehová eli fillque ngülam taiñ adnieaeteu, feichi ngülam pengeli Jehová tañi raquiduamqueel. Ngüneduamfiliyiñ fillque nütram Biblia meu, quimaiñ Jehová ñi raquiduamqueel. Fei tüfa quelluaiñmu taiñ cüme dullial ca ayühulafiyiñ ta Jehová.

2. Petu tami dullinon, ¿chem dungu mu raquiduamaimi?

Biblia feipi: “Ti adümuhun-ngelu cüme raquiduamquei tañi chem chumal” (Proverbios 14:15). Felei llemai, petu taiñ dullinon cüme raquiduamaiñ chem taiñ chumafel. Petu raquiduamülmi tami chem chumal, ramtuunge: “¿Chem ngülam Biblia meu quelluafeneu? Dullifili tüfa, ¿chum duamelaeneu? Caquelu che cai, ¿cüme duampeai mai tañi dulliel meu? Tañi dulliel, ¿ayühulpeafui mai ta Jehová?” (Deuteronomio 32:29).

Jehová deumaeiñmu, feimu ngen-ngei taiñ feipiaeteu chem ñi cümen ca chem ñi cümenon. Cüme quimfiliyiñ Jehová tañi ley dungu ca tañi fillque ngülam, doi eluucüleaiñ taiñ inayafiel. Tüfa quelluqueiñmu taiñ cüme raquiduam nieal. Cüme raquiduam nieliyiñ, quimaiñ chem ñi cümen ca chem ñi cümenon (Romanos 2:14, 15). Fei tüfa quelluaiñmu taiñ cüme dullial.

DOI QUIMAIMI

3. Eluunge tami adnieaeteu Biblia

VIDEO: Eluunge tami adnieaeteu Biblia ñi ngülam (5:54)

• Jehová, ¿chem elueiñmu taiñ femal quisuque ta iñchiñ?

• Jehová, ¿chumngelu (chemu) elueiñmu taiñ dullial caque quisuque iñchiñ chem taiñ chumal?

• Jehová, ¿chumngechi quelluqueiñmu taiñ cüme dullial?

Taiñ quimal quiñe ngülam tripalu Biblia meu, papeltuaiñ Filipenses 1:10. Ca ngüneduamaiñ tüfachi cüla ramtun:

• Tüfachi troquiñ Biblia, ¿chumngechi quelluafeimu tami papeltuafiel Biblia fill antü?

• Pu füta, pu domo, pu chau, pu ñuque, pu fotüm, pu ñahue, ¿chumngechi quelluafeyu tüfachi troquiñ Biblia ñi doi cüme chengeal engün?

• Tüfachi troquiñ Biblia, ¿chumngechi quelluafeimu tami doi eluucüleal tami trahuluhual?

4. Eluunge tami quimal chem ñi cümen ca chem ñi cümenon

VIDEO: Niemün cüme raquiduam (5:13)

• Taiñ lamngen, ¿chumi ñi cüme raquiduam nieal ca ayühulafiel ta Jehová?

Quimnolmi chumal, ¿chumngelu ramtulayafimi caquelu che chem tami dullial? Papeltuaiñ Hebreos 5:14, ca ngüneduamaiñ tüfachi epu ramtun:

• ‘Feipien chem tañi chumal’ piafuiñ ta quiñe che, huelu ¿chumngelu falin-ngei taiñ quisutu dullial chem taiñ chumal?

• Taiñ quimal chem ñi cümen ca chem ñi cümenon, femngechi taiñ cüme dullial ¿chem quelluafeiñmu?

5. Yamnieafiyiñ caquelu che ñi dulliel

Com iñchiñ trürngelaiñ, feimu caquerumeafui taiñ dulliel. ¿Chumngechi pengelafuiñ taiñ yamniequefiel caquelu che ñi dulliel? Raquiduamnge tüfachi epu dungu meu:

1: Quiñe lamngen ayüquelu ñi tucuhual maquillaje huiñamtuhui quiñe hue trahunche mu. Üyeu pu lamngen tucuuquelaingün maquillaje ca huesa duamelqueyu engün pefiel mu caquelu domo tucuuquelu maquillaje.

Papeltuaiñ Romanos 15:1 ca 1 Corintios 10:23, 24, fei ngüneduamaiñ tüfachi epu ramtun:

• Ñi feipin mu tüfachi troquiñ Biblia, taiñ lamngen ¿chem dulliafui tañi femal? Eimi cümelu troquifilmi femal quiñe dungu, huelu cangelu che huesa troquifile, ¿chem chumafuimi eimi?

2: Quiñe peñi quimniei tati Biblia condenaquelai pulcutual, huelu dulli putunoal chem pulcu no rume. Fei quiñe antü trahuluhui caquelu pu peñi ca lamngen meu ca quisu engün pichiquen pulcutuingün.

Papeltuaiñ Eclesiastés 7:16 ca Romanos 14:1, 10, fei ngüneduamaiñ tüfachi epu ramtun:

• Ñi feipin mu tüfachi troquiñ Biblia, taiñ peñi ¿chem dulliafui tañi femal? Pefilmi quiñe peñi cam lamngen femmequelu quiñe dungu cümelu tañi troquifiel, huelu eimi cümelu troquiquelafimi ¿chem chumafuimi?

¿Chumafuimi tami cüme dullial?

1. Ngillatun meu “quelluen tañi cüme dullial” piafuimi ta Jehová (Santiago 1:5).

2. Ngüneduamnge chem pilen Biblia ca taiñ fillque papel ca video tami quimal chem tami chumal. Cafei nütramcayafuimi pu peñi ca pu lamngen cüme hueniyefilu ta Jehová.

3. Raquiduamnge: “Dullifili tüfachi dungu, ¿chum duamcüleafun? ¿Chum duamelafun ta caquelu che?”.

TAMI QUIMEL

Petu taiñ dullinon, cüme raquiduamaiñ chem ñi raquiduamqueel Jehová ca chumngechi duamelafuiñ ta caquelu pu che, femngechi cüme dulliaiñ llemai.

¿Chem piafuimi?

• ¿Chumngechi ayühulafuimi ta Jehová tami dullin meu?

• ¿Chumafuimi tami quimal chem ñi cümen ca chem ñi cümenon?

• ¿Chumngechi pengelafuimi tami yamniefiel caquelu pu che ñi dulliel?

CA PEAFUIMI

Tami dulliel meu, ¿chumngechi doi cüme hueniyeafuimi ta Jehová?

“Tami dullin meu püramyengepe ta Jehová” (Ti Huerquen 15 abril, 2011)

Doi quimürpunge chumngechi ngülamtuqueiñmu Jehová.

Jehová adniefi tañi troquiñche (9:50)

Inaduamnge chem quellueyu quiñe huentru ñi cüme dullin.

Jehová eluqueiñmu re cümeque dungu (5:46)

Biblia meu mülenole quiñe ley feipilelu chem tami chumal, ¿chumafuimi tami ayühulafiel ta Jehová tami dulliel meu?

“¿Chumafuiñ mülenole quiñe huercün dungu Biblia meu?” (Ti Huerquen 1 diciembre, 2003)