¿Chumngechi pengelafuiñ taiñ quelluntucuquefiel Ngünechen tañi Gobierno müten?

Jesús feipifi tañi pu inaniequeteu: “Mapu mülechi pu che reque femngelaimün” (Juan 15:19). Feimu hueichaquelaingün ca coneltuquelaingün politica dungu meu. Huelu yenieal femngechi mongen cüdaungeafui ca quiñeque mu ayentungeafuiñ. Fei, ¿chem quelluafeiñmu taiñ nor piuqueyeafiel ta Jehová ca connoal politica dungu meu?

1. Iñchiñ taiñ cristianongen, ¿chem raquiduamqueiñ pu gobierno meu?

Taiñ cristianongen mu yamniequefiyiñ tati pu gobierno. Feimu Jesús feipi: “Elufimün ti Lonco Ülmen quisu ñi coneltuel”. Feimu iñchiñ eluucüleiñ taiñ inanieal tati fillque ley ñi elcünuel pu gobierno, tüfa mu coneltulei cullial impuesto (Marcos 12:17). Biblia quimeltuquei com tati pu autoridad Jehová ñi duam mu mülei (Romanos 13:1). Feimu quimnieiñ pu autoridad ñi doicülenon ta Ngünechen meu. Iñchiñ fente maneluucüleiñ Chau Ngünechen tañi Gobierno cüme elcünutuafi com huesaque dungu Mapu meu.

2. ¿Chumngechi pengelqueiñ taiñ coneltuquenon politico dungu meu?

Jesús reque iñchiñ conquelaiñ politica dungu meu. Tati pu che pefilu quiñe afmatun dungu ñi femün ta Jesús, ayüfuingün ñi reycünuafiel, huelu Jesús catrütueyu engün, ¿chumngelua cai? (Juan 6:15). Quisu feipi: “Iñche ñi ngünenietuafiel mapu trürlayai mapu müleyechi gobierno reque” (Juan 18:36). Fillque dungu femqueiñ taiñ reyüconnoal politica dungu meu, femngechi inayentuquefiyiñ ta Jesús, feimu conquelaiñ hueichan cam aucan meu (papeltuaimi Miqueas 4:3). Cafei iñchiñ püramyequelafiyiñ fillque chemcün elcünulu pu autoridad ñi püramyengeal, tati bandera reque, huelu yamniequefiyiñ müten (1 Juan 5:21). Ca femngechi inaquelaiñ quiñe troquiñ politico no rume ca quelluntucuquelafiyiñ quiñe che no rume ñi loncocünungeal. Femliyiñ com tüfachi dungu, pengelaiñ taiñ doyümniefiel Ngünechen tañi Gobierno.

DOI QUIMAIMI

3. Pu rüfngechi cristiano reyüconquelai politica cam hueichan meu

Jesús ca tañi pu inaniequeteu reyüconlaingün politica dungu meu. Papeltuaiñ Romanos 13:1, 5-7 ca 1 Pedro 2:13, 14. Fei, peaiñ ti VIDEO ca ngüneduamaiñ tüfachi epu ramtun.

VIDEO: Pu rüfngechi cristiano coneltuquelai ti Mapu müleyechi dungu meu (troquiñ 1) (4:28)

• ¿Chumngelu mülei taiñ yamnieafiel ti autoridad elcünungelu?

• ¿Chem dungu meu pengelafuiñ taiñ yamniequefiel pu autoridad?

Quiñeque mu epu pais quehuatumequelu, caquelu pais feipiqueingün: “Iñchiñ chumconlaiñ feichi hueichan meu”, huelu fillque dungu femqueingün ñi quelluafiel tañi hueichamequen meu engu, fei ¿rüfngepei mai tañi reyüconquenon engün? Papeltuaiñ Juan 17:16. Fei, peaiñ ti VIDEO ca ngüneduamaiñ tüfachi ramtun.

VIDEO: Pu rüfngechi cristiano coneltuquelai ti Mapu müleyechi dungu meu (troquiñ 2) (3:11)

• ¿Chumqueingün pu che rüf reyüconquenolu politica cam hueichan meu?

Quiñeque mu pu gobierno feipieliyiñmu taiñ femal quiñe dungu ñi ayüquenoel ta Chau Ngünechen, ¿chem chumafuiñ? Papeltuaiñ Hechos 5:28, 29. Fei, peaiñ ti VIDEO ca ngüneduamaiñ tüfachi epu ramtun.

VIDEO: Pu rüfngechi cristiano coneltuquelai ti Mapu müleyechi dungu meu (troquiñ 3) (1:18)

• Ñi feipin pu gobierno hueluule Ngünechen tañi feipin meu, ¿chuchi am inayafiyiñ?

• ¿Chem dungu meu tati pu cristiano inalayafui tati pu autoridad ñi feipin? ¿Chem raquiduamqueimi?

4. Cuñiutucuafiyiñ taiñ raquiduam ca taiñ femquen

Papeltuaiñ 1 Juan 5:21. Fei, peaiñ ti VIDEO ca ngüneduamaiñ tüfachi epu ramtun.

VIDEO: Pu rüf kristianongen, ¿chumngelu duamnieiñ fütra piwkekünuwal?: Taiñ kon-noal politiko dungu mu (2:49)

• Taiñ peñi, ¿chumngelu eluulai ñi conal fillque dungu mu nüucülelu politica dungu meu?

• ¿Cüme dullipei mai? ¿Chem pimi cai?

¿Ca chem dungu meu cüdautuafuiñ taiñ reyüconnoal politica dungu meu? Peaiñ ti VIDEO, ca ngüneduamaiñ tüfachi cüla ramtun.

VIDEO: ¿Chem quimeltuqueiñmu Ti Huerquen? Reyüconlayaiñ Mapu meu müleyechi dungu (5:16)

• Pefiliyiñ fütraque torneo cheu ñi aucantuquen fillque troquiñ mapu, ¿chumngechi pengelafuiñ taiñ doyümniefiel Chau Dios ñi Gobierno müten?

• Ñi dulliel pu politico cümelcaeliyiñmu cam huesalcaeliyiñmu, ¿chumngechi pengelafuiñ taiñ reyüconquenon politica dungu meu?

• Inanieliyiñ fillque noticia nütramcalu politica meu cam trahuluuliyiñ feichi pu che mu ayüquelu ñi nütramcayal politica mu, ¿chumngechi huesalcayafeiñmu?

TAMI QUIMEL

Iñchiñ pu cristiano taiñ feipin, raquiduam ca femquen meu pengelqueiñ taiñ reyüconquenon politica dungu meu.

¿Chem piafuimi?

• ¿Tunte puuquei taiñ yamniefiel pu gobierno?

• ¿Chumngelu reyüconquelaiñ politica dungu meu?

• ¿Chem dungu meu cüdautuafuiñ taiñ doyümnieafiel Chau Ngünechen tañi Gobierno müten?

CA PEAFUIMI

¿Chem dungu mülei taiñ femal taiñ connoal politica dungu meu?

Jehová turpu quisucünuquelaeiñmeu (3:14)

Pu familia, ¿chumngechi pepicahuafui ñi doyümnieafiel ta Jehová chem dungu rupale rume?

Chew rume müleliyiñ, kelluntukuaiñ Chaw Dios ñi Gobierno mew (4:25)

Fentren che feipiquei: ‘Incañpeafiel tami pais doi yamün-ngei caquelu dungu meu’, huelu ¿rüfngepei mai tüfa?

“Chau Ngünechen com pepilniei” (5:19)

Taiñ cüdau meu, ¿chumngechi pengelafuiñ taiñ inayentuquenofiel Mapu mülechi pu che?

“Caque quiñeque che fempe quisu tañi dungu” (Ti Huerquen 15 marzo, 2006)

Com pu cristiano tañi feyentuniefiel mu ta Jehová caiñetungeaingün ca inacangeafuingün cütu. Huelu, ¿llicalepeafuiñ mai?

1. ¿Chumngelu (chemu) quimnieiñ taiñ caiñetungeal?

Biblia feipi: “Caiñetungeai com pu inaniefilu ta Cristo Jesús ayünielu ñi püramyeafiel ta Chau Dios tañi mongen meu” (2 Timoteo 3:12). Jesús reyüconlai tüfachi Mapu mu ñi ngünenieteu Huecüfü, feimu caiñetungei ca inacangei. Iñchiñ inayentufiyiñ ta Jesús, feimu quimnieiñ pu gobierno ca fillque religion taiñ caiñetuaeteu (Juan 15:18, 19).

2. ¿Chumngechi pepicahuafuiñ taiñ chaftuafiel caiñetun dungu?

Mülei taiñ doi maneluhual Jehová mu, ¿chumngechi femafuiñ? Fill antü elcünuaiñ tiempo taiñ ngillatuafiel ta Jehová ca papeltuafiel Biblia. Cafei fentecünulayaiñ taiñ trahuluhual. Femngechi femliyiñ, caiñetueliyiñmu rume taiñ pu che maneluucüleaiñ Jehová meu ca chaftuafuiñ chem caiñetun dungu rume. Ti apostol Pablo fillque rupa caiñetungequefui, huelu feipi: “Chau Jehová quelluqueneu. Llicalayan” (Hebreos 13:6).

Amuldungucheal ca quelluafeiñmu taiñ fütra piuquecünuhual, doi maneluucüleal Jehová mu ca taiñ llicanoafiel tati pu che (Proverbios 29:25). Com nehuen meu amuldungucheliyiñ feula, doi pepicaucüleaiñ taiñ amuldunguleal catrütueliyiñmu pu gobierno (1 Tesalonicenses 2:2).

3. ¿Chumngechi cümelcangeaiñ püntüunoliyiñ Jehová mu?

Inei no rume ayüquelai tañi caiñetungeal, huelu hueutripan mu caiñetun dungu meu doi maneluucülerpuiñ Jehová mu. Quiñeque mu rupan mu huesaque dungu meu, iñchiñ taiñ nehuen meu hueutripalayafuiñ, huelu Jehová eluucülei taiñ quelluaeteu, feimu doi fülmaucülelu Jehová mu troquiuqueiñ (papeltuaimi Santiago 1:2-4). Jehová müna hueñancüquei caiñetungen mu tañi pu che, huelu müna ayüuquei taiñ afeluuquenon mu. Biblia feipi: “Cutrancahulmün tamün cümeque femün meu, Chau Ngünechen rume ayüquei tamün nehuentulen” (1 Pedro 2:20). Püntüunoliyiñ Jehová mu, quisu eluaiñmu rumel mongen cümelcaletule ta Mapu. Feiti mu com pu che poyeafi ta Jehová ca inei no rume caiñetulayaeyu (Mateo 24:13).

DOI QUIMAIMI

4. Caiñetuelmu rume tami pu che, eimi yafüluucüleafuimi

Jesús feipi quisu taiñ pu che cütu caiñetuafeiñmu taiñ poyefiel mu ta Jehová. Papeltuaiñ Mateo 10:34-36, ca ngüneduamaiñ tüfachi ramtun:

• Quiñe che eluule ñi poyeafiel ta Jehová, ¿chem chumafui tañi familia?

VIDEO: Jehová ta quisucünulaeyumeu (5:13)

• Quiñe tami pu che cam hueni ngüchaltucuelmu tami poyehuenoafiel ta Jehová, ¿chumafuimi?

Papeltuaiñ Salmo 27:10 ca Marcos 10:29, 30, fei ngüneduamaiñ tüfachi ramtun:

• Ñi feipin tüfachi troquiñ Biblia, ¿chumngechi quelluafeimu caiñetuelmu tami pu che cam tami pu hueni?

5. Caiñetungeliyiñ rume, amuleai taiñ poyeniefiel ta Jehová

VIDEO: Caiñetungelu rume, fütra piuquecünuhuingün (6:27)

• ¿Chem dungu tami peel ti video meu quelluafeimu tami fütra piuquecünuhual?

Papeltuaiñ Hechos 5:27-29 ca Hebreos 10:24, 25, fei ngüneduamaiñ tüfachi ramtun:

• Pu autoridad catrütueliyiñmu taiñ amuldungual ca trahuluhual, ¿chumngelu fentecünulayaiñ taiñ poyeniefiel ta Jehová?

6. Jehová quelluaimu tami nehuentuleal

VIDEO: Jehová yafültucuaeneu (3:41)

• Pu peñi ca lamngen tripalu ti video, ¿chem quellueyu ñi hueutripayal caiñetun dungu meu?

Papeltuaiñ Romanos 8:35, 37-39 ca Filipenses 4:13, fei ngüneduamaiñ tüfachi ramtun:

• Ñi feipin mu Biblia, ¿chumngelu maneluucüleafuimi tami hueutripayal chem rupalmi rume?

Papeltuaiñ Mateo 5:10-12, fei ngüneduamaiñ tüfachi ramtun:

• Inacangelmi rume, ¿chumngelu ca ayüucüleafuimi?

TAMI QUIMEL

Jehová rume falintuniequefi tati pu che ñi poyenieteu caiñetungelu rume engün. Jehová ñi quellun meu hueutripayaiñ chem caiñetun dungu mu rume.

¿Chem piafuimi?

• Pu cristiano, ¿chumngelu quimnieingün tañi caiñetungeal?

• ¿Chumngechi pepicahuafuimi feula tami chaftual caiñetun dungu?

• ¿Chumngelu maneluucüleimi tami hueutripayal caiñetun dungu meu?

CA PEAFUIMI

Pefinge chumngechi Jehová quellufi quiñe hueche huentru carceltucungelu tañi connon mu servicio militar.

Afeluulayaiñ caiñetungeliyiñ rume (2:34)

Quiñe curehuen rupalu rume caiñetun dungu mu, fentecünulai tañi poyefiel ta Jehová. Inaduamnge chem quellueyu.

Cüdaungechi dungu mu rupalu rume, poyefiyiñ ta Jehová (7:11)

Ngüneduamnge chumngechi pepicahuafuimi tami chaftual caiñetun dungu.

“Pepikawaiñ fewla taiñ chaftuafiel ti kayñetun dungu” (Ti Huerquen julio, 2019)

Caiñetueliyiñmu taiñ pu che, ¿chem mülei taiñ quimal? Ca ¿chumafuiñ taiñ cüme yeucüleal taiñ familia iñchiñ ca nor piuqueyeafiel ta Jehová?

“Ti rüf dungu ñi duam mu mülekey kayñetuwün” (Ti Huerquen octubre, 2017)