Caque raquiduam niei tati pu che ti putun dungu meu. Quiñeque che, quiñeque mu müten pulcutuqueingün mülen mu tañi hueni engu. Ca quiñeque pichi concaltucuquelaingün rume. Huelu ca mülei tati pu che ngollicauquelu. ¿Chem nütramcai tati Biblia putun dungu meu? Peafiyiñ.

1. ¿Cümepelai mai pulcutual?

Biblia feipilai ñi cümenon pulcutual. Doi mai, Ngünechen eli tati pulcu taiñ ayühulmapiuqueeteu (Salmo 104:14, 15). Ca Biblia meu tripai fentren huentru ca domo poyequefilu ta Jehová putuquelu (1 Timoteo 5:23).

2. ¿Chem ngülam huli ti Biblia putun dungu meu?

Jehová ayüquelai pu ngollicauquelu ca pu rume putuquelu (Gálatas 5:21). Feimu Biblia feipi: “Reyüconquilnge tati pu rume putuquelu pulcu” (Proverbios 23:20). Feimu cuñiutucuucüleaiñ taiñ putun meu, femnoliyiñ ngüneniehuelayafuiñ taiñ feipin ca taiñ femün, cüme raquiduamürpulayafuiñ ca tremolehuelayafuiñ. Feimu quisuleliyiñ cam müleliyiñ caquelu che meu, rume putulayaiñ. Fei pepi ngüneunoliyiñ taiñ putun meu, doi cümeafui taiñ putuhuenoal.

3. ¿Chumngechi pengelafuiñ taiñ yamniefiel caquelu pu che ñi dulliel?

Quisuque ta iñchiñ dulliafuiñ taiñ putual cam putunoal. Feimu huesa troquilayafiyiñ tati pu che putuquelu quim ngüneniehun meu ca inei no rume dicümlayafiyiñ ñi putual (Romanos 14:10). Cafei eluhuafuiñ taiñ putunoal, femngechi taiñ huesa duamelnoafiel ta caquelu che (papeltuaimi Romanos 14:21). Iñchiñ ayüquelaiñ taiñ “quisu duamuhual müten, doi mai caquelu che ñi cüme feleal” (papeltuaimi 1 Corintios 10:23, 24).

DOI QUIMAIMI

4. Dullinge tami putual cam putunoal

Jesús, ¿chem raquiduamquefui pulcutun meu? Taiñ quimal ti huiñoldungun, peaiñ tati hunen afmatun dungu ñi femün ta Jesús. Papeltuaiñ Juan 2:1-11, ca ngüneduamaiñ tüfachi epu ramtun:

• Ñi feipin tüfachi troquiñ Biblia, Jesús ¿chem raquiduamquefui tati pulcu meu ca tati pu che pulcutuquelu?

• Jesús huesa troquiquelafui tati pu che putuquefulu, fei fantepu mu quiñe che cüpa pulcutule ¿chumngechi troquiafiyiñ?

¡Felei llemai! Pu cristiano putuafuingün, huelu quiñeque mu doi cümeafui tañi ngünehual. Papeltuaiñ Proverbios 22:3, ca ngüneduamaiñ ñi cümepen mai putual inalechi cayu dungu meu:

• Petu amulniefilmi quiñe auto.

• Niepüñeñcülelmi.

• Ti doctor feipielimu tami putunoal.

• Ngüneunolmi tunte tami pulcutual.

• Tati ley eluñmanoelimu tami pulcutual.

• Mülelmi quiñe che engu cuifi meu ngollifengefulu.

¿Cümepeafui mai ñi müleal pulcu mafün mu cam caquelu fiesta meu? Taiñ quimal falinque ngülam tüfachi dungu meu, peaiñ ti VIDEO.

VIDEO: ¿Mülepeafui mai pulcu tañi fiesta meu? (2:41)

Papeltuaiñ Romanos 13:13 ca 1 Corintios 10:31, 32, fei ngüneduamaiñ tüfachi ramtun:

• Chi ngülam tripalu tüfachi puque troquiñ Biblia meu, ¿chumngechi quelluafeimu tami ayühulafiel ta Jehová tami dullin meu?

5. Cüme raquiduamnge tunte tami putual

Eluhulmi tami putual, raquiduamtucunienge: Jehová huesa troquiquelafi tami putual, huelu mai huesa troquifi rume putual, ¿chumngelu cai? Papeltuaiñ Oseas 4:11, 18, ca ngüneduamaiñ tüfachi ramtun:

• Quiñe che rume putule, ¿chem rupayafui?

¿Chem quelluafeiñmu taiñ rume putunoal? Mülei taiñ cüme quimtucunieal tunte putuafuiñ. Papeltuaiñ Proverbios 11:2, ca ngüneduamaiñ tüfachi ramtun:

• ¿Chumngelu cümeafui tami quimtucunieal tunte tami putual?

6. Ngünencaquenoelmu ti pulcu

VIDEO: ‘Üderpun tañi mongen ñi yeniekefel’ (6:32)

• Dmitry ngollin meu, ¿chem femquefui?

• ¿Pürüm müten elcünupei mai tañi pulcutun?

• ¿Chem quellueyu tañi putuhuenoal?

Papeltuaiñ 1 Corintios 6:10, 11, ca ngüneduamaiñ tüfachi epu ramtun:

• ¿Rüf huesa dungu pemai ngollicahual? ¿Chumngelu cai?

• Quiñe che ngollifengele, ¿chumngelu maneluucüleafuiñ ñi putuhuenoal?

Papeltuaiñ Mateo 5:30, ca ngüneduamaiñ tüfachi ramtun:

• Jesús feipilu catrünentual taiñ cuhu, cüpa quimeltui ñi duamfalngen doi nehuentuleal taiñ ayühulafiel ta Jehová. Fei eimi cüdautulmi tami famentuafiel ti pulcu, ¿chem chumafuimi?a

Papeltuaiñ 1 Corintios 15:33, ca ngüneduamaiñ tüfachi ramtun:

• Trahuluhulmi feichi pu che meu ayüquelu tañi fütra putual, ¿chem yeafeimu tami femal?

TAMI QUIMEL

Jehová elcünui ti pulcu taiñ ayühulaeteu, huelu quisu ayüquelai taiñ ngollicahual ca fütra putual.

¿Chem piafuimi?

• ¿Chem pilei Biblia putun dungu meu?

• Fütra putuliyiñ, ¿chem rupayafuiñ taiñ mongen meu?

• ¿Chumngechi yamnieafuiñ caquelu pu che ñi dulliel putun dungu meu?

CA PEAFUIMI

Pu huechequeche, ¿chem quelluafeyu ñi cüme dullial putun dungu meu?

Yehuentucuqueelmu ti pulcu (2:31)

Pepi ngünenieunolmi pulcutun dungu meu, ¿chem quelluafeimu?

“¿Chumafuimi tami ngünenienoaeteu ti putun dungu?” (Ti Huerquen 1 enero, 2010)

¿Cümepei mai pu cristiano ñi brindayal?

“Pu papeltuquelu ñi ramtuqueel” (Ti Huerquen 15 febrero, 2007)

¿Ayüafuimi quimal chumngechi quiñe huentru elcünutui tañi putun? Pefinge ti nütram feipilu: “Tuduamquelafui tañi putun”.

“Ti Biblia cüme elcünutueyu ñi mongen” (Ti Huerquen 1 mayo, 2012)

Com iñchiñ caquerumequei chumngechi taiñ tucutuuquen. Inanieliyiñ quiñeque ngülam Biblia meu, tucutuhuafuiñ chumngechi ayüqueiñ ca ayühulafuiñ ta Jehová. Peafiyiñ chem taiñ ngülamtueteu Biblia.

1. ¿Chem ngülam Biblia meu quelluafeiñmu taiñ cüme tucutuhual?

Biblia feipi pu cristiano mülei ñi cüme tucutuucüleal ca tañi tucutuhun meu mülei ñi quimfalngeal “ñi mallmangenon ca ñi nien cüme raquiduam”. Cafei mülei ñi lifquiyahual, femngechi pengelai ñi poyeniefiel ta Chau Ngünechen (1 Timoteo 2:9, 10). Ngüneduamaiñ meli cümeque ngülam taiñ elueteu Biblia: 1) Ti Biblia feipilei ti pu cristiano “cüme tucutuucülepe”. Tati trahunche meu taiñ pu peñi ca lamngen tañi tacun meu ca chumngechi tañi cupiluucülen pengelqueingün ñi poyeniefiel ta Jehová. 2) Biblia ca feipi “quimfalngepe tañi mallmangenon”. ¿Chem pilei ta tüfa? Cuñiutucuucüleaiñ taiñ raquiduamelnoafiel pu che cudumuhun dungu meu taiñ tacun mu cam tañi illutungenoal. Cafei mallmangelayaiñ taiñ tucutuhun meu. 3) Biblia ca ngülamtuqueiñmu taiñ ‘nieal cüme raquiduam’. ¿Chumngechi pengelafuiñ taiñ cüme raquiduamcülen? Fachantü tati pu che caquecünuumequei chumngechi tañi tucutuumequen, huelu iñchiñ inayentuquelafiyiñ. 4) Taiñ tucutuhun meu mülei ñi quimfalngeal taiñ poyeniefiel ta Chau Dios (1 Corintios 10:31).

2. Dulliliyiñ taiñ tucutuhual, ¿chumngelu raquiduamaiñ taiñ chafche meu?

Caque quiñeque iñchiñ dulliafuiñ chumngechi taiñ tucutuhual. Huelu ca raquiduamaiñ chumngechi duamelafuiñ ta caquelu pu che. Femngechi inayentuquefiyiñ Biblia ñi ngülam feipilu: “Mülei taiñ duamtuafiel taiñ chafche, femngechi cümelcayafiyiñ cam nehuentucuafiyiñ” (papeltuaimi Romanos 15:1, 2).

3. Taiñ tucutuhun meu, ¿quelluafuiñ pu che ñi quimafiel Jehová?

Cheu rume miyauliyiñ, cuñiutucuhuaiñ chumngechi taiñ tucutuuquen. Huelu amun mu ta trahun cam amuldunguyauliyiñ, doi cuñiutucuuqueiñ. ¿Chumngelu cai? Iñchiñ ayüquelaiñ ti pu che ñi allcütunoal tati cümeque dungu taiñ tucutuhun meu, doi mai ayüqueiñ taiñ tacun meu ñi püramyengeal “ti quimeltun Chau Dios mu cüpalu” (Tito 2:10).

DOI QUIMAIMI

4. Cüme tucutuucüleliyiñ pengelaiñ taiñ yamniefiel ta Jehová

¿Chumngelu eluucülequeiñ taiñ cüme tucutuucüleal? Papeltuaiñ Salmo 47:2, ca ngüneduamaiñ tüfachi epu ramtun:

• Raquiduamliyiñ taiñ yenieel Jehová tañi üi, ¿chumngechi quelluqueiñmu taiñ cüme tucutuhual?

• Amun meu trahun cam amuldunguyaulu, ¿cümepeafui mai taiñ cüme raquiduamal chumngechi taiñ tucutuhual? ¿Chumngelu chi cai?

5. ¿Chem quelluaiñmu taiñ cüme tucutuhual?

Peaiñ ti VIDEO.

VIDEO: “Com femqueaimün Ngünechen tañi püramyengeal” (10:18)

Tunten faliafui rume taiñ tacun, huelu doi fali tañi lifcüleal ca ñi cüme adcüleal. Papeltuaiñ 1 Corintios 10:24 ca 1 Timoteo 2:9, 10, fei ngüneduamaiñ chumngelu tucutuuquelaiñ femngechi tacun meu:

• Huesalcalechi tacun ca lifcülenochi tacun.

• Tacun illulcachequelu ca tacun rume pünalelu ti cuerpu meu.

Tati pu cristiano inaquelafiyiñ tati ley ñi elungeel ta Moisés, huelu ngüneduamal tañi feipin quelluqueiñmu taiñ quimal Jehová tañi raquiduam. Papeltuaiñ Deuteronomio 22:5, ca ngüneduamaiñ tüfachi ramtun:

• ¿Chumngelu cümelai quiñe huentru tucutuhual quiñe domo reque cam quiñe domo tucutuhual quiñe huentru reque?

Papeltuaiñ 1 Corintios 10:32, 33 ca 1 Juan 2:15, 16, fei ngüneduamaiñ tüfachi cüla ramtun:

• ¿Chumngelu cuñiutucuucüleaiñ taiñ huesa duamelnoafiel taiñ tucutuhun meu tati pu che taiñ lof mu ca tati trahunche meu?

• Tami lof meu, ¿chumngechi tucutuuquei tati pu che?

• ¿Chem tacun pünengequeel tami lof meu cümelayafui tañi tucutuhual quiñe cristiano? ¿Chumngelu chi?

TAMI QUIMEL

Cüme tucutuuliyiñ, pengelaiñ taiñ yamniefiel tati pu che ca yamniefiel ta Jehová.

¿Chem piafuimi?

• ¿Chumngelu Jehová fente falintuquefi taiñ cüme tucutuhual?

• ¿Chem troquiñ Biblia quelluafeiñmu taiñ cüme tucutuhual?

• Taiñ tucutuhun meu, ¿chumngechi quelluafuiñ pu che ñi quimürpuafiel ta Jehová?

CA PEAFUIMI

Inaduamnge chem raquiduamelafuimi ta caquelu che tami tucutuhun meu.

“¿Chem pengeli tañi tucutuhun?” (Troquiñ internet mu)

¿Chumngelu duamfali cüme raquiduamal ñi cümepen mai nieal quiñe tatuaje?

“¿Chem pilei Biblia tatuaje meu?” (Troquiñ internet mu)

Ngüneduamnge caquelu ngülam tami cüme dullial.

“Tami tucutuhun meu, ¿püramyengepei mai ta Chau Ngünechen?” (Ti Huerquen septiembre, 2016)

¿Chumi quiñe domo tañi huesa duamcülenoal caquelu pu che ñi tucutuhun meu ca tañi yamnieafiel engün?

“Rume cüdautuquefun ñi adümal chem tucuhun ñi cümen” (¡Tami quimafel! 22 diciembre, 2003)