Feyti küme rumel mülewe mew, trürlayay tüfachi mapu mew taiñ mülel fachantü. Chaw Dio turpu pilafuy tüfachi mapu apoleal wedake dungu, kutrantun ka kutrankawün. Welu küpalechi antü mu, tüfachi mapu, re küme rumel mülewe mew ngetuay. ¿Chumgechi? Pefinge chem pin ta Biblia.

Kümeke che. Dio ñi pu weni müleay küme rumel mülewe mew. Feyengün welukentu dewmaluwayngün re kümeke dungu, ka mongeleayngün feyentuleal itrokom Jewba ñi nor dungu (Proverbios 2:21).

Fentren iyael. Tati küme rumel mülewe mu, iney rume ngüñütulayay. Biblia ta feypi: ‘Fentren iyael müleay tüfachi mapu mew’ (Salmo 72:16).

Kümeke ruka ka ayün küdaw. Tati küme rumel mülewe mapu mew, itrokom pu reñma nieayngün kidu ñi ruka, itrokom che nieay ayüwün küdaw (Isaías 65:21-23).

Tüngkülen kom mapu mew. Chumkawnorume ngewelayay nalün ta che ka lawelayay awkan mu. Dio ñi Dungu feypi: “[Dio] ta apümay awkan (weychan)” (Salmo 46:8, 9).

Kümelkalen. Biblia feypikünuy: “Iney no rume [tañi mülelu küme rumel mülewe mu] feypiay: ‘Iñche kutrankülen’” (Isaías 33:24). Kafey ngewelayay küntro, trawma, pilu ka ketro (Isaías 35:5, 6).

Ngewelayay weñankün, kutrantun ka lan. Dio ñi Dungu feypi: “Fey ngewelayay ta lan, ngüman no rume, eyütun no rume, kutrantun no rume. Itrokom tati mülekefulu am ta kuyfi dew ta mülewetunolu” (Apokalipsi 21:4).

Ngewelayay wedake che. Jewba feypikünuy: “Welu tati rume wedake che, katrünentunieayngün mapu mu; ka tati pu ngünenkakelu apümnieayngün ka anüntunieyngün mapu mew” (Proverbios 2:22).

Kom pu che piwkeyewayngün ka yamuwayngün. Ngewelayay nor dungunon, ngeñikawün, rume diñmangen, ka üdewün. Kom pu che kiñewküleayngün ka yeniayngün ñi mongen chem pin ta Dio ñi nor dungu (Isaías 26:9).

Kom wedake dungu ruparupangelu Mapu mu, pengelnieiñmu ta küme rumel mülewe mew tañi fülpan. Biblia feypi fütra kuyfi, taiñ peal pepilfalnochi dungu petu ñi küpanon küme rumel mülewe mu, ka feychi dungu rupalewyey, fewla peniefiyiñ. Tüfa ta kiñeke dungu tañi piel ta Biblia tañi rupayal:

Fütrake awkan (weychan). “Kiñe trokiñ mapu ta weychayalu kangelu trokiñ mapu engu ka fütra trokiñ mapu weychayay kangelu fütra trokiñ mapu engu.” (Matew 24:7.) Tüfachi piel tañi rupayal, rupalewyey. Feychi rupay 1914 tripantu mu, mülewyey epu fütrake awkan, epe kom mapu kewafuy, ka fentren kake pichike awkan mülekey. Rume fentren che lay feymu.

Fill kutran kom mapu puwi. Müleay “kutran fill mapu püle” (Luka 21:11). ¿Feley tachi dungu piel? Feley may. Tati cáncer, kutran piwke, tuberculosis, diabetes, sida ka itrofill kutran, langümi fentren che.

Fillaleay iyal. Kom mapu, müley che nienolu tañi duamniefel tañi iyal. Rume fentren che lakey fill tripantu ngüñün mu. Tüfa ta ka kiñe pengelün tañi fülpan küme rumel mülewe mu. Biblia feypi: “Müleay ta ngüñün” (Marku 13:8).

Fütrake Nüyün. “Müleay ta fütrake nüyün.” (Luka 21:11.) Tüfa ka rupay tüfachi antü mu. Feychi rupay 1914 tripantu mu amuley tañi lan fentren che tati fütrake nüyün mu.

Wedake che. Tati che “rume diñmatuafi engün ta pülata” ka “tati pu che kisutu kimkawünngeay”. “Kintuay engün ayüwungechi rupaleal tunte felefuy rume ñi müngeltuafiel engün ta Ngünechen [Chaw Dio]”. Pu yall “müngeltulayafi tañi fütakeche” (2 Timotew 3:1-5). ¿Eymi ka femgentulaymi, fentren femgechi che mülen fachantü? Yamlafi Chaw Dio engün ka wedalkamekefi tati küpa kimlu kidu mu.

Llükakelay chem pin ley ta che. Kafey “müleay fentren wesake dungu” (Matew 24:12). ¿Eymi ka pekeymi rupalechi tripantu, fentren che müley femnolu chem pin Ley? Kom püle, pu che kuñiwtuküley tañi weñengeal, ngünenkangeal kam wedalkangeal.

Kom tüfa pengeleyiñmu fülkülepan Dio ñi ngünenietual mapu. Biblia feypi: “Feychi pefilmün ñi rupan tüfachi wele dungu, kimaymün tañi fülkülepan ta Ngünechen [Dio] ñi longko ülmenngepayael [Dio ñi ngünenietual mapu]” (Luka 21:31). Welu, ¿chem anta Dio ñi ngünenietual mapu? Dio wenu mapu mülelu ngüneniealu tüfachi Mapu, küme rumel mülewe mew ngetualu. Dio welulnentuay kom che ñi ngüneniekelchi mapu (Daniel 2:44).

Jewba elulay wedake che apümkayal küme rumel mülewe mew. Feymew, müleay ñi re pu weni. ¿Chumay am tati wedake che? Kimal tati llowdungun, peayiñ chumgechi mongen niekefuy kiñe wentru, Noe pingekefuy. Noe mülekefuy fentren warangka tripantu mew kuyfi mu. Küme wentru em ka rumel trokituy femal, kom ñi newen, chumgechi pin ta Jewba. Welu kakelu pu che mülelu mapu mu feychi re wedake mongen yeniekefuyngün. Feymew, Jewba feypifi ta Noe, ta küpalal kiñe fütra mangiñ ko ta apümafiel itrokom wedake che. Ka werküfi tañi dewmayal kiñe fütra wampo ruka reke tañi lanoam kidu ka ñi reñma akualchi fütra mangiñ ko (Génesis 6:9-18).

Noe ka ñi pu reñma dewmay fütra wampo ruka. Noe kimelfi kom pu che tañi küpayal fütra mangiñ, welu iney rume allkütuñmalayu, amuley ñi wedalkameken engün. Noe dewmalu chi fütra wampo ruka, tukuy kom fentren kulliñ ka koni kidu ka tañi pu reñma. Fey wüla, Jewba küpali fütra mawün. Meli mari antü ka meli mari pun mawüni, feychi ko kom mangiñmay mapu (Génesis 7:7-12).

Kom wedake che lay, welu Noe ka tañi pu reñma montuyngün. Jewba montulfi engün kom mangiñ ko mew, elkünufi kiñe lif mapu mu ngenochi wedake dungu (Génesis 7:22, 23). Biblia feypi tañi ka akual antü, Jewba tañi apümafiel kom tachi pinolu femal kümeke nor dungu. Welu pu kümeke che apümgelayay, rumel mongeleayngün mapu mew, küme rumel mülewe mew ngetualu (2 Pedro 2:5, 6, 9).

Fachantü müley rume fentren che wedalkamekelu. Kom mapu apoley re fill wedake dungu. Jewba werküwerküyey tañi pu dungukelu iney ngen kidu, tañi kimelafiel tañi dungu kom pu che, welu fentren ayülay allkütual. Pilay ñi norümal ñi mongen engün ka pilayngün Dio ñi feypiatu chuchi tañi kümelkan ka chuchi tañi wedalkan. ¿Chumay am tüfachi pu che? ¿Norümpeayngün may ñi mongen kiñe antü? Fentren engün ta turpu norlay engün. Welu fülpay ta antü tañi kom wedake che, tañi rumel apümgeal (Salmo 92:7).

Mapu ta apümgelayay; feymu dewmangeay kiñe küme rumel mülewe. Kom tati weniyeafilu Dio, afnoachi mongen nieayngün ka müleayngün küme rumel mülewe Mapu mew (Salmo 37:29).