¿Cheu tuhui ti Noche de Brujas?

Biblia ñi quimeltuqueel

Biblia nütramcaquelai ti Noche de Brujas mu, Halloween ca pingequelu. Fill tripantu pu che femquei tüfachi fiesta 31 conchi octubre. Huelu fillque dungu femngequelu tüfa mu chaftuquefi ñi feipin Biblia.

Tüfachi troquiñ mu peaiñ:

• Noche de Brujas, ¿cheu tuhui ca chem femngequei?

• ¿Huesa dungu am celebrayal Noche de Brujas?

• Halloween, ¿chumngelu femngechi feipingequei?

Noche de Brujas, ¿cheu tuhui ca chem femngequei?

• Fiesta del “Final del Verano” (Samhain). Fei ti lifru Mitos celtas mu, Miranda Green huirintucui pu che ñi raquiduamquefel tüfachi fiesta mu femngequelu 2.000 tripantu cuifi mu: “Ti pu layechi che ñi püllü nampiyahuafui Mapu mu ca pu che amuafui cheu ñi mülen pu püllü”. Ca feipi: “Ñi femngequefel ti Fiesta del ‘Final del Verano’ petu femngequei famülque mu ti Noche de Brujas ca día de Todos los Santos mu” (peafuimi “Halloween, ¿chumngelu femngechi feipingequei?”).

• Fillque tacun ca feipingen mu “dulce o travesura”. Quiñe lifru feipi quiñeque cuifique che, celta pingelu, tucutuuquefui ñi femfaluhual pu huesaque püllü reque, femngechi ñi huesalcanoaeteu engün. Caquelu che eluquefui dulce ñi tüngduamelafiel pu püllü.a

  

  Edad Media Europa mapu mu, pu loncolechi catolico inanierpuingün fentren huimtun cristianongenolu, fei feipifi ñi pu inaniequeteu ñi tucutuhual fillque disfraz ca ñi rupayal fill ruca püle ñi elungeal pichique regalo.

• Pu calcu, püllü, vampiro, hombre lobo ca zombie. Tüfa afquentu troquingequei ñi fülconcülen pu huesaque püllü mu.

• Noche de Brujas mülechi calabaza. Edad Media Gran Bretaña mapu mu, pu che amuquefui “fill ruca püle ñi elungeal iyael, fei ñi ngillatuñmayafiel pu layelu”. Pu ngillatuquelu yeniequefui “pelontuhue deumangelu quiñe tucucan rabano reque cahushcangelu, tañi fela adentulefui ti am mülecalu purgatorio meu” (Halloween—From Pagan Ritual to Party Night). Cafei quiñeque che feipiquei feichi pelontuhue famentuquefui ti huesaque püllü. Fei 1800 tripantu püle, América del Norte mapu mu, ti rabano huelucünungei calabaza mu, tüfa am doi cüdaungelafui ñi nieal, cahushcangeal ca huidüngeal.

¿Huesa dungu am celebrayal Noche de Brujas?

Mai. Quiñeque che feipiquei: “Huesa dungu no celebrayal Halloween, pu che re cüme rupaquei müten”. Huelu ñi femngequeel tüfachi fiesta mu chaftuquefi ñi quimeltuqueel ta Biblia, ca nüucülei coilaque feyentun tati pu layelu mu ca pu huesaque püllü mu.

Tami quimal chem raquiduamquei Chau Dios ñi femngequeel Halloween mu, ngüneduamnge tüfachi feipin tripalu Biblia mu:

• “Ngelai ñi müleal eimi meu [...] inei no rume ramtuquelu tati rangiñelhuelelu ta pu huesaque püllü meu ca pu che engün meu, cam amuquelu quiñe pelontuchequelu meu, ca inei no rume ramtuquelu tati pu la” (Deuteronomio 18:10-12).

  ¿Chem quimeltueiñmu? Chau Dios ayüquelai taiñ ramtuafiel tati pu la, ca pu femfaluulu no rume.

• “Tati pu layelu chem dungu no rume quimhuetuquelaingün” (Eclesiastés 9:5).

  ¿Chem quimeltueiñmu? Pu layelu quimhuetuquelaingün, feimu fülmaucülelayafuingün pu mongelechi che mu.

• “Reyüconlayaimün pu huecüfü mu [...]. Ngelai tamün quiñentrür putual Chau Jehová ñi copa meu ca pu huecüfü ñi copa meu” (1 Corintios 10:20, 21).

  ¿Chem quimeltueiñmu? Pu ayüquelu ñi fülmaucüleal Chau Dios mu, mülei ñi famentuafiel chem dungu rume nüucülelu pu huesaque püllü mu.

• “Nehuentuleaimün tati Huecüfü ñi fillque ngünen mu. Iñchiñ hueichaquelaiñ pu che engün. Doi mai hueichaquefiyiñ [...] pu huecüfü” (Efesios 6:11, 12).

  ¿Chem quimeltueiñmu? Pu cristiano mülei ñi famentuafiel pu huesaque püllü, feimu fiestañmalayafuingün quisu engün mu.