¿Chem quimeltulayafeimu pu cientifico?

Pu cientifico, ¿rüf quimniepeingün mai chumngechi ñi mülerpun tati fütra huenu ca tati mongen? Quimlaingün llemai. Quiñeque che feipiquei pu cientifico ngüneduamquefilu ti fütra huenu, feipiafeiñmu chumngechi ñi mülerpun ta tüfa. Huelu quiñe cientifico Marcelo Gleiser pingelu, cüdauquelu tati universidad Dartmouth College mu feipi: “Petu quimlaiñ chumngechi ñi mülerpun ti fütra huenu”.

Ca femngechi quiñe revista Science News pingelu nütramcalu cheu ñi tuhun ta mongen feipi: “Epe com tati pu cura pengelafulu ñi rupan hue deumangelu ta Mapu ngehuetulaingün. Feimu rume cüdaungei taiñ quimal chumngechi ñi mülerpun ta mongen Mapu meu”. Felei llemai, tati pu cientifico petu adümlaingün chumngechi ñi mülerpun tati fütra huenu ca tati mongen.

Huelu eimi ramtuupelaimi chi, feipiliyiñ ñi deumangeel com ñi mülen Mapu meu, ¿inei am deumafi? Ca ramtuupeimi chi: “Feichi taiñ deumaeteu quim chengele ca piuqueyechefengele, ¿chumngelu eluñmaquei ñi sufrial pu che? ¿Chumngelu eli ñi caquerumeal chumngechi tañi poyenieteu tati pu che? Ca ¿chumngelu eluñmaquei ñi femal huesaque dungu feichi pu che feipiquelu tañi poyenieteu?”.

Pu cientifico pepi huiñoldungulayafuingün femngechi ramtun. Huelu fentren che quimürpuingün tüfachi falinque dungu Biblia meu, fei eimi ca femngechi quimürpuafuimi.

Cüpa quimülmi chumngelu quiñeque cientifico eluulu ñi chillcatual Biblia feula feyentuqueingün ñi mülen quiñe Ngünechen, amunge tati troquiñ feipilelu “Ñi feipingequeel tati mongen ñi tuhun mu” mülelu jw.org mu.