Kuyfike kristiano trawünche reke, famülke mew kullingekelay taiñ pu longkolelu, welu may elfalkünungey adümkechi longko ñi kamañnieafiel (inaduamnebel) “Ngünechen tañi trokiñche feyentulelu” (Hecho 20:28). Tüfachi pu wentru müna küme weniyefingün ta Jewba, ngüyülkeyngün ka kamañkefingün (inaduamkebingün) tati trawünche ‘nor küme rakiduam mew, chumngechi ñi ayünieel ta Ngünechen, tañi dikümtukuniengenon mu [ngüdalngenon mu], ka plata tañi duam no rume, welu küme duamkechi amulnieyngün tañi küdaw’ (1 Pedro 5:1-3). ¿Chem femkeyngün tati pu longkolelu kellungeal ta iñchiñ?

Kuñiwtukukeeiñmew ka inaduamkeeiñmew. Pu longkolelu ngüyülmekefi ti trawünche Biblia ñi dungu mu, ka kelluniefi ñi fülkonküleal Jewba mew. Kimnieyngün Ngünechen ñi eluetew tüfachi falin küdaw: inaduamafiel tañi pu che. Feymew eluwkelayngün ñi weda ngünenieafiel tati trawünche, welu may kellukefingün ñi küme feleal ka ñi ayüwküleal (2 Korintio 1:24). Kiñe wentru reke inaduamkefilu kiduke ñi ufisa kom piwke mew, ka femngechi pu longkolelu eluwingün ñi kimafiel kiduke che konlu Ngünechen ñi kechan ufisa mew (Proverbios 27:23).

Kimelelkeeiñmew taiñ femal Ngünechen ñi ayükeelchi dungu. Fill semana pu longkolelu ngendunguyngün chi trawün mu, taiñ yafültukuñmayaetew taiñ mupiltun (Hecho 15:32). Kafey tüfachi pu wentru küdawkelu kom ñi newen mu ngüyülkeyngün tati amuldungun, küdawkeyngün iñchiñ mu, ka pepikakeeiñmew ñi femal fill dungu mu konkelu tati amuldungun.

Kiduke iñchiñ yafültukukeeiñmew. Taiñ kellukeetew newenküleal taiñ küme weniwen-ngen Jewba iñchiñ, pu longkolelu pemekeeiñmu taiñ ruka mu, ka nütramkalelkeeiñmew Trawünwe Ruka mew. Kafey kellukeeiñmew ka yafültukukeeiñmew Biblia ñi dungu mu (Santiaw 5:14, 15).

Tüfachi pu peñi longkolelu trawünche mu, ka nieyngün kiduke ñi küdaw ka tañi pu che ñi kuñiwtukuafiel ka inaduamafiel engün. Feymu llemay müley taiñ yamnieafiel fente küdawkelu engün am (1 Tesalonisense 5:12, 13).

• ¿Chem küdaw nieyngün pu longkolelu trawünche mew?

• Pu longkolelu duamniekeeiñmew kiduke iñchiñ, ¿chumngechi pengelkeyngün tüfa?

Biblia ta feypi epu trokiñ wentru müley ñi kellual fill duam nielu ti trawünche: “tati longkolelu engün ka ti pu che kellukelu” (Filipense 1:1). Fillke trawünche mu müleyey tüfachi pu peñi. ¿Chem küdaw femkeyngün pu konakechi kellukelu taiñ kümelkayaetew?

Kellukefingün tati trokiñ longkolelu. Pu konakechi kellukelu, wechengele ka füchangele, müna küme weniyefingün ta Jewba, ka manelfal ka külfün-ngechi küdawfe ngeyngün. Fey engün ñi newen mu kam adümuwün mu, femmekeyngün fentren falinke küdaw ñi dewmamekekeel trawünche mew. Femngechi, pu longkolelu eluwkeyngün kidu tañi küdaw mu müten: kimeltual ka kamañyeal (inaduamal).

Falinke küdaw femkeyngün. Kiñeke konakechi kellukelu adkünucheyngün ka chalikefingün (mankulkebingün) tati pu che petu akulu Trawünwe Ruka mew. Kakelu adümkeyngün ti dunguwe ñi allkütual ta che, wülkeyngün fillke lifru tuwlu Biblia mu, trapümfingün ta plata wülngekelu, ka feypikeyngün tati pu peñi ka lamngen chew püle ñi amuldungual. Ka femngechi kellukeyngün ñi adkayafiel ti Trawünwe Ruka, ka kellufingün tati pu füchake che, pu longkolelu ñi adkünuel mew. Chem küdaw rume ñi elfalngeel, ayüwünkechi femkeyngün, feymu yamniengekeyngün (1 Timotew 3:13).

Ñi küme kristiano wentrungen wülingün kiñe küme inafalchi dungu. Pu konakechi kellukelu dullingeyngün (ngümintungeyngün) ñi küme kristianongen mu. Dungukelu engün tati trawün mew yafültukuñmaeiñmu taiñ mupiltun (mupin), ka tañi inafalchi femün amuldungun mew kellunieeiñmu taiñ doy ayüwünkechi amuldungual, ka ayüwkülen kellukelu engün doy tremkülerpuy taiñ ayüwün ka kiñewkülen trawünche mew (Efesio 4:16). Küpalechi antü mu, ka longkolelu ngerpuafuyngün.

• ¿Chem chengeyngün pu konakechi kellukelu?

• Pu konakechi kellukelu, ¿chumngechi kellukeyngün ti trawünche ñi küme amual?

Tati Griego Wirin Chillka fill rupa üytukefi ta Bernabe ka ti apostol Pablo ñi witran-ngepakechi longkolelu ngen engu, ka pemekefuyngu tati trawünche mülelu feychi antü mu. ¿Chem nengümkefeyew ñi femal tüfachi küdaw? Tañi rüf duamniefiel ñi küme feleal kom pu mülelu trawünche mu. Pablo feypi fente duamnieel ñi wiño pemeafiel tati pu peñi ka lamngen kimpual ñi chumlen engün. Fütra kamapu tuwün-ngelu rume tati pu peñi ka lamngen, amuy müten ñi yafültukuafiel (Hecho 15:36). Ka femngechi mu fachantü tati pu witran-ngepakechi longkolelu nengümkeeyew ñi femal tüfachi küdaw.

Küpayngün taiñ yafültukupayaetew. Pu witran-ngepakechi longkolelu pemekefi fentren trawünche epu rupa fillke tripantu mu, ka mülepukey kiñe semana kiduke trawünche mew. Nentuafuiñ fentren kimeltun tüfachi adümuwkechi wentru ka tañi domo engu, kurengele tüfa. Fey engün ayükey ñi kimafiel pu wechekeche ka füchakeche. Kafey müna ayüwingün amuldungual iñchiñ mu ka kiñewkülen pemeafiel tati pu chillkatukelu Biblia. Tati pu witran-ngepakechi longkolelu ka ti longkolelu trawünche mew pemekefingün tati pu peñi ka lamngen ñi ruka mew tañi yafültukuafiel; ka wewpikeyngün trawün mu ka fütra trawün mew taiñ yafültukuaetew (Hecho 15:35).

Duamniefingün kom pu che. Pu witran-ngepakechi longkolelu alüduamniey ñi kimal chumngechi amuley tati pu peñi ka lamngen tañi weniwen Jewba engu. Ka trawükey pu longkolelu ka pu konakechi kellukelu engün tañi ngüneduamal chum amulen tañi küdaw, ka elukefi kiñeke ngülam küme yenieal ñi femkeel engün. Kellukefingün tati pu wünelekelu amuldungun mu ñi doy küme femal tañi küdaw ñi küme tripayal, ka ayüwünkechi kimkefingün tati we akuchi che taiñ trawün mew küme amulelu tati rüf dungu mew. Tüfachi pu peñi kidu ñi ayün mu eluwkey, femngechi ‘kiñe kompañngeyngün’ taiñ kümelkaleal (2 Korintio 8:23). Feymu llemay müley taiñ inayentual tañi mupiltun ka tañi poyefiel Ngünechen (Ebrew 13:7).

• ¿Chumal am pemekefi tati trawünche pu witran-ngepakechi longkolelu?

• ¿Chumngechi kümelkayafeymu pu witran-ngepakechi longkolelu?

Rupale kiñe nüyün, mangiñ ko, fütrake kürüf ka chem kake dungu rume, pu Dungukelu Iney Ngen Jewba pepikawfemkeiñ ñi kellual ti küdaw mu taiñ pu peñi ka lamngen duamnielu. Tüfachi dungu mew pengelkeiñ taiñ rüf piwkeyewün (Juan 13:34, 35; 1 Juan 3:17, 18). ¿Chumngechi kellukeiñ?

Wülkeiñ plata. Kuyfi mu, rupalu kiñe fütra ngüñün Judea mapu mew, Jesu tañi pu inanieetew Antiokia waria mülekefulu werkülelfingün plata tañi pu peñi ka lamngen mülekefulu üyew (Hecho 11:27-30). Ka femngechi kimum inchiñ taiñ pu peñi ka lamngen kake mapu mülelu ñi rupameken wedake dungu, trapümkeiñ plata taiñ trawünche mew, fey yefalelkefiyiñ tañi kellungeal (2 Korintio 8:13-15).

Eluwkeiñ kelluafiel tati pu che. Tati pu longkolelu mülekelu tati lof rupamekelu feychi wedake dungu, pemekeyngün kom pu peñi ka lamngen konlu ñi trawünche mew tañi kümelkaleal. Kiñe kellukonkechi trokiñche pepikamekey ñi yeal iyael, ko ka takuwün, tañi lawenmangeal ka tañi umañngeal. Fentren adümkechi peñi ka lamngen kidu kullikeyngün ñi amual, fey kellukonkey ti küdaw mew ñi küme elngetual tati pu ruka ka tati Trawünwe Ruka. Kiñewkülelu am inchiñ ka kiñentrür küdawün mu, matukawkechi pepikawkeiñ taiñ amual duamniengele chem dungu rume. Kellukefiyiñ “taiñ pu peñi ka lamngen feyentulelu [mupitulelu] ta Cristo mew”, kafey pepi femngele, kellukefiyiñ ta che kake religion nielu kütu (Galata 6:10).

Biblia mu yafültukukeiñ ta che ka kellukeiñ tati kutrantupiwkelelu. Feychi che mongentripalu kiñe fütra weda dungu mu doy duamniey tañi yafültukungeal. Feymew Jewba, “taiñ yafülkeetew,” elukeeyew newen (2 Korintio 1:3, 4). Fey llemay pengelelkefiyiñ tati pu kutrantupiwkelelu Biblia ñi feypikünuelchi dungu, rüf feypikelu may ta Ngünechen ñi Ngünenien müchay müten apümafi kom tüfachi wedake dungu küpal-lu eyutun ka kutrankawün (Apokalipsi 21:4).

• Rupalu kiñe weda dungu, ¿chumngelu am (chemu) tati pu Dungukelu Iney Ngen Jewba matukawkeiñ kellual?

• ¿Chem yafüluwün elukefiyiñ tati pu che kiñe fütra weda dungu mu rupalu?

Epe puwlu ñi layal, Jesu ka kiñeke ñi pu apostol engün, Pedro, Santiaw, Juan ka Andre, kidu nütramkayngün. Feypikünuy chem tañi rupayal, femngechi kimngeal kidu tañi mülen epe puwkülele ñi afael ta antü, fey kiñe falin ramtun nentuy: “Rüfkünu may, ¿iney am tachi kim manelfal kona tati ülmen wentru ñi elfalkünuetew tañi kakelu kona mew, femngechi tañi eluafiel ñi iyael engün puwchi antü mu?” (Matew 24:3, 45, TNM; Marku 13:3, 4). Jesu iyael nütram mu dungulay, welu may tati kimün Ngünechen mew iyael reke trürümfi. Jesu tañi ülmen wentrungen mu, rüf feypikünuy ñi elfalkünual kiñe trokiñche wülniealu Ngünechen ñi kimün tañi pu inanieetew, epe puwkülele ñi afael ta antü. ¿Iney engün am konküley tüfachi konangelu mu?

Jesu tañi pu dullin (ngümintun) inanieetew konküley tüfachi pichin trokiñche mu. Pu Dungukelu Iney Ngen Jewba mew müley kiñe pichin trokiñche, Kiñewkülechi Ngünenielu pingey. Fey tüfa tati kim manelfal kona, ka puwchi antü mew elukey Chaw Ngünechen ñi kimün tañi pu kompañetew Jewba ñi poyeafiel mew. Maneluwküleiñ tüfachi manel kona mu taiñ llowal tüfachi kimün “tunte [chumten] antü rume” (Luka 12:42).

Adkünumekey kom ñi nieel tati Ülmen Wentru tañi elfalkünuetew (Luka 12:44). Jesu kiñe fütra falin küdaw elufi tüfachi trokiñche: adkünual Jewba ñi adkünun Mapu mu. ¿Chem dungu mu konküley tüfachi küdaw? Küme ngüneduamnieal tañi chemkün (yewün), ngünenieafiel tati amuldungun küdaw, ka kimeltuafiel tati trawünche. Fillke dungu tripay taiñ amuldungual ka adkünuelchi chillkatun wülngekey trawün ka fütrake trawün mew, femngechi mu ti “kim manelfal kona” wülkey Ngünechen ñi kimün. Feymu llemay chem dungu rume taiñ duamnieel elukeeiñmew.

Manelfali tüfachi “kona”, fey nüwkülelu am Biblia ñi rüf dungu mew, ka küme yeniey ñi küdaw ti amuldungual ti kümeke dungu; ka kim konangey ngüneduam adümkelu am kom tañi duamnieel ta Kristo Mapu mu (Hecho 10:42). Jewba trapümniepafi fentren che ñi konal tañi trawünche mew, ka fürenefi tati kim manelfal kona tañi doy alüngerpual ñi elukeel Ngünechen ñi kimün (Isaías 60:22; 65:13).

• Ñi elungeal tañi pu inanieetew Ngünechen ñi kimün, ¿iney am elfalkünufi Jesu?

• ¿Chemu am kim ka manelfalngey tüfachi “kona”?

Wünen siglo mew, “tati pu apostol ka tati pu [...] longkolelu” Jerusalen waria mu kiñe pichin trokiñche trür adkünukelu mu konkefuyngün, tüfa engün dunguñpefingün tati pu dullingechi (ngümintungechi) kristiano dullial kiñe falin dungu (Hecho 15:2). Tüfa engün inaduamkefuyngün ti Wirin Chillka, ka eluwkefuyngün ñi ngüyülaetew Ngünechen ñi lif küme püllü dullial (ngümintual) kiñe dungu (Hecho 15:25). Ka famngechi femkey ti Kiñewkülechi Ngünenielu fanten mu.

Chaw Ngünechen femkey ñi ayükeelchi dungu ti Kiñewkülechi Ngünenielu mu. Tati pu dullingechi peñi koneltulelu ti Kiñewkülechi Ngünenielu mu müna duamkefingün ta Biblia, ka küme kimingün Ngünechen ñi dungu ka chumngechi adkünual fill dungu mu. Fill semana mu trawüluwkeyngün tañi inaduamal chem ñi duamnien tati pu peñi ka lamngen wall Mapu püle mülelu. Chumngechi femngekefuy wünen siglo mew, wülkeyngün ngülamtun Biblia mu küpalu, ka kimelelkefingün tati trawünche chillka mu, witran-ngepakechi longkolelu kam kake peñi mew. Femngechi kellukeyngün Ngünechen ñi pu che kiñewküleal tañi rakiduamün mu engün ka tañi chumken mew (Hecho 16:4, 5). Kafey pepikakeyngün ñi wülngeal Ngünechen ñi kimün, yafültukukefingün kom pu peñi ka lamngen tañi wünekünual ti amuldungun tañi mongen mew, ka ngüneymakeyngün chumngechi kiñeke adümkechi wentru elfalkünungen ñi longkoleal.

Inakeyngün Ngünechen ñi lif küme püllü ñi ngüyülün. Tati Kiñewkülechi Ngünenielu inakey tañi ngüyülaetew Chaw Ngünechen Jewba ka Jesu, longkolelu am trawünche mew (1 Korintio 11:3; Efesio 5:23). Tüfa engün ülmen ñidol trokiwkülelayngün Ngünechen ñi trawünche mew. Kakelu pu dullingelu (ngümintungelu) reke, ti Kiñewkülechi Ngünenielu “yamüñmakefi Ngünechen ñi Korderu”, Jesu llemay (Apokalipsi 14:4). Tüfa engün müna mañumkeyngün taiñ ngillatuael kidu engün mu.

• Wünen siglo mu, ¿iney engün koneltukefuyngün tati trür adkünukelu mew?

• Fanten mu, ¿chumngechi inakey Ngünechen ñi ngüyülaetew tati Kiñewkülechi Ngünenielu?

Ebrew dungun mew “Ngünechen ñi ruka” pifel ta Fetel (Génesis 28:17, 19, TNM). Ka famngechi küme üytungekey ti fütrake ruka nieyelu wall Mapu püle tati pu Dungukelu Iney Ngen Jewba, chew ta kellungekey ka ngüyülngekey tati amuldungun küdaw. Tati Kiñewkülechi Ngünenielu müley Fetel Nueva York, Estados Unidos pingechi mapu mu. Üyew adkünumekey tati küdaw femngekelu kakelu fill Fetel mülelu itrokom Mapu mew. Kom tüfachi pu peñi ka pu lamngen küdawkelu faw, “Fetel reñma” pingekey. Tüfa engün kiñe reñma reke müleyngün, kiñentrür ikeyngün, küdawkeyngün, ka kiñewkülen chillkatukeyngün ta Biblia (Salmo 133:1).

Fetel müna falin-ngey, tüfachi pu reñma kiñepülekünulu am engün kidu ñi ayükeelchi dungu. Itrokom pu Fetel reñma mu müleyey pu wentru ka domo kristianongelu fill antü eluwlu tañi femal engün Ngünechen ñi ayükeelchi dungu, ka kellukonkeyngün tati amuldungun mew (Matew 6:33). Kiñe no rume kullingelay, kom elungekeyngün chew ñi umayal ka iyael, ka kellungekey pichin plata müten ñi ngillayal kiñeke chemkün tañi duamnieel. Itrokom nieyngün kiñe elfal küdaw: ofisina mu, dewmawe iyael kam chew ñi ingekem; kakelu chew ñi nentuwiringekem papil, kam chew ñi dewmangemum ta papeltun; ka kiñeke liftuam chew umawtuken che, küchatuwe mew, ka inaduamal kom chi chemkün, ka fill küdaw rume.

Faw müley fentren küdaw kellual ñi amuldungungeal Chaw Ngünechen ñi Ngünenien. Fetel kellukefi fentren che ñi kimafiel Biblia ñi rüf dungu, tüfa tati doy falin kudaw ñi nieel. Tüfachi papil pengeli tüfa. Tati Kiñewkülechi Ngünenielu inaduamfi ñi wirintukungeal, fey werkülelngey komputador mew alün rulpadungufe wall Mapu mu, dewmadewmakünungey chew ñi nentuwiringekem fillke lof mapu mu, ka werkülelngey doy pataka mari warangka trawünche mu. Femngechi tati Fetel reñma küme kellukey tati doyümfalchi küdaw: amuldungual tati kümeke dungu (Marku 13:10).

• ¿Iney engün am ta küdawkey Fetel mu, ka chem elungekey?

• ¿Chem doyümfalchi küdaw kelluntukungekey kom ñi dewmangekeel Fetel mu?

Pu küdawkelu Fetel reñma mu, fill küdaw dewmakeyngün tañi kellual ti amuldungual kiñe kam mufüke lof mapu mew: rulpadungumekey, nentuwirinmekey, dewmamekey ka trapümmekey fillke wirintukun, allkütual ka pengelngechi nütram dungu, ka fillke küdaw rume.

Kiñe trokiñche inaduammekey tati ngünenieelchi ruka ñi küdaw. Tati Kiñewkülechi Ngünenielu elfalkünukey tüfachi trokiñche mu kom chi dewmangen ngünenieelchi ruka mu. Tüfachi trokiñche mu koningün küla kam doy küla pepikawkülechi longkolelu. Tüfa engün wüldungumekefingün ti Kiñewkülechi Ngünenielu chum amuley ta dungu tañi lof mew ka chem wedake dungu ñi mülen. Tüfa kellukey ñi dullial (ngümintual) chem dungu ñi feypingeal küpalechi papeltun mu ka trawün ka fütrake trawün mew. Fentren rupa ti Kiñewkülechi Ngünenielu werküy kiñeke witran-ngepakechi werken. Fey ngülamtukefi tati Trokiñche Adkünukelu tati Ngünenieelchi Ruka tañi küme femürpual tañi küdaw (Proverbios 11:14). Ngepalu tüfachi ngüneniechi ruka ñi werken femngekey kiñe falin trawün, ka wewpitukey tañi yafültukuafiel tachi pu peñi ka lamngen mülelu üyew.

Kellungekey pu trawünche. Tati ngünenieelchi ruka tutelkakey tripalu kiñe we trawünche. Ka fey mu ngüyülngekey tati küdaw ñi femkeel pu wünelekelu amuldungun mew, pu werküngelu ka mapu ñi amuldungual, ka pu witran-ngepakechi longkolelu engün. Kafey pepikangekey tati fütrake trawün, ka we Trawünwe Ruka ñi dewmangeal, ka fillke lifru yefalngey tati trawünche mew. Kom tüfachi küdaw femngekelu tati ngünenieelchi ruka mew kellukey ta küme pepikawküleal tati amuldungun mu (1 Korintio 14:33, 40).

• Ti Trokiñche Adkünukelu tati Ngünenieelchi Ruka, ¿chumngechi kellukefi tati Kiñewkülechi Ngünenielu?

• ¿Chem küdaw femngekey kiñe ngünenieelchi ruka mu?

Fillke papil doy 750 kewün dungu mu entukeiñ iñchiñ, taiñ kimelelafiel tüfachi kümeke dungu ta “itrokom trokiñke mapu, ka tripanche, [kewün] dungun ka trokiñche” (Apokalipsi 14:6). ¿Chumngechi femkeiñ tüfachi fütra küdaw? Fentren che wirintukukelu fill tuwün nieyngün, ka fentren lof mapu mu müleyngün. Ka fillke manelfalngechi rulpadungukelu. Kom engün Dungukelu Iney Ngen Jewba ngeyngün.

Wünelu mew ti papil wirintukungey gringu dungun mew. Tati Kiñewkülechi Ngünenielu peyawülkey kom chi küdaw femkelu ti Wirintukuam Küdaw-we, mülelu Fetel Estados Unidos pingechi mapu mew. Tüfachi Wirintukuam Küdaw-we adkünumekey chi küdaw nielu pu wirintukukelu küdawmekelu üyew ka kake ngünenieelchi ruka mu. Tati pu wirintukukelu kakewme tuwün nieyngün, feymu wirintukungekey fill dungu mu duamnielu chem che rume, femngechi mu taiñ papil fillke mapu tuwlu reke feley.

Tachi wirintukungechi dungu werkülelngey tati pu rulpadungukelu. Tüfachi papil küme elkünungele ka “tutengechi wirintukungey” feypingele, fey werkülelngey komputador mew tati pu rulpadungukelu wall Mapu mülelu, ka tüfa engün elfalkünungeyngün tañi rulpadunguafiel. Pu rulpadungukelu yafüluwkeyngün ñi dullial (ngümintual) “küme rüf dungun”, ñi manel feypial kidu ñi kewün dungu mew ñi feypilen ti gringu dungun (Eclesiastés 12:10).

Komputador mew doy müchay amukey ti küdaw. Tati komputador pepi welutukungelay tati che wirintukukelu kam rulpadungukelu rume. Welu ti küdaw doy müchay amukey küdawliyiñ komputador ñi kellun mew. Feymu tati pu Dungukelu Iney Ngen Jewba dewmaiñ kiñe Küdaw-we Küme Elkünual Fill Kewün Dungu mu Komputador mew (MEPS feypingey gringu dungun mew). Femngechi tukulkefiyiñ ti wirintukun patakakechi kewün dungu mu, trapümkefiyiñ ti wirintukun ka adentun engu, ka pepikakünukefiyiñ ñi nentuwiringeal.

¿Chumngelu am (chemu) fente newenma küdawkeiñ ta rulpadungual fentren kewün dungu mew? Jewba am “ayünielu kom che tañi montuael ka tañi kimürpuafiel engün tati rüfngechi dungu” (1 Timotew 2:3, 4).

• ¿Chem küdaw femngekey wirintukuafiel taiñ papil?

• ¿Chumngelu (chemu) rulpadungumekeiñ fentren kewün dungu mu?

Fillke tripantu mu, tati pu Dungukelu Iney Ngen Jewba wirintukukeiñ ka elukeiñ fentren warangkakechi warangka Biblia ka fillke papil, kafey dewmakeiñ ka küme elkünukeiñ Trawünwe Ruka ka ngünenieelchi ruka, wülkeiñ pichinke plata ñi kellual tati pu che Fetel mu mülelu ka pu werküngelu ka mapu ñi amuldungual, ka yefalkeiñ fillke chemkün ñi kellual tati pu peñi ka pu lamngen kütrankawkülelu kiñe nüyün mew, mangiñko kam kake wedake dungu mu. ¿Chew entukeiñ tati plata ñi kulliafiel kom tüfachi küdaw?

Ngillatukelaiñ diesmo ka dikümtukukelafiyiñ (eypikelabiyiñ) ta che wülal ñi chemkün. Fentren fali rume tati amuldungun küdaw, ngillatukelafiyiñ ta che ñi plata. Doy pataka tripantu kuyfi mu, tripalu ti epungen chillka La Atalaya pengeli taiñ feyentun Jewba taiñ kellunieetew, ka feypi: “Turpu ngillatukullinkelayaiñ, ka ngillatulayaiñ rume tati pu che ñi kelluaetew”. Ka femngechi femi (Matew 10:8).

Taiñ küdaw kulliwkey kidu ñi ayükeelchi wülkeel mu. Fentren che müna falintuniefi taiñ küdaw kimeltual Biblia ñi dungu, feymu ñi ayükeelchi wülkeel engün kellukeeiñmew ñi kulliñmayafiel tüfachi küdaw. Pu Dungukelu Iney Ngen Jewba ka wülkeiñ taiñ antü, newen ka chemkün (yewün) ta femal Chaw Ngünechen ñi ayükeelchi dungu wallon Mapu mu (1 Crónicas 29:9). Tati Trawünwe Ruka mew ka fütrake trawün mew müley kiñeke pitaka (caja), femngechi kom pu che ayüle tukuafuy tañi ayükeelchi wülkeel tüfa mu. Ka femngeafuy taiñ pagina internet mu, jw.org. Pu ülmen-ngenochi che elukey epe kom tati ayükeelchi wülkeel trapümngelu. Tüfa engün femkeyngün tati pofre lantu domo reke Jesu ñi sakifiel, tüfa ta epu pichi moneda tukuy pichi kakon mülelu ngillatuwe ruka mu (Luka 21:1-4). Chem che rume elkünuafuy fente plata ayüle “tañi wülael tunte tañi rakiduamel ñi piwke mew” (1 Korintio 16:2; 2 Korintio 9:7).

Rüf maneluwküleiñ Jewba mu, kidu am amuleay ñi yafültukuafiel tati pu che ayülu ñi poyeaetew tañi falinke chemkün (yewün) mu. Femngechi kelluayngün ñi amuldungungeal Ngünechen ñi Ngünenien, ka fey felerpuay tañi ayükeelchi dungu (Proverbios 3:9).

• Tati pu Dungukelu Iney Ngen Jewba, ¿chemu am trürlaiñ kakelu pu religion mew?

• ¿Chem dungu mu amultukungekey (chumngekey) tati ayükeelchi wulkeel trapümngekelu?

Kom tati Biblia kimeltun wülngekelu Trawünwe Ruka mew nüwküley Ngünechen ñi Ngünenien mu. Jesu ñi amuldungun mu nütramyey tüfachi Ngünenien (Luka 8:1).

Chuchi lof mu rume, müley tüfachi ruka chew rüf poyengekey Ngünechen. Tüfachi Trawünwe Ruka mu pu Dungukelu Iney Ngen Jewba adkünukeyngün ti amuldungun küdaw kidu tañi lof mew (Matew 24:14). Müley kiñeke Trawünwe Ruka alükelu ka pichikelu, fill adnielu, welu rume (mütre) ülmen-ngeyelay, kafey fentrenke trawünche amukey kiñe Trawünwe Ruka mu müten. Müna tremkülerpulu tati pu trawünche, feymu llemay dewmakeiñ marikechi warangka Trawünwe Ruka rupakechi tripantu mu. ¿Chumngechi am femürpukeiñ tüfa? (Matew 19:26).

Ayükeelchi wülkeel plata mu trawülu, dewmangeyey tati Trawünwe Ruka. Tati trapümelchi plata yefalngekey tati ngünenieelchi ruka mew, femngechi arelngekey tati pu trawünche duamnielu ñi dewmayal kam küme elkünutual tati Trawünwe Ruka.

Fillke che küpay tañi ngünewün mew, ka kullingekelay rume ñi kellual. Fentren lof mapu mew müley kiñeke Trokiñche Dewmakelu Trawünwe Ruka. Kiñeke peñi ka lamngen konkeyngün tüfachi trokiñche mew küdawkelu ñi dewmayal Trawünwe Ruka, kafey kake peñi ka lamngen konkeyngün kidu ñi duam mu ñi kellual ta dewmayal. Kom engün wiñamtuwkeyngün ñi amual kiñe trawünche mu ka kangelu trawünche mew tañi mapu mu, kamapulelu rume (alü tripalelu ume), ka kellukeyngün tati pu trawüluwkelu feychi lof mu ñi dewmayal tañi Trawünwe Ruka. Kake trokiñ mapu mew kiñeke pepikawkechi che Dungukelu Iney Ngen Jewba ngelu elfalkünungeyngün kiñe lof mew ñi adkünual ti dewmamekeel ka küme elkünungetulu ti Trawünwe Ruka üyew. Fill pepikawkechi che küdawkeyngün kidu ñi duam mu chew dewmangey ti Trawünwe Ruka, welu epe kom che küdawkelu kidu ñi duam mu tuwingün tüfachi trawünche mülelu feychi lof mu. Kom tüfachi küdaw femngekey Jewba ñi lif küme püllü mew, ka pu peñi ka lamngen ñi küdaw kom tañi piwke mu (Salmo 127:1; Kolosense 3:23).

• ¿Chumngechi am fente dewmakeiñ Trawünwe Ruka wall Mapu püle?

Kom pu Dungukelu Iney Ngen Jewba ñi Trawünwe Ruka yeniey Chaw Ngünechen ñi fütra üy, feymu nieiñ tüfachi falin küdaw: liftunieafiel ka küme adkünuafiel. Tüfachi dungu müna falin-ngey taiñ küme poyeafiel Jewba, ka kom iñchiñ kelluafuiñ.

Yafüluwaiñ ñi liftuafiel ti Trawünwe Ruka afle chi trawün. Tati pu peñi ka lamngen trawünche mew ayüwün-ngechi kelluyngün ñi liftuliftukünual ti Trawünwe Ruka afle chi trawün, welu kiñe rupa fill semana mu doy küme liftungekey. Fill rupa mu femngekey kiñe pepikakünungechi küdaw, fey kiñe longkolelu kam kiñe konakechi kellukelu adkünukeyngün (ngüyülkeyngün) ti küdaw: lepüal (yepütual) ka liftual ti mapu ruka (pülli mu), liftual trüfür ka küme elkünual ti wangku, küme küchakünuafiel tati tripatripatuwe, liftuafiel tati fentana ka komütuwe, ütrüfentuafiel ti tripachi pod, ka liftual ka adkünuafiel kom mülelu wekuntu. Kiñe rupa fill tripantu mu elkünungey kiñe antü ñi doy küme liftuafiel kom ti Trawünwe Ruka. Tati pu pichikeche ka kelluafuy ñi liftual, femngechi fey engün kimtukuayngün ñi yamnieafiel tüfachi ruka chew taiñ poyekefiel ta Chaw Ngünechen (Eclesiastés 5:1).

Kelluaiñ küme elkünutuafiel. Fillke tripantu küme inaduamngekey tati Trawünwe Ruka, ponwi ka wekuntu. Fey küdawngekey ñi küme elkünutuafiel ka küme adkünuafiel, femngechi kullipüdalayaiñ rupale ta antü (2 Crónicas 24:13; 34:10). Ti Trawünwe Ruka müley ñi küme lifküleal ka küme elkünungeal taiñ poyeafiel ta Chaw Ngünechen. Yafüluwliyiñ ta küme elnieal ti Trawünwe Ruka, fey pengelaiñ taiñ piwkeyefiel Jewba ka falintufiel chew taiñ trawüken (Salmo 122:1). Femngechi mu kakelu pu che afmatuay (2 Korintio 6:3).

• ¿Chumngelu (chemu) müley taiñ küme elnieal tati Trawünwe Ruka?

• ¿Chem küdaw femngekey ñi lifkünungeal ti Trawünwe Ruka?

¿Ayüfuymi doy tremal tami kimün Biblia ñi dungu mew? ¿Ayüfuymi tami doy kimal kiñe che, lof, versikulo, kam kiñe nütram Biblia mu tuwlu? ¿Ramtuwkeymi chi chumngechi Ngünechen ñi Dungu kelluafeymew nielmi kiñe weda dungu? Femngechi femülmi, kümeafuy tami amual chew ñi elngekem lifru Trawünwe Ruka mu.

Chew ñi elngekem lifru fillke dungu müley tami kelluaetew ta inaduamal. Eymi nielaymi chi kom tati papil entukelu pu Dungukelu Iney Ngen Jewba tami kewün dungu mu. Welu chew ñi elngekem lifru Trawünwe Ruka mu müley epe kom we tripachi lifru. Mülekafuy chi fill rulpadunguelchi Biblia, kiñe küme diccionario ka kake lifru tami kelluaetew ta inaduamal. Yafüluwnge tami inaduamafiel petu ñi kon-non chi trawün kam afle. Mülele kiñe komputador niekafuy chi Watchtower Library pingelu, tüfa mu müley epe kom taiñ papil, ka küdawngelay kintungeal fillke ramtun kiñeke dungu kam versikulo mew.

Müna kellukey tati pu chillkatufe konlu ti trawün Taiñ Mongen ka Taiñ Amuldungukeel. Chew ñi elngekem lifru kelluafeymew ta pepikawal tami elfalngeelchi dungu mu. Tati adkünukelu ti trawün Taiñ Mongen ka Taiñ Amuldungukeel elfalkünungey ñi küme elnieal chew ñi elngekem lifru, ka peyawülkey ñi müleal kom pu papil we tripalu ka ñi küme elkünungeal. Tami kimeltukeetew kam ti adkünukelu ti trawün kimeltuafeymu ta peal kom chi dungu tami duamnieel. Welu entukelayaymi tati lifru Trawünwe Ruka mew, ka müley tami dapiafiel (kümekabel) ka wirikalayafimi.

Biblia feypiley chumngechi taiñ peal “Ngünechen ñi kimün”: yafüluwaiñ ta kintuafiel “ellkalechi falinke chemkün” reke (Proverbios 2:1-5). Chew ñi elngekem lifru Trawünwe Ruka mu, kelluaeymu tami kintual tüfa.

• ¿Chem dungu mülelu chew ñi elngekem lifru mu kelluafeymew tami inaduamal?

• ¿Iney am kelluafeymew tami doy küme adümafiel chew ñi elngekem lifru?

Jesukristo feypifi tañi pu inanieetew: “Eymün tamün pelon feley ñi alofael [pelontual] ta kom che mew, feymew pefile engün eymün tamün femken kümeke dungu, püramyeafi engün ta wenu mapu mülechi Ngünechen” (Matew 5:16). Feymu pünekeiñ tati we tripankechi teknologia, internet llemay. jw.org mew müten rüf wüldungungekey pu Dungukelu Iney Ngen Jewba tañi mupiltun ka tañi küdaw mu. ¿Chem wüldungukey?

Biblia ñi llowdungun tati pu che ñi ramtumeken mew. Peaymi llowdungun tati doy falin-ngechi ramtun femuwkelu ta che. Fey müley tati pichike papil ¿Afpeay may taiñ kutrankawkülen? ka ¿Felepey may tati pu layelu ñi wiñomongetual?, tüfa doy 600 kewün dungu mu müley. Kafey peaymi tati Traducción del Nuevo Mundo doy 130 kewün dungu mu; fillke papil tami kelluaetew chillkatual ti Biblia, tati papil ¡Kümeke dungu küpalu Dio mew! pingelu, ka müley tati we tripamekechi chillka La Atalaya ka ¡Despertad! Fentren tüfake papil chillkatuafuymi kam allkütuafimi internet mew, welu kafey entuafuymi kimngekeelchi chumkünungen mu, tüfa kiñeke: MP3, PDF kam EPUB. Pepi nentuwiriafuymi kiñeke pagina tami eluafiel tati che küpa kimlu ti kümeke dungu kidu ñi kewün dungu mu. Ka müleyey fillke video chumngechi ñi dunguken tati pu pepi allkütukenolu, ka nakümngeafuy nütramelchi papeltun Biblia mew, allkütungekeelchi nütram Biblia mu tripalu, ka tutengechi ül tami allkütuñmual tüngkületulmi.

Rüf wüldungumekey pu Dungukelu Iney Ngen Jewba ñi dungu mu. Tüfachi pagina internet mew müley we tripanchi wüldungun ka fillke video pengelkelu taiñ küdaw wall Mapu mu, kom chi dungu rupamekelu pu Dungukelu Iney Ngen Jewba, ka taiñ küdaw kellukelu pu che. Kafey kimeldungukey ñi fülkülepan tati fütra trawün, ka feypi chumngechi pepi dunguafuiñ tati ngünenieelchi ruka mu.

Femngechi pepi alofi (pelontubi) tati rüf dungu ñi pelon, fütra kamapu rume (alü tripa ume), tañi kümelkangeal pu che kom chi Mapu mew, kafey Antartida pingechi fütra mapu mu. Ngillatumekeiñ Jewba “ñi werken dungu doy müchay ñi kom püle puwael” kom Mapu mu, fey Ngünechen ñi püramyengeal (2 Tesalonisense 3:1).

• ¿Chumngechi tati pagina jw.org kellukefi fentren che ñi kimal Biblia tañi rüf dungu?

• ¿Chem dungu küpa inaduamfuymi taiñ pagina internet mew?