Amulepe taiñ quintual Jehová taiñ adnieteu

1. ¿Chem doi duamniei com pu che? (Mateo 5:3).

CHUMNGECHI taiñ deumaeteu Jehová, duamqueiñ iyael, ropa ca cheu taiñ müleal. Tüfa rume falin-ngei taiñ cümelcaleal. Huelu ca duamnieiñ taiñ quimafiel taiñ Chau Jehová ca taiñ adnieaeteu (papeltunge Mateo 5:3). Quimnielu cai iñchiñ taiñ duamnieel Jehová taiñ adnieaeteu, eluhuaiñ taiñ hueniyeafiel. Femngechi müten nieafuiñ rüfngechi ayühun.

2. Ti duamnielu ñi adnieaeteu Jehová, ¿chumngechi trürümuhuafui quiñe mongetuyaulu mu?

² Jesús ñi feipin Mateo 5:3, ¿chem cüpa quimeltui? Griego quehun mu raquiduamelafeiñmu quiñe che mongetuyaulu. Feichi che huesa tucutuucülei ca nielai iyael. Nienolu am cheu tañi müleal, antü mu mülequei cheu ñi rume arengen, ca pun meu rume hutrequei. Yafüngehuelai tañi entrilen mu. Chumngechi ñi felen, tati pu che cañpüle rupaquei. Tüfachi che quimniei ñi duamnieel quellu tañi mongeleal. Ca femngechi tati pu quimnielu ñi duamün ñi adnieaeteu Chau Dios llellipuquefingün ñi quelluaeteu ca allcütuquefingün.

3. ¿Chem peaiñ tüfachi troquiñ mu?

³ Tüfachi troquiñ mu, peaiñ ñi femün quiñe Fenicia tuhun-ngechi domo, fei llellipufi Jesús ñi quelluaeteu. Peaiñ chumngechi inayentuafuiñ feichi domo Jehová taiñ adnieaeteu. Ca ngüneduamaiñ ñi femün Pedro, Pablo ca ti rey David, com fei engün maneluhui Jehová mu tañi adnieaeteu.

¿CHEM QUIMELTUEIÑMU ÑI FEMÜN TI FENICIA DOMO?

4. Tati Fenicia domo, ¿chem ayüniefui ñi femaeteu Jesús?

⁴ Quiñe rupa quiñe Fenicia domo amui cheu ñi mülen Jesús, conhuecüfülefulu am tañi püñeñ (Mat. 15:21-28). Fei püllecontufi Jesús, lucutunagi ca llellipufi tañi quelluaeteu. Peaiñ chem quimeltueiñmu ñi femün.

5. ¿Chem femi Jesús ñi quelluafiel ti domo? Ca, ¿chemu? (Ca inaduamnge ti adentun).

⁵ Tati Fenicia domo deu feipifilu Jesús tañi quelluaeteu, fei trürümeyu quiñe pichi trehua mu. Cangelu che femngechi feipingefule amufemtuafui, huelu tüfachi domo femlai. Doi mai mülenagi, femngechi pengeli tañi ñom piuquengen. Cafei amulei tañi quelluen pifiel ta Jesús. Femi tañi maneluucülen fei meu. Jesús feipifui ti domo ñi quelluafiel re tati pu Israel che, huelu ngüneduamlu fente tañi maneluucülen, quellufi ca tuhun-ngelu rume. Fei tremoltufi tañi püñeñ conhuecüfülelu.

6. ¿Chem quimeltueiñmu ñi femün ti Fenicia domo?

⁶ Taiñ adnieaeteu Jehová, mülei taiñ inayentuafiel ti Fenicia domo. Mülei taiñ ñom piuquengeal ca rumel feipiafiyiñ Jehová taiñ quelluaeteu. Ca mülei taiñ nehuentu maneluucüleal Jesús mu ca pu elfalcünulu taiñ adnieaeteu (Mat. 24:45-47). Ñom piuquengeliyiñ, fentecünunoliyiñ taiñ quelluen piafiel Jehová ca nehuentu maneluucüleliyiñ, Jehová ca Jesús ayüuqueingu. Femngechi femliyiñ, quelluaiñmu ca adnieaiñmu (ca ngüneduamafuimi Santiago 1:5-7). Feula ngüneduamaiñ chumngechi adniequeiñmu Jehová ca chumngechi quelluqueiñmu taiñ ayüucüleal. Ca peaiñ chumngechi inayentuafuiñ Pedro, Pablo ca ti rey David.

PEDRO REQUE, CÜME ESTUDIAYAFIYIÑ CHAU DIOS ÑI DUNGU

7. Pedro, ¿chem elfalcünungei? ¿Ca chem mülefui ñi femal? (Hebreos 5:14–6:1).

⁷ Peaiñ ñi femün Pedro. Fei quiñe tati hunenque judio ngüneduamlu Jesús tañi Mesías ngen. Pedro quimtucui Jehová ñi adniefiel ta Jesús ñi quimeltucheal tañi nieal rumel mongen (Juan 6:66-68). Jesús petu ñi püranon ta huenu mu, feipifi Pedro: “Elufinge iyael tañi pichique ufisa” (Juan 21:17). Pedro femi ñi elfalcünueteu Jesús, fei quimeltulelfi pu trahunche. Ca Jehová adnieyu ñi huirintucual 2 carta Biblia mu. Huelu Pedro ca duamniefui tañi quimürpuafiel Chau Dios ñi Dungu. Feimu ngüneduami feiti carta Pablo ñi huirintucuel Jehová tañi adnieteu mu. Quiñeque dungu müte adümlafi (2 Ped. 3:15, 16). Huelu fentecünulai ñi ngüneduamfiel, maneluucülefui Jehová ñi quelluaeteu tañi adümafiel Pablo ñi huirintucuel ca ñi inayafiel (papeltunge Hebreos 5:14–6:1).

8. Pedro feipingelu ñi cacünutual ñi raquiduam, ¿chumi?

⁸ Pedro femi Jehová tañi feipieteu, femngechi pengeli ñi maneluhun quisu meu. Raquiduamaiñ ñi rupan Jope huaria mu. Quiñe antü, pei afmatun dungu. Quiñe cüme püllü feipieyu ñi iyal quiñeque iyael lifngenolu Moisés tañi ley mu. Pedro tañi judiongen mu, cümenolu troquiquefui ñi iyafiel. Feimu feipi: “Femlayan Ñidol. Turpu iquelan feiti podcülelu ca ünufalngelu”. Fei ti cüme püllü feipieyu: “Chem ñi liftuel Chau Ngünechen, podcülei pihuelayafimi” (Hech. 10:9-15). Feichi mu müten, acuingün 3 huentru Cornelio tañi huercüel. Cornelio mangeleimu tañi ruca mu pifingün. Tüfachi huentru judiongelafui. Feichi mu, pu judio amuquelafui caque tuhunche tañi ruca mu (Hech. 10:28, 29). Fei, ¿chumafui cai Pedro? Cacünutui tañi raquiduam, quimürpui feula Jehová ayüquei fillque tuhun-ngechi che tañi quimaeteu (Prov. 4:18). Feimu Pedro amui Cornelio ñi ruca mu, fei amuldungulelfi quisu ca com tañi pu che. Fei engün cüme allcütuingün tati rüf dungu, fei llohuingün Chau Dios ñi nehuen ca fautizahuingün (Hech. 10:44-48).

9. Ngüneduamliyiñ cüdaungechi quimeltun, ¿chumngechi cümelcayaiñmu?

⁹ Pedro reque, iñchiñ ca femngechi mülei taiñ estudiayafiel Chau Dios ñi Dungu. Quiñeque quimeltun müte cüdaungelai tañi adümngeal, caquelu doi cüdaungeafui. Huelu ca mülei taiñ ayühunquechi ngüneduamafiel. Feimu elcünuaiñ tiempo taiñ cüme ngüneduamafiel feichi quimeltun doi cüdaungelu. Femliyiñ, llohuaiñ fentren cümelcan. Quiñe, doi quimürpuafiyiñ Jehová, femngechi doi piuqueyeafiyiñ ca doi respetayafiyiñ. Ca epu, doi quimürpufiel mu Jehová doi eluhuaiñ taiñ amuldungucheal (Rom. 11:33; Apoc. 4:11). Ca quiñe dungu quimeltueiñmu Pedro ñi femün. Chau Jehová tañi troquiñche doi cüme adümfiel mu quiñe quimeltun, mülei taiñ pürüm inanieafiel. Femngechi müten Jehová adnieaiñmu ca amuleaiñ taiñ serfinieafiel.

PABLO REQUE, CÜME ELCÜNUTUAIÑ TAIÑ RAQUIDUAM

10. ¿Chumafuiñ taiñ ayühulafiel Jehová? (Colosenses 3:8-10).

¹⁰ Jehová ca quiñe dungu femquei taiñ adnieaeteu: quimeltuqueiñmu chumngechi chengeal taiñ ayühulafiel (papeltunge Colosenses 3:8-10). Duamnieiñ tiempo ca nehuencünuhual taiñ inayentuafiel Jehová tañi chumngen. Raquiduamaiñ ñi femün Pablo. Huechengelu müten, yafüluuquefui tañi ayühulafiel Chau Dios (Gál. 1:14; Filip. 3:4, 5). Huelu Pablo quimlafui Jehová tañi ayüqueel, feimu quimlafui chumngechi tañi cüme poyeafiel. Pablo quimlafui Jesús tañi quimeltun ca mallma huentrungefui, feimu rüf ayühulquelafui Chau Dios (1 Tim. 1:13).

11. Pablo, ¿chem dungu mülefui ñi cacünutual?

¹¹ Petu ñi cristianongenon, Pablo lladcüfemquefui. Fente tañi lladcütufiel Jesús tañi pu inanieteu, ayüfui tañi langümafiel engün (Hech. 9:1). Deu cristianongerpulu, yafüluhui tañi quim ngüneniehual, femngechi ñom huentrungerpui (Efes. 4:22, 31). Femlu rume, quiñe rupa trürlai ñi raquiduam Bernabé engu, fei müna illcutuhuingu (Hech. 15:37-39). Feichi mu Pablo ngüneulai, huelu femcünuulai. Amulei müten tañi huecünutuafiel ñi chumngen, fei ñi ayühulafiel Jehová (1 Cor. 9:27).

12. ¿Chem quellueyu Pablo ñi doi cüme inayentuafiel Jehová?

¹² ¿Chem quellueyu Pablo tañi doi cüme inayentuafiel Jehová tañi chumngen? Maneluulai quisu tañi nehuen mu (Filip. 4:13). Chumngechi femi Pedro, Pablo maneluucülefui Jehová tañi quelluaeteu doi cüme amuleal ñi mongen (1 Ped. 4:11). Femlu rume, quiñeque mu huelulcauquefui, fei huesa duamelquefeyu. Femngechi rupalu, Pablo acordaquefui com cümeque dungu ñi eluqueteu Chau Jehová, femngechi ca nehuencontuquefui tañi ayühulnieafiel (Rom. 7:21-25).

13. ¿Chumngechi inayentuafuiñ Pablo?

¹³ Tunten tripantu rume yenieliyiñ taiñ serfiquefiel Jehová, com iñchiñ inayentuafuiñ Pablo. ¿Chumngechi femafuiñ? Yafüluhuaiñ taiñ inayentunieafiel Jehová ñi chumngen. Quiñeque mu huelulcahuafuiñ, illcuafuiñ chi cam huesa entuafuiñ taiñ hun. Femliyiñ rume, raquiduamlayaiñ taiñ turpu ayühulnoafiel ta Jehová. Doi mai, com piuque mu yafüluhuaiñ taiñ doi cüme elcünutual taiñ raquiduam ca taiñ femquen (Rom. 12:1, 2; Efes. 4:24). Loncontucuaiñ quiñe falin dungu: taiñ inayentuafiel Jehová, duamfali taiñ cüme quimal chem ayüniei Jehová taiñ femal ca inayafiel.

DAVID REQUE, ELUHUAIÑ TAIÑ CUÑIUTUCUAETEU JEHOVÁ

14, 15. Famülque mu, ¿chumngechi cuñiutucuquefi tañi pu che Jehová? (Salmo 27:5; ca inaduamnge ti adentun ).

¹⁴ Taiñ rüf ayüucüleal, ca duamnieiñ taiñ cuñiutucuaeteu Jehová. ¿Chumngechi cuñiutucuqueiñmu Jehová? Ca, ¿chem femafuiñ taiñ cuñiutucuaeteu? Feula ngüneduamaiñ.

¹⁵ Ti rey David cüme quimniefui Chau Jehová tañi cuñiutucuaeteu rupale cuñihun-ngechi dungu meu (papeltunge Salmo 27:5). Jehová, ¿chumngechi cuñiutucuquefi tañi pu che famülque mu? Jehová cuñiutucuqueiñmu, femngechi inei no rume ca chem no rume taiñ püntünentunoaeteu quisu mu. Pu che cüpa catrütueliyiñmu rume ñi serfihuenoafiel Jehová, fei feipicünui ñi hueutripanoal engün (Sal. 34:7; Is. 54:17). Huecüfü, tati pu huesaque püllü ca taiñ pu inantucueteu nehuen-ngeingün, huelu Jehová doi pepiluhun-ngei. Langümngefuliyiñ rume, huelu Jehová ca huiñomongeltuaiñmu (1 Cor. 15:55-57; Apoc. 21:3, 4). Jehová ca quelluqueiñmu fill raquiduamcüleliyiñ, femngechi taiñ serfinieafiel (Prov. 12:25; Mat. 6:27-29). Jehová fente taiñ piuqueyeteu, elueiñmu taiñ pu peñi, pu lamngen ca tati pu loncolelu taiñ quelluaeteu ca yafültucuaeteu (Is. 32:1, 2). Ca amuliyiñ trahun mu, doi quimeltungequeiñ chem mülei taiñ femal taiñ cuñiutucuaeteu Jehová (Heb. 10:24, 25).

16. Jehová, ¿chumngechi cuñiutucufi David?

¹⁶ David allcütufilu Jehová, fei quellueyu ñi cüme dullial tañi chumal, femngechi Jehová cuñiutucueyu ñi cutrancaunoal huesaque femün mu (ca ngüneduamafuimi Proverbios 5:1, 2). Huelu David allcütunofilu Jehová, cutrancahui tañi huesa femün mu, fei Jehová entuñmalaeyu ñi huesa rupan (2 Sam. 12:9, 10). Ca quiñeque mu, David cutrancahui caquelu tañi huesa femeteu mu. Femngechi rupan mu, llellipufi Jehová, com entui chem tañi nieel piuque mu. ¿Chumngechi cuñiutucueyu Jehová cai? Jehová yafültucufi, feipifi ñi rume piuqueyefiel ca ñi cuidayafiel (Sal. 23:1-6).

17. ¿Chumngechi inayentuafuiñ David?

¹⁷ ¿Chumngechi inayentuafuiñ David? Taiñ dullial chem taiñ chumal, llellipuafiyiñ Jehová ca quintuaiñ tañi ngülam, femngechi Jehová cuñiutucuaiñmu. Ca acordanieaiñ: huesa femliyiñ, Jehová catrütulayaiñmu taiñ huesa rupayal (Gál. 6:7, 8). Quiñeque mu ca cutrancahuafuiñ caquelu che ñi duam mu. Femngechi rupale, com piuque mu llellipuafiyiñ Jehová, fei yafültucuaiñmu ca tüngduamelaiñmu (Filip. 4:6, 7).

AMULEPE TAIÑ QUINTUAL JEHOVÁ TAIÑ ADNIETEU

18. Fachantü, ¿chumquei fentren che? Taiñ adnieaeteu Jehová, ¿chumafuiñ? (Ca inaduamnge ti adentun).

¹⁸ Ti texto taiñ loncontucunieal 2026 tripantu mu, feipilei: “Ayühun niei pu quimlu ñi duamnieel Chau Ngünechen ñi adnieteu”. Fachantü doi duamfali taiñ inayafiel Jesús ñi feipin. ¿Chumngelu cai? Fachantü fentrenque che duamtuquelafingün ta Chau Dios, feimu quintuquelafingün rume tañi adnieaeteu. Caquelu feyentuqueingün Dios mu, huelu quintuquelaingün chumngechi tañi cüme poyeafiel. Caquelu che tañi maneluhuafel Chau Dios mu, inaquefingün che tañi quimün müten. Tañi femün com engün, rüf ayüucülequelaingün. Turpu inayentulayafiyiñ tañi femngechi femquen engün. Feimu llemai, amulepe taiñ quimafiel Jehová ñi dungu, yafüluhuaiñ taiñ doi ayühulafiel Jehová taiñ chumngen mu ca eluhuaiñ Jehová taiñ cuñiutucuaeteu.