9-15 MARZO, 2026
ÜLCANTUN 45 Tañi piuque ñi raquiduamqueel
Hueñancüleliyiñ, Jehová quelluaiñmu llemai
“¡Aungen mai iñche!” (ROM. 7:24).
¿CHEM QUIMAIÑ?
Chumngechi chaftuafuiñ taiñ huesa duamcülen.
1, 2. Ti apostol Pablo, ¿chum duamcülequefui quiñeque mu? Ca, ¿chumngechi trürümuhuafuiñ Pablo mu? (Romanos 7:21-24).
¿CHEM raquiduamqueiñ apostol Pablo mu? Acordaqueiñ chi tañi amuldunguquen fentren mapu püle, huirintucui fentrenque carta Biblia mu, quiñe cüme quimeltuchefengefui. Felei llemai, Pablo femi com feitachi dungu, huelu quiñeque mu, ca huesa duamquefui iñchiñ reque fachantü.
2 (Papeltunge Romanos 7:21-24). Romanos pingechi carta mu, Pablo nütramcai tañi chum duamcülequefel. Iñchiñ ca femngechi dungu mu rupayafuiñ chi. Pablo cüme cristianongefui, ayüfui tañi femal Jehová tañi ayüqueel, huelu tañi culpan chengen mu, quiñeque mu cüdautuquefui tañi cüme femal. Cafei acordafiel mu tañi huesa femün mu cuifi, fei rume huesa duamquefui. Ca Pablo rupamequefui quiñe huesa dungu mu. Quimfiel mu tañi pepi famentunoafiel, rume hueñancülquefeyu.
3. ¿Chem ngüneduamaiñ feitachi troquiñ mu?
3 Pablo huesa duamcülequefulu rume, fentecünulai tañi famentuafiel huesaque raquiduam.a Tüfachi troquiñ mu, ngüneduamaiñ chemu ti apostol Pablo quiñeque mu huesa duamcülequefui. ¿Chem quellueyu tañi famentuafiel com feitachi huesaque raquiduam? Ca, ¿chumafuiñ iñchiñ hueñancüleliyiñ?
¿CHEMU PABLO HUESA DUAMCÜLEQUEFUI?
4. ¿Chemu hueñancüquefui Pablo?
4 Tañi huesa femün ta cuifi mu. Petu tañi cristianongenon ta Pablo, femi fentren huesaque dungu. Langümngelu ta Esteban, Pablo mülefui ta fei mu. Cümelu troquifi tañi langümngen (Hech. 7:58; 8:1). ¿Ca chumi ta Pablo? Inacafi tati pu cristiano ca huesalcafi (Hech. 8:3; 26:9-11).
5. Acordan mu tañi femün cuifi, ¿chum duamquefui Pablo?
5 Cristianongerpulu Pablo, hueñancüquefui acordan mu tañi huesa femün mu cuifi. Rupachi tripantu mu, ¿doi huesa duamquepelafui ta Pablo? Tati 55 tripantu püle, Pablo huirintucui: “Iñche inantucufiñ Chau Dios ñi trahunche, feimu apostol pingelayafun” (1 Cor. 15:9). Ca 5 tripantu rupalu, huirintuculelfilu pu Éfeso che, feipi: “Iñche ancapuulan tati doi inan-ngelu Chau Ngünechen ñi pu che mu” (Efes. 3:8). Pablo ca feipifi Timoteo: “Cuifi caiñetudunguquefun ta Chau Ngünechen, inantucuquefun tañi pu che, checauquefun” (1 Tim. 1:13). Pablo huitrancontufilu tati pu trahunche, pequefui quiñeque cristiano ca tañi pu familia ñi inantucuel, fei ¿huesa duamquepelafui?
6. ¿Ca chem dungu mu rupaquefui Pablo? (Ca inaduamnge ti quimal dungu).
6 Pablo rupamequefui quiñe huesa dungu mu. Feipilai chem tañi cutrancamequeteu, huelu trürümfi quiñe chacai mu (2 Cor. 12:7). Feita quiñe cutran chi cam caquelu dungu chi tañi raquiduameleteu. Pablo feipilai, huelu rume cutrancaquefeyu.b
7. ¿Chemu cüdaungefui Pablo tañi cüme femal? (Romanos 7:18, 19).
7 Tañi culpafengen mu huesa duamquefui. Pablo rume ayüquefui tañi cüme femal, huelu tañi culpan chengen mu cüdautuquefui (papeltunge Romanos 7:18, 19). Pablo eluuquefui tañi femal Jehová tañi ayüqueel, huelu quiñeque mu ca huelulcauquefui (1 Cor. 9:27). Pablo ngüneduamlu tañi ca huiño huesa femün, ¿rume hueñancüquepelafui?
¿CHEM QUELLUEYU PABLO HUESA DUAMCÜLEN MU?
8. Pablo, ¿chem quelluquefeyu tañi doi cüme femal?
8 Pablo chumngechi huirintucui tañi carta mu, raquiduamquefui chumngechi Chau Ngünechen ñi nehuen quelluafeyu quisu ca caquelu cristiano ñi chaftuafiel tañi huesaque raquiduam ca ñi doi cüme chengeal (Rom. 8: 13; Gál. 5:16, 17). Fentren rupa feipicünui chem huesaque dungu ñi famentuafiel pu cristiano ñi ayühulafiel Jehová (Gál. 5:19-21, 26). Pablo raquiduamquefui chem dungu mülefui tañi doi cüme femal, ¿quintuquepelafui ngülam Chau Dios tañi Dungu mu tañi quelluaeteu? Pablo ngülamtuquelafui caquelu müten, quisu ca inaquefui ti ngülam.
9, 10. ¿Chem quellueyu Pablo ñi ayüucüleal? (Efesios 1:7; ca inaduamnge ti adentun).
9 Pablo quiñeque mu huesa duamquefui, huelu fentren dungu quelluquefeyu tañi ayüucüleal. Pablo rume ayühui allcütun mu ñi cüme amulen cañpüle müleyechi trahunche (2 Cor. 7:6, 7). Ca tañi cümeque hueni rume ayühulquefeyu (2 Tim. 1:4). Pablo ca quimniefui tañi hueniyefiel Jehová ca tañi ayühulquefiel, feimu ca ayüucülefui (2 Tim. 1:3). Carcelconcülefulu rume Roma mu, feipifi pu cristiano: “Ñidol ñi duam mu rumel ayüucülequeaimün” (Filip. 4:4). Femngechi feipilu Pablo, quimfali ñi raquiduamcülenon ñi huesa duamcülen mu müten. Pablo contueteu mu huesaque raquiduam, pürüm raquiduamquefui chem dungu tañi ayühulqueteu.
10 Ca quiñe dungu quellueyu Pablo tañi ayüucüleal. Raquiduamquefui ñi piuqueyenieteu Jehová ca ñi hulün tañi Fotüm tañi montulaeteu (Gál. 2:20; papeltunge Efesios 1:7). Femngechi maneluhurpui Jehová tañi perdonaqueteu tañi culpan Jesús tañi lan mu (Rom. 7:24, 25). Com tüfa quellueyu Pablo ñi cüdahuelfiel Jehová ayühunquechi (Heb. 9:12-14).
Quiñeque mu Pablo huesa duamquefui ñi femün mu cuifi, huelu raquiduamlu Jesús ñi hulün ñi mongen doi cüme duamtui. (Inaduamnge parrafo 9, 10).
11. Pablo ñi rupan, ¿chumngelu yafültucuqueiñmu?
11 Pablo reque, cüdautuafuiñ taiñ hueñancülnoafiel Jehová taiñ feipin mu, taiñ femquen mu ca taiñ raquiduam mu. Feimu, quiñeque mu iñchiñ turpu ayühulnoafilu Jehová troquihuafuiñ. Quiñe üllcha lamngen Elizac pingelu feipi: “Rume yafültucuqueneu Pablo tañi rupan. Iñche reque, huesa duamcülequefui quiñeque mu, feimu quimnien iñche müten tañi rupaquenon tüfachi dungu mu. Jehová quimniei ñi chum duamcülen tañi pu serfiqueteu”. Huesa duamcülefuliyiñ rume, ¿chem chumafuiñ taiñ ayühulafiel Jehová ca iñchiñ taiñ ayüucüleal Pablo reque? Peafiyiñ.
¿CHEM QUELLUAIÑMU TAIÑ AYÜUCÜLETUAL?
12. ¿Chem chumaiñ taiñ doi ayüucüleal?
12 Femaiñ cümeque dungu taiñ püllecontuafiel Jehová. Raquiduamnge tüfa: doi cüme duamqueiñ iliyiñ iyael taiñ cümelcaqueteu, femliyiñ pichiquen ejercicio ca cüme umautuliyiñ. Ca femngechi, cüme duamaiñ femliyiñ cümeque dungu taiñ hueniyeafiel Jehová: papeltuafiyiñ Biblia fill antü ca amuldunguaiñ, ngüneduamaiñ chem taiñ chillcatual trahun mu ca coneltuaiñ trahun mu. Fentecünunoliyiñ taiñ femal com tüfachi dungu, raquiduamtuculayafiyiñ huesaque dungu, fei doi ayüucüleaiñ (Rom. 12:11, 12).
13, 14. Quiñeque peñi ca lamngen püllecontufiel mu Jehová, ¿chumngechi quelluqueyu?
13 Peaiñ ñi rupan peñi Juan. Contueyu cancer 39 tripantu nielu. Niequefui quiñe fotüm 3 tripantu müten nielu. Ellaca mu, rume huesa duamcülefui. Feipi: “Petu fütachengelan, feimu cutrannoafulu iñche”. ¿Chem quellueyu tañi doi cüme duamtual? Fei feipi: “Cansalefulu rume, tañi pu che iñchiñ amuquefuiñ com trahun mu, amuldunguquefuiñ ca trür estudiaquefuiñ fill semana. Cüdaungefulu rume, femquefuiñ com tüfachi dungu. Huesa dungu rupai che, quimquelai tañi chumal, huelu pürüm nehuentucuqueyu Jehová ca pengelelqueyu tañi piuqueyeteu. Femngechi dungu mu rupan iñche”.
14 Eliza, taiñ nütramcapeel parrafo 11 mu feipi: “Amun mu trahun mu ca chillcatufiel mu Biblia, doi maneluuquen Jehová tañi allcütuqueteu ca tañi rume piuqueyenieteu. Tüfa ta rume ayühulqueneu”. Quiñe peñi huitranmaquefilu pu trahunche Nolan pingei, tañi domo Diane pingei. Fei feipi: “Tañi domo iñchiu llellipuniequefiyu Jehová, chillcatuqueyu Biblia, amuqueyu trahun mu, ca amuldungulequeyu ngañhuadcüleliyu rume. Jehová quelluqueiñmu taiñ ayüucüleal. Huesa duamcülen mu iñchiu, loncontucuqueyu Jehová tayu quelluaeteu ca tayu cümelcayaeteu. Quimnoliyiñ rume chumngechi ñi femal, huelu maneluucüleiñ ñi femal”.
15. ¿Ca chem femafuiñ hueñancüleliyiñ? ¿Chumngechi trürümafuiñ feiti cutran furilelu?
15 Amulele taiñ hueñancülen, ca quiñeque dungu femafuiñ chi. Raquiduamnge tüfa mu: cutran furilelmi, pichi cansatuafuimi chi, feita quelluafeimu. Huelu femnole, felecayan müten pilayafuimi, quintuafuimi tami tremotual ca pemeafuimi quiñe doctor. Ca femngechi amulele taiñ hueñancülen, quintuaiñ taiñ cüme duamcületual. Quintuafuiñ Biblia mu ca taiñ publicacion mu chumngelu taiñ huesa duamcülen ca chem quelluafeiñmu taiñ ayüucüleal. Ca feipiafuiñ quiñe peñi cam lamngen taiñ cüme ngülamtuaeteu. ¿Ca chem quelluafeiñmu? Peafiyiñ.
16. ¿Chem quelluaiñmu taiñ quimal chemu taiñ huesa duamcülen? (Salmo 139:1-4, 23, 24).
16 Llellipuafuiñ Jehová taiñ quimal chem taiñ huesa duameleteu. Ti rey David quimniefui Jehová tañi cüme quimnieteu, feimu llellipufi ñi quimal chem dungu tañi tüngnienoeteu (papeltunge Salmo 139:1-4, 23, 24). Iñchiñ ca llellipuafuiñ Jehová taiñ quimal chumngelu taiñ huesa duamcülen ca chem femafuiñ taiñ doi cüme duamtual. Ca ramtuhuafuiñ: “¿Cheu tuhui tañi hueñancün? ¿Mülei quiñeque dungu rumel huesa duamelqueteu? Contueteu huesa duamün-ngechi raquiduam, ¿famentufemquefiñ cam femquelan?”.
17. ¿Chem chillcatuafuiñ taiñ ayüucüleal? (Ca inaduamnge ti adentun).
17 Chillcatuafuiñ quiñeque dungu taiñ quelluaeteu taiñ rupamequen mu iñchiñ. Ngüneduamafuiñ quiñeque dungu taiñ doi cüme quimal ñi chumngen Jehová. Apostol Pablo rume quellueyu raquiduamal Jesús ñi lan mu ca Jehová ñi perdonachequen mu. Iñchiñ ca femngechi femafuiñ. Taiñ publicacion mu, doi ngüneduamafuiñ Jehová tañi cutranpiuqueyechequen, tañi perdonachequen ca tañi rüf piuqueyechen. Fei huirintucuafuiñ chem publicacion doi quelluafeiñmu ca elcünuafiyiñ cheu taiñ pürüm peafiel. Femngechi hueñancürumeliyiñ, chillcatufemafiyiñ ca raquiduamaiñ chem quimeltun entuafuiñ taiñ doi ayüucületual (Filip. 4:8).
Chillcatuafuimi quiñeque dungu tami yafültucuaeteu. (Inaduamnge parrafo 17).
18. ¿Chem quelluqueyu quiñeque cristiano?
18 Lamngen Eliza taiñ deu nütramcapeel, eluhui tañi doi ngüneduamal Job tañi mongen. Fei feipi: “Contueneu fentren huesaque dungu, Job reque. Quisu hueñancülequefui tañi huesa rupamequen mu. Quimlafui chumngelu ñi cutrancaumequen, huelu maneluucülequefui müten Jehová mu” (Job 42:1-6). Diane, taiñ nütramcapeel parrafo 14 feipi: “Tañi füta iñchiu papeltuquefiyu ti lifru Acerquémonos a Jehová. Chau Jehová quimeltuqueiñmu taiñ inayentuafiel, feimu mañumniefiyiñ. Huesa duamcüleliyu tayu huelulcauquen mu, raquiduamqueyu Jehová taiñ adnieteu taiñ doi cüme chengerpual. Fotra reque feleiñ tañi cuhu mu. Raquiduamfiel mu tüfa, doi hueniyefiyiñ” (Is. 64:8).
JEHOVÁ QUELLUAIÑMU TAIÑ AYÜUCÜLEAL
19. Hueñancüleliyiñ rume quiñeque mu, ¿chem quimnieiñ?
19 Inafiliyiñ rume com taiñ peel feitachi troquiñ mu, quiñeque mu ca huesa duamafuiñ. Huelu Jehová tañi quellun mu elcünuafuiñ taiñ huesa duamcülen ca tüngduamafuiñ. Hueñancüleliyiñ rume quiñeque mu, doi mülequei antü taiñ ayüucülen, quimnielu cai iñchiñ taiñ hueniyefiel Jehová ca taiñ ayühulquefiel.
20. Huesa duamcülen mu, ¿chem eluucüleaiñ taiñ femal?
20 Quiñeque mu huesa duamafuiñ taiñ femün mu cuifi, taiñ huesa rupamequen mu cam taiñ huelulcauquen mu. Huelu eluucüleaiñ taiñ chaftuafiel taiñ huesa duamcülen, chem no rume catrütuquilpe taiñ ayühun. Jehová quelluaiñmu llemai taiñ cüme duamcüleal (Sal. 143:10). Rume ayüqueiñ taiñ müleal tati hue mapu mu. Feichi mu, chem no rume hueñancül-layaiñmu. Ngehuelayai huesa duamcülen, fill antü huitran mu müten ayüucüleaiñ taiñ serfiniefiel mu Jehová.
ÜLCANTUN 34 Com tañi piuque mu miyahuan
a Tüfachi troquiñ mu nütramcayaiñ feichi pu che quiñeque mu hueñancülelu ca huesa duamcülelu. Nütramcalayaiñ feichi pu che alüñma nielu depresion ca duamnielu ñi peaeteu doctor.
b Pablo cüme pelohuelafui chi. Femfule, cüdautupelafui ñi huirintucual ñi carta ca ñi amuldungumeal caque mapu mu (Gál. 4:15; 6:11). Cam Pablo rume raquiduamcülefui chi ñi huesa pieteu mu quiñeque coilaque quimeltuchefe (2 Cor. 10:10; 11:5, 13). Quimlaiñ chemu Pablo feipi ñi nien “quiñe chacai reque”, huelu rume cutrancaquefeyu.
c Tüfachi troquiñ mu, ca üi tuculelngei ta quiñeque che.