¿Chumngelu duamnieiñ Jesús taiñ montuleteu?

1, 2. ¿Chemu duamnieiñ taiñ montulngeal? (Romanos 7:22-24; ca inaduamnge ti adentun).

RAQUIDUAMAIÑ tüfa: quiñe edificio teifücaule, quiñe che miñche mu mülelu petu mongelei, huelu trañmalei. Duamniei ñi entungeal. Pepi femlai chem no rume, huirarafui müten ñi quellungeal.

² Ca quisuque iñchiñ femngechi feleiñ, ¿chumngelu feipiafuiñ? Adán allcütunofilu Jehová, culpafengetui. Adán meu tuulu cai iñchiñ, com culpafengetuiñ. Tati culpan trañmaleiñmu reque, tati huentru reque trañmalelu miñche edificio mu. Feimu ca duamnieiñ ñi quellungeal. Ti apostol Pablo feipi chum duameleiñmu ti culpan (papeltunge Romanos 7:22-24). “¡Aungen mai iñche! Tüfachi cuerpo yenieneu ñi layal” pi. Quimniefui ñi layal ti culpan ñi duam mu, feimu trañmalelu reque troquihui (Rom. 6:23). Iñchiñ ca duamnieiñ ñi montulngeal ti culpan ca lan dungu meu.

3. ¿Chumngechi cümelcaqueiñmu Jesús tañi lan?

³ Pablo ca elueiñmu maneluhun, feipi: “¿Inei montulaeneu? ¡Taiñ Ñidol Jesucristo ñi duam mu mañumquefiñ ta Chau Ngünechen!” (Rom. 7:25). Feita mu Pablo nütramcamequefui Jehová taiñ montuleteu Jesús tañi lan mu. ¿Chumngechi cümelcaqueiñmu Jesús ñi lan? 1) Jehová perdonaqueiñmu taiñ culpan, 2) maneluucüleiñ taiñ culpafengehuenoal, 3) cüme hueniyeafuiñ Jehová. Tüfachi troquiñ mu, ngüneduamaiñ feitachi 3 dungu. Fei quelluaiñmu doi piuqueyeafiel Jehová ca doi mañumnieafiel Jesús taiñ montuleteu taiñ culpan mu (Rom. 15:13; Col. 1:14).

JESÚS ÑI LAN MU, JEHOVÁ PERDONAQUEIÑMU

4, 5. ¿Chumngelu com iñchiñ duamnieiñ Jesús taiñ montulaeteu? (Eclesiastés 7:20).

⁴ Taiñ culpafengen mu, duamfalfui Jesús tañi layal taiñ perdonayaeteu Jehová. Com iñchiñ huelulcauqueiñ taiñ feipin mu ca taiñ femquen mu (papeltunge Eclesiastés 7:20). Mülei fütraque culpan. Quiñeque tüfa ti langümchen ca ti ñihuañpen dungu. Moisés tañi ley feipifui ti ñihuañpefilu ñi afcadi ca ti langümchelu, mülefui ñi langümngeal (Lev. 20:10; Núm. 35:30, 31). Com che conquelai femngechi fütra culpan mu, huelu ca culpaquei. Culpayafuiñ taiñ feipin mu cütu (Sant. 3:2). Ti salmista David feipi: “Cuñiutucuucülean tañi femquen meu, femngechi tañi culpanoal tañi dungun meu” (Sal. 39:1).

⁵ ¿Feipiqueimi quiñe dungu tami feipinoafel? Deu tami femün quiñe dungu, ¿femürquenoafulu iñche piqueimi? Com iñchiñ rupayafuiñ femngechi dungu mu. Biblia feipi: “‘Iñchiñ culpaquelaiñ’ feipiliyiñ, quisu ngünencaumequeiñ. Fei feyentuquelafiyiñ ti rüf dungu” (1 Juan 1:8).

6, 7. ¿Chumi Jehová taiñ perdonayaeteu? (Ca inaduamnge ti adentun).

⁶ Jehová tañi norngen mu re rulpacünulayafui taiñ culpan, mülefui ñi femal quiñe dungu. Fei hultucui ñi Fotüm taiñ perdonayaeteu (Efes. 1:7). Huelu perdonafeliyiñmu rume Jehová, quisu ayüquelai taiñ huesa femal (Is. 59:2).

⁷ Moisés tañi ley feipilefui tati pu Israel che ñi chalintucual culliñ tañi culpan mu (Lev. 4:27-31; 17:11). Feichi chalintucun pengeli tati pu che ñi duamniefel doi fütra chalintucun, Jesús ñi chalintucun llemai. Jesús hul-lu tañi mongen elufi ta Jehová chem tañi duamniefel taiñ perdonayaeteu taiñ culpan. Pablo quimtucui fente tañi cümelcafiel pu che Jesús tañi lan. Tati pu cristiano mülelu Corinto mu huesaque dungu femquefuingün petu tañi cristianongenon, feimu Pablo feipieyu: “Lifngetuimün Chau Ngünechen ñi nehuen mu, dullicünulelngeimün ta Chau Ngünechen, ca nor che pingetuimün taiñ Ñidol Jesucristo ñi üi meu” (1 Cor. 6:9-11).

8. Püllelepale ti trahun ñi acordangeal Jesús tañi lan, ¿chem raquiduamaiñ?

⁸ Püllelepale ti trahun ñi acordangeal Jesús ñi lan tüfachi tripantu, raquiduamaiñ chumngechi cümelcaqueiñmu Jehová taiñ perdonaqueteu. Quimnielu am iñchiñ Jesús ñi hulün tañi mongen, ngelai tañi hueñancümequeal taiñ culpan mu cuifi. Huelu cüdautuquefiyiñ chi taiñ deu perdonaeteu Jehová. Feipiafuiñ “Jehová perdonayafeneu chi, huelu iñche quimlan tañi perdonahual”. Femngechi raquiduamliyiñ, loncontucuaiñ Jehová quimniei inei tañi perdonayafiel ca elfalcünufi Jesús taiñ juzgayaeteu. Huelu elfalcünulaeiñmu iñchiñ taiñ dullial inei mülei ñi perdonangeal. Biblia feipi miyauliyiñ Chau Dios ñi rüpü mu, “tañi Fotüm Jesús ñi mollfüñ liftuñmaqueiñmeu com taiñ culpan” (1 Juan 1:6, 7). Feyentuquefiyiñ com ñi quimeltuel Biblia, feimu tüfa mu ca feyentuafuiñ. Loncontucunieaiñ: Jesús hul-lu tañi mongen elufi ta Jehová chem tañi duamniefel taiñ perdonayaeteu taiñ culpan. Ca Biblia feipilei Jehová eluucülei taiñ perdonayaeteu (Sal. 86:5).

JESÚS ÑI LAN MU, MANELUUCÜLEIÑ TAIÑ CULPAN CHENGEHUENOAL

9. Biblia mu, ¿chem cüpa feipi ti culpan? (Salmo 51:5).

⁹ Biblia feipilu ti culpan feita feipilei taiñ huelulcauquen. Ca feipi choyüngelu müten iñchiñ, culpafengeiñ (papeltunge Salmo 51:5). Taiñ culpafengen mu eluucülequeiñ reque taiñ huesa femal, huelu feica müten no. Ca cutranürpuqueiñ, fücharpuqueiñ ca larpuqueiñ. Com tüfa quimeltueiñmu chumngelu quiñe hue pichiche cutranürpuafui ca larpuafui petu ñi femnon huesa dungu rume. Ca quimeltueiñmu chemu cutrancahuafui ca larpuafui com che, cüme chengefule rume. Feichi dungu mu com coneltuleiñ Adán meu cai tuulu iñchiñ.

10. Adán ca Eva culpan chengetulu engu, ¿chum duami?

¹⁰ ¿Chum duamingu chi Adán Eva engu culpan chengetulu? Ngüneduamlu müten tañi inanofiel Jehová tañi ley, huesa duamingu, fei coni tañi cutrancahun engu (Rom. 2:15). Femngechi quisu tañi raquiduam engu fütra caletui, fei yehuentucuhuingu, tucutuhuingu tapül anümca mu ca ellcahuingu Chau Dios mu (Gén. 3:7, 8). Feichi mu huesa duamingu, yehueingu ca fill raquiduamcüleingu, com tañi mongen mu huesa duamcületuingu (Gén. 3:16-19).

11. ¿Chum duamelqueiñmu taiñ culpafengen?

¹¹ Adán ca Eva mu tuulu am iñchiñ, ca femngechi huesa duamqueiñ ca cutrancauqueiñ taiñ culpafengen mu. Tunte yafüluuliyiñ rume ñi doi cüme amuleal taiñ mongen, quiñeque dungu pepi norümlayafuiñ. Biblia feipi Adán ca Eva culpalu, com tañi pu cüpanche condenangei tañi rupayal cüdaungechi dungu mu (Rom. 8:20). Fachantü penieiñ ñi rüfngen tüfa. Fentren gobierno ayüquei ñi cuñiutucuafiel ti mapu, ñi afal ti hueichan, quehuan dungu ca filla dungu. Huelu, ¿chum tripaquei? Pepi huechurpuquelaingün. Huelu Jesús tañi hulün tañi mongen com iñchiñ mu, rüf maneluhun eluqueiñmu.

12. ¿Chem maneluhun dungu nieiñ Jesús tañi lan mu?

¹² Jesús ñi hulün mu ñi mongen, maneluucüleiñ taiñ lifrengetual ti culpan ca lan dungu mu (Rom. 8:21). Ti hue mapu mu, puhuai chi antü taiñ culpafengehuenoal, femngechi cutranhuelayaiñ ca huesa duamhuelayaiñ ca yehuentucuulayaiñ huesaque femün mu. Jesús ngünenietule mapu, quelluafi com che tañi cüme cuidayafiel mapu ca ñi doi tüngcületual (Is. 9:6, 7).

13. ¿Ca chemu raquiduamcüleafuiñ petu taiñ amunon ñi acordayafiel Jesús tañi lan?

¹³ Raquiduamaiñ chumletual taiñ mongen culpafe chengehuenoliyiñ. Fill antü pulihuen huitraliyiñ, iñchiñ ca taiñ pu che com cüme feletuaiñ, cutranhuelayaiñ, fillalehuelayaiñ ca lahuelayaiñ. Fachantü petu acunolu rume feichi cümeque dungu, ca tüngcüleafuiñ raquiduamliyiñ taiñ maneluhun mu (Heb. 6:18, 19). Raquiduamcüleliyiñ Jehová tañi feipicünuel mu, doi maneluhuaiñ ñi femtripayal ca nehuentucuaiñmu chem huesaque dungu rume rupafuliyiñ. Rüf maneluuqueiñ Jehová “ñi fürenequefiel feichi pu che tañi serfiqueteu com piuque mu” (Heb. 11:6). Jesús tañi lan mu müten maneluucüleiñ fachantü ca cüpalechi antü mu.

JESÚS TAÑI LAN MU, CÜME HUENIYETUAFUIÑ JEHOVÁ

14. Culpalu Adán Eva engu, ¿chumngechi yeucületuiñ Jehová iñchiñ?

¹⁴ Adán ca Eva ñi culpan mu, com pu che choyüngelu müten püntülei reque Chau Dios mu (Col. 1:21). Feimu Biblia feipi com tati pu che caiñeyeuquei reque Chau Dios engün (Rom. 8:7, 8). ¿Chemu feipiafuiñ? Jehová am norngelu, re femngechi rulpacünuquelafi ti culpan dungu. Biblia mu, Jehová feipingei: “Rume lifngei tami nge tami peal ti huesalcalelu, ayüquelaimi ñi müleal huesaque dungu” (Hab. 1:13). Culpafengelu am iñchiñ, camapuleiñ reque Chau Dios mu. Iñchiñ taiñ duam mu fülconlayafuiñ quisu mu, Jesús tañi hulün mu müten tañi mongen hueniyerpuafuiñ Jehová.

15. Jesús tañi lan, ¿chumngechi quellueiñmu taiñ cüme hueniyetuafiel Jehová?

¹⁵ Biblia feipi: “Jesucristo quiñe chalintucun reque felei taiñ cümelcautual Chau Ngünechen iñchiñ, feimu rulpacünuñmangeiñ taiñ culpan” (1 Juan 2:2). Jesús tañi lan, ¿chumngechi quellueiñmu taiñ hueniyetuafiel Jehová? Jesús hulün mu ñi mongen, culli reque taiñ culpan mu, femngechi Jehová eluhuafui com che tañi hueniyeaeteu (Rom. 3:23-26). Jehová rume maneluucülefui Jesús tañi hulal tañi mongen, feimu nor che troquifi tañi pu serfiqueteu petu ñi lanon rume ta Jesús (Gén. 15:1, 6; Is. 46:10). Felei llemai, Jesús tañi lan mu müten hueniyerpuafuiñ Jehová.

16. Petu taiñ amunon tañi acordayafiel Jesús ñi lan, ¿ca chem dungu raquiduamafuiñ? (Ca inaduamnge ti adentun).

¹⁶ Raquiduamnge chumngechi cümelcaeimu tami cüme hueniyefiel Jehová. Iñchiñ “Chau” piafuiñ ta Jehová chumngechi taiñ quimeltueteu Jesús (Mat. 6:9). Ca fentren rupa, hueni piafuiñ ta Jehová. Rume cüme dungu taiñ femngechi feipiafiel ta Jehová. Huelu rumel mülei taiñ femal ñom piuque mu ca fütra yamün meu. ¿Chemu? Huelulcauquelu am iñchiñ. Feimu quisu taiñ duam mu hueniyelayafuiñ ta Jehová, Jesús mai tañi duam mu femafuiñ. Jehová llemai huli tañi Fotüm taiñ cümelcautual (Col. 1:19, 20). Feimu cüme hueniyeafuiñ Jehová culpafengefuliyiñ rume.

JESÚS TAÑI LAN MU, JEHOVÁ PENGELI ÑI CUTRANPIUQUEYECHEN

17. Jehová hulün mu tañi Fotüm, ¿chumngechi pengeli taiñ cutranpiuqueyeteu? (Efesios 2:4, 5).

¹⁷ Jehová hulün mu tañi Fotüm, pengeleleiñmu taiñ cutranpiuqueyeteu. “La reque felefuiñ taiñ culpan mu, huelu Chau Ngünechen elueiñmu mongen” (papeltunge Efesios 2:4, 5). Feichi huentru reque trañmalelu quiñe edificio mu, pu ñom piuquengelu quimnieingün ñi duamnieel tañi montulngeal (Hech. 13:48). Feimu eluuqueingün tañi quellungeal. Jehová ngüneduamquefi tüfachi pu che, feimu yelelquefi tañi cümeque dungu. Femngechi tañi quimürpufiel engün Jehová, Jesús ca chumngechi montulqueiñmu tañi lan (Juan 17:3). Satanás raquiduamfui chi Adán ca Eva ñi feyentunon mu ñi femtripanoal Jehová tañi ayüqueel, huelu femlai llemai.

18. ¿Chem doi falin dungu meu Jehová huli tañi Fotüm?

¹⁸ Cümei taiñ raquiduamal chumngechi taiñ montulqueteu Jesús tañi lan, huelu mülei doi falin dungu. Jehová huli tañi Fotüm ñi huiñoldungual Huecüfü ñi huesa feipiel Edén mu (Gén. 3:1-5, 15). Femngechi Jehová incafi tañi üi ca pengeli Huecüfü tañi coilangen. Ca montulqueiñmu taiñ culpan chengehuenoal ca taiñ lahuenoal, femngechi pengeli tañi fütra piuqueyechen. Ca fente tañi piuqueyechefengen, culpafengefuliyiñ rume, Jehová eluqueiñmu taiñ pengelal Huecüfü tañi coilatufengen (Prov. 27:11). Müna mañumcüleiñ Jesús tañi lan, ¿chumngechi pengelafuiñ? Peafiyiñ cüpalechi troquiñ mu.