23-29 MARZO, 2026
ÜLCANTUN 18 Mañumcüleiñ tati montulchen mu
¿Chumafuimi eimi tami mañumtuafiel Jesús tañi lan?
“Cristo taiñ piuqueyeteu ngünenieiñmu” (2 COR. 5:14).
¿CHEM QUIMAIÑ?
Chumngechi mañumafuiñ Jesús ñi lan iñchiñ mu.
1, 2. Jesús am hul-lu tañi mongen iñchiñ mu, ¿chumafuiñ iñchiñ? (2 Corintios 5:14, 15; ca inaduamnge ti adentun).
RAQUIDUAMNGE, hue montulngeimi quiñe trananagchi edificio mu. Femngelmi, ¿chum duamafuimi? ¿Müna mañumniepelayafuimi tati che tami montuleteu? ¿Feipipelayafuimi tami rumel acordanieal ñi femün eimi mu?
2 Ñi feipin rupachi troquiñ mu, iñchiñ ca duamnieiñ taiñ montulngeal tati culpan dungu mu ca lan dungu mu. Femngechi femi ta Jehová hul-lu tañi Fotüm lapayal iñchiñ mu. Jesús tañi lan mu, perdonangeafuiñ taiñ culpan, maneluucüleiñ taiñ culpan chengehuenoal ca cüme hueniyeafuiñ Jehová. Femngechi rumel mongeleafuiñ tati hue mapu mu. Jesús hul-lu tañi mongen com iñchiñ mu, pengeli taiñ rume piuqueyeteu. Petu cüpanolu rume mapu mu, Jesús deu piuqueyeniequefui ta che (Prov. 8:30, 31). Apostol Pablo feipi: “Cristo taiñ piuqueyeteu ngünenieiñmu” (papeltunge 2 Corintios 5:14, 15). ¿Chem pifel tüfa? Raquiduamliyiñ fente taiñ piuqueyenieteu Jesús, iñchiñ ca eluucülequeiñ taiñ pengelal taiñ mañumcülen.
Tami montuleteuchi che mañumafuimi, doyelchi mai mañumtuafuimi Jehová ca Jesús taiñ montuleteu culpan ca lan dungu mu. (Inaduamnge parrafo 1, 2).
3. ¿Chemu caquerumequei taiñ mañumtuquen Jesús tañi lan mu?
3 ¿Chumngechi pengelafuimi eimi tami mañumtuniefiel Jesús tañi lan? Caquerumeafui chumngechi taiñ mañumtuafiel, ¿chemu am? Quiñeque petu estudiamequeingün Biblia, caquelu deu fautizahuingün, ca quiñeque püntüleingün trahunche mu. Tüfachi troquiñ mu, ngüneduamaiñ chumafui caque quiñeque tüfachi pu che tañi pengelal ñi mañumcülen.
¿CHUMAFUI PU ESTUDIAQUELU BIBLIA?
4. ¿Chem ngüneduamüñmaquefi Jehová tati pu papeltuquelu Biblia?
4 Eimi, ¿papeltuqueimi Biblia? Feita pengeli Jehová ayüniei tami hueniyeaeteu ca quelluqueimu tami fülconal quisu mu (Juan 6:44; Hech. 13:48). Biblia feipi Chau Dios ñi ngüneduammequefiel che tañi piuque. ¿Chem pifel tüfa? Quisu ngüneduamquei chumngechi tami cüdautuquen tami quimafiel ca ayüuquei tami cüme elcünuquetun tami mongen (Prov. 17:3; 27:11). Jesús tañi lan mu cüme hueniyeafuimi Jehová (Rom. 5:10, 11). Piuquentucunieafiyiñ tañi femün iñchiñ mu.
5. Pu papeltuquelu Biblia, ¿chumngechi inayafui ñi feipin Filipenses 3:16?
5 ¿Chumngechi pengelafuimi tami mañumcülen Jesús tañi lan? Quiñe dungu, tami inayafiel chem pin ta Pablo: “Tunte amulele rume taiñ serfiquefiel ta Chau Dios, amulepe taiñ femmequen” (Filip. 3:16). Feimu, chem no rume catrütulayaimu tami amuleal feitachi rüpü yenielu afnoachi mongen (Mat. 7:14; Luc. 9:62).
6. ¿Chumafui pu estudiaquelu Biblia cüdautule ñi inayal Biblia ñi quimeltun? (Deuteronomio 30:11-14; ca inaduamnge ti adentun).
6 ¿Cüdautuqueimi tami inayafiel tami hue quimelchi dungu Biblia mu? Femülmi, doi papeltuafimi feichi quimeltun, ca llellipuafimi Jehová tami quelluaeteu tami doi cüme quimürpual (Sal. 86:11). Amulelmi tami cüdautumequefiel, pichiñma fentecünuafuimi. Huelu fentecünulayaimi tami papeltuafiel Biblia, ñochiquechi quimürpuafimi. ¿Cüdautulmi cai tami famentuafiel Jehová tañi ayüquenoel? ¿Chumafuimi? Raquiduamaimi, Jehová chumcaunorume feipilayaiñmu taiñ pepi femnoafel. Eimi inayafuimi llemai Jehová tañi feipin (papeltunge Deuteronomio 30:11-14). Quisu feipieiñmu taiñ quelluaeteu (Is. 41:10, 13; 1 Cor. 10:13). Fentecünulayaimi. Müte raquiduamlayaimi tami cüdautuqueelchi dungu mu, doi mai raquiduamaimi com tati cümeque dungu ñi femün Jehová eimi mu. Quiñe tüfa, ñi hulün tañi Fotüm eimi tami duam mu. Doi piuqueyerpufilmi Jehová, doi cüdautulayaimi tami inayafiel ñi feipin (1 Juan 5:3).a
Jehová feipiquelaeiñmu taiñ pepi femnoel, quelluqueiñmu taiñ inayal tañi feipin. (Inaduamnge parrafo 6).
7. Tati pu hueche nielu testigongechi chau, ¿chem ngüneduamafui?
7 Ca mülei caquelu estudiaquelu Biblia. Tüfachi pu hueche tañi pu chau testigongei ca quimeltulelqueyu ti rüf dungu. Pu chau meu rume falin-ngei ñi quimeltulelafiel Biblia tañi pu yall. ¿Chem mülei ñi femal tati pu yall cai? Biblia feipi: “Fülconmün Chau Ngünechen mu, fei fülconai ta eimün meu” (Sant. 4:8; 1 Crón. 28:9). Feimu hueche, eimi eluulu tami hueniyeafiel Jehová, fei ca eluuquei tami hueniyeaeteu. Jehová ngüneduamquelaeimu tami familia ñi duam mu, doi mai eimi quisu ngüneduamqueimu. Jehová huli tañi Fotüm ca eimi mu, femngechi eluhui tami hueniyeaeteu (Rom. 5:1, 2). Feimu petu tami amunon ñi acordangeal Jesús tañi lan, raquiduamtucuafimi fente ñi falin-ngen ñi femün Jehová ca Jesús eimi mu. Feita quelluaimu tami dullial chem tami chumal tami mongen mu ca chumngechi pengelafuimi Jehová tami mañumniefiel.b
¿CHUMAFUI PU DEU FAUTIZAULU?
8. Pu deu fautizaulu, ¿chumngechi pengelquei ñi mañumcülen?
8 Iñchiñ deu fautizaulu pengeliyiñ taiñ mañumniefiel Jehová ñi hulün tañi Fotüm. Hunelu mu, pülleconiyiñ Jehová mu ca cüme elcünutuiñ taiñ mongen taiñ ayühulafiel. Amuldunguquefiyiñ caquelu che. Hultucuiñ taiñ mongen Jehová mu ca fautizahuiyiñ. Ca serfiniefiyiñ Jehová caiñetungen mu rume (2 Tim. 3:12). Taiñ püntütripaquenon Jehová mu, pengelqueiñ taiñ piuqueyefiel Jehová ca taiñ mañumniefiel Jesús ñi hultucun tañi mongen (Heb. 12:2, 3).
9. Pu cristiano fautizaucülelu, ¿chemu mülei tañi cuñiutucuhual?
9 Iñchiñ taiñ deu fautizaucülen mülei taiñ cuñiutucuhual. ¿Chemu? Rupachi tripantu mu, ñochiquechi mañumhuelayafuiñ Jesús ñi hulün tañi mongen. Ngüneduamaiñ ñi rupan pu Éfeso cristiano. Jesús saquieyu tañi nehuentulen mu, huelu ca feipieyu: “Tüfachi dungu mu norümtuayu: piuqueyehuelafimi ta Chau Dios chumngechi tami piuqueyefel ellaca mu” (Apoc. 2:3, 4). Tüfa ñi feipin Jesús pengeli quiñe cristiano ñochiquechi piuqueyehuelayafui ta Jehová. Llellipuafui, amuafui trahun mu, amuldunguafui cütu, huelu femafui tañi huimtulen mu müten. Femlai tañi piuqueyefiel mu Jehová. ¿Chem femafuiñ femngechi rupafuliyiñ?
10. ¿Chumngechi inayafuiñ Pablo ñi feipifiel Timoteo? (1 Timoteo 4:13, 15).
10 Apostol Pablo ngülamtufi Timoteo ñi ngüneduamuhual chumngechi ñi poyequefiel Jehová, femngechi ñi femal com piuque mu (papeltunge 1 Timoteo 4:13, 15). ¿Iñchiñ cai? ¿Chumngechi inayafuiñ feichi ngülam? Ngüneduamaiñ chumngechi nehuentuleafui taiñ poyequefiel Jehová ca com piuque mu taiñ serfinieafiel (Rom. 12:11). Elantücünuaiñ taiñ doi cüme estudiayal taiñ amual trahun mu ca doi cüme allcütuaiñ. Ca estudiafiel mu Biblia, quintuaiñ cheu taiñ doi tüngcüleal, femngechi taiñ doi loncontucual taiñ estudiapeel. Chumngechi tati cütral ñi doi üicüleal, tuculelngequei doi fentren mamüll, ca femngechi femliyiñ com tüfachi dungu, doi mañumnieafiyiñ ñi femün Jehová ca Jesús iñchiñ mu. Doi püllelepale ti trahun ñi acordangeal Jesús tañi lan, raquiduamaiñ fente taiñ cümelcaqueteu Jehová taiñ coneltulen ñi troquiñche mu. Femliyiñ, doi mañumnieafiyiñ Jehová ñi hulün tañi Fotüm taiñ hueniyeaeteu.
11, 12. Cüdautuliyiñ taiñ com piuque mu serfiafiel Jehová, ¿niehuelaiñ tañi nehuen piafuiñ? ¿Chemu am? (Ca inaduamnge ti adentun).
11 Quiñeque mu, cüdautuafuiñ com piuque mu serfiafiel Jehová, huelu huesa duamlayaiñ ca Jehová eluhuelaeneu ñi nehuen pilayaiñ. Acordayaiñ Pablo ñi femquefel. Quiñeque mu müte eluucülelafui tañi amuldungual, huelu femquefui müten. “Tüfa tañi elfalcünungen müten” piquefui (1 Cor. 9:17). ¿Chem quimeltueiñmu ñi femün?
12 Quiñeque mu, Pablo müte ayülafui tañi amuldungual. Huelu femfulu rume, fentecünulai tañi amuldungual. Inayentuafiyiñ Pablo. Quiñeque mu müte eluucülenoliyiñ rume, amuleaiñ müten taiñ femal cümeque dungu. Llellipuafiyiñ Jehová taiñ eluaeteu taiñ yafüluucüleal ca taiñ cüpa cüdahual (Filip. 2:13). Femaiñ fillque dungu taiñ püllecontunieafiel Jehová. Inaliyiñ com tüfachi ngülam, doi piuqueyeafiyiñ Jehová ca com piuque mu serfiafiyiñ chumngechi taiñ femquefel.
Femaiñ fillque dungu taiñ pülleconal Jehová mu, quiñeque mu doi cüdautuliyiñ rume. (Inaduamnge parrafo 11, 12).
13. ¿Chumngechi ngüneduamniehuafuiñ?
13 Biblia feipi: “Quisu ngüneduamniehuaimün, fei quimaimün ñi nehuencülen tamün feyentun. Ngüneduamniehuaimün tamün chumngechi chengen” (2 Cor. 13:5). Taiñ inayafiel feitachi ngülam, ramtuhuafuiñ: “Tañi mongen mu, ¿doyümquepen mai tañi cüdahuelafiel Jehová? Tañi dulliqueel ñi cüme rupaleal, ¿pengelquepei mai tañi üdequefiel huesaque dungu? ¿Quelluntucuquepen mai tañi quiñeucüleal ti trahunche?” (Sal. 97:10; Mat. 6:33; Efes. 4:2, 3). Püllelepan mu ti trahun ñi acordangeal Jesús tañi lan, cümei taiñ raquiduamal tüfachi dungu mu. Raquiduamliyiñ com taiñ eluqueteu Jehová ca Jesús, rume mañumcüleiñ. Feimu eluucüleiñ taiñ femhuenoal quisu taiñ ayünieel, doi mai Cristo tañi ayünieel.
¿CHUMAFUI PU PÜNTÜLELU JEHOVÁ TAÑI FAMILIA MU?
14. ¿Chumngelu quiñeque peñi ca lamngen püntühuingün ti trahunche mu?
14 Quiñeque taiñ pu peñi, pu lamngen püntühuingün ti trahunche mu. Quiñeque engün yeniefuingün fentren tripantu tañi serfiquefiel Jehová. ¿Chumngelu püntühuingün? Quiñeque yafüngehuelai tañi serfiafiel Jehová tañi nien mu fillque duam (Luc. 21:34). Caquelu huesa duamingün tañi feipin ca tañi femün caquelu peñi ca lamngen (Sant. 3:2). Ca quiñeque huesa culpaingün chi, fei yehueleingün tañi quellungeal. Eimi püntülelmi ti trahunche mu, ¿chumafuimi? Ñi femün Jehová ca Jesús eimi mu, ¿chumngechi quelluafeimu? Peafiyiñ.
15. ¿Chem raquiduamquei Jehová pu püntütripalu mu? (Ezequiel 34:11, 12, 16).
15 Raquiduamnge chem raquiduamquei Jehová tati pu püntütripalu mu. Jehová illcutunielafi, petu acordaniefi. Pequefi quiñe nampiyauchi ufisa reque. Ca quintuquefi ñi ilelafiel ca quellufi ñi huiñotual fei meu (papeltunge Ezequiel 34:11, 12, 16). ¿Ca femngechi femquepei mai eimi mu? Felei llemai. Eimi tami papeltufiel tüfachi troquiñ pengeli tami petu piuqueyeniefiel Jehová. Acordange: Jehová ngüneduami tami cüme piuquengen, feimu cüpaleimu tañi troquiñche mu. Jehová petu ngüneduami cümeque dungu tami piuque mu, feimu ayüquei tami huiñotual tañi familia mu.
16. ¿Chem quelluafui pu püntütripalu ñi huiñotual Jehová mu? (Ca inaduamnge ti adentun).
16 Raquiduamnge ñi feipin ti folleto Jehová desea que vuelva: “Jehová quelluaimu llemai tami huiño hueniyetuafiel. Fei nehuentucuaimu tami chaftuafiel fillque raquiduam, tami tremoltuafiel reque tami piuque, perdonayaimu ca quelluaimu tami tüngcületual. Femngechi eluupelayaimi huiño serfiafiel Jehová tañi troquiñche mu”. Cafei pu loncolelu ayüquei tami quelluaeteu. Biblia feipi pu loncolelu “quiñe ellcaupeyüm reque feleaingün cürüf mu, quiñe chellcomtuhue tati cürüftucu mahun meu” (Is. 32:2). Tami pengelal tami falintufiel Jesús ñi hulün ñi mongen, ngüneduamnge chem femafuimi tami cümelcautual Jehová engu (Is. 1:18; 1 Ped. 2:25). Amuafuimi Trahunhue Ruca meu, nütramcayafuimi quiñe loncolelu tami cüpa huiñotun Jehová mu. Fei pepicayafui tami quimelelngeal Biblia tami quelluaeteu. Eluhulmi tami huiñotual Jehová mu tami mañumtuafiel, fei quelluaimu llemai.
Ramtuunge: “¿Chumafun tañi cümelcautual Jehová iñchiu?”. (Inaduamnge parrafo 16).
¿CHUMAIMI EIMI?
17, 18. Püllelepale ñi acordangeal Jesús ñi lan, ¿chem femafuiñ?
17 Jesús feipi Chau Dios “hulcünui tañi quiñen Fotüm. Femngechi tuchi feyentule quisu meu, apümcangelayai. Huelu mai nieai rumel mongen” (Juan 3:16). Jesús tañi lan mu, Jehová lifrenentueiñmu tati culpan mu ca lan dungu mu, fentecünulayaiñ taiñ falintuafiel ñi femün (Rom. 3:23, 24; 2 Cor. 6:1). Püllelepale ñi acordangeal Jesús ñi lan, eluhuafuiñ taiñ raquiduamal Jehová ca Jesús taiñ fente piuqueyeteu. Feita quelluaiñmu taiñ pengelal fente taiñ mañumcülen.
18 ¿Chumngechi pengelaimi tami mañumcülen? Com trürlayafui chumngechi taiñ pengelal taiñ mañumcülen Jesús tañi lan. Jehová cümelcayafi tañi femquen com tañi pu che tañi femhuequenon quisu tañi ayünieel, doi mai femquen Cristo tañi ayünieel (2 Cor. 5:15).
ÜLCANTUN 14 Püramyengepe taiñ Lonco Ülmen Jesús
a Tami inayal tami quimürpumequen Biblia mu, peafimi ti huichulechi dungu feipilelu “Tami femafel”. Tüfa mülei aflu caque quiñeque quimeltun ti lifru ¡Rumel ayüucüleaimi!
b Tami peal cümeque ngülam tami doi hueniyeafiel Jehová, papeltuafimi ti troquiñ “Wechekeche: ‘fente küme küdawyenieaymün tamün montuluwal’” tripalu Ti Huerquen diciembre 2017.