Ayüfalngepe taiñ quimeltuchequen ti rüf dungu

1. ¿Chumafuiñ taiñ coneltuleal Jehová ñi troquiñche mu?

QUIMFIEL mu quiñe peñi cam quiñe lamngen, ramtuquefiyiñ: “¿Chumngechi quimürpufimi ti rüf dungu?”. Quiñeque feipiafui: “Iñche quimürpufiñ pichicalu müten”. Ca quiñeque: “Hue quimfiñ ti rüf dungu” piafui. ¿Chemu am femngechi ramtuuqueiñ? Iñchiñ rume falintuquefiyiñ ti rüf dungu mülelu Biblia mu ca adniequeiñmu taiñ mongen mu. Taiñ coneltuleal Jehová ñi troquiñche mu, mülei taiñ piuqueyeafiel tati rüf dungu ca inayafiel. Feimu manelfalngeiñ taiñ feipin ca femquen mu (Sal. 15:1-3).

2. 1) ¿Chem raquiduamquefui pu che Jesús mu? 2) Pu che allcütulu Jesús tañi quimeltun, ¿chumquefui?

² Jesús rumel rüf dunguquei. Tañi pu caiñe cütu feipiqueingün Jesús ñi manelfalngen, ayünofule rume engün tañi quimeltuel Jesús (Mat. 22:16). Jesús quimniefui ñi chumal ta che allcütule tañi quimeltun, fei feipi: “Cüpan ñi yafcahual engün. Ti fotüm caiñetuafi tañi chau, ti domo püñeñ caiñetuafi tañi ñuque ca caiñetuhuai ti pu nanünghuen” (Mat. 10:35). Jesús ayülafui ñi lladcülcayafiel pu che tañi quimeltun mu, huelu quimniefui tañi femngechi rupayal (Mat. 23:37). Jesús quimniefui quiñeque che ñi piuqueyeafiel tati rüf dungu, huelu caquelu che tañi üdeafiel (2 Tes. 2:9-11).

3. ¿Chem ngüneduamaiñ feitachi troquiñ mu?

³ Jesús reque, manelfal chengeiñ. Ca enseñalquefiyiñ ta che Biblia mu, caquelu ayünofule rume. Feimu, ¿chumül rume ca chumngechi rume feipiafuiñ ti rüf dungu? Femlai llemai. Feitachi troquiñ mu, ngüneduamaiñ cheu entuafuiñ tati rüf dungu. Ca peaiñ chumngelu nütramcacheaiñ Biblia mu, ca chumngechi ca chumül femafuiñ. Tüfa quelluaiñmu ñi doi ayüfalngeal taiñ feipin quimeltucheliyiñ Biblia mu.

¿CHEU ENTUAFUIÑ TATI RÜF DUNGU?

4. ¿Chumngelu feipiafuiñ Jehová mu cüpai ti rüf dungu?

⁴ Jehová mu cüpai tati rüf dungu. Com ñi feipiel rüfngei. Feipin mu chem ñi cümen ca chem ñi cümenon, manelfali (Sal. 19:9; 119:142, 151). Com ñi feipicünuel ñi rupayal cüpalechi antü mu, com femngechi tripaquei (Is. 55:10, 11). Huechunentuquei com tañi feipicünuel (Núm. 23:19). Chumcaunorume coilatuquelai (Heb. 6:18). Feimu “Chau Ngünechen manelfalngelu” pingei Biblia mu (Sal. 31:5).

5. ¿Chumngelu cüdaungelai ñi quimngeal ta Chau Dios? (Hechos 17:27).

⁵ Quiñeque che feipiquei cüdaungei tañi quimngeal ta Chau Dios, huelu femlai. Com tati mülelu huenu ca mapu mu pengeli Chau Dios tañi mülen ca tañi chumngen (Rom. 1:20). Pablo mülepulu Atenas mu, nütramcafi quiñeque adümuhun-ngechi huentru, feipifi: “Chau Ngünechen ayüniei pu che ñi quintuaeteu”, “camapulelai caque quiñeque iñchiñ meu” pifi (papeltunge Hechos 17:27). Doi mai, Chau Dios cüpalquefi pu ñomngechi che quintuyahul-lu ti rüf dungu (Juan 6:44).

6. 1) ¿Chem falinque dungu quimeltuqueiñmu Biblia? 2) ¿Chemu mañumcüleimi tami quimfiel tati rüf dungu?

⁶ ¿Chumngechi quimafuiñ Jehová? Papeltufiliyiñ ta Biblia. Pu huentru huirintuculu Biblia, femingün Chau Dios tañi nehuen mu (2 Ped. 1:20, 21). Feimu com tati mülelu Biblia mu rüfngei ca manelfali. Biblia feipilei Chau Dios ñi deumafiel huenu, mapu ca itrofill mongen (Gén. 1:1, 26). Ca quimeltuquei chumngelu mülei culpan dungu, ca chumngelu cutrancauquei ca laquei pu che (Rom. 5:12; 6:23). Biblia ca feipilei Jehová adnieafi tañi Fotüm ñi apümcayafiel com ñi huesa femün Huecüfü, “quisu meu tripaquei com coilaque dungu” (Juan 8:44; Rom. 16:20). Jesús ca apümcayafi pu huesaque che, huiñomongeltuafi pu layelu, cüme elcünutuafi tati mapu ca quelluaiñmu taiñ culpafe chengehuenoal (Juan 11:25, 26; 1 Juan 3:8). Biblia am feipilu, maneluhuafuiñ com tüfachi dungu mu. Chau Jehová quimeltueiñmu tati rüf dungu ca elfalcünueiñmu taiñ quimeltucheal, ¡rume cüme dungu tati! (Mat. 28:19, 20).

¿CHEMU RÜF DUNGUAIÑ?

7, 8. ¿Chemu falin-ngei cüme piuque mu rüf dungual? Feipinge ñi rupan ta Jesús (Marcos 3:11, 12; ca inaduamnge ti adentun).

⁷ Chumngechi taiñ peel, mülei taiñ manelfal chengeal taiñ coneltuleal Jehová ñi troquiñche mu. Huelu taiñ ayühulafiel Jehová, rüf dungulayaiñ müten, Jehová mu falin-ngei chemu taiñ femquen. Raquiduamaiñ ñi rupan Jesús amuldunguyaulu (papeltunge Marcos 3:11, 12). Amuldunguyaulu inafül Galilea lafquen mu, acui fentren che cheu tañi mülemum ta Jesús. Ca mülefui quiñeque che conhuecüfülelu, lucutunagingün Jesús tañi adquiñ mu, fei huiraringün: “Eimi ta Chau Ngünechen ñi Fotüm”. Rüfngefui ñi feipin engün, huelu huesa piuque mu feipingün. Ayüfuingün chi caquelu che ñi maneluhual fei engün mu, femngechi rupachi antü mu ñi püntünentuafiel Jehová mu. Jesús quimnieñmafi ñi piuque engün, feimu ayülafi ñi feipin ca feipifi ñi amuldungunoal engün quisu mu.

⁸ ¿Chem quimeltueiñmu feitachi nütram? Jehová mu falin-ngei chemu taiñ rüf dunguquen. Feimu quimeltucheliyiñ Biblia, femaiñ taiñ piuqueyefiel mu Jehová. Ca saquingeliyiñ taiñ amuldunguquen mu, iñchiñ püramyequefiyiñ Jehová müten (Mat. 5:16; ca ngüneduamnge Hechos 14:12-15).

9. ¿Chem femlayaiñ ca chemu?

⁹ Ca quiñe dungu mu cuñiutucuhuaiñ taiñ püramyengenoal. Quiñe loncolelu nütramcaeliyiñmu quiñe dungu taiñ feipinoafel, iñchiñ ayüafuiñ chi taiñ feipiafiel caquelu che. Rupachi antü mu, taiñ feipifielchi che ngüneduamle ñi rüfngen taiñ feipin, afmatuafeiñmu, fentren dungu quimi piafeiñmu chi. Femngechi femfuliyiñ, afmatulafuiñ caquelu, huelu ayühul-layafuiñ ta Jehová (Prov. 11:13). ¿Chemu am? Rüfngefule rume taiñ feipin, ngelafui taiñ nütramcayafiel feichi dungu. Ca feipiliyiñ ti dungu taiñ saquingeal müten, Jehová quimniei, feimu ayüquelai.

¿CHUMNGECHI RÜF DUNGUAFUIÑ?

10. ¿Chem pifel Colosenses 4:6?

¹⁰ (Papeltunge Colosenses 4:6). Apostol Pablo feipifi pu cristiano Colosas mu mülelu: “Rumel ayüfalngepe tamün dungun”. Griego quehun mu feipilei chumngechi taiñ dunguquen cümelcayafi ta caquelu, huelu cafei mülei tañi cüme duamelafiel engün.

11, 12. ¿Chumngelu cuñiutucuhuaiñ quimeltucheliyiñ Biblia mu? Feipinge quiñe ejemplo (ca inaduamnge ti adentun).

¹¹ Rume falin-ngei taiñ inayafiel Pablo ñi feipin quimeltufiel mu Biblia ta caquelu. Biblia ñi quimeltun trürümngei quiñe fütra cuchillo mu rume yungelu. Tüfa “quimfalcünuquei tati che ñi raquiduam ca chem ñi ayünieel piuque meu” (Heb. 4:12). Huelu cüme dullinoliyiñ chumngechi quimeltucheal Biblia mu, huesa duamelafuiñ ti che ca lladcülcayafuiñ. Peafiyiñ quiñe ejemplo.

¹² Raquiduamnge tüfa. Amuldunguyauliyiñ, nütramcayafuiñ quiñe cüme huentru ngillatumequefilu tati adentun ca celebraquelu Navidad tañi familia engün. Ayüafuiñ chi taiñ pengelelafiel Biblia mu ñi falinon ngillatungeal adentun ca tati Navidad ñi chaftuquefiel Biblia (Is. 44:14-20; 2 Cor. 6:14-17). Femfuliyiñ hue quimfiel mu müten ti che, cümelayafui. Rüfngefule rume taiñ feipin, cüme quimeltuchelayafuiñ Biblia mu.

13. ¿Chumngechi chadiñmaquefiyiñ reque taiñ feipial?

¹³ Pablo ca feipi “chadiñmalepe reque” tamün dungun. Huelu feita feipilai taiñ ellcacünuafiel ti rüf dungu ca taiñ adelcacünuafiel reque. Doi mai, quimeltucheliyiñ mülei taiñ raquiduamal chumngechi puhual tati che ñi piuque mu (Job 12:11). Feita cüdaungeafui llemai. Caquerumequei chumngechi ñi pepicangeal iyael, ca femngechi caquerumequei chumngechi ayüquei che ñi nütramcangeal. Quiñeque mapu mu tati che ayüquei ñi feipifemngeal müten ti dungu, fütaqueche cütu. Caque mapu mu femngechi dungungele ti che, huesa duamelngeafui cam lladcüafui. Pablo feipi: “Quimaimün chumngechi huiñoldunguafiel caque quiñeque che”. Feimu chadiñmayafiñ reque taiñ feipial iñchiñ taiñ ayüel müten no, doi mai ñi puhual tati che ñi piuque mu.

CÜME DULLIAIÑ CHUMÜL TAIÑ QUIMELTUCHEAL

14. Jesús, ¿com dungu quimeltufemfi ñi pu discipulo?

¹⁴ Jesús cüme dungulelquefui tañi pu inanieteu ca piuqueyenquechi quimeltulelfi fentren dungu (Mar. 6:34). Jesús niefui fentren dungu ñi quimeltuafiel tañi pu discipulo, huelu quimniefui tañi pürüm com adümnoafiel engün. Ñochiquechi quimeltunierpufi (Juan 16:12). ¿Chem quimeltueiñmu tüfa? Peafiyiñ.

15. ¿Mülei taiñ pürüm quimeltuafiel pu che com ti rüf dungu mülelu Biblia mu? (Proverbios 25:11; ca inaduamnge ti adentun).

¹⁵ ¿Chem quimeltueiñmu Jesús ñi femün? Nielu rume iñchiñ fentren dungu taiñ quimeltuafiel pu che, ngelai taiñ pürüm quimeltuafiel com dungu. Doi cümei inayentuafiel ta Jesús ca duamtuafiel ti pu che. Ca huiño nütramcayafiyiñ ti huentru ayüquelu ñi celebrayal ti Navidad tañi familia engün. Iñchiñ quimnieiñ feichi fiesta chaftuquefi Biblia ñi feipin, feimu Jehová ayüquelafi. Ti huentru eluufule taiñ quimeltulelafiel Biblia epe puucülele ti Navidad, ¿cümepeafui mai taiñ pürüm feipiafiel Chau Dios ñi ayüquenon feiti fiesta? ¿Ayüpeafuiñ mai ñi pürüm celebrahuenoafiel feiti fiesta? Femlayafuiñ llemai. Quiñeque che pürüm femquei Chau Dios ñi ayüqueel, huelu ca quiñeque doi alüñmaquei ñi femal Biblia ñi feipin. Pu chillcatuquelu Biblia duamniei ñi quimafiel ti rüf dungu, huelu taiñ quelluafiel cüme dulliaiñ chumül taiñ feipiafiel quiñeque quimeltun (papeltunge Proverbios 25:11).

16. ¿Chumngechi quelluafuiñ pu chillcatuquelu Biblia ñi amuleal ti rüf dungu mu?

¹⁶ Quimeltulelafiel caquelu che Chau Jehová mu, rume ayühulqueiñmu. Taiñ quelluafiel ñi amuleal ti rüf dungu mu, iñchiñ mülei taiñ cüme miyahual ti rüf dungu meu (3 Juan 3, 4). Taiñ mongen mu pengelaiñ taiñ maneluucülen Biblia ñi feipin mu. Chumngechi taiñ peel, nütramcafiliyiñ ti rüf dungu mu, cüme piuque mu femaiñ. Ca mülei ñi rumel ayüfalngeal taiñ feipin ca cüme dullial chumül taiñ quimeltual t rüf dungu. Ca saquieliyiñmu quiñe che, püramyeafiyiñ Jehová müten. Femngechi pengelaiñ taiñ poyequefiel Jehová, Chau Ngünechen manelfalngelu.