7. Sum yatichaña

¿KAMSAÑSA MUNI?

Awk taykanakajja, kunatï walïki ukarjam sarnaqañatakiw chʼamachastanjja. Jumatï honradöñatak chʼamachasiskstajja, ukham jaqëpjjañapatakiw wawanakamar yaticharakïta.

Trabajir jaqëñasa, mayninakar jan yaqhachañasa, sinttʼasirïñas kunja wakiskirisa ukwa wawanakasar yatichañ munaraktanjja. Wayn tawaqökasaw ukanak sum yateqapjjaspa.

BIBLIAJJ KAMSISA: “Wawarojja suma sarnaqañapatakejja jiskʼatpach sum yaticham, ukatsti awkëjjan ukkhajja janiw uka yatichäwinakatjja armaskaniti” (Proverbios 22:6).

¿KUNATSA WALI WAKISKIRI?

Tecnologiampi phoqantat akapachanjja, kunatï walïki jan walïkaraki uk yatiñajj wali wakiskiriwa. “Wawanakasajj celularansa tabletansa jan walinak kuna horasas uñapjjakispawa, ladosankkasas jan walinakwa uñasipkaspa” (Karyn).

BIBLIAJJ KAMSISA: ‘Jilïr jaqenakajj sapa kuti amuytʼjjasajja, kunatï walïki jan walïki ukanak amuytʼañjja yateqjjapjjewa’ (Hebreos 5:14).

Mayninakat llakisiñajj wali wakiskiriwa. “Mirä amp suma”, “yuspära” sañasa, mayninakat llakisiñasa wali wakiskiriwa, ukampis ukanakajj chhaqtaskiwa. Jaqe masipat llakisiñat sipansa, celularapata jan ukajj yaqha ukhamanakatwa jukʼamp llakisipjje.

BIBLIAJJ KAMSISA: “Kunjamtï jaqenakampi uñjatäñ munapktajja, ukhamaraki jumanakajj jupanakar uñjapjjam” (Lucas 6:31).

¿KUNSA LURASMA?

Kunanakatï jumatak jan walïki uk wawanakamar qhan yatichañamawa. Yatjjatasiwayki ukarjamajja, awk taykanakajj wawanakar jan casaratäkasin maynimp ikintasiñajj jan walïtap yatichapki ukhajja, wayn tawaqöjjasajj janiw facilak ukar purtʼasipkiti.

AKHAMWA LURASMA: Noticianakat parlasaw wawanakamar sum yatichasma. Sañäni, mä noticiatï jaqe jiwayapjjatapat parlani ukhajja, “¡jan walirakisä! ¿Kunatsa yaqhep jaqenakajj ukham lurapjjpacha?” sasaw jisktʼasma.

“Wawanakasajj suma amtanakar puripjjañapatakejja, kunatï walïki jan walïkaraki ukanakwa nayraqat sum amuytʼapjjañapa” (Brandon).

Mayninakat llakisiñ yaticham. Jiskʼa wawanakasa, “mirä amp suma”, “yuspära” sañsa, mayninakat llakisiñsa yateqapjjarakispawa. Mä librojj akham siwa: “Wawanakajj janiw jupanakakis jaqëpkaspa ukham amuyasipjjañapäkiti, jan ukasti familiapata, escuelankir masinakapata, yaqha jaqenakat llakisipjjañapajj kunja wakiskirisa ukwa amuyapjjañapa, ukhamatwa yaqhanakar yanaptʼañ munapjjarakini” (Parenting Without Borders).

AKHAMWA LURASMA: Yaqhanakar yanaptʼañajj kunja wakiskirisa uk yateqapjjañapatakejja, lurañanakwa wawanakamar churasma.

“Wawanakajj kuna lurañanakatï utan wakiski ukanak lurañ yateqapjjani ukhajja, sapak jakasjjapjjani ukhajj janiw sint chʼam tukupkaniti, lurañanakapampi phoqañ yatitäjjapjjaniwa” (Tara).