Taqi kunansa Diosar jachʼañchapxañäni

“WILLJTANAKAX munasiñam istʼayita [...]. Sarañaxäki uka thak uñachtʼayita” sasaw Davitax Diosar mayisïna (Sal. 143:8). Sapa alwaw Diosar jakäwimat yuspärpachätaxa, ukat Davidjamarakiw suma amtanakar puriñatakisa sum sarnaqañatakis yanap mayisirakpachätaxa.

‘Manqʼkasasa umkasasa jan ukax kun lurkasasa’, Diosar jachʼañchañatakiw cristianonakax “taqi kunsa” lurañ muntanxa (1 Cor. 10:31). Chiqansa, luratanakasampiw Diosar jachʼañchsna jan ukax jiskʼachsna. Ukampis Supayax “uruy arumarakiwa” Criston jilatanakaparux juchañchaski ukat aka Uraqinkiri Diosan luqtirinakaparusa juchañcharaki sasaw Bibliax qhanañchi (Apo. 12:10). Ukatwa Supayan kʼarïtap uñachtʼayañataki chʼamachastanxa, ukat Jehová Diosar “uruy aruma” luqtasin kusisiyañwa muntanxa (Apo. 7:15; Pro. 27:11, NM).

Kunjamsa Diosar jachʼañchsna uk jichhax pä tuqit uñjañäni. Kunas jiwasatakix nayrankañapa ukat kunjamatsa mayninakan askip thaqharaksna uka tuqinakat uñjañäni.

Diosar katuyatjam sarnaqañäni

Kunapachatï Jehová Diosar jakäwis katuyastan ukhaxa, walpun Jumar luqtañ munsma, ‘sapürutjamaw’ kamachinakamarjam sarnaqäxa sasaw arsuwaytanxa (Sal. 61:5, 8). Jichhaxa, ¿cristianonakax uka arsutasar phuqañatakix kuns lurtanxa? ¿Kunjamsa Jehová Diosar taqi chuym munasitas uñachtʼaytanxa?

Kunsa Diosax mayistu ukxa qhanwa Bibliax uñachtʼayistu (Deu. 10:12, 13). “¿Kunanak phuqañassa Diosax muni?” siski uka recuadro 22 janan uñxattʼäta. Ukanwa Diosan wakiskir walja kamachinakapax jiwasataki utji. Ukat pä kamachinak jan ukax walja kamachinaka phuqañ wakiskani ukhaxa, ¿kawkïr kamachis nayrankañapa, ukxa kunjamatsa yatsna?

Bibliat yatxataña, Diosat mayisiña, tantachäwinakar saraña ukat Diosan arunakap yatiyir saraña ukanakaw cristianonakatakix nayranki (Mat. 6:33; Juan 4:34; 1 Ped. 2:9). Chiqas janirakiw sapürus ukanakak lurkaraktanti ni sarkaraktansa. Kunayman lurañanakaw utji. Irnaqäwir sarañasa, escuelar sarañasa ukat utan yaqha luräwinakampi phuqañas wakisirakiwa. Ukanak phuqañataki tiempo sums apstʼaskstanxa, tantachäwinakarux sarapuntanwa; jiwasatakix kunatï Diosamp sum apasiñ yanaptʼkistu ukanakaw nayranki. Sañäni, tamanak tumptʼir jilatax tamasar jutañapäki uka urunakax janiw yaqha chiqanakar sarañ amtktanti, ukat jachʼa tantachäwinak utjki ukhasa ukhamarakiwa. Ukat inas kun lurkasas yaqha luräwimpi phuqaraksna, sañäni, ¿janit Tantachasiñ Uta qʼumachirix familpach sarapkasma? ¿Ukat yatiqañ utansa jan ukax irnaqäwinsa janit manqʼtʼasiñ horasanakax Diosan arunakapat yatiyañax wakiskaspa? Taqi kunat sipansa alaxpachankir Jehová Dios Awkisar luqtañaw nayrankañapa. Ukatxa kunansa irnaqañäni, kunsa yatiqañäni ukat khitinakampis sarnaqañäni ukanak amtañatakixa kunatix nayrankañapäki ukarjamaw amtxañasa, mä arunxa, wali munasir Awkisan munañaparjamaw kun lurañsa amtañasa (Ecl. 12:13).

Mayninakan askip thaqharakiñäni

Mayninakar sum uñjsna ukat jupanakan askip thaqhañaswa Jehová Diosax muni. Ukampis Supayax jiwasatakiki taqi kun munasksna ukwa muni. Supayan apnaqat aka ñanqhapachax “jupanak jaqïñaki muniri” jan wali jaqinakampi phuqantatawa ukat “jupanakan pachpa munañanakapakwa thaqapx[i]”, ukat ‘jañchin munañaparjamaw kuns lurapxaraki’ (2 Tim. 3:1-5, MT; Gál. 6:8). Niya taqiniw kuns lurapxaki, janiw jaqi masipat llakisipkiti. Ukat ‘jan wali luräwinakax’ taqi chiqan uñjasi (Gál. 5:19-21).

Ukampis khitinakatix qullan ajayumpi yanaptʼayasipki ukanakax janiw ukhamäpkiti, munasiñampi ukat khuyaptʼayasiñampiw jaqi masiparux uñjapxi (Gál. 5:22). Jiwasatak askinak thaqhañat sipansa jaqi masisan askip thaqhañatakiw Bibliax chʼamachistu. Ukatwa maynit maynikam taqi chuym yanaptʼasiñ thaqtanxa. Ukampis amuytʼasiñasarakiwa, janiw yaqhanakan jakäwipar mitisiñ munktanti (1 Cor. 10:24, 33; Fili. 2:3, 4; 1 Ped. 4:15). Cristianonakax jilat kullakanakatakix kunatï askïki ukanakawa thaqharaktanxa; ukat Diosar jan yupaychapki ukanakan askip thaqhañatakis chʼamachasiraktanwa (Gál. 6:10). ¿Kunjamanakatsa aka urunakan yaqhanakarux khuyaptʼayasiñ uñachtʼaysna? (“¿Khitinakarus khuyaptʼaysna?” siski uka recuadro 23 janan uñxattʼäta.)

Kunapachatï khuyaptʼayañjamäni ukhax maynir khuyaptʼayañax wali askipuniwa (Gál. 6:2; Efe. 5:2; 1 Tes. 4:9, 10). Kunjamsa mayninakax jikxatasipxi ukarjam yanaptʼañatakiw lupʼiñasa ukat chʼamäkipansa jankʼakiw yanaptʼañasaraki. Ukatakix yänaksa tiempsa taqi chuymaw apstʼasiñasa ukat kuntï yatktan ukanakampis yanaptʼaraksnawa. Jiwasatï mayninakar khuyaptʼayañäni ukhaxa Jehová Diosax jiwasar khuyaptʼayarakistaniwa (Pro. 11:25; Luc. 6:38).

“Uruy aruma” Diosar luqtapxañäni

Kunjamtï yatxatawayktanxa, “uruy aruma” Diosar luqtapxam sasaw Bibliax chʼamañchistu. Ukampisa, ¿uk lursnati? Jïsa. Ukatakix kuntï Diosax lurapxam siskistu ukanak jan jaytas sum phuqañasawa (Hech. 20:31). Ukanakax akanakäspawa: Biblia sapür liyisin lupʼiña, Diosar sapür mayisiña, tantachäwinakat jan chhaqasiña. Ukat kawkinsa Diosan arunakapat yatiyañasapuniwa (Sal. 1:2; Luc. 2:37; Hech. 4:20; 1 Tes. 3:10; 5:17).

¿Sapa maynis uka luräwinakampix sumti phuqasktanxa? Ukhamächi ukhaxa, taqi kunansa Supayan kʼarïtapwa uñachtʼayañäni ukat Jehová Diosarus kusisiyarakiñäni. Ukhamasti kawkinsa, jan ukax kun lurkasas Jehová Diosarupun jachʼañchapxañäni. Kunjamtï Arupax yatichkistu ukhampun parlañäni, lurarakiñäni ukat kun lurañsa ukarjam amtarakiñäni. Ukat Jehová Diosax wali sum yanaptʼistu ukat munasiñampi uñjistu, ukanakat yuspäratas uñachtʼayañatakixa, Jupar taqi chuym atinisiñasawa ukat taqi chʼamampi luqtañasarakiwa. Maysa tuqitxa, juchachasirïtas layku pantjassna ukhaxa, iwxanakapsa chiqañchäwipsa katuqasiñasarakiwa (Sal. 32:5; 119:97; Pro. 3:25, 26; Col. 3:17; Heb. 6:11, 12).

Ukhamax kunsay lurasipkañäni, taqi kunsa Diosar jachʼañchañataki lurapxañäni. Ukhamatwa samaraña jikxatañäni, ukat wiñayatakiw Jehová Dios Awkisan sum uñjata jakasiñäni (Mat. 11:29; Apo. 7:16, 17).

[22 janan recuadropa/fotonakapa]

¿Kunanak phuqañassa Diosax muni?

• Diosat mayisiña (Rom. 12:12).

• Biblia liyiña, sum yatxataña ukat ukarjam sarnaqaña (Sal. 1:2; 1 Tim. 4:15).

• Diosar taman yupaychaña (Sal. 35:18; Heb. 10:24, 25).

• Familiar Diosan Arupat yatichaña, qullqi tuqit yanaptʼaña ukat sum jikxatasipxañapataki yanaptʼaña (1 Tim. 5:8).

• Diosan Apanqäwipat yatiyaña ukat Criston arkiripar tukuyaña (Mat. 24:14; 28:19, 20).

• Diosar yupaychañ tuqitsa, jañchi tuqitsa ukat chuyma tuqinsa kʼumar sarnaqasiñataki chʼamachasiña ukat sum kusistʼäwinak ajlliña (Mar. 6:31; 2 Cor. 7:1; 1 Tim. 4:8, 16).

• Taman taqi luräwinak jan armasis phuqaña (Hech. 20:28; 1 Tim. 3:1).

• Utassa ukat Tantachasiñ Utsa wali sum uñjaña (1 Cor. 10:32).

[23 janan recuadropa/fotopa]

¿Khitinakarus khuyaptʼaysna?

• Tamasankir chuymankipstat jilat kullakanakaru (Lev. 19:32).

• Usutäpki jan ukax llakitäpki uka jilat kullakanakaru (Pro. 14:21).

• Yanaptʼirjamäktan uka jilat kullakanakar jankʼak yanaptʼaña (Rom. 12:13).

• Familiaranakasaru (1 Tim. 5:4, 8).

• Ijma jilat kullakanakaru (1 Tim. 5:9).

• Taman taqi chuym irnaqtʼki uka irpir chuymaniru (1 Tes. 5:12, 13; 1 Tim. 5:17).