Phesqa tunka maranakaw círculo polar ártico jakʼan precursorjam irnaqtʼasipkta

FINLANDIA markankir Ostrobotnia Septentrional sat cheqankirïpjjtwa, granjan irnaqeri 10 wawanakani mä familiankiripjjtwa. Wawasipkäyät ukhaw Payïr Jachʼa Chʼajjwäwejj utjäna. Ukhat jaya cheqans utjasipkchïyätjja, nänakamppacharuw jan waltʼayapjjetäna, jichhakamas amtasipkaktwa. Kunapachatejj Oulu ukat Kalajoki uka jakʼankir markanakan bombanak phallayapjjän ukhajja, alajjpachajj wila kʼajkirikiw arumanakajj uñtasirïna. Ukat jiskʼanakarojj avionanak uñjapjjäta ukhajja, imantasipjjätawa sasaw awk taykanakajj yatichapjjetäna. Ukapachaw Tauno sat jilïr jilajajj aka Oraqen mä paraisow utjani ukat ukanjja taqe kunas cheqapäniwa sasaw sapjjetäna, ukajj chuymarupuniw purtʼapjjetu.

Tauno jilajajj 14 maranïkän ukhaw Bibliat Yatjjatirinakan qellqatanakap liytʼasajj Biblian yatichäwinakap yateqäna. Ukat Payïr Jachʼa Chʼajjwäwejj qalltkäna ukhajj janiw cuartelar sarañ munkänti, kunattejj concienciapajj Diosan Aruparjam yatichatäjjänwa. Ukatwa carcelar jistʼantasajj wal tʼaqhesiyapjjäna. Ukhamas tʼaqheskchïnjja, jukʼampiw Jehová Diosar serviñ munäna, ukat carcelat mistjjasajj taqe chuymaw Diosan arunakap yatiyaskakïna. Uk uñjasaw nänakajj Jehová Diosan Qhanañchirinakapan tantachäwinakapar sarjjapjjayäta. Uka tantachäwejj utjasipkayät uka jakʼankir mä markänwa apasïna. Ukat jachʼa tantachäwinakarus sarapjjarakïyätwa, ukar sarañatakejj walja qollqew munasïna, ukatwa wal irnaqapjjayäta. Cebollanaka ayrupjjerïta, bayanak apthapipjjerïta ukat vecinonakatakis isinak chʼukupjjarakirïta. Niyakejjay granjan lurañanakajajj wal utjchïnjja, janiw jachʼa tantachäwinakarojj panpachan sarirjamäpkäyäti ukatwa turnasipjjerïta.

Jehová Diosata ukat amtanakapat yateqasajj jukʼampiw Jupar munasipjjayäta, ukatwa jakäwinakaj Jupar katuyasisajj 1947 maran bautisasipjjta (Annikki 15 maranïnwa ukat Aili 17 maraniraki). Saimi kullakajajj uka mararakiw bautisasïna. Ukat Linnea kullakajarus Bibliat yatichapjjarakïyätwa, jupajj jaqechatäjjänwa. Jupasa familiapasa Diosan yupaychiripäjjapjjewa. Ukat bautisasipjjta uka qhepatjja, awisajj precursorjamaw (auxiliar) irnaqtʼapjjerïta.

PRECURSORJAM IRNAQAÑWA QALLTAPJJTA

Khä 1955 maranwa alay toqenkir Kemi sat markar sarjjapjjta. Panpachanis uru jornal irnaqapkchïyätjja, precursorjam irnaqañ wal munapjjayäta. Ukampis kuna qollqempirak precursorjam irnaqañänisti sasaw llakisipjjayäta, ukatwa janïr precursoräkasin qollqe tantasiñ amtapjjta. Ukapachaw qalltan parltʼasipkayäsma uka precursorampejj parltʼapjjta. Jehová Diosar precursorjam serviñatakejj janiw qollqenïñapunisa ni familian yanaptʼapas wakiskapuniti, jan ukasti Jehová Diosar confiyasiñaw jukʼamp wakiskirejja ukwa uka kullakan arunakapat yateqawayapjjta.

Ukhajja, pä phajjsitakikiw imat qollqejj utjapjjetäna. Ukat mayo, 1957 maranwa mä jukʼa ajjsartʼayasis Pello (Laponia, círculo polar ártico alay toqena) sat markan pä phajjsitak precursor apstʼasipjjta. Uka phajjsinak pasatatjja, janiw uka imat qollqet akchʼas iraqapkayätti. Ukatwa pä phajjsimp precursorjam irnaqtʼañatak wasitat apstʼasipjjta. Ukampis imat qollqet janirakikiw iraqapkayätti. Ukhaw Jehová Diosaw yanaptʼaskistani sasin taqe chuym atinisipjjayäta. Ukhatpachajj 50 maranakaw precursoräjjapjjta, ¡ukampis uka qollqejj imatakïskiwa! Taqe ukanakat lupʼisajja, amparat kattʼasas Jehová Diosajj “jan ajjsara[pjja]mti, nayaw yanapas[ip]käma” sapkitaspas ukham amuyasipjjta (Isa. 41:13).

Khä 1958 maranwa, tamanak tumptʼir jilatajj Sodankylä (Laponia) sat markar precursor especialjam irnaqtʼir sarañatak chʼamañchtʼapjjetu. Uka maranakanjja, mä kullakakiw utjäna, kunjamsa jupajj cheqa yatichäwinak uñtʼatayna uk cuenttʼapjjäma. Yoqapaw Helsinki, Finlandia markan capitalapar yateqer masinakapampi saratayna. Ukat yateqer masinakapampi callen sarasipkäna ukhajja, jupajj qhepwa saraskäna, ukhaw mä kullakajj Yatiyañataki revista uka waynitur mamapar churañapatak churatayna. Jupajj mamaparuw churatayna, ukat mamapajj akapï cheqa yatichäwejja sasaw amuytʼasitayna.

Mä altus pataruw mä cuarto alquilasipjjta ukat ukanwa jakapjjayäta, tantachäwinaks lurapjjerïta, ukat manqhäjjanjja, maderanak khuchhupjjerïna. Qalltanjja, uka markankir kullakampi, phuchhapampi ukat nänakampikiw tantachasipjjerïta. Semanatak wakichat qellqatanak liyipjjerïta. Uka qhepatjja, Jehová Diosan Qhanañchirinakapamp Bibliat yateqeri mä jaqew maderanak khuchhupki ukar irnaqer jutäna. Ukat jupajj familiapampiw nänakamp tantachasjjapjjäna. Tiempompejja, uka chachasa, warmipasa bautisasjjapjjänwa, ukat jupaw tantachäwinak sarayjjäna. Ukan trabajir yaqhep chachanakasa, nänakamp chikaw tantachasjjapjjäna ukat cheqa yatichäwinaks uñtʼjjapjjarakïna. Ukat pä mara qhepatjja, uka jiskʼa grupojj jiltasajj mä tamaruw tukjjäna.

YATIYAÑAJJ CHʼAMÄNWA

Yatiyañajj chʼamakïnwa, wali jayanak sarañänwa. Jallupachajja, kayuki, boteta ukat bicicletatwa yatiyirejj sarapjjerïta. Cheqas bicicletajj wali wakiskiripunïnwa, ukampiw jachʼa tantachäwinakarusa, awk taykar visittʼiris sarapjjerïta, jupanakajj jayanwa jakasipjjäna. Juyphi pachanjja, autotwa uka jakʼankir mä markarojj sarapjjerïta ukat kayukiw utat uta yatiyapjjerïta. Taqenir visitawayasajja, yaqha markaruw kayuki sarjjapjjerïta. Khunojj wali jachʼa patapunïnwa, thakhinakas janiw amuyañjamäjjänti. Ukat caballonakajj qatatki uka carritonakan sarataparuw jila partejj arkapjjerïta. Awispachajj nayraqat saririnakan thakichasitanakapjja khunojj chhaqtayjjeriwa. Jallupach qalltanakajja, khunojj ina umallallakëjjeriwa, ukhamïpansti sarañajj wali chʼamänwa.

Wali thayan jakasajja, walja isinakampiw isthapisipjjerïta. Lana mediasampi, paya jan ukajj kimsa mediasanakampi ukat botasampiw uchantasipjjerïta. Botasanakajj alayar jachʼäkchïnsa, khunojj mantaskakiriwa, ukatwa mä utan escalerapar purisajj khunu warsuñatakejj botas apsusipjjerïta. Jachʼa abrigonakajan aynach puntapajja, qʼala chʼarañakëjjeri ukhajj jukʼampiw thayjayjjapjjerïtu ukat chhullunktʼasajj metaljam qholöjjeriwa. Mä warmejja, akham sasaw sapjjetu: “Jumanakajj wali iyawsäwinïpjjpachätawa ukatwa aka taq thayan jutapjjtajja” sasa. Uka warmin utapar puriñatakejj 11 kilometronakats jukʼamp jaywa sarapjjayäta.

Niyakejjay wali jayanak sarapjjerïstjja, jilapartejj jaqenakan utanakapan ikipjjerïta. Ukat jaypʼuntjjeri ukhajja, jaqenakaruw utamaruy qorpachtʼapjjeta sasin achiktʼasipjjerïta. Utanakapajj janiw suma utanakäkänti, ukampis katoqtʼasiri ukat suma jaqenakäpjjänwa. Janiw qorpachapkakitänti, manqʼsa wajjtʼapjjarakitänwa. Walja kutiw reno, alce jan ukajj oso lipʼichinak patjjar ikipjjerïta. Awisajj wali suma utanwa katoqtʼapjjarakitäna. Mä kutejja, mä jachʼa altos pataruw katoqtʼapjjetu. Ukat ukanjja, visitanak katoqañatak utaw utjäna, suma ikiñani ukat bordat qʼoma sabanani. Ukat wali arumkamaw utanimpejj Bibliat parltʼapjjerïta. Mä kutejja, utanimpejj mä cuartonakwa ikipjjta. Ukat paqar arumaw Bibliat parlapjjerïta, kunattejj mayn mayniw jisktʼapjjerïtu.

WALJA BENDICIONANAK KATOQAPJJTA

Laponia markan janiw walja achunakajj achkiti, ukampis wali sumawa, marpachanjja tiempoparjamaw wali sum tuku. Nänakatakejj Jehová Diosar munasir jaqenakar yatiyañaw wali sumänjja. Jupanakat yaqhepajj kʼullunak apsurinakäpjjänwa, mader khuchhupki ukaruw jutapjjerïna. Nänakajj jiskʼa tansa warminakakïpjjayätwa ukampis awisajj jachʼa tansa lonqho jaqenakaruw yatiyapjjayäta ukat taqe chuymaw jupanakajj istʼapjjeri, Bibliat apstʼat qellqatanaksa katoqasipjjeri.

Ukan yatiyasajj walja experiencianakaw utjapjjetäna. Mä kutejj autot qheptʼapjjta, kunattejj auto sayañan utjki uka relojuw phesqa minutunak nayrtʼatätayna. Ukhamïpansti, yaqha autot maysa toqer sarañwa amtapjjta, ukampis uka markar janiw yatiyir sarapjjerïkti. Nayrïr utanjja, mä tawaq warmiw akham sasin katoqtʼapjjetu: “Jumanakarupuniw suyaskayätjja” sasa. Kunattejj jupaw Bibliat yatichapkatäta uka kullakaparojj uküru visittʼapjjañajatak mayitayna. Ukampis janiw nänakajj yatipkayätti. Uka warmisa ukat uka jakʼan jakasir familiaranakapas Bibliat yateqañ qalltawayapjjewa. Uka qhepatjja, taqpach yateqerinakaruw tantachtʼapjjta, taqpachanejj tunka payanipjjänwa. Ukhatjja, waljaniw uka familiat Jehová Diosan Qhanañchiripäjjapjje.

Ukat 1965 maranjja, Kuusamo markankir tamaruw khitjjapjjetu, ukajj círculo polar ártico aynach cheqankiwa ukat jichhakamas ukanwa Diosar loqtasipkta. Uka maranjja, jukʼa yatiyirinakakiw uka taman utjäna, ukat jaqenakas janiw istʼañ munapkaspati sañjamänwa, kunattejj yaqha religionanakaruw sarapjjäna, yatiyapkayäta uks janiw sum uñjapkänti. Ukhamäkchïnsa, Bibliarojj respetapjjänwa, ukat kuntï yatjjatañ munapkaspa uka toqenakatwa parlapjjerïta. Jukʼat jukʼatwa jupanakar uñtʼjjapjjayäta, ukat pä mara qhepatjj Bibliat yatichañ qalltañajj janiw chʼamäjjänti.

YATIYASIPKAKTWA

Sapüru jornalpacha yatiyañatakejj janiw chʼamanëjjapjjti, ukampis niya sapüruw yatiyir mistupjjta. Aili kullakajajj sobrinor istʼasinwa auto apnaqañ yateqe, ukat 1987 maranwa 56 maranïkas licencia apsusjje. Diosan suma arunakap yatiyañajj jachʼäkchisa autompejj janiw sinti chʼamäjjeti. Ukat mä Tantachasiñ Uta cuartonakani lurapjjatapajj wal yanaptʼapjjetu, ukaruw jakasir sarjjapjjta.

Diosatak sapüru irnaqtʼañ qalltapkayät ukhajja, mä jukʼa yatiyirinakakiw Finlandia marka alay toqen utjäna. Jichhajja, walja tamanakaw utj-jje, uka uñjasajj wal kusisipjjta. Jachʼa tantachäwinakanjja, walja kutiw jilat kullakanakajj arunttʼasin ¿nayat amtasipkistati? sasin jisktʼapjjetu. Jupanakat yaqhepajja, Bibliat yatichañatak visitapkayät ukhajj wawanakäsipkänwa. Cheqansa, Jehová Diosajj irnaqatanakajarojj bendiciwayapjjetuwa (1 Cor. 3:6).

Ukat 50 maranakwa 2008 maran precursorjam irnaqtʼañ phoqhapjjta. Walpun Jehová Diosarojj yuspärapjjta, uka suma irnaqäwin aguantañatakejj maynit maynikamaw wal yanaptʼasiwayapjjta. Kunatï jakañatak wakiski ukampikiw jakasipjjta ukampis janipuniw kunapachas pistʼayasipkti (Sal. 23:1). ¡Qalltan inamayakiw llakisipjjatätjja! Jehová Diosajj kunjamsa uka walja maranakan chʼamañchtʼawayapjjetu ukajj wal kusisiyapjjetu, Jupajj akham siwa: “Nayaw chʼamañchaskäma, nayarakiw yanapaskäma, atipjiri amparajjampirakiw uywaskäma” sasa (Isa. 41:10).