NAYRÏR JANAN PʼEQEÑCHÄWIPA | MÄ JACHʼA CHʼAJJWÄWIW ORAQPACHAR MAYJTʼAYAWAYI

Chʼajjwäwinaka ukat tʼaqhesiñanak ¿khitis utjaypacha?

Nayrïr Jachʼa Chʼajjwäwejj noviembre 11, 1918 maranwa tukuyjjäna. Jaqenakajj tiendanakap jistʼantasaw caller thoqhori mistupjjäna. Ukampis mä qawqha urunakatjja, jukʼamp jan walinakaw oraqpachan utjirjamäskäna.

Junio 1918 maranjja, Francia markankirinakajj chʼajjwasipkän ukhanwa gripe española sat ñanqha usojj sartäna, ukat mäkiw waljanir jiwarayäna. Mä qawqha phajjsinakanakwa Francia markanjj Estados Unidos markankir soldadonakar jiwarayäna, janiw enemigonakapas ukham jiwarayapkänti. Ukat markanakapar kuttʼapkäna ukhajja, uka usumpiw kutʼjjapjjäna, ukhamatwa oraqpachan uka usojj utj-jjäna.

Guerra qhepatjja, manqʼat pistʼañasa pisinkañasa taqe cheqanwa utj-jjäna. Europa uksa toqen chʼajjwäwi niy tukuyañampïskän ukhajja, jila partejj manqʼatjamaw jiwarasipkäna. Ukat 1923 maratakejja, Alemania markan qollqepajj janiw valoranëjjanti. Sojjta maratjja, oraqpachanwa qollqet aynachtʼañajj utj-jjäna. Ukat 1939 maranjja, Payïr Jachʼa Chʼajjwäwiw qalltjjarakïna. Ukajj nayrïr chʼajjwäwis jan tukuykaspa ukhamänwa. ¿Kunatsa taqe uka jan waltʼäwinakajj utjpachäna?

¿QHEPA URUNAKANKJJTANTI?

Kunatsa taqe uka jan waltʼäwinakajj utjäna, yamas Nayrïr Jachʼa Chʼajjwäwejj kunatsa utjäna uk amuyañatakejja, Biblian qellqatäki uka profecianakatwa amuyañasa. Jesusajja, mä markajj yaqha markampiw nuwasini, usunakaw sartani ukat manqʼat pistʼañas taqe cheqanwa utjani sasaw arsuwayäna (Mateo 24:3, 7; Lucas 21:10, 11). Taqe ukanakajja, qhepa urunakankjjataswa uñachtʼayani sasaw arkirinakapar Jesusajj säna. Biblianjja, Apocalipsis libronwa uka toqet jukʼamp qhanañchi, ukat aka Oraqen tʼaqhesiñanak utjki ukanakajj alajjpachan mä guerra utjatap laykuw utjawayi sasaw qhanañcharaki. (“Oraqensa alajjpachansa guerraw utjäna” siski uka recuadro uñjjattʼäta.)

Apocalipsis libronjja, caballonakar latʼjjatat pusi chachanakatwa qhanañchi. Jupanakat kimsajja, kuna jan walinakattï Jesusajj arsuwaykäna ukanakamp sasiwa: guerranaka, manqʼat pistʼañanaka ukat usunaka. (“Apocalipsis libron caballor latʼjjatatanakat parlki ukajj ¿phoqasiskiti?” siski uka recuadro uñjjattʼäta.) Nayrïr Jachʼa Chʼajjwäwit qalltawaykäna uka tʼaqhesiñanakajj jichhakamaw utjaskaki. Taqe ukanakatjja Supayaw juchani sasaw Bibliajj qhanañchi (1 Juan 5:19). Uka jan waltʼäwinak ¿khitis saytʼayaspati?

Supayan ‘tiempopajj jukʼakëjjatapwa’ Apocalipsis librojj qhanañchi (Apocalipsis 12:12). Ukatwa Supayajj coleratäsin aka Oraqen tʼaqhesiñanak utjayi. Cheqas kuna jan waltʼäwinaktï uñjktan ukajj tiempop tukusiskatapwa uñachtʼayistu.

SUPAYAN LURATANAKAPAW TUKJASI

Nayrïr Jachʼa Chʼajjwäwejj akapachan mayjtʼatapwa uñachtʼayistu. Ukhatpachaw guerranakasa, sartäwinakasa ukat marka apnaqerinak contra saytʼirinakas utjawayi, ukanakaw Supayan akapachar jaqoqanitätap uñachtʼayi (Apocalipsis 12:9). Kuntï jupajj lurawayki ukajja, kunjamtï mä jan sinttʼasiri ukat munañapar apnaqer jaqejj apnaqäwip tukusiskatap yatisin jan walinak lurkejja ukhamwa luraski. Supayan apnaqañapajj tukusjjani ukhajja, kuna tʼaqhesiñanakatï Nayrïr Jachʼa Chʼajjwäwimpi qalltawayki ukajj tukusjjarakiniwa.

Biblian qellqatäki uka profecianakaw Jesucristo Reyisar confiyañatak yanaptʼistu, jupajj niyaw ‘Supayan luratanakap tʼunjani’ (1 Juan 3:8). Jichjatpachaw millón millón jaqenakajj Jesusan apnaqjjañapatak mayisipki. ¿Jumajj mayiskaraktati? Kunjamsa uka gobiernojj Diosan munañap aka Oraqen phoqasiyani ukjja suma jaqenakajj uñjapjjaniwa, janiw Supayan munañapajj phoqaskaniti (Mateo 6:9, 10). Diosan Reinopajj apnaqkani ukhajja, janipuniw mayampis guerranakajj utj-jjaniti (Salmo 46:9). Ukhamasti Diosan Reinopat yatjjataskakim ukhamatwa kunja sumankañas aka Oraqen utjani uk uñjäta (Isaías 9:6, 7).

Oraqensa alajjpachansa guerraw utjäna

Nayrïr Jachʼa Chʼajjwäwi qalltañapatak niya 1900 maranak faltaskäna ukhaw Supayajj Jesusar “taqe markanaka” churañ munäna (Mateo 4:8, 9). Jesusajj janiw katoqañ munkänti, qhepatjja, “akapacha apnaq[eri]” sasaw Supayar säna (Juan 14:30). Apóstol Juanajj akham sarakïnwa: ‘Taqe aka oraqpachajj Supayan munañapankiwa’ sasa (1 Juan 5:19).

Niyakejjay akapachajj Supayan munañapankchejja, Nayrïr Jachʼa Chʼajjwäwi utjañapatakisa ukat yaqha jan waltʼäwinak utjañapatakis jupaw juchani. Ukhamajja, kuna jan walinakatï 1914 marat aksar pasawayki ukanakjja, Apocalipsis librojj juparuw uñtayaraki. Akjjar qhanañchaskani ukajja, Apocalipsis 12 jaljan parlki ukanakat mä qawqhakiwa:

7 jiskʼa tʼaqa. Alajjpachanjja, Miguelampi (Jesucristo) dragonampiw (Satanás) nuwasipjjäna.
9 jiskʼa tʼaqa. Khititï “aka oraqen jaqenakarojj wali sallqjañanak lur[ki]” uka Supayaruw alajjpachat aka Oraqer jaqoqasini.
12 jiskʼa tʼaqa. “¡Wali llakisiñarakiw oraqen ukhamarak qotan utjirinakatakejja! Supayasti jumanakan ukaruw wali colerat juti, tiempopan jukʼakïtapa yatisina”.

Bibliarjamasa ukat kunanakatï oraqpachan pasawayki ukanakasa, Diosan Reinopajj alajjpachan 1914 maran uttʼayaskäna uka qhepat alajjpachan guerrajj utjatap uñachtʼayistu.a Uka maranjja, pä guerranakaw utjawayäna: mayajj aka Oraqena ukat yaqhajj alajjpachana.

a Jukʼamp yatjjatañatakejja, ¿Kunsa Bibliax chiqpachapuni yatichi? sat libron 8 jaljap uñjjattʼäta, ukajj Jehová Diosan Qhanañchirinakapan luratawa.

Apocalipsis libron caballor latʼjjatatanakat parlki ukajj ¿phoqasiskiti?

Janqʼo caballor latʼjjatatäkäna ukasti alajjpachankir reyiwa. Reyisti Jesucristowa, ukat cheqapar uñjañatakiw sarantaski (Salmo 45:4). Nayraqatjja, Supayampiru sajjranakapampiruw alajjpachat jaqoqanïna (Apocalipsis 6:2; 12:9).

Wila caballor latʼjjatatäkäna ukasti “munañanïñwa katoqe akapachan suman sarnaqasiña chhaqtayañataki”. (Apocalipsis 6:4.) Khä 1914 maratpachaw guerrajj jaqenakar jan waltʼayi. Nayrïr Jachʼa Chʼajjwäwit 21 maranak pasaskäna, ukhaw Payïr Jachʼa Chʼajjwäwejj qalltäna ukat jukʼamp jaqenakaruw jiwarayäna, amuyatajj 60 millón jaqenakaruw jiwarayäna. Ukat 1945 marat aksarojj guerranakajj mä qawqha cheqanaks utjkchejja, ukhamarakwa jaqenakar jiwarayi. Sarnaqäwi toqet yatjjatatanakat yaqhepajja, 1901 marat 2000 marakamajj 100 millón jila jaqenakaw guerran jiwarapjje sasaw amuyapjje.

Chʼiyar caballor latʼjjatatäkäna ukasti mä balansa aptʼatänwa, ukat manqʼat pistʼañanaka sañ muni (Apocalipsis 6:5, 6). Nayrïr Jachʼa Chʼajjwäwinjja, Alemania markan 750.000 jaqenakaw manqʼatjam jiwarapjjäna, kunattejj yanapirinakapaw bloqueo lurapjjäna. Ukat 1921 maranjja, Rusia markanjj pä millonarakiw manqʼatjam jiwarapjjäna, ukat oraqpachan ukhamarakiw yaqhep cheqanakan manqʼatjam jiwarapjjäna. Amuyatajja, 1901 marat 2000 marakamajj mä 70 millón jaqenakaw manqʼatjam jiwarapjjäna. Jichhürunakansa, janïr phesqa maranïkasaw sapa marajj kimsa millón jila wawanakajj manqʼatjam jiwarapjje.

Qʼellu caballor latʼjjatatäkäna ukasti jiwayir usunakwa uñstayäna (Apocalipsis 6:8). Khä 1900 maranakanjja, gripe española sat ñanqha usuw sartäna. Qawqhanirupunis uka usojj jiwarayäna uk janis sum yatiskchejja, amuyatajj 50 millón jaqenakaruw jiwarayäna. Mä librojj akham siwa: “Uka usojj ñanqha usupunïnwa, janipuniw yaqha usojj jaqenakar ukham jiwaraykiti [...]. Ni bubónica sat usus ukham jankʼak jiwarayawaykiti” sasa (Man and Microbes). Viruela, malaria ukat tuberculosis sat usunakajj ukhamarakiw 1901 marat 2000 marakamajj waranq waranqa jaqenakar jiwarayawayi.