Jisktʼäwinaka
◼ ¿Kunjamsa taqinis tantachäwinakan wali askirjam yatiqapxañasatakix yanaptʼsna? (Deu. 31:12.)
Jehová Diosaru ukat Jupan wakichat tantachäwinakar respetatas laykuxa, taqiniruw horasapar puriñasatak chʼamañchtʼapxistu, ukhamatwa Diosamp yatichatäñatakix wakichtʼatäñäni. Askïspaw nayraqatar quntʼasiñasaxa, ukhamatwa wawanïpki jan ukax awisax qhiptʼanipki ukanakax qhipäxankir asientonakar quntʼasipxaspa. Janïr tantachäwi qalltkipanxa, wakisiwa celularanaksa ukat yaqha ukhamanaksa amuktʼayaña, ukhamatwa mayninakarux jan pantjaykañäniti. Tantachäwinkkasax taqinitï Diosar axsartʼasa wali respetompi istʼañäni ukhaxa, janiw kuna pantjayiris sinti utjkarakiniti (Ecl. 5:1; Fili. 2:4).
Machaqanakax tanchäwinakar jutxapxi ukhaxa, jupanakar uñtʼir mä jilataw jan ukax kullakaw jupanakamp chik quntʼasispa. Yamas yatiqaskir jiskʼa wawanïpki ukanakar ukham yanaptʼañax wali askipunïspawa. Ukat uka familiax tantachäwinakax kunjamas apasi ukxa inas jan yatipkchiti ukatwa jupanakax qhipäxar quntʼasiñ munapxaspa. Ukhamatwa awk taykax wawanakapar uñjañatak mistsuñ munapxani ukhasa, jupanakatakix mistuñax janiw chʼamäkaniti ni tantachasirinakarus pantjayapkaniti (Pro. 22:6, 15). Uka familianakax yaqha chiqan sapak quntʼasipxañapax janiw askïkaspati, kunattix wawanakapax anatañ jan ukax kun lurañs munxapxakispawa. Wawanakarutï chiqañchañataki jan ukax kunatakisa anqar irpañ wakisini ukhaxa, awkipaw jan ukax taykapaw anqar irpañapa ukat irpantanxañaparaki.
Katuqirinakaw tantachäwinakax askirjam apasiñapatak yanaptʼapxi. Jupanakaw familianakatakisa jan ukax awisax qhiptʼanipki ukanakatakis quñtʼasipxañapatak asientonak jikxatañ yanaptʼapxi, ukatxa jan khitir pantjayañatakix suma amuytʼampi ukat suma arunakampiw purinirinakarux kawkharus quntʼasipxani uk uñachtʼayapxi. Ukat kuna jan waltʼäwinakas akatjamat utji ukhaxa, suma amuyumpirakiw uñjapxi. Mä wawatï tantachasirinakar pantjayirjam kuns lurchi ukhaxa, katuqirinakax munasiñampiw yanaptʼapxi.
Chiqpachansa, tantachäwinakax sum apasiñapatakix taqiniw yanaptʼsnaxa, tantachäwinakanwa Jehová Diosatsa ukat jutir pachataki sumankaña ukat taqi kunas chiqapaxäni uka arsüwinakapatsa yatiqtanxa (Heb. 10:24, 25).