“Aka suma yatiyäwisti aka uraqpachanwa yatiyatäni”
1. Yatiyañxa janipuniw khitis ni kunas saytʼaykaspati, ¿kunats ukham sistanxa?
1 Jehová Diosax munañap phuqapuniniwa, janiw kunas jarktʼkaspati (Isa. 14:24). Amuyataxa, Gedeón sat taripirix 300 soldadonakapampix janiw 135.000 madianit soldadonakar atipirjamäkänti. Ukampis Jehová Diosax akham sänwa: “Israelitanak qhispiyir saram madianitanakan tʼaqhisiyatäñata. Nayawa jumarux khithasksma” sasa (Jue. 6:14). Jichhürunakanxa, ¿kuna luräwis Jehová Diosan yanaptʼapampix lurasiski? Jesusax akham sänwa: “Diosan reinopat aka suma yatiyäwisti aka uraqpachanwa yatiyatäni” sasa (Mat. 24:14). ¡Janipuniw khitis uka luräwxa saytʼaykaspati!
2. Yatiyañatakix Jehová Diosaw yanaptʼitani sasax ¿kunatsa sissna?
2 Jehová Diosax sapa mayniruw yanaptʼistu. Jehová Diosaxa, markapan nayrar sartañapatakix yanaptʼapuniniwa janiw uka tuqit pächasksnati, ukampis ¿sapa maynirux yanaptʼarakistaspati? Apóstol Pablox yanaptʼa munkäna ukhaxa, Jehová Diosax jupar Jesús tuqnäm yanaptʼaskatap amuyasïna (2 Tim. 4:17). Jiwasatï Jehová Diosan munañap lurañatak chʼamachasiñäni ukhaxa, Jupax bendicirakistaniwa, janiw uka tuqit pächasiñasäkiti (1 Juan 5:14).
3. ¿Kunjamanakan jikxatasisas Jehová Diosax yanaptʼistu?
3 ¿Akapachan kunayman llakinakax utjki ukanakat yatiyañatak chʼam jiwjtaytam? Jehová Diosaw “qaritarux chʼam chur[aski]” (Isa. 40:29-31). ¿Arknaqata jan ukax uñisitach uñjasta? “Diosar llakinakam katuyam, jupasti chʼaman tukuyätam” (Sal. 55:22). ¿Yaqhippachax janis yatiyañatak wakichtʼatäkasma ukhamt amuyasta? “Ukhamasti saram, nayawa jumampïskäxa kunapachatix parlkäta ukkhaxa” (Éxo. 4:11, 12). ¿Jan kʼumarätam laykut jukʼak yatiyxta? Taqi chuyma, mä jukʼaks yatiystaxa Jehová Diosatakix wali askiwa, ukat chʼamachasitamarus bendicisirakiwa (1 Cor. 3:6, 9).
4. Jehová Diosarutï taqi chuym atinisiñänixa, ¿kuns lurañäni?
4 Jehová Diosan amparapxa ‘janiw khitis jarkʼkaspati’ (Isa. 14:27). Jehová Diosax yatiyatasar bendiciskatap amuyasaxa, jan axsaras yatiyasipkakiñäni (Hech. 14:3).