‘Taqe jilat kullakanakar sum uñjapjjañäni’
Pʼeqeñchäwin uñstki uka arunakajja, Diosan amuytʼayataw qellqasiwayi, ukhat jichhakamajj niya pä waranqa maranakaw pasawayjje (1 Ped. 2:17). Ukhamäkchi ukasa, uka arunakar istʼañajj jichhürunakanjja, jukʼamp wakiskiriwa. Ukampis ¿kunjamsa oraqpachankir jilat kullakanakasar munassna? Ukat jupatakik kuns muniri akapachanjja, ¿munasiñ jan chhaqhañapatakejj kuns lursna? (Mat. 24:12.) Ukatakejja, Toda nuestra asociación de hermanos sat video uñtam ukat aka jisktʼanakar qhanañchtʼam.
1) ¿Kunapachas oraqpachankir cristiano jilat kullakanakasamp mayakëjjtanjja? 2) Oraqpachankir jilat kullakanakasajj ¿kuna kimsa luräwinakansa irnaqasipki? 3) ¿Kunjamsa yatiyañ wal munapjjatap jilat kullakanakasajj uñachtʼayapjje 1) Alaska markan kawkhantï yatiyirinakajj jan utjki uka cheqar sarasajja, 2) Europa markan barconakajj puripki ukhanakanjja, ukat 3) Perú markan chʼumi taypinakar yatiyir sarasajja? 4) Diosan arunakap yatiyañajj mä aleq irnaqäwikïkaspas ukhamjja, ¿kunatsa jan amuyañasäki? 5) Jehová Diosan Qhanañchirinakapajj ¿kunjamsa maynit maynikam yanaptʼasipjjäna ukat chuymachtʼasipjjäna 1) oraq khathati utjkän uka qhepatjja, 2) jachʼa thaya utjkän uka qhepatjja, ukat 3) mä markan jupanak pura chʼajjwapkän uka pachajja? 6) ¿Kunjamanakatsa cheqpach cristianötas uñachtʼaysna? (Juan 13:35.) 7) Tantachasiñ Utanak lurapki ukar yanaptʼañanjj ¿kuna askinakas utji? 8) Kunapachatï Europa oriental ukat Rusia markanakan jilat kullakanakajj jarkʼata uñjasipjjäna ukhajja, ¿kunjamsa ajay toqet chʼamañchasipjjäna? 9) Kimsa uru jachʼa tantachäwinkañatakejj ¿kunjamsa walja jilat kullakanakajj chʼamachasipjje, ukat kunatsa? 10) ¿Kunjamsa aka videojj yanaptʼawaytam 1) Jehová Diosar jilat kullakanakamp chik mayachtʼat serviñatakejja, 2) jan walinakan jikjjtasipki ukanakar yanaptʼañatakejja, ukat 3) Diosan arunakap taqe cheqan yatiyañatakejja? 11) ¿Kunjamsa aka videompejj Diosan arunakap yatiykasajj jaqenakar yanaptʼsna?
Jehová Diosar munasitasaw oraqpachankir cristiano jilat kullakanakasampejj mayachthapistu. Ukatwa Jupat wal yatjjatañ muntanjja, ukat yaqhanakarus parlañ munaraktanjja. Ukatjja, khitinakarutï Jehová Diosajj munki ukarojj munaraktanwa. Jan waltʼäwin jikjjatasipki ukanakar yanaptʼasajja, janiw Diosan yuspäratañ suyktanti. Antisas Juparuw oraqpachankir cristian jilat kullakanakasampi mayachthapkistu ukat yuspärtanjja. Jupatakik taqe kuns muniri akapachan tukusiñapajj niy jakʼankkipanjja, mayachtʼata maynit maynikama munasiñ uñachtʼayasisipkakiñäniwa.