Mayninakar yanaptʼapki ukanakarojj Diosajj bendisiwa

Akapachankir walja jaqenakanjja, janiw manqʼañapasa ni kawkjan jakañapas utjkiti. Yaqhepajj jutïr uruk suyjjapjje. Diosan bendicionap katoqañatakejja, mayninakaruw yanaptʼañasa.

SAGRADO QELLQATANAKAJJ KAMSISA

“Mä pobre jaqer maytʼirejj Tatituruw maytʼaski, ukatsti Tatit pachpawa uka manjja phoqjjani” (PROVERBIOS 19:17).

¿MAYNINAKAR YANAPTʼAÑATAKEJJ KUNSA LURSNA?

Jesusajj mä chachan sarnaqäwipatwa parläna, uka chacharojj lunthatanakaw jaljjatasin qʼal lluchʼsupjjäna, niya jiwirjam jaytasaw sarjjapjjäna (Lucas 10:29-37). Ukatsti yaqha markat jutiri mä jaqew uka usuchjat jaqerojj yanaptʼäna.

Uka suma jaqejj janiw usuchjatanakak qolljjatkänti, qollqempis yanaptʼarakïnwa. Janiw ukakïkänti, chuymachtʼänwa jan llakisjjañapatakis yanaptʼarakïnwa.

¿Kunsa uka sarnaqäwit yateqtanjja? Jesusan arsutaparjamajj qhawqtï yanaptʼirjamäktan ukhamwa mayninakar yanaptʼañasa (Proverbios 14:31). Sagrado Qellqatanakajja, Diosajj pobren jakasiñsa tʼaqesiñanaksa niyaw chhaqtayani sasaw qhanañchi. Ukampis ¿kunjamsa ukat kunapachas uk lurpachäni? Akjjar jutki uka yatichäwinjja, taqe kun Luriri Diosajj kunsa juma laykojj lurani ukwa qhanañchaskani.