Jehová Diosan yatichäwinakaparjam sarnaqapjjañäni

Jehová Diosaw kunjamsa sarnaqañasa uka toqenakat Biblian yatichistu. Amuytʼañataki, mä chachampi mä warmimpikiw casarasipjjaspa, janirakiw jaljtapjjañapäkiti sasaw Diosajj säna (Mt 19:4-6, 9). Qʼañu jucha lurañanaksa Diosajj uñisiwa (1Co 6:9, 10). Ukatjja kunjamsa servirinakapajj isisipjjañapa, kʼachachasipjjañapa uksa Diosajj yaticharakistuwa, ukhamat mayni jaqenakat sipansa mayjätasajj qhan amuyasiñapataki (Dt 22:5; 1Ti 2:9, 10).

Jichhürunakanjja waljanejj janiw Diosan yatichäwinakaparjam sarnaqapkiti (Ro 1:18-32). Antisas jila parte jaqenakjamaw isisipjje, kʼachachasipjje sarnaqapjjaraki. Ukatjja jan phenqʼaniw qʼañu juchanak lurapjje, qʼoma sarnaqer jaqenakarojj jiskʼachapjjewa (1Pe 4:3, 4).

Jehová Diosan Testigonakapajja, Diosan yatichäwinakap jan ajjsarasaw arjjatañasa (Ro 12:9). ¿Kunjamsa uk lursna? Diosajj kunjam sarnaqañas munki uk respetompi munasiñampi jaqenakar yatiyasaw uk lursna, ukatjja Biblian yatichäwinakaparjam sarnaqasaw luraraksna. Amuytʼañataki, kuna issa uchasiñäni, kunjamsa kʼachachasiñäni uk amuytʼasajja, akham jisktʼasiñasawa: “¿Jehová Diosan yatichäwinakaparjamati isisisktjja jan ukajj jaqenakjamach isisisktjja? ¿Jehová Diosar servitajajj isisitajan amuyasiti?” sasa. Mä película jan ukajj televisionan mä programa janïr uñtkasajja, Diosatakejj walikïskiti janicha ukwa amuytʼañasa. Ukanak uñtañajj ¿Diosampi sum apasiñatakit chʼamañchtʼitani? ¿Diosar serviñan aynachtʼayitaniti? sasaw jisktʼasiraksna (Sl 101:3). Uka toqenakat sum amuytʼasiñajja, familiasarusa yaqhanakarusa wal yanaptʼaspa (1Co 10:31-33).

¿Kunatsa Diosan yatichäwinakaparjam sarnaqañasa? Jesusajj niyaw gobiernonakarusa akapachan utji taqe jan walinaksa chhaqtayani (Eze 9:4-7). Diosan munañaparjam sarnaqapki ukanakakiw salvasipjjani (1Jn 2:15-17). Ukhamasti Jehová Diosan yatichäwiparjam sarnaqañasawa. Sum sarnaqerïtas amuyapjjani ukhajja, jaqenakajj Jehová Diosar jachʼañchapjjaniwa (1Pe 2:11, 12).

JEHOVÁ DIOSAJJ AMIGOMÄSPAWA: MÄ CHACHAMPI MÄ WARMIMPI SAT VIDEO UÑTASAJJA, AKA JISKTʼANAKARUW QHANAÑCHAPJJÄTA:

• ¿Kunatsa Jehová Diosan yatichäwinakaparjam sarnaqañajj yanaptʼistu?

• Awk taykanakajja, ¿kunatsa wawanakaparojj jiskʼatpach yatichapjjañapa?

• Wayna tawaqonakasa jilïrinakasa, ¿kunjamsa Diosan bendicionap jutïrin katoqapjjañapatakejj jaqenakar yanaptʼapjjaspa?