¿Kunapachas akapachajj tukusini? Jesusajj kamsänsa

JESUSAJJ UKA TOQET KAMSÄNSA UK AMUYTʼAÑÄNI:

“Amuyasipjjapunim. Kuna urünisa kuna horasänisa ukjja janiw yatipktati” (MATEO 25:13).

“Amuyasipjjapunim, jan ikjas uñnaqapjjam. Kunapachas ukanakajj pasani ukjja, janiw yatipktati” (MARCOS 13:33).

Ukhamasti akapachajj kunapachas tukusini uk janiw khitis aka oraqen yatkiti. Ukampis Diosajja, akapachan tukusiñapajj “kuna urünisa kuna horasänisa ukjja” amtjjewa (Mateo 24:36). Ukhamajj ¿akapachan tukusiñapajj kunapachänisa uk janipunit khitis yatkaspa? Janiw uk sañ munkiti. Jesusajja discipulonakaparojj kunanakas janïr akapachan tukusiñapa purinkipan pasañapäna uk qhanañchänwa.

AKANAKAW PASAÑAPÄNA

Kunanakatï pasañapäkäna ukanakajja, ‘akapachan tukusiñapajj’ niya jakʼankjjatapwa uñachtʼayañapäna. Jesusajj akham sänwa: “Mä jachʼa markajj yaqha jachʼa marka contraw sartani, mä gobiernosti yaqha gobierno contrarakiw saytʼani. Manqʼat pistʼañanakasa terremotonakas ukjan akjan utjarakini” (Mateo 24:3, 7). Jan wali ‘usunakaw’ utjani sasaw sarakïna (Lucas 21:11). ¿Jesusan uka profeciapajj phoqasiskiti?

Guerranakasa, manqʼat pistʼañanakasa, terremotonakasa, usunakasa walja jaqenakaruw tʼaqesiyi. Sañäni, 2004 maranjja mä jachʼa terremotow océano Índico cheqan pasäna, ukajj mä tsunami utjayarakïna, mä 225.000 jaqenakarakiw jiwarapjjäna. Kimsa maranakanjja, COVID-19 usojj 6,9 millones jila jaqenakaruw oraqpachan jiwarayäna. Ukanakan pasatapaw akapachan tukusiñapajj wali jakʼankjjatap uñachtʼayani sasaw Jesusajj säna.

‘QHEPA URUNAKA’

Akapachan tukusiñap nayrajja ‘qhepa urunaka’ sasin uñtʼata mä tiempow utjani sasaw Bibliajj qhanañchi (2 Pedro 3:3, 4). 2 Timoteo 3:1-5 textojja, qhepa urunakan jaqenakajj kunjamäpjjanisa ukwa qhanañcharaki (“Akapach janïr tukuskipan akanakaw pasañapa” sat recuadro uñjjattʼäta). ¿Jupatakik kuns muniri, jan walinak luriri, qollqe añcha muniri, mayninakar jan waltʼayiri ukham jaqenakajj jichhürunakan utjiti? Ukanakajja akapachan tukusiñapajj wali jakʼankjjatapwa uñachtʼayi.

¿Qhepa urunakajj qhawqha tiempöpachänisa? Janiw walja tiempökaniti sasaw Bibliajj qhanañchi. Ukhaw Diosajj ‘aka oraq tʼunjasipki ukanakar’ tukjani (Apocalipsis 11:15-18; 12:12).

AKA ORAQEJJ NIYAW MÄ PARAISÖJJANI

Kuna urusa kuna horasarusa aka jan wali pachar tukjani uk Diosajj amtjjewa (Mateo 24:36). Ukampis “janiw khitin jiwañapsa jupajj munkiti” (2 Pedro 3:9). Ukhamajj taqeniruw jupar uñtʼañasataki istʼañasatak tiempo churaskistu. ¿Kunatsa? Diosajj akapachan tukusiñapat salvassna ukwa muni, ukhamat jutïrin mä paraison jakasiñasataki.

Diosan Reinopan apnaqata paraison jakasiñatakejj kunanaksa lurañasa uk yatiñatakejja, oraqpachan Bibliat yatichasiñapwa Diosajj amtawayi. Diosan Reinopan suma yatiyäwinakapajja, “aka oraqpachanwa yatiyasini” sasaw Jesusajj säna (Mateo 24:14). Jehová Diosan Testigonakapajj oraqpachanjja, walja millón horanakwa predicapjje, Biblian suma yatichäwinakapsa jaqenakar yatichapjjaraki. Akapacha janïr tukuskipanjja, oraqpachanwa yatiyasini sasaw Jesusajj säna.

Ukhamasti jaqenakan gobiernonakapajj niyaw tukjatäpjjani. Ukampis akapachan tukusiñapat salvassnawa, Diosajj arsuwayki uka Paraisonwa jakasiraksna. Akjjar jutki uka yatichäwinjja, paraison jakañatakejj kunsa lurañasa uka toqetwa qhanañchasini.