2 | ‘Qellqatanakaw chuymachtʼistu’

BIBLIAJJ AKHAM SIWA: “Taqe kunanakatï nayra tiempon qellqaskäna ukanakajja, jiwasar yatichañatakiw qellqasiwayi, ukhamat kuntï Diosajj jutïrin churkistani uk suytʼañasataki. Uka Qellqatanakaw aguantañasatak yanaptʼistu, chuymachtʼarakistu” (ROMANOS 15:4).

¿Kamsañsa muni?

Biblianjja chuymachtʼkir ewjjtʼanakaw utji, uka ewjjtʼanakajj aguantañataki, aynachtʼayir amuyunakar saykatañatakiw yanaptʼistu. Kunanakatï jichha tiempon llakisiykistu ukanak janiw jutïrin amtjjañäniti sasaw sarakistu.

¿Kunjamsa yanaptʼistu?

Awisajj taqeniw llakita jikjjatastanjja, ukampis llaki usunïpki ukanakajja, ukar saykatañatakejj inas sapüru chʼamachasipjjañapächi. ¿Kunjamsa Bibliajj jupanakar yanaptʼaspa?

Biblianjja, yanaptʼkir walja ewjjtʼanakaw utji, ukanakaw aynachtʼayir amuyunakar saykatañatak yanaptʼistaspa (Filipenses 4:8). Biblian ewjjtʼanakaparakiw kunanakatï chʼamañchtʼkistaspa ukanakamp pʼeqer phoqantañasatak yanaptʼistu, ukaw llakimp jan aynachtʼañatak yanaptʼistaspa (Salmo 94:18, 19).
Mayninakat sipans janis kunäksna jan ukajj janis kunatak sirvksna, ukham jan amuyasiñatakiw Biblian ewjjtʼanakapajj yanaptʼistaspa (Lucas 12:6, 7).
Janiw sapakïktanti, taqe kun Luriri Diosasajj kunjamas jikjjatastan uk sumwa amuyarakistu, Bibliankir walja textonakaw ukhamätap amuytʼayistu (Salmo 34:18; 1 Juan 3:19, 20).
Kunanakatï jichha tiempon llakisiykistu ukanakajj armatäjjaniwa sasaw Bibliajj qhanañchistu (Isaías 65:17; Apocalipsis 21:4). Jiwasatï aynachtʼayir amuyunakar saykatañatak chʼamachasiskstan ukhajja, Bibliankir uka promesapaw ukamp jan apayasiñatak chʼam churistaspa.

¿Kunjamsa Bibliajj jupar yanaptʼawayi? Jessica

Llaki usojj jan waltʼayituwa

“Nayajj 25 maranïkayät ukhaw usuntawayta, doctoranakajj llaki usunïtaw sapjjetänwa. Mä akatjamatwa kuna jan walinakatï nayrajj paskitäna uka amuyunakajj jutitäna, janiw ukanak controlañ puedkayätti. Doctoranakajja, kuna jan walinakatï nayrajj pasawayktam ukïpanwa aynachtʼayir amuyunakajj pʼeqemar juti, ukatwa llaki usunirakïtajja sasaw sapjjetäna. Kuna aynachtʼayir amuyutï pʼeqejan utjkäna uk yatiñatakisa, ukar saykatañatakisa, usuj toqet yatjjatat doctorampiw parltʼawayta, ukat yanaptʼkir qollanakampiw qollasiwayarakta”.

Bibliajj kunjamsa yanaptʼitu

“Llakimp wali usuntatäkayäta ukhajja, mä akatjamatwa wali sustjata jikjjatasirïta, wal llakisirïta, janirakiw ikiñsa puedirïkti. Arumanakajja, kutin kutiniw llakisiñ amuyunakajj pʼeqejar jutitäna, janiw chʼamajas utj-jjeriti. Ukampis kunjamtï Salmo 94:19 textojj siskejja, llakinakajj aynachtʼaykistu ukhajj Diosaw chuymachtʼistu, tranquilokïñatakis yanaptʼarakistu. Ukhamajja, ikiñ ladojan mä Bibliampi chʼamañchtʼkir textonak qellqtʼat mä cuadernompiw utjitäna. Jan ikiñ puedirïkta ukhajj ukanak toqew Diosajj chuymachtʼitäna.

”Kuna amuyunakatï Jehová Diosat jan cheqäki ukanak apanukuñasatakiw Bibliajj chʼamañchistu. Sañäni, nayrajja janis kunatak sirvkirista, janis khitimp munatäñajajj wakiskaspa ukhamwa amuyirïta. Ukampis ukham amuyañajj jan Bibliarjamätapwa yateqawayta. Diosajj mä munasir Awkir uñtasitawa, sinttʼasiriwa, sapa maynitwa llakisiraki sasaw Bibliajj yatichi. Jukʼat jukʼatjja, janiw aynachtʼayir amuyunakamp apnaqayasjjayätti. Kunjamtï Diosajj uñjkitu ukham naya pachpa uñjasiñwa yateqawayta. Ukaw naya pachpat jan wal amuyirïkta ukanak apanukuñatak yanaptʼawayitu.

”Llakisiyir amuyunakajj jan utj-jjani uka urun puriniñap wal suyaskta. Cheqasa llaki usunakajj janiw jutïrin utj-jjaniti, uk yatiñajja uka uru puriniñapkamajj usujar saykataskakiñatakiw yanaptʼitu”.