5. ¿Tʼaqesiñanakajj tukusjjpachäniti?
¿Kunatsa ukham jisktʼasiñasajj wali wakiskiri?
Tʼaqesiñajj tukusjjaniwa sasin confiyañajja, jakäwisar kusisit chuymampi uñjañataki, Diosar jakʼachasiñatakiw yanaptʼistu.
Aka toqet amuytʼam
Cheqas tʼaqesiñjja, walja jaqenakaw tukjañ wal munapjjaspa. Ukampis uk lurañatakejj janiw chʼamanïpkiti. Aka toqenakat amuytʼam:
Usunak toqet doctoranakajj nayrat sipan jukʼampsa yatjjatawayapkchejja...
... walja jaqenakaw aka oraqpachan chuymat usuntasin jiwapjje.
... cáncer usumpejj walja millón jaqenakaw sapa mara jiwapjje.
... “jaqenakajj jan qollañjam contagioso usunakampiw usuntapjje. Kunayman jan uñtʼat contagioso usunakaw uñstaraki, jan ukajj nayra contagioso usunakaw wasitampi uñstjjaraki” sasaw David Bloom sat doctorajj ciencia toqet parlir Frontiers in Immunology sat revistan qhanañchi.
Yaqhep markanakan walja qollqenïpkchisa...
... sapa marajj walja millón wawanakaw jiwapjje, jilapartejj wali pobren jakasipki uka cheqanakanwa jiwapjje.
... walja waranq millón jaqenakajj basuranak chhaqtayañatak jan utjki uka lugaranakanwa jakapjje.
... walja millón jaqenakanjja, janiw qʼoma umapajj utjkiti.
Jaqenakajj kuna derechonakanïpjjesa ukajj jukʼampis yatisjjchejja...
... jaqenak secuestrasin aljañajj walja markanakan utjaskakiwa. Uka jan wali luririnakar chhaqtayañatak jan chʼamachasir markanakajja, “inas ukanak jan uñjapkchiti jan ukajj inas ukatak jan wakichtʼatäpkchiti” sasaw Naciones Unidas sat organizacionajj mä yatiyäwipan qhanañchi.
JUKʼAMP YATJJATAÑATAKEJJA
¿Kunas Diosan Reinopajja? sat video Internetan jw.org cheqar mantasaw uñtasma.
Bibliajj akham siwa
Diosajj jiwasanakat llakisiwa
Diosajj jiwasar tʼaqesir uñjasajj wal sinttʼasistu.
‘Diosajj janiw jiskʼachkiti, ni jan istʼiris tukkarakiti pobrenakan tʼaqesitapatjja, ni imantaskarakisa. Jan ukasti khitinakatejj jupar yanapa jachʼat mayipki ukanakarojj istʼiwa’ (SALMO 22:24, TNM).
“Taqe llakinakam jupan amparapar katuyapjjam, jupajj kunatï jumanakar pasapktam ukanakat wal llakisi” (1 PEDRO 5:7).
Janiw wiñayapunejj tʼaqeskañäniti
Diosajj tʼaqesiñanak tukj-jjaniwa sasaw Bibliajj sistu.
“Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” (APOCALIPSIS 21:3, 4).
Diosaw kunatï tʼaqesiykistu taqe ukanak tukj-jjani
Kunjamtï Bibliajj qhanañchkejja, Reinop toqew tʼaqesiñanak tukj-jjani.
“Alajjpachankiri Diosajj mä yaqha reino saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampejja [...], wiñayan wiñayapaw uka reinojj utjarakini” (DANIEL 2:44).