Ispa wawanakax janiw kikpäpkänti

AKA pä waynitunakax janiw kikpäpkiti. ¿Sutinakap yattati? Flecha aptʼataxa Esaú satawa, uwijanak uñjaski ukasti Jacob satarakiwa.

Isaacampi Rebecampin ispa jan ukax mellizo wawanakapawa. Isaacaxa Esaurux wal munasïna, kunattix animalanak katuñataki khusänwa ukat familiatakiw manqʼañ apanirïna. Ukampisa Rebecax Jacoburuw wal munasïna, kunattix jan colerayiri suma wawänwa.

Ukapachax Abraham achachilapax jakaskänwa, Jacobuxa Jehová Diosat parlir istʼañxa wal munpachäna. Abrahamax 175 maraniw jiwxäna, ukhaxa uka waynitunakaxa 15 maranïxapxänwa.

Esaux 40 maranïxäna ukhaxa Canaán uraqin utjasir pä warmimpiw casarasïna. Isaacarusa Rebecarusa wal ukax llakisiyäna, kunattix uka warminakax janiw Jehová Diosar yupaychapkänti.

Mä uruxa Jacobun luratapatwa Esaux wal colerasïna. Isaac tatax jilïr yuqapar bendiciñapänwa. Esaú yuqapaw jilïrinxa, ukatwa bendición katuqañapänxa. Ukampis Esauxa jilïr wawañxa Jacoburuw aljxatayna. Ukhamaraki, kunapachatï uka pä wawax yurxäna jan ukax nasxäna ukhaxa, ‘Jacobuw bendición katuqani’ sataynaw Diosaxa. Ukarjamapï phuqasïnxa. Isaacax Jacob sullka yuqaparuw bendicïna.

Jacobur bendicitayna uk yatisaxa, Esaux wal colerasïna. Sintipuniw phiñasïna, Jacobur jiwayañ amtäna. Rebecax uk yatisaxa, wal llakisïna. Ukatwa, Isaacarux akham säna: ‘Wali chuyma usuyapunïniwa Jacobux aka Canaán markankiri warmimpi casarasini ukhaxa’ sasa.

Ukatwa Isaacax Jacobur jawsasin akham säna: ‘Canaán markankir warmimpix janiw casarasiñamäkiti. Ukat sipana Betuel achachilaman utap sarma. Labán sat yuqapan mä phuchapampi casarasim’ sasa.

Jacobux tatapar istʼasax Harán uraqiruw wali jay saräna, kawkintï familiaranakapax utjasipkäna ukaru.