Jacobumpi Esaumpiw sumankthapipjje

Jehová Diosajj Jacobur akham sänwa: ‘Kunjamtï Abrahanarusa Isaacarusa jan walinakat jarkʼaqkayätjja ukhamarakiw jumar jarkʼaqäma’ sasa. Jacobojj Harán sat lugaranwa jakasïna, ukanwa casarasirakïna. Jupajj walja wawanakanëjjanwa, wali qamirëjjarakïnwa.

Tiempompejja, Jehová Diosajj akham sasaw Jacobur säna: “Nayra awkinakaman oraqepar kuttʼjjam” sasa. Ukatwa Jacobumpi familiapampejj viajiñ qalltapjjäna. Thakinjja, khitanakapajj akham sasaw yatiyapjjäna: Esaú jilamajj 400 chachanakampiw jutaski sasa. Jacobojj wal ajjsarayasïna, ‘Esaú jilajajj nayarus familiajarus jan walinakwa lurapjjetaspa’ sasaw säna. Ukatwa Jehová Diosar akham sasin mayisïna: Mirä amp suma, jilajat salvakitaya sasa. Qhepürusti, Jacobojj regalonakwa Esaú jilapar apayäna: walja ovejanaka, cabranaka, vacanaka, camellonaka, asnonaka.

Uka arumajj Jacobojj sapakiskäna ukhaw mä angelar uñjäna. Uka angelajj Jacobumpiw nuwasïna. Jupanakajj qhantatkamaw nuwasipjjäna. Angelajj Jacobur usuchjkchïnsa katuntaskakïnwa. Angelajj “antutjjeta” sasaw säna. Ukampis Jacobojj akham sänwa: “Janitï bendiskitätajja, janiw nayajj antutkämati” sasa.

Ukatwa angelajj Jacobur bendisïna. Uka bendición katoqasaw Jacobojj ‘Jehová Diosaw Esaú jilajat jarkʼaqetani’ sasin confiyäna.

Uka alwajja, Jacobojj Esaú jilaparu 400 chachanakampiruw jayat uñjäna. Ukatsti Esaú jilapamp jikisiñatakejj familiapat nayrwa saräna, purisajj paqallq kutiw jilap nayraqatar oraqer puriñkam altʼasïna. Esaú jilapajj Jacobun ukar tʼijusaw qhomantäna. Panipajj wal jachapjjäna sumankthapipjjarakïnwa. ¿Jacobun ukham luratapajj Jehová Diosar gustpachänti?

Uka qhepatjja, Esaú chachajj utaparuw kuttʼjjäna, Jacobusti kawkirutï sarañapäkäna ukaruw viaj-jjäna. Jacobojj 12 wawanakanïnwa, sutinakapajj akanakänwa: Rubén, Simeón, Leví, Judá, Dan, Neftalí, Gad, Aser, Isacar, Zabulón, José ukat Benjamín. Qhepatjja, Jacobun José sat yoqap taypiw Jehová Diosajj markapar salvañapäna. ¿Kunjamas ukajj pasäna uk yatiñ munasmati? Yatjjatañäni.