Jan walinakan tukusiñapa

¿AKAN kuns uñjtaxa? Jïsa, waljaniw caballot tʼijunisipki. Ukampis kawkitsa jutasipki. ¡Alaxpachat qinay patxnam chhukuqanisipki! ¿Alaxpachan caballonakax utjpachati?

Janiwa, aka caballonakax janiw chiqa caballonakäpkiti. Janiw qinay patxan tʼijtapkaspati, ¿janichä? Ukampis Biblianwa alaxpach caballonakatxa parli. ¿Kunatäpachas uk yattati?

Jaya nayra tiemponakanwa caballot nuwasir sarapxirïna. Ukhamasti alaxpachat caballonakaw saraqani sasa Biblian siski ukhaxa aka Uraqinkir jaqinakamp nuwasiñaw utjani sañwa muni. ¿Kawkinkanisa? Armagedonankaniwa, aka Uraqin taqi jan waltʼäwinakwa chhaqtayani.

Armagedonanxa, Jesusaw nuwasiñ pʼiqtʼani. Jehová Diosaw gobiernopan apnaqiripataki Jesusar ajllïna uk amtañäni. Ukatwa akan Jesusax pillunixa. Ukat espadaxa Diosan taqi uñisirinakapaw jiwarapxani sañ munaraki. Diosax jan wali jaqinakar chhaqtayxaniwa, ukax ukhamäspati, ¿kamsasmasa?

10 sarnaqäwi thaqtañäni. ¿Kuns uñjtaxa? Jïsa, Uma Juiciompi jan wali jaqinakar jiwayäna ukawa. ¿Khitis uka Uma Juicio apanïnxa? Jehová Diosawa. Jichhax 15 sarnaqäwi uñxatarakiñäni. ¿Kunas akan kamachaski? Jehová Diosaw Sodoma ukat Gomorra markanak phichkatäna.

Jichhax 33 sarnaqäwi uñxatarakiñäni. Uñtam egipcionakan nuwasiñ carronakaparusa caballonakaparusa kunas kamachaski. ¿Khitis umampi apayäna? Jehová Diosawa. Markapar jarkʼaqañatakiw uk luräna. 36 ukat 76 sarnaqäwinak jichhax thaqtʼarakma. Jan wali sarnaqapxatapatxa Diosan markapax tʼunjataw uñjasïna, janiw Jehová Diosax jarkʼaqkänti.

Ukhamasti Jehová Diosax aka Uraqit jan walinak chhaqtayañatakix alaxpachat khitaniskapuniniwa. ¿Ukxarux kunas utjani? Janakipaskakma, yatxataskakiñäni.