14 Yatichäwi
Kunjam uttʼayatäpxisa Jehová Diosan Qhanañchirinakapaxa
¿Qhanañchirinakax kunapachas mayampi uñsti? (1)
¿Kunjamsa tantachäwinakapax apasi? (2)
¿Kuna qullqimpis yanaptʼasipxi? (3)
¿Khitis sapa taman irpirixa? (4)
¿Kuna jachʼa tantachäwinakasa sapa mar apasi? (5)
¿Uraqpachan Diosan Apnaqäwipat uñjaski uka utansa sucursalanakapansa kunas lurasi? (6)
1. Jichhürunakanxa, Jehová Diosan Qhanañchirinakapaxa 1870 uka maranakan uñstäna. Qalltanxa Bibliat Yatiqirinaka satäpxänwa. Ukat 1931 maranwa Bibliat apstʼasin Jehová Diosan Qhanañchirinakapa sas sutinïxapxi (Isaías 43:10). Jukʼat jukʼatwa jilxattawayi, jichhax millón millón Qhanañchirinakaw utjxi, ukatxa 230 jila markanakanwa yatiyasipki.
2. Niya taqi tamanakawa semananxa kimsa kuti tantachasipxi. Uka tantachäwinakaru sarasmaxa wali askipunïspawa (Hebreos 10:24, 25). Uka tantachäwinakanxa Bibliat yatichasi. Qalltañatakisa tukuyañatakisa Diosat maytʼasipxi, ukatxa niya taqi tantachäwinakanwa ‘yupaychañ qʼuchunak’ qʼuchupxi (Efesios 5:18, 19). Mantañax inakiwa, janiw qullq mayipkiti (Mateo 10:8).
3. Niya taqi tamanakawa mä Tantachasiñ Utan tantachasipxi. Uka utanakax janiw sinti kʼachachatäkiti, Jehová Diosan Qhanañchirinakapan luratawa. Uka utanakanxa janiw pachachanakasa cruzanakasa, ukar uñtasitanakas utjkiti. Yanaptʼañ munirinakan churäwinakapampiw gastonakax phuqasi. Yanaptʼañ munirinakaxa mä cajaruwa iranttʼapxaspa (2 Corintios 9:7).
4. Sapa tamanakanwa irpiri chuymaninakax utji, jupanakaw tamar yatichapxi (1 Timoteo 3:1-7; 5:17). Irpirinakan yanapirinakapawa jupanakar yanaptʼapxi (1 Timoteo 3:8-10, 12, 13). Janiw khitis tamanxa jilankkiti (2 Corintios 1:24). Janiw suma sutinakampi apxatatäpkiti (Mateo 23:8-10). Janirakiw mayja isitäpkisa. Ukatxa janiw khitisa jupanakar qullqi churkiti. Irpiri chuymaninakaxa taqi chuymawa tamankirinakar yatichapxi. Jan waltʼañanakax utjki ukhaxa chuymachtʼapxiwa ukhamaraki iwxtʼapxiwa (Santiago 5:14-16; 1 Pedro 5:2, 3).
5. Jehová Diosan Qhanañchirinakapaxa sapa maraw jachʼa tantachäwinak lurapxi. Uka jachʼa tantachäwinakarux walja tamanakaw sarapxi Biblian yatichäwinakap istʼañataki. Uka tantachäwinakanwa machaqanakax bautisasipxi (Mateo 3:13-17; 28:19, 20).
6. Uraqpachana Diosan Apnaqäwipa uñjañataki Jehová Diosan Qhanañchirinakapan utapaxa Nueva York markankiwa. Ukankiwa Uraqpachan uñjiri Jilïri Irpiri jilatanakaxa, jupanakaxa wali yatxatata irpir chuymaninakawa, jupanakawa taqi tamanaka uñjapxi. Ukatsti, patak jila sucursalanakaw Uraqpachan utji. Uka utanakan irnaqirinakawa Bibliat apstʼat libronak lurañsa apayaniñsa yanaptʼapxi. Uka utanakanrakwa yatichiri sarañatakisa wakiyapxi. ¿Janit uka utar uñanttʼiri sarañ munkasma?