Kunjam uttʼayatäpxisa ukat kunjamsa Uraqpachan yatiyasipki
NIYA pä patak kimsa tunka jila markanakanwa Diosan arunakapxa yatiyasipki, ukatxa walja sucursalanakaw utjaraki. Ukat kunjamas taqi chiqanakan yatiyasiski ukxa Uraqpachan Jilïr Irpirinakaw pʼiqiñchapxaraki, jupanakax Brooklyn, (New York) markankapxiwa. Jupanakan khitataw mä qhawqha jilatanakax sucursalanakan uñjir jilatanakampi tantachtʼasirix sarapxi, sapa maraw uk lurapxi. Ukat sapa sucursalanwa kimsat paqallqkam jilatanakax uñjapxaraki, kawkintix jupanakar uñjañax waktʼki ukwa sum uñjapxaraki. Ukampis yaqhip sucursalanakanxa libronak lurañ wali jachʼa maquinanakaw utjaraki. Jichhax yaqha tuqit amtarakiñäni, mä jachʼa markanxa walja tamanakaw utji, ukat niya pä tunka tamanakxarux mä jilataw uñji, tamanak tumptʼir satawa, uka jilatax sapa maraw pä kutix uka tamanakar tumptʼirix sari, ukhamata jilat kullakanakar yanaptʼañataki, Diosan arunakapat sum yatiyapxañapataki. Ukatxa maran pä kutirakiw uka tamanakax pä jachʼa tantachäwinak lurapxi. Ukampis uka tamanak tumptʼir jilatanakxarux yaqha jilatarakiw utji, tamanak tumptʼirinakan uñjiripa satawa. Uka jilatanakax kawkinsa uñjapxañapäki uka chiqanwa tamanak tumptʼir jilatanakar uñjasipkaraki, ukat uka tamanakar uñjapxaraki.
Taqi chiqansa mä Tantachasiñ Utanpunwa Jehová Diosan Qhanañchirinakapax tantachasipxi, ukanwa Diosan arunakapat yatiyir sarañatakix wakichasipxi. Ukat jilat kullakanakax kawkhantï yatiyapxañapäki ukaxa wali suma jalanuqtʼatawa, ukhamata Diosan arunakapax taqi jaqinakar purtʼañapataki. Tamanakax may mayäpxarakiwa, yaqhipansti jukʼanikiw tantachasipxi, ukat yaqhipansti waljaniw tantachasipxi, niya pä patakanjamaw tantachasipxi, ukat sapa tamanwa mä qhawqha irpir chuymaninakax utji, jupanakaw kun lurañsa wakichapxi. Ukhamasti, khitinakatix Uraqpachan uñjasipki ukanakasa, yanapirinakapasa ukat sucursalanakan uñjirinakasa, tamankirinakasa mä amtanikïpxiwa. Mä arunxa, Jehová Diosan taqi Qhanañchirinakapaw Diosan Apnaqäwipat suma yatiyäwinakxa taqinir yatiyapxi, ukaw jupanakatakix taqi kunat sipansa nayranki.
Ukxarusti, kunjamas taqi chiqanakansa yatiyasiski uka tuqinakat yatiyäwinakwa Uraqpachan uñjirinakax katuqapxaraki, uka yatiyäwinakampiw sapa maratxa Anuario sat mä libro apsupxi, ukansti kunjamsa Jehová Diosatsa, Jesusar katuyat Apnaqäwipatsa Uraqpachan yatiyasipki ukanakaw sum qhanañchasi, ukat qhawqhanïpxisa ukas yatiyasirakiwa. Aka qhipa maranakanxa niya tunka paqallquni millón jaqinakaw Jesusan jiwäwip amtañatakix sarapxatayna. Ukatxa sapa marawa mä waranqa millón horanakax yatiyir sarapxatayna, ukatsti sapa mararakiw niya kimsa millón jaqinakax bautisasipxatayna. Libronakasa qillqatanakasa ukham lakintatarakiwa.