¿Kunatsa Bibliat yatjjataskakiñama?

1. Bibliat yatjjataskakiñamajja, ¿kunjamsa yanaptʼätam?

Biblian qallta yatichäwinakapat yatjjatañajj Jehová Diosar munasiñamatakiw yanaptʼpachätam. Ukampis Jupar jukʼamp munasiñatakejj chʼamachasiskakiñamawa (1 Pedro 2:2). Jan armasimti, Bibliat yatjjatasa, Diosan jakʼapankäta ukhakiw wiñay jakañ jikjjatäta. Juan 17:3 ukat Judas 21.

Jehová Diosat jukʼamp yatjjataskakïta ukhajja, jukʼampiw iyawsäwimajj jiltani, ukaw Diosan munañap lurañamatak yanaptʼätam (Hebreos 11:1, 6). Ukat arrepentisiñatakisa, sum sarnaqjjañatakisa yanaptʼarakïtamwa. Hechos 3:19 liytʼäta.

2. ¿Kunjamsa yaqhanakar yanaptʼasma?

Taqeniw suma yatiyäwinak yatiyañ muntanjja, ukhamajj inas jumajj kuntï yateqawaykta uk yaqhanakar yatiyañ munarakchisma. Ukhamäni ukhajja, Bibliat jukʼamp yatjjatañamawa, ukhamatwa kunjamsa Qollan Qellqatanakampi Jehová Diosata ukat suma yatiyäwinakapata jaqenakar sum yatiyasma uk yateqäta. Romanos 10:13-15 liytʼäta.

Familiaranakamaru ukat amigonakamaruw parlañ qalltasma, ukampis wali munasiñampi ukat respetompiw jupanakar parltʼañama. “Yatichäwinakamajj janiw walïkiti” sañat sipansa, Diosajj kuna amtanis aka Oraqetakejja, uka toqetwa parlasma. Ukat jan armasimti, jaqenakajj janiw arunak istʼasaki yateqapkiti, jan ukasti luratanakas uñjasaw jukʼamp yateqapjje. 2 Timoteo 2:24, 25 liytʼäta.

3. ¿Kunjamsa Jehová Diosampi sum apasisma?

Bibliat yatjjatañaw Diosar jukʼamp yupaychaskakiñataki ukat Jupamp sum apasiñataki yanaptʼätam. Jïsa, jumajj Diosan familiap taypinkasmawa. 2 Corintios 6:18 liytʼäta.

4. ¿Kunas nayrar sarantaskakiñamatak yanaptʼätam?

Janipuniw Bibliat yateqañ jaytañamäkiti (Hebreos 5:13, 14). Jehová Diosan Qhanañchirinakaparuw “Bibliat yatichapjjeta” sasin mayisma, jupanakaw ¿Kunsa Bibliax chiqpachapuni yatichi?, sat librompi yatichapjjätam. Cheqansa, jukʼamp yateqaskakïta ukhajja, jukʼamp kusisitaw jakasirakïta. Salmo 1:1-3 ukat 73:27, 28 liytʼäta.

Jan armasimti, Biblian suma yatiyäwinakapajja, Jehová Diosatwa juti, jupaw kusisit Diosajja. Ukat jumatï taqe chuyma servirinakapampi tantachasïta ukhajja, jukʼampiw Jupar jakʼachasirakïta (Hebreos 10:24, 25). Ukat Diosan munañap lurañataki chʼamachasiskakïta ukhajja, wiñayatakiw jakasisma, ukaw cheqpach jakañajja. Cheqansa, Jehová Diosar jakʼachasiñamawa, janiw yaqha suma luräwejj ukat sipansa utjkiti. Tito 1:2 liytʼäta.