Galilean yatiyasaw apostolonakar wakichäna

Jesusajj walja maranakaw Diosan arunakap yatiyjjäna. Ukhamïpanjja, ¿Jesusajj samartʼañ horasäjjewa sasat amuypachäna? Janiwa, antisas Diosan arunakap yatiyañatakejj “Jesusajj taqe jiskʼa jachʼa markanakaruw [Galilean] saräna, sinagoganakan yatichasa, Reinon suma yatiyäwinakap jaqenakar parlasa, kunayman usutanakar qollasa” (Mateo 9:35). Uka markanakar sarasajja, Diosan arunakap jukʼamp cheqanakan yatiyasiñapajj wakisitapwa Jesusajj amuyäna. ¿Kunsa ukatakejj luräna?

Jaqenakajj Diosar jakʼachasiñ wal munapjjäna, chuymachatäñwa munapjjarakïna, ukwa Jesusajj yatiyir sarkasajj uñjäna. Jupanakajj jan awatirini ovejanakjam qʼala usuchnoqata, ananukuta ukhamäpjjänwa. Ukatwa jaqenakat sinttʼasisajj discipulonakapar akham säna: “Cosecha apthapiñajj waljawa, trabajirinakasti jukʼanikiwa. Ukhamasti khititï cosecha apthapiyaski ukar mayipjjam, trabajirinak yapupar khitaniñapataki” sasa (Mateo 9:37, 38).

Jesusajj jaqenakar yanaptʼañwa amtäna. Ukatwa 12 apostolonakapar jawsayasajj panin panin khitäna. Jesusajj akham sasaw ewjjtʼarakïna: “Janiw akapachankir markanakan thakipar sarapjjätati, ni samaritanonakan markaparus mantapjjätati, jan ukasti chhaqat ovejanakar uñtasitäpki uka Israel markaruk sarapjjam. Sarkasasti akham sasaw yatiyapjjäta: ‘Alajjpachankir Reinojj jakʼankjjewa’ sasa” (Mateo 10:5-7).

Jesusajj oración lurañ yatichkäna ukhajja, Diosan Reinopatwa parläna. Apostolonakapajj uka pachpa Reinotwa yatiyapjjañapäna. Diosan ajllit Reyipajja, mä arunjja Jesucristojj jupanakampi chikäskänwa, ukatwa “Reinojj jakʼankjjewa” sasin yatiyapjjañapäna. Ukampis ¿kunjamatsa Reinon khitatäpjjatap uñachtʼayapjjaspäna? Jesusaw jupanakarojj usutanakar waliptayañataki, jiwatanakar jaktayañatak chʼam churäna, ukjja jan kun mayisakiw lurapjjañapäna. Ukhamasti ¿kuna qollqempis jupanakajj manqʼañanaksa kunanakatï jakañataki wakiski ukanaksa jikjjatapjjäna?

Yatiyir sarañatakejja, janiw cosasanak apapjjätati sasaw Jesusajj discipulonakapar säna. Janiw qori, qollqe, ni cobrsa apapjjañapäkänti, janirakiw thakitakejj manqʼa wayaqsa, yaqha issa, yaqha wiskhunaksa apapjjañapäkänti. ¿Kunatsa? Jesusajj akham sasaw jupanakar säna: “Trabajirin manqʼa katoqañapajj wakisiwa” sasa (Mateo 10:10). Khitinakatï Diosan arunakap sum istʼapkäna, uka jaqenakaw discipulonakarojj kunatï jupanakatak wakiskäna ukanakampi yanaptʼapjjañapäna. Akham sasaw Jesusajj discipulonakapar säna: “Kawkjan mä utar mantasasa, ukan quedasipjjam, uka cheqat sarjjañkama” sasa (Marcos 6:10).

Jesusajj kunjamsa yatiyapjjañapäna uka toqet akham sasaw discipulonakapar ewjjtʼäna: “Utar mantasinsti utankirinakar aruntapjjam. Sum katoqapjjätam ukhajja, jumanakan sumankañanakamajj jupanakampïpan, ukampis jan sum katoqapkätam ukhasti, uka sumankañajj jumanakjjar kuttʼanjjpan. Kawkintejj jan katoqapkätam, arunakamsa janirak istʼañ munapkani ukhajja, uka utat jan ukajj uka markat mistjjasajj kayunakamat laqʼa polvonak thalarasiwayapjjam” sasa (Mateo 10:12-14).

Inas mä markpacha, jan ukajj mä jiskʼa markpach Diosan arunakap jan istʼañ munapkchispänti. ¿Kunas uka markampejj pasaspäna? Jesusajj sänwa: “Qhanakwa sapjjsma, Juicio Urunjja uka markajj Sodoma, Gomorra markanakat sipansa jukʼamp jan walin uñjasini” sasa (Mateo 10:15). Uka arunakampejj uka markajj juchañchatäniwa sasaw saskäna.