Cuerpo Gobernanten cartapa

Suma yatiyäwinak yatiyirinakataki:

¡Jehová Diosar servisajj wali kusisitätanwa! Diosajj jupan yanapirinakaparjamaw uñjistu, oraqpachan Diosan Reinopat predicañataki yatichañatakiw mä luräwi churarakistu (Mat. 28:19, 20; 1 Cor. 3:9). Uka luräwimp mayachtʼat sum phoqañatakejja, organiztʼatäñasawa (1 Cor. 14:40).

Aka librojja, cristiano congregacionajj kunjam organiztʼatasa uk sum amuyañatakiw yanaptʼistani. Ukhamarus kuna luräwimpis sapa cristianojj phoqe, kuna privilegionisa uka toqetwa qhanañcharaki. Jumatï congregacionan katoqkta uka luräwinak valoranit uñjäta, sum phoqarakïta ukhajj jukʼampiw Diosar confiyäta (Hech. 16:4, 5; Gál. 6:5).

Ukatwa aka libro yatjjatañamataki, kuntï yateqkäta uk sum amuytʼasin ukarjam sarnaqañamatak chʼamañchtʼapjjsma. Sañäni, jumatï jan bautisat publicadorästa ukhajja, ¿bautisasiñatakejj kunanakampsa lurañama? Bautisatäjjsta ukhajj ¿kunjamsa Diosar jukʼamp servisma? ¿Kunanaksa lurasma? (1 Tim. 4:15). ¿Kunjamsa congregacionan sumankañ utjañapatakejj yanaptʼasma? (2 Cor. 13:11). Aka libronwa uka jisktʼanakan respuestanakap jikjjatäta.

Niyakejjay walja jaqenakajj Diosan markapar mantasinipkchejja, congregación pʼeqtʼapjjañapatakejj wakichtʼat walja chachanakaw munasi. Ukhamajj jumatï jilatästa ukhajj ¿kunsa ancianöñatakisa siervo ministerialäñatakis lurasma? Uka luräwinak katoqañatakejj kunanaksa maynejj luraspa ukajj aka libronwa sum qhanañchtʼasi (1 Tim. 3:1).

Diosan markapan kuna luräwimpis sapa maynejj phoqasipkta uk sum amuyañataki ukhamarak uka luräwinak valoranit uñjañataki aka librojj yanaptʼapjjeristam ukwa munapjjta, ukatakiw Jehová Diosar oracionan mayipjjarakta. Jilat kullakanaka, wal munasipjjsma, wiñayatak Jehová Diosar kusisit servipjjañamatakiw wal orasipkarakta (Sal. 37:10, 11; Is. 65:21-25).