Suma yatiyäwinak yatiyirinaka

JEHOVÁ DIOSAJJA Jesucristo Yoqapat yateqasiñaswa muni (1 Ped. 2:21). Jesusan taqe arkirinakapajja, jupjamarakiw Diosan servirinakapjamajj suma yatiyäwinak yatiyañatakejj chʼamachastanjja. Ukham luratasajj Jehová Diosar taqe chuyma serviñatakiw chʼamañchtʼistu, Jesusajj uka toqet akham sänwa: “Nayan ukar jutapjjam, taqe qarjatanaka, jatjatanaka, nayaw jumanakar samartʼayapjjäma. Nayan yukuj jumanakjjar apapjjam, nayat yateqasipjjarakita. Nayajj llampʼu chuymanïtwa, humilde chuymanirakïtwa, ukatsti jumanakatakejj samarañsa jikjjatapjjätawa” sasa (Mat. 11:28, 29). Khitinakatï uka invitacionapar istʼktan ukanakajja, wali kusisitaw jikjjatastanjja.

² Jesusajj Jehová Diosan serviripjamajja, mä qhawqha jaqenakaruw jupan arkiripäpjjañapatakejj invitäna (Mat. 9:9; Juan 1:43). Jupanakar sum yatichasasti, jaqenakar predicapjjañapatakiw khitarakïna (Mat. 10:1-11:1; 20:28; Luc. 4:43). Mä qhawqha tiempotjja, 70 discipulonakaruw Diosan Reinopat yatiyir sarapjjañapatak khitarakïna (Luc. 10:1, 8-11). Jesusajj jupanakar akham sänwa: “Khititejj jumanakar istʼapktam ukajja, nayaruw istʼaskitu. Khititejj jumanakar jan yäqapktam ukajja, janirakiw nayarojj yäqkituti. Ukhamarus khititejj nayar jan yäqkitu ukajja, khititï nayar khitankitu ukarus janirakiw yäqkiti” sasa (Luc. 10:16). Uka arunakampejja, kuntï lurapjjañapäkäna ukajj wali wakiskirïtapwa Jesusajj uñachtʼayäna, cheqansa Jesusampiru Jehová Diosampiruw representapjjäna. Jichhürunakan ukaw pasaraki, khitinakatï Jesusan invitacionap katoqasin jupan arkiripar tukupki ukanakajja, Jehová Diosatwa mä luräwi katoqapjje: jupanakajj predicapjjañapawa, jaqenakarus Jesusan discipuloparuw tukuyapjjañaparaki (Mat. 24:14; 28:19, 20; Luc. 18:22; 2 Cor. 2:17).

³ Jesusan invitacionap katoqasirinakajja, Jehová Diosampiru Jesucristompiruw uñtʼawaytanjja (Juan 17:3). Jehová Dios nayraqatan kunjamsa sarnaqañasa uksa yateqawayaraktanwa. Ukatjja Diosan yanaptʼapampejj amuyuswa qʼomachasiwaytanjja, machaq jaqëñampiw isthapisiwaytanjja, cheqap leyinakaparjam sarnaqañatakis chʼamachasiwayaraktanwa (Rom. 12:1, 2; Efes. 4:22-24; Col. 3:9, 10). Ukhamarus Jehová Diosar yuspäratas laykuw jakañ vidas jupar katuyasiwaytanjja, bautisasiwayaraktansa. Bautisasktan ukhatwa Diosan serviripar tukuwayjjtanjja.

⁴ Janipun ak armapjjañäniti, Jehová Diosar serviñatakejj qʼoma chuymanïñasawa, ‘janipuniw jan walinak lurañasäkiti (Sal. 24:3, 4; Is. 52:11; 2 Cor. 6:14-7:1). Jesusan jiwas layku jiwatapar confiyasaw qʼoma concienciampi Jehová Diosar sirvtanjja (Heb. 10:19-23, 35, 36; Apoc. 7:9, 10, 14). Apóstol Pablojja ‘taqe kunsa Diosar jachʼañchañatak lurapjjam, janirak mayninakar lanktʼasiyapjjamti’ sasaw cristiano jilat kullakanakar amtayäna. Apóstol Pedrojj sum sarnaqapjjañapatakiw cristianonakar ewjjtʼarakïna, ukhamat jaqenakajj uk uñjasin Jehová Diosat jukʼamp yatiñ munapjjañapataki (1 Cor. 10:31, 33; 1 Ped. 3:1). Ukhamajj ¿Biblia yateqerin suma yatiyäwinak yatiyirïñapatakejj kunsa jiwasajj lursna?

MACHAQ PUBLICADORANAKA

⁵ Bibliat yateqerirojja qalltatpachaw kuntï yateqaski uk familiaranakaparu, amigonakaparu jan ukajj trabajopankir compañeronakapar parlañapatak chʼamañchtʼañasa. Ukhamtï luranejja, suma yatiyäwinak predicañatakejj wakichtʼatäjjaniwa (Mat. 9:9; Luc. 6:40). Jupatï taqe cheqan Jehová Diosat parlañatak chʼamachasini, Diosar serviñans jiltarakini ukhajja, jiwasamp chik predikir sarañwa amtani.

KUNA MAYITANAKAMPIS MACHAQ PUBLICADORANAKAJJ PHOQAPJJAÑAPA

⁶ Nayrïr kuti utat uta janïr sarkasajja, Bibliat yateqerejj nayraqatajj mä qhawqha mayitanakampiw (requisitonakampiw) phoqañapa. Jaqenakajja jiwas chika predicapki ukanakarojj Jehová Diosan Testigonakapäpkaspas ukhamwa uñjapjje, ukatwa khititï Diosan leyinakaparjam sarnaqañatak chʼamachaski ukakejj jan bautisat publicadoräspa.

⁷ Kunapachatï mä publicadorajj maynir Bibliat yatichki ukhajja, jukʼamp sumwa yateqeripar uñtʼaspa, kuntï yateqki ukarjam sarnaqatapsa amuyarakispawa. Ukhamäkchisa ancianonakajj Bibliat yateqerimpi ukat yatichiripampiw tantachasipjjani, ukhamat jakañ vidapat mä jukʼa parltʼañataki.

⁸ Coordinador jilatajja, pä ancianonakaruw jupanakamp parltʼapjjañapatak mayiñapa, (uka ancianonakat maynejj comité de servicio uka taypinkirïñapawa). Jukʼa ancianonakak utjki uka congregacionanakanjja, coordinador jilatajj mä ancianompiru wakichtʼat mä siervo ministerialampiruw uk lurapjjañapatak mayispa. Uka jilatanakajj jankʼakiw uka lurañamp phoqapjjañapa. Amuytʼañataki, coordinador jilatatï mä tantachäwin uk lurapjjañap anciano jilatanakar mayini ukhajja, tantachäwi tukuyataruw jupanakajj Bibliat yateqerimpi ukhamarak yatichiripamp jankʼak tantachtʼasipjjaspa. Tantachaskasajj munasiñampi ukat respetompiw parltʼasipjjañapa. Ukampis Bibliat yateqerir jan bautisat publicadorjam janïr aprobkasajja, akanakwa ancianonakajj sum uñakiptʼapjjañapa:

1. 1) Yateqerejj Bibliajj Jehová Diosan amuytʼayatätapwa creyiñapa (2 Tim. 3:16).

2. 2) Kuntï Bibliajj yatichki uk sumwa uñtʼañapa, ukatjja chuymaparuw katoqasiñapa. Ukatjja Bibliarjamaw kuns qhanañchañapa, janiw falso religionanakan yatichäwinakaparjamasa pachpa amuyuparjamas qhanañchañapäkiti (Mat. 7:21-23; 2 Tim. 2:15).

3. 3) Bibliajj tantachäwinakar sarañ mayki ukarjamajja, puedki ukarjamaw jan faltasis sarañapa (Sal. 122:1; Heb. 10:24, 25).

4. 4) Bibliajj kuntï adulterio toqeta, pä chachanïñata jan ukajj pä warminïñata, chachapura jan ukajj warmipura ikintasiñata, ukat yaqha ukham qʼañu juchanakat yatichki uk sumwa amuyañapa. Jupatï jan casadökasin mä chachampi jan ukajj mä warmimp jakchi ukat ikintasirakchi ukhajja, leyinakarjamaw casarasiñapa (Mat. 19:9; 1 Cor. 6:9, 10; 1 Tim. 3:2, 12; Heb. 13:4).

5. 5) Bibliajj machantasiñ toqet kuntï yatichki ukaruw istʼañapa. Janirakiw qollanak doctoramp jan recetatajj umañapäkiti, ni pʼeqer mayjtʼayir vicionakarus yatintatäñapäkiti (2 Cor. 7:1; Efes. 5:18; 1 Ped. 4:3, 4).

6. 6) Jan wali amigonakamp chikachasiñajj kunja jan walisa uk sumwa amuyañapa (1 Cor. 15:33).

7. 7) Nayrajj sarirïkäna uka falso religionatwa mistjjañapa. Janirakiw kunanaktï uka religionajj lurki ukanakar apoyjjañapäkiti (2 Cor. 6:14-18; Apoc. 18:4).

8. 8) Janiw politicar mitisiñapäkiti (Juan 6:15; 15:19; Sant. 1:27).

9. 9) Mä markajj yaqha markampi jan waltʼayaski ukhajja, janiw kawkïr markarus apoyañapäkiti (Is. 2:4).

10. 10) Jehová Diosan Testigopäñ cheqpachapuniw munañapa (Sal. 110:3).

⁹ Ancianonakatï yateqerin yaqhep respuestanakapat jan seguröpkchi ukhajj jukʼampwa uka toqet jisktʼapjjañapa, ukhamat kunatsa ukham amuyi uk yatiñataki. Aka alay toqen uñstki uka textonakwa yateqerimp amuykiptʼapjjaspa. Yateqerejj akwa amuyañapa: khitinakatï Jehová Diosan Testigonakapamp predicapki ukanakajja, Biblian mayitanakaparjamaw sarnaqapjjañapa. Kunjamjjay Bibliat yateqerejj respuestanak churchi ukarjamaw ancianonakajj predikir mistuñatakejj wakichtʼatati janicha uk amuyapjjani.

¹⁰ Ancianonakajja jankʼakiw yateqerirojj publicadoräjjaniti janicha uk sapjjañapa. Jilapartejja jupamp parlañ tukuyasaw yatiyapjjaspa. Yateqeritï mayitanakamp phoqchi ukhajja, Jehová Diosar serviñan nayrar sartatapat felicittʼapjjañaparakiwa (Rom. 15:7). Ukatjja predikir jankʼak mistuñapataki ukhamarak phajjsi tukuyar informe churañapatakiw chʼamañchtʼapjjañapa. ‘Ukanak luräta ukhajja, sutimajj Registro de publicador de la congregación uka formularioruw qellqantasini, ukatjja congregacionan archivonakapanwa imasirakini’ sasaw qhanañchtʼapjjañaparaki. Ancianonakajja, kunanakatï uka formularion phoqantasiñapäki uka datonakwa publicadorar mayipjjañapa, aka pä amtanakampiw ukajj mayisi: 1) oraqpachankir Jehová Diosan Testigonakapajj kunanaksa lurasipki uk sum registrañataki. 2) Diosan markapan publicadorajj kunayman luräwinakamp phoqañapataki ukhamarak Diosar serviñan yanaptʼa katoqañapataki. Ukjjarusti ancianonakajj machaq publicadoranakarojj akham sasaw sapjjañapa: ‘“Política global de protección de datos personales de los testigos de Jehová” ukarjamaw juman datonakamajj apnaqasini, ukajj Internetan jw.org cheqanwa uñsti’ sasa.

¹¹ Taqeniw machaq publicadorar sum uñtʼañatak chʼamachasiñasa, Jehová Diosar serviñan nayrar sartañapatakis taqeniw yanaptʼañasaraki. Ukhamatwa Bibliat yateqerejj wali chʼamañchtʼat jikjjatasini, predikiris sapa kutiw mistuni, Jehová Diosar jukʼamp serviñatakis wal chʼamachasirakini (Filip. 2:4; Heb. 13:2).

¹² Publicadoräjjtawa sasin ancianonakajj Bibliat yateqerir yatiyapjjani ukhajja, aka libro katoqañapatakiw encargasipjjani. Nayrïr informep churjjani ukhajja, “[Suti] jan bautisat publicadoräjjewa” sasaw congregacionan yatiyasini.

¿MINUS MARANI WAWANAKAJJ PUBLICADORÄPJJASPATI?

¹³ Wawanakajj publicadoräpjjarakispawa. Jesusajj wawanakarojj sum uñjäna, bendisirakïnwa (Mat. 19:13-15; 21:15, 16). Jilpachajj awk taykanakaw wawanakapat encargasipjje, jupanakatï predikir mistuñatak wal chʼamachasipjjani ukhajja, wawanakapajj Jehová Diosar serviñwa amtapjjarakini. Cheqansa wal predicañ munapki uka wawanakarojja, congregacionankirinakat taqeniw yanaptʼañasa. Suma chuyman mä wawatï creencianakapat yaqha jaqenakar parlañ munchi ukhajja, ¿Jehová Diosan markapan jiltaskakiñapatakejj kun lurañas wakisispa?

¹⁴ Minus marani mä wawajj publicadoräñatak mayitanakamp phoqeti janicha uk yatiñatakejja, jupan papitupa jan ukajj mamitapaw Comité de Servicio taypinkir mä ancianomp parlañapa. Ukatjja coordinador jilataw pä ancianonakarojj publicadoräñ munir wawampi awk taykapampi (jan ukajj jupanakat maynimpi jan ukajj waw uywirimpi) tantachasipjjañapatak mayiñapa, uka ancianonakat maynejj comité de servicio taypinkirïñapawa. Mä wawajj Biblian qallta yatichäwinakap sumwa yatiñapa, cheqpachapuniw predikir sarañ munañaparaki, ukhamatwa Diosar serviñan jiltaskatapajj qhan amuyasini. Ancianonakajj mä jachʼa jaqempjamaw wawamp parlapjjañapa, ukampis janiw kunatï jan wawanakatakjamäki uka toqet parlapjjañapäkiti. Ukjjaruw jan bautisat publicadoräjjaniti janicha uk amtapjjañapa (Luc. 6:45; Rom. 10:10).

¹⁵ Ancianonakajja Jehová Diosar serviñan jiltatapat wawarojj felicittʼapjjañapawa, bautisasiñapatakis chʼamañchtʼapjjañapawa. Awk taykaparus felicittʼapjjañaparakiwa, kuna laykutejj Jehová Diosar serviñapatakiw wawapar wali sum yanaptʼawayapjje. Ukatjja “Awk taykanakataki mä qhawqha arunaka” (páginas 179-181) siski uk liytʼapjjañapatakiw awk taykar mayipjjañaparaki, ukanwa kunjamsa wawapar yanaptʼasipkakispa ukajj qhanañchasi.

JEHOVÁ DIOSAR JAKAÑ VIDA KATUYASIÑAMPI UKAT BAUTISASIÑAMPI

¹⁶ Maynitï Jehová Diosar uñtʼjjchi, munasirakchi, mandamientonakaps phoqchi, predikiris mistjjarakchi ukhajja, Diosamp jukʼamp sum apasiñatakiw chʼamachasiñapa. ¿Kunjamsa uk luraspa? Diosaruw jakañ vidap katuyasiñapa, bautisasiñaparakiwa (Mat. 28:19, 20).

¹⁷ Katuyasiña siski uka arojja, mä kun sagrado luräwitak yaqhachaña sañwa muni. Ukhamajj ¿kunjamsa jakañ vidas Jehová Diosar katuyastanjja? ‘Jumar serviñataki, juman thakinakaman sarnaqañatakiw jakañ vidaj jumar katuysma’ sasaw mä oracionan Diosar jakʼachastanjja. Ukham lurasajja, jupa saparuk adorañ amtataswa uñachtʼaytanjja (Deut. 5:9). Jehová Diosar katuyasiñ mayni pachpaw amtañapa, janiw khitis jupa lantejj uk amtkaspati.

¹⁸ Ukampis maynejj janiw mä oración toqekejj jakañ vidap Jehová Diosar katuyasiñapäkiti, jan ukasti Jesusjamaw taqenin uñjkata bautisasiñapa (1 Ped. 2:21; 3:21). Maynitï Jehová Diosar serviñ amtani, bautisasiñ munarakini ukhajja, coordinador jilatampiw parltʼañapa. Ukatjja uka jilataw jupamp tantachasipjjañapatakejj mayni ancianonakar mayini, ukhamat Biblian mayitanakap phoqaskiti janicha uk amuyapjjañapataki. Uka toqet jukʼamp yatiñatakejja, “Jan bautisat publicadoratak mä qhawqha arunaka” (páginas 182-184) ukat “Bautisasiñ munirinakatak jisktʼanaka” (páginas 185-207) siski uka cheqanakwa maynejj liytʼaspa.

JESUSAN DISCIPULONAKAPAJJ SAPA PHAJJSIW INFORMENAKAP CHURAPJJE

¹⁹ Kunjamsa oraqpachan Dios saparuk adorasjje uk yatisajja, Jehová Diosan markapankirinakajj wali chʼamañchtʼataw jikjjatasipjje. Oraqpachanwa suma yatiyäwinakajj yatiyasini sasin Jesusajj siskäna ukhat qalltasinjja, kunjamsa uka arunakajj phoqasiski uk cristianonakajj wal yatiñ munapjje (Mat. 28:19, 20; Mar. 13:10; Hech. 1:8).

²⁰ Kunjamas walja cheqanakan predicasiskäna uka yatiyäwinak istʼasajja, Jesusan discipulonakapajj walpun kusisipjjerïna (Mar. 6:30). Hechos librojja, 33 maran Pentecostés urun mä 120 discipulonakaw espíritu santo katoqapjjäna sasaw qhanañchi. Mä qhawqha tiempotjja, Jesusan discipulonakapajj jukʼampiw jiljjattäna, nayraqatajj mä 3.000 ukhanïpjjänwa, qhepatsti mä 5.000 ukhanëjjapjjarakïnwa. Bibliarjamajja “Jehová Diosajj sapüruw jaqenakar salvaskäna, jupanakasti discipulöjjapjjänwa”, “walja sacerdotenakaw creyentëjjapjjarakïna” (Hech. 1:15; 2:5-11, 41, 47; 4:4; 6:7). Jehová Diosan markapan ukham jiljjattatapajj ¿kunjamsa Jesusan discipulonakapar chʼamañchtʼäna? Cheqas religión pʼeqtʼiri judío jaqenakan arknaqatpachasa, Jesusan discipulonakapajj predicañatakiw chʼamachasisipkakïna.

²¹ Colosas markankirinakar (60, 61 maranakana) qellqkäna uka cartanjja, apóstol Pablojj akham sänwa: “Jumanakan ukar purinki uka suma yatiyäwinakajja, mundpachanwa achoqaski waljaptaskaraki” sasa. Ukatjja “suma yatiyäwinakajj oraqpachanwa yatiyasjje” sasaw sarakïna (Col. 1:5, 6, 23). Nayrïr cristianonakajj Qellqatanakarjamaw sarnaqapjjäna, ukatjja judionakajj 70 maran janïr tukjatäpkäna ukhajj espíritu santon yanaptʼapampirakiw predicapjjäna. Uka yatiyäwinakajj mayampiw Jehová Diosat jan jitheqtir cristianonakar uka tiempon chʼamañchtʼäna.

²² Mateo 24:14 textorjamajj kunanakas jichha tiempon lurasiski uk Diosan markapajj wali sum registri. Mateo 24:14 textojj akham siwa: “Reinon aka suma yatiyäwinakapajja, aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa. Jehová Diosaw uka wakisir luräwi phoqasiñapatakejj encargasini. Ukampis jupan servirinakapjamajja, jupamp suma uñjatäñwa muntanjja, ukatwa janïra akapach tukuskipan walja jaqenakar predicañatak wal chʼamachastanjja (Ezeq. 3:18-21).

¿PREDIKTAN UK KUNJAMSA YATIYTANJJA?

²³ Informe de predicación siski uka hojanjja, kunanakas informasiñapa ukaw uñsti. Ukampis kunanakatï akjjar qhanañchaskani ukaw informenakas sum qellqantañatak yanaptʼistaspa.

²⁴ “Publicaciones (impresas y electrónicas)” siski uka cheqarojja, jan Testigöpki ukanakar Biblia apstʼat qellqatanak churktan, jan ukajj Internet toqe apayktan uka qellqatanakaw anottʼasiñapa. “Presentaciones de videos” siski uka cheqarojja, Diosan markapankir videonak qhawqha kutis mayninakar uñtaytan ukanakaw anottʼasiñapa.

²⁵ Kunapachatï jan Testigo mä jaqer Bibliat yateqaskakiñapatak visitaski ukajja, revisitjamaw anotasiñapa. ¿Kunanak lurasas jiwasajj mä revisitjam anotassna? Mayamp mä jaqer visitktan, maynir mä carta apayktan, teléfono toqe maynir jawsktan, mä mensaje jan ukajj mä correo maynir aptʼayktan, Bibliat apstʼat mä qellqat revisitasar jaytir sarktan ukhanakaw revisitjam anotassna. Mä jaqer Bibliat yatichktan ukhajja, mä revisitjamwa jiwasajj jakhusiraksna. Kawkïr familianakantï jan bautisat wawanakajj utjki ukanjja, khititï sapa semana familiampi Bibliat yatjjatki uka jilata jan ukajj uka kullakaw mä revisitjam jakhusiñapa.

²⁶ Sapa semanas Bibliat maynir yatichaskchejja, khititï yatichki ukajj mä curso bíblico ukhamakwa anotasiñapa, ukatjja phajjsin qhawqhaniruy Bibliat yatichchi uksa anotasiñaparakiwa. ¿Cursos bíblicos siski uka cheqarojj kunanakas informasiñapa? Jan bautisatäpki ukanakar Bibliat yatichaski, inactivonakar Bibliat yatichaski, jan ukajj jichhak bautisasirinakar ¡Wiñayatakiw kusisit jakasisma! sat libromp yatichaski ukanakaw informasiñapa. Inactivonakarojja kuntï comité de servicio ukankir jilatanakajj sapki ukarjamaw yatichasiñaparaki.

²⁷ “Horas” siski uka cheqarojja, maynejj qhawqha horanakas phajjsin utat ut prediki, revisitanaks luri, Bibliats jaqenakar yatichi, jan ukajj kawkir sarkasas jan Testigöpki ukanakar prediki ukanakaw informasiñapa. Taqe ukanakajj cheqaparjamapuniw anottʼasiñapa. Kunapachatï panini yatiyapki ukhajja, panpachaniw hora jakhusipjjañapa, ukampis jupanakat maynikiw revisitanaksa Bibliat yatichaski uksa anotasiñapa. Familiampi Bibliat Yatjjataski ukhajja, awk taykanakajj panpachaniw sapa semana mä hora anotasipjjañapa. Discurso arstʼir jilatanakajja, qhawqha tiempoy mä discurso arstʼapjjchi ukwa anottʼasipjjañapa, mä discurso yaqha arur traducipki ukanakas (interpretenakas) hora anotasipjjarakispawa. Ukampis predicañatak waktʼayaskasasa, territorior puriñkamasa, jiwas pachpatak mä kun lurkasasa, jan ukajj yaqha ukhamanak lurkasasa janiw hora jakhusiñasäkiti.

²⁸ Qhawqha horanaksa maynejj informani uk janïr qellqtʼkasajja, Bibliarjam yatichat concienciaparjamaw sum anottʼañapa. Territorionakajj janiw igualäpkiti, yaqhep cheqanakanjja walja jaqenakaw utji, yaqhep cheqanakansti jukʼa jaqenakakiw utjaraki, ukatwa wali jay viajiñajj wakisi. Ukhamarus horanak informañ toqetjja, sapa publicadoraw mayj mayja amuyapjjaraki. Cuerpo Gobernantejj janiw kunjampunsa maynejj horanak jakhuñapa uk siskiti, janirakiw kunjampunsa maynejj informañapa uk sañapatakejj khitirus uttʼayawaykiti (Mat. 6:1; 7:1; 1 Tim. 1:5).

²⁹ Qhawqha horanaksa prediktan uk informkasajja, janiw minutonakak anotañasäkiti, jan ukasti horanakwa anotañasa. Yaqhep jilat kullakanakajj wali chuymankipstatäpjjatap layku, wali usuntatäpjjatap layku, ikiñapatsa utapatsa jan misturjamäpjjatap layku ukhamarak mä asilonkapjjatap laykuw walja horanak predicañ jan puedipkiti. Ukatwa jupanakajj jukʼa horanakak informapjjaspa. Jupanakatï phajjsin 15 minutonakak predicapjjchi ukhajja, jan ajjsarasaw uk informepan qellqtʼapjjañapa, ukhamatwa prediktʼir jilatata jan ukajj prediktʼir kullakat uñtʼatakïsipkani. Khitinakatï usutäsina jan ukajj wali usuchjatäsin mä phajjsisa jan ukajj jukʼamp phajjsinakas predikir jan mistuñ puedipkchi ukanakajja, uka pachparakwa lurapjjaspa. Taqe uka jilat kullakanakarojja, mä arun predikir mistuñ janipun puedipki ukanakarojj publicadoranakarjamaw uñjasiskakiñapa. Ukampis kawkïr jilat kullakanakas jukʼa horanakak informapjjaspa ukjja, comité de servicio taypinkir jilatanakaw amtapjje.

REGISTRO DE PUBLICADOR DE LA CONGREGACIÓN SAT FORMULARIO

³⁰ Kunanaktï informen yatiyktan ukanakajja, Registro de publicador de la congregación sat formularioruw qellqantasi. Uka registronakajj congregacionankiwa. Ukhamajja yaqha congregacionar sarjjañäni ukhajja, ancianonakaruw yatiyañasa. Ukat secretario jilataw jiwasan registros sarktan uka congregacionar aptʼayjjani. Ukhamatwa yaqha congregacionankir ancianonakajj sum katoqtʼapjjestani, Diosar serviskakiñatakis yanaptʼapjjestani. Kimsa phajjsit minus tiempok yaqha congregacionar sarstan ukhajja, congregacionasaruw informenakas aptʼayaskakiñasa.

¿KUNATSA INFORMENAKAS CHURTANJJA?

³¹ Inas awisajj informenakas churañ armasstan, cheqas awisajj amttʼayatäñajj wakisispawa. Ukampis jiwasatï kunatsa informenakas churañasa, kunatsa uk lurañajj wali wakiskirejja uk amuyañäni ukhajja, informenakas churañ janiw armaskañäniti.

³² Yaqhepanakajja, “niyakejjay Jehová Diosajj kuntï lurktan uk uñj-jjchejja, ¿kunatsa informenak churañajj wakisipuni?” sasaw jisktʼasipjje. Cheqansa Jehová Diosajj uk sum yati, taqe chuymat jupar servisktan janicha, jan ukajj pata chuymakich jupar sirvtan janicha uksa yatirakiwa. Ukampis akwa amtañasa: kunanaksa nayra tiempon servirinakapajj lurapjjäna uk Jehová Diosajj sum qellqayawayi. Biblianjja, qhawqha tiempos Noé chachajj arca manqhankäna, qhawqha maranakas israelitanakajj wasarankapjjäna, jupanakat qhawqhanis Jehová Diosat jitheqtapjjäna, qhawqhanis jan jitheqtapkarakïna ukanakaw qellqatajja. Kunjamas Canaán oraqejj katuntasïna, kunanaksa Israelankir juezanakajj lurapjjäna ukanakas qellqatarakiwa. Ukhamasti Jehová Diosatakejj taqe kunas cheqaparjam suma qellqtʼatäñapajj wali wakiskiriwa.

³³ Kunanakatï Biblian qellqatäki ukanakajj Jehová Diosan servirinakapan qellqatawa, jupanakajj taqe kuns cheqaparjam sum qellqañatakiw chʼamachasipjjäna. Ukatwa kunanaktï qellqawayapki ukanakajj Biblia sum amuyañataki, ukhamarak kunanakatï nayra tiempon pasawayki ukanak sum amuyañatak yanaptʼistu. Ukanakat mä qhawqhajj aka textonakanwa jikjjatasi: Génesis 46:27; Éxodo 12:37; Jueces 7:7; 2 Reyes 19:35; 2 Crónicas 14:9-13; Juan 6:10; 21:11; Hechos 2:41; 19:19.

³⁴ Apostolonakajj predicäwit kuttʼanjjapjjäna ukhajja, “kunanaktï lurapkäna, yatichapkarakïna, taqe ukanakwa” Jesusar yatiyapjjäna (Mar. 6:30). Cheqansa informenakasan janiw taqe kunanaktï Jehová Dios laykojj lurktan ukajj qellqatäkiti, ukampis kuntï informenakasan yatiyktan ukajj Diosan markapatakejj wali wakiskiriwa. Ukanakajj predicación toqen kunanakan mejorañas wakisi, kunansa nayrar sartasiski, kunansa aynachtʼatäsktan ukanak amuyañatakiw Diosan markapar yanaptʼi (sañäni, publicadoranakajj jiljjattaskiti janicha uk amuyañatakiw yanaptʼi). Inas jilat kullakanakar chʼamañchtʼañajj wakischi, jan ukajj inas jan waltʼäwinak askichañajj wakischi. Ukhamäni ukhajja, anciano jilatanakaw kunanakas mä qhawqha jilat kullakanakarusa jan ukajj taqpach congregacionarus Jehová Diosar serviñan aynachtʼayaski uk amuyañatakiw chʼamachasipjjañapa, ukatjja congregacionan kuna jan walinakatï utjki ukanak askichañatakiw chʼamachasipjjañaparaki.

³⁵ Informenak churasitapajja, kawkjanakansa predikir jilat kullakanakajj munasi, kawkja cheqanakansa publicadoranakajj wal jiljjatti, kawkjanakansa janirak jiljjattki ukanak amuyañatakiw Jehová Diosan markapar yanaptʼi. Kuna qellqatanakampis jaqenakar yatichasispa uk amuyañatakisa, kunjamsa uka qellqatanakampejj oraqpachan jaqenakar yanaptʼasispa uk amuyañatakis yanaptʼarakiwa.

³⁶ Kunjamsa oraqpachan yatiyasiski ukajj walpun jiwasar chʼamañchtʼistu, taqeniruw kusisiyarakistu. Informenakajja kunjamas Jehová Diosan markapajj jiljjattaski uk amuyañatakiw yanaptʼistu, ukhamarus jilat kullakanakan experiencianakapajj kusisit chuymamp Jehová Diosar serviskakiñataki, taqe chuym predicaskakiñatakiw chʼamañchtʼarakistu (Hech. 15:3). Ukhamajj predicatasat informe churañajj wali wakiskiriwa. Informe churañajj janis wakiskirïkaspa ukham amuyañjamäspawa, ukampis kunapachatï informenakas churtan ukhajj jilat kullakanakasat llakisitaswa uñachtʼaytanjja, Jehová Diosan markapar istʼatassa uñachtʼayaraktanwa (Luc. 16:10; Heb. 13:17).

JEHOVÁ DIOSAR JUKʼAMP SERVIÑ TAQENIS AMTAPJJAÑÄNI

³⁷ Jiwasajj janiw khitimpis igualayasiñasäkiti, kuna laykutejj sapa mayniw mayj mayj jakastanjja (Gál. 5:26; 6:4). Ukampis sapa mayniw puedktan ukarjamajj Jehová Diosar jukʼamp serviñ amtañasa, ukhamatwa Diosar serviñan jiltasktanti janicha uk amuyasiñäni. Ukhamarus mä amtas phoqañäni ukhajja, wali kusisitaw jikjjatasiñäni.

³⁸ Jehová Diosajj walja jaqenakaruw markapar irpasinki, ukhamat jupanakajj ‘jachʼa tʼaqesiñ’ tiempon jarkʼaqatäpjjañapataki. Aka qhepa urunakanjja, Isaías profetan aka arunakapaw phoqasiski: “Jiskʼäki ukajja waranqaniruw tukuni, jan yäqatäki ukasti wali chʼamani markaruw tukuni. Naya Jehová Diosaw kunanaktï arskta ukanak tiempopar ratuk phoqasiyäjja” (Apoc. 7:9, 14; Is. 60:22). Jichha tiempon suma yatiyäwinak yatiyirïñajj mä jachʼa privilegiowa (Mat. 24:14).