Janiw promesap phoqapkänti

Jehová Diosajj Moisesar akham sänwa: ‘Qollur makatanim. Tʼalpha qalanakaruw leyinakaj qellqäjja, uksti jumaruw churäma’ sasa. Moisesajj iyaw sasaw makatäna, 40 urumpi arumampiw ukan quedasïna. Ukankaskäna ukhajja, Jehová Diosajj pä tʼalpha qalanakaruw Tunka Mandamientonak qellqäna, ukatsti Moisesaruw churarakïna.

Mä qhawqha urunak pasatatjja, ‘Moisesajj jaytanukjjpachïstuwa’ sasaw israelitanakajj amuyapjjäna. Ukatwa Aaronarojj akham sapjjäna: ‘Mä pʼeqtʼir munapjjta. ¡Mä dios lurarapipjjeta!’ sasa. Aaronasti ‘qorinakam apanipjjam’ sasaw säna. Uka qorinak ninamp umatatayasajj mä vaca qall lursüna. Jaqenakajj sapjjänwa: ‘¡Aka vaca qalluw diosasajja, juparakiw Egipto markat apsunistu!’ sasa. Ukatwa mä fiesta lurapjjäna, uka vaca qalluruw adorapjjarakïna. ¿Ukham lurañajj walïnti? Janiwa. Jupanakajj ‘Jehová Diosarukiw adorapjjäjja’ sasaw mä promesa lurapjjäna. Ukampis janiw uka promesap phoqapkänti.

Jehová Diosajj kuntï israelitanakajj lurasipkäna uk uñjasajj Moisesar akham sänwa: ‘Markan ukar saraqam, jupanakajj nayar jan istʼasaw jan walinak lurasipki. Mä falso diosaruw adorasipki’ sasa. Moisesajj uka pä tʼalpha qalanakas aptʼasitaw qollut saraqanïna.

Moisesajj campamentor jakʼachasïna ukhajja, jachʼat cantasirinak istʼäna. Purïna ukhasti, vaca qallur adoraskiri, uka nayraqatan thoqoskir uñjäna. Moisesajj wal colertʼasïna, apankäna uka pä tʼalpha qalanak oraqer jaqtasaw pʼakjäna. Jankʼakiw vaca qallur tʼunjir saräna. Aaronarojj akham sasaw jisktʼäna: ‘¿Aka ajjtaskañ dios lurañamatakejj kunjamsa iyaw sayapjjtamjja?’ sasa. Aaronasti sarakïnwa: ‘Janikiy colerasimti, aka jaqenakajj kunjamäpjjesa uk sum yatisktajja. Mä dios munapjjäna, ukatwa qorinak ninar jaqontta, uka qorinakasti aka vaca qalluruw tukjje’ sasa. Aaronan ukham luratapajj janipuniw walïkänti. Moisesajj mayampiw qollur makatäna, markar perdonañapatakiw Jehová Diosar ruwtʼarakïna.

Istʼasiñ muniri israelitanakarojj Diosajj perdonänwa. Jehová Diosar istʼañasa Moisesar istʼañasa wali wakiskirïnwa, ¿uk amuytati?