Aka revista liytʼirinakan jisktʼäwinakapa
Aaronax mä quri vaca qall lurasin juchachasitapatxa, ¿kunatsa Diosax jupar jan jiwaykäna?
Kunjamtï Éxodo 32 jaljan parlkixa, vaca qallur uñtat mä dios lurasinwa Aaronax mä jachʼa juchar purtʼasitayna. Janiw yaqha diosanakar yupaychapxätati siski uka kamachi pʼakintatayna (Éxo. 20:3-5). Ukatwa “Tatitu Diosax [...] wal colerasïna, juparu tʼunjañkama, ukampis [Moisés jilapaw] jupataki Tatitu Diosaru mayi[rapïna]” (Deu. 9:19, 20). Ukhamaw “mä aski jaqin oracionapasti wali chʼamanirakiwa” siski uka arunakax phuqasïna (Sant. 5:16). Jïsa, Moisesar istʼasaw Jehová Diosax Aaronan juchap pampachäna. Ukampis yaqha pä tuqit amuytʼarakiñäni.
Janïr uka juchar purkasax taqi chuymaw Aaronax Diosar luqtatayna. Kunapachatï Jehová Diosax israelitanakar qhispiyañataki faraonan ukar Moisés khitäna ukhaxa, jilam lanti parlir jupamp chik saram sasaw Aaronar satayna (Éxo. 4:10-16). Iyaw sasaw panpachani sarapxäna, ukat walja kutiw uka qala chuyman qhuru jaqin ukar mantapxäna. Ukhamasti, Egiptot mistunxapxäna ukhaxa, Diosat jan jithiqtir wali suma luqtirïtap Aaronax uñachtʼayäna (Éxo. 4:21).
Maysa tuqitxa, kunatsa vaca qallur uñtat mä quri dios lurpachäna uk amuytʼañasarakiwa. Moisesax niyaw pusi tunka urunaka Sinaí qullun chhaqasxatayna. Janirakis uñstanxitixä sasaw israelitanakax mä dios lurayañ amtapxatayna; ukat walpun waytʼapxäna, ukatwa Aaronax mä vaca qallu lursutayna (Éxo. 32:1-6). Ukampis kunapachatï Moisesax uka jan wal chhaqtayañ munkäna ukhaxa, Leví tatan taqi wawanakapaw Jehová Dios tuqit saytʼasipxäna, Aaronas jupanakamp chikaw saytʼasirakïna. Ukhamasti, janiw chuymapanxa uka vaca qallu lurañ munkpachänti, mayninakan waytʼatakiw lurpachäna. Chiqansa, khitinakatix uka jan walir wiytapkäna ukanakax tukjataw uñjasipxäna, niya kimsa waranqaniw jiwarapxäna (Éxo. 32:25-29).
Qhipatxa akham sasaw Moisesax israelitanakar satayna: “Jumanakax wali jachʼa jucha lurapxtaxa” sasa (Éxo. 32:30). Ukhamax janiw Aarón sapaki juchanïkänti. Chiqas Jehová Diosan khuyapayasiñapat jupas mayni israelitanakas jiwañat qhispipxäna.
Ukat qhiparuxa, akham sasaw Jehová Diosax Moisesar säna: “Aaronarux sacerdote isimpiw isintayäta, ukat aceitempiw warxatäta ukhamata nayaru luqtata sacerdotëxañapataki” sasa (Éxo. 40:12, 13). Ukhamasti, Aaronax jilïr sacerdotjamaw irnaqxäna. Ukhamaw Diosax juchap perdonäna. Aaronax janiw Diosar kutkatiri ukat yaqha diosanakar yupaychañ munir jan wali jaqïkänti. Jan ukasti, taqi chuymaw Jehová Diosar luqtäna.