Jehová Diosajj Samuel wawaruw parläna

Elí sat jachʼa jilïr sacerdotejj pä yoqanïnwa: maynejj Hofní satänwa, maynisti Finehás satarakïnwa. Jupanakajj tabernaculonwa sacerdotet servipjjäna. Ukampis janiw Diosan leyinakap istʼapkänti, jaqenakarus jan walinakwa lurapjjerïna. Israelitanakajj Jehová Diosatak sacrificionak apapkäna ukhajja, Hofní chachampi Finehás chachampejj jupanakatakiw sumäki uka aycha apaqasipjjerïna. Elí sacerdotejj yoqanakapan jan walinak lurapjjatap yatkchïnsa, janiw cheqañchkänti. ¿Jehová Diosajj ukhamakti uk uñchʼukpachäna?

Samuelojj Hofní, Finehás chachanakat sipans wali sullkäkchïnsa, janiw jupanakjam jan walinak lurkänti. Ukatwa Jehová Diosajj Samuelur uñjasajj wal kusisïna. Mä arumajja, Samuelojj ikiskänwa, ukhamaruw mä aru istʼäna. Ukatwa sarthapisajj Elí sacerdoten ukar tʼijusin akham säna: ‘Tata, ¿jumat jawsista?’ sasa. Elí sacerdotesti ‘janiw jawsksmati, ikintanjjam’ sasaw säna. Samuelusti ikintjjänwa. Ukampis mayampwa Samuelojj jupar jawsatap istʼäna, ukampejj pä kutiw jawsjjäna. Kimsïr kutinjja, Jehová Diosan jawsaskatapwa Elí sacerdotejj amuyäna. Ukatwa Samuelur akham säna: ‘Mayampi jawsir istʼäta ukhajj “Jehová Dios, saskakita, servirimajj istʼasktamwa” sasaw säta’ sasa.

Samuelojj ikiñaparuw kuttʼjjäna, ukhaw mayampi jupar jawsir istʼäna: ‘Samuel, Samuel’ sasa. Jupasti akham sänwa: ‘Jehová Dios, saskakita, servirimajj istʼasktamwa’ sasa. Jehová Diosajj akham sänwa: ‘Elí sacerdoter akanak yatiyam. Juparusa familiaparus castigäwa. Jupajja, kuna jan walinaksa wawanakapajj tabernaculon lurasipki uk sumwa yatiski, ukhampachas janiw wawanakapar cheqañchkiti’ sasa. Qhepür alwajja, Samuelojj kuntï lurirïkäna ukarjamaw tabernaculon punkunakap jistʼaraskäna. Kuntï Jehová Diosajj siskäna uk yatiyañsa wal ajjsaräna. Ukampis Elí sacerdotejj jupar jawsasajj akham sasaw jisktʼäna: ‘Samuel, wawa, ¿Jehová Diosajj kamstamsa?’ sasa. Samuelusti taqpachwa yatiyäna.

Samuelojj jachʼäjjänwa, Jehová Diosajj jupar yanaptʼaskakïnwa. Diosajj juparuw profetäñapataki juezäñapatak ajllïna, uksti taqe cheqankir israelitanakaw yatipjjäna.