Criston jutañapatwa Juanajj yatiyäna

Zacariasampin Elisabetampin wawapajj Juan satänwa, Jehová Diosaw jupar profetat uttʼayäna. Mesiasan jan ukajj Criston jutañapatwa jaqenakar yatiyäna. Jupajj janiw sinagoganakansa ni markanakansa predickänti, jan ukasti wasaranwa predicäna. Jerusalén markatsa Judea oraqen markanakapatsa waljaniw Juanar istʼir sarapjjäna. Jupasti akham sänwa: ‘Diosan chuymapar purtʼañatakejj jan walinakjja apanukupjjañamawa’ sasa. Ukatwa waljanejj juchanakapat arrepentisipjjäna. Juanajj Jordán jawiranwa jupanakar bautisarakïna.

Juanajj janiw walja cosasanakanïkänti. Camello tʼawrat lurat isinïnwa, tʼiju tʼijunakampi wasaran utjki uka miskʼimp manqʼäna. Jaqenakajj jupjjat wal yatiñ munapjjäna. Jachʼa jachʼa tukur fariseonakasa saduceonakas uñjirejj sarapjjarakïnwa. Jupanakarojj Bautisir Juanajj akham sänwa: ‘Arrepentisipjjam, jan walinaksa apanukupjjam. Janirak Abrahanan wawanakapäpjjtwa sasajj jachʼañchasipjjamti, janiw aleq ukhamatakjja Diosan wawanakapäpkasmati’ sasa.

Juanarojj akham sasaw waljanejj jisktʼapjjäna: ‘¿Diosan chuymapar purtʼañatakejj kun lurapjjañajasa?’ sasa. Jupasti sarakïnwa: “Khititï pä isinïki ukajja, jan isinïki ukar may churpan” sasa. ¿Kunatsa ukham sispachäna? Diosar kusisiyañatakejj jaqe masipar munasipjjañapänwa, uk yatipjjañapwa Juanajj munäna.

Impuesto cobririnakarojj akham sänwa: ‘Honradöpjjam, janirak khitirus engañjapjjamti’ sasa. Soldadonakarusti sarakïnwa: ‘Jan kʼarinak parlapjjamti, janirak qollqempis chilltayasipjjamti’ sasa.

Sacerdotenakampi levitanakampejj Juanan ukar sarasajj akham sapjjänwa: ‘Khitïtas ukjja taqeniw yatiñ munapjje’ sasa. Juanasti sänwa: ‘Khititejj wasaran “¡Jehová Diosar [jakʼachasipjjam]!” sasin arnaqaski ukajj nayätwa, kunjamtï Isaías profetajj siskäna ukhama’ sasa.

Kuntï Bautisir Juanajj yatichkäna ukajj wal jaqenakar gustäna. Jupat Mesiasäpacha janicha ukwa yatiñ munapjjarakïna. Ukatwa Juanajj akham säna: ‘Jutki ukajja, nayat sipansa jukʼamp chʼamaniwa, janiw wiskhupan chinuñap jararañas nayar waktʼkituti. Nayajj umampiw bautisapjjsma, jupajj espíritu santompiw bautisapjjätam’ sasa.