Jesusajj Mesiasäjjänwa

Bautisir Juanajj akham sasaw yatiyaskäna: ‘Nayat sipan jukʼamp chʼamanïki ukajj niyaw jutani’ sasa. Jesusajj niya 30 maranëjjäna ukhajj Galileat Jordán jawiraruw saräna. Ukanwa Juanajj jaqenakar bautisaskäna. Jesusajj jupamp bautisayasiñwa munarakïna. Ukampis Juanajj akham sänwa: ‘Antisas jumaw nayar bautisañamajja, janiw nayajj bautiskirismati’ sasa. Jesusajj sarakïnwa: ‘Jehová Diosajja, jum nayar bautisañamwa muni’ sasa. Ukatwa Jordán jawirar mantapjjäna, ukanwa Juanajj umar qʼal chhaqtayasin Jesusar bautisäna.

Jesusajj umat mistusajj Diosaruw orasïna. Ukapachaw alajjpachajj jistʼartäna, Diosan espiritupaw mä palomar uñtat Jesusjjar saraqanïna. Jehová Diosajj akham sasaw alajjpachat sanirakïna: ‘Jumajj wali munat wawajätawa. Nayajj wal jumat kusista’ sasa.

Ukhamaw Jesusajj Jehová Diosan espiritup katoqäna, uka urutwa Mesiasäjjäna, mä arunjja Cristöjjäna. Aka oraqenjja kun lurañaptï Jehová Diosajj munkäna uk phoqañwa qalltarakïna.

Bautisasjjäna uka qhepatjja, Jesusajj wasararuw saräna, 40 urunakaw ukankarakïna. Kuttʼanjjäna ukhajja, Juanan ukaruw saräna. Juanajj Jesusan jutaskatap uñjäna ukhajj akham sänwa: ‘¡Uñtapjjam, jupajj Diosan Corderopawa, jupaw akapachat juch apaqani!’ sasa. Jesusan Mesiasätap yatipjjañapatakiw Juanajj ukham säna. ¿Jesusajj wasarankaskäna ukhajja kunas paspachäna uk yattati? Ukwa akjjar yatjjatañäni.