Jesusajj Diosan Reinopat predicäna

Jesusajj bautisaskäna uka qhepatjja, “Diosan Reinopajj jakʼankjjewa” sasaw yatiyäna. Discipulonakapajj jupampiw Galilearu Judear predikir sarapjjäna. Jesusajj Nazaret markapar kuttʼasajja, sinagogaruw saräna. Isaías profetan rollop jistʼarasajj akham sasaw jachʼat liytʼäna: ‘Suma yatiyäwinak yatiyañatakejj Jehová Diosaw espíritu santo churitu’ sasa. ¿Ukampejj kamsañsa munäna? Jesusajj milagronak luraspa ukwa jaqenakajj munapjjäna. Ukampis janiw milagronak lurañatakikejj espíritu santo katoqkänti, jan ukasti Reinon suma yatiyäwinakap yatiyañatakiw katoqäna. Liytʼañ tukuyasajja, Jesusajj akham sänwa: ‘Aka profeciajj jichhüruw phoqasi’ sasa.

Ukatjja Jesusajj Galilea qotaruw saräna. Chawlla katuri pusi discipulonakapamp jikisisajj akham sänwa: “Nayar arkapjjeta, nayasti jaqenak katuri tukuyapjjäma” sasa. Jupanakajj Pedro, Andrés, Santiago, Juan satäpjjänwa. Negociop jaytasajj jankʼakiw Jesusar arkapjjäna. Diosan Reinopat predicasajj Galileypach muytapjjäna. Sinagoganakana, qhatunakana, callenakan predicapjjäna. Jupanakarojj waljaniw taqe cheqar arkapjjäna. Jesusan yatiyäwipajj taqe cheqan istʼasïna, Siria markansa istʼasirakïnwa.

Tiempompejja Jesusajj usutanakar qollañataki, jaqenakat demonionak alissuñatakiw yaqhep arkirinakapar chʼam churäna. Yaqhepasti jachʼa markanakana jiskʼa markanakan predicañatakiw Jesusar arkapjjäna. Mä qhawqha warminakas Jesusampiru arkirinakapampiru yanaptʼañatakejj sarapjjarakïnwa. Jupanakat yaqhepajj María Magdalena, Juana, Susana satäpjjänwa.

Discipulonakapar yatichtʼasajja, Jesusajj predikir sarapjjañapatakiw khitäna. Galilea cheqnam viajasipkäna ukhajja, waljaniw Jesusan discipulopar tukupjjäna, bautisasipjjarakïna. Waljanirakiw Jesusan discipulopäñ munapjjäna, ukatwa Jesusajj ‘yapojj apthapiñatak poqoratäjjewa’ säna. Ukatsti akham sarakïnwa: ‘Jehová Diosarojj jukʼamp trabajirinak yapupar khitaniñapatak mayipjjam’ sasa. Qhepatjja 70 discipulonakaparuw ajllïna, Judea oraqen predicapjjañapatakiw panin panini khitarakïna. Jupanakajj taqeniruw Diosan Reinopat yatiyapjjäna. Kuttʼanipjjäna ukhajja, kunjamsa yatiyanipjjäna ukanak Jesusar awistʼañ wal munapjjäna. Diosan arunakap yatiyasiñapjja, Diablojj janiw kunjamatsa jarkʼkaspänti.

Jesusajja discipulonakapan predicasipkakiñapatakejj sum wakichtʼäna, ukhamat jupan alajjpachar sarjjatap qhepatsa predicasipkakiñapataki. Akham sarakïnwa: ‘Reinon suma yatiyäwinakap taqe markankir jaqenakar yatiyanipjjam. Jaqenakarojj Diosan Arupat yatichapjjam, bautisapjjarakim’ sasa.