Jesusajj alajjpacharuw kuttʼjjäna

Jesusajj discipulonakapampiw Galilean tantachasïna. Mä mandato jupanakar churarakïna: ‘Sarapjjam, taqe markankir jaqenakar discipulojar tukuyapjjam. Taqe kuntï yatichapksma ukanak yatichapjjam, bautisapjjarakim’ sasa. Ukatsti akham sänwa: ‘Amtapjjapunim, nayajj sapürupuniw jumanakampïskäjja’ sasa.

Jiwatat jaktasajja, Jesusajj 40 urunakaw Galileansa Jerusalenansa walja discipulonakapar uñstäna. Suma yatichäwinakwa yatichäna, walja milagronak lurarakïna. Apostolonakapampejj qhep qhepa kutiw Olivos qollun tantachasipjjäna. Jesusajj jupanakar akham sänwa: ‘Jan Jerusalenat mistupjjamti. Kuntï alajjpachankir Awkejj mä promesan siskäna uk suyasipkakim’ sasa.

Jesusajj kamsañsa munäna uk janiw apostolonakajj amuyapkänti, ukatwa akham jisktʼapjjäna: ‘¿Niyat Israelan reyipäjjäta?’ sasa. Jesusajj sarakïnwa: ‘Jehová Diosajj janïraw reyïñaj munkiti. Ukampis jumanakajj niyaw espíritu santo katoqapjjäta, ukaw nayan testigojäpjjañamatak chʼam churapjjätam. Ukhamasti Jerusalenana, Judeana, Samariana, ukhamarak taqe aka oraqpachan yatiyanipjjam’ sasa.

Ukatsti Jesusajj alajjpachar aptatäjjänwa, mä qenayaw chhaqtayjjarakïna. Discipulonakapajj wal uñchʼukisipkäna, ukhamaruw Jesusajj chhaqtjjäna.

Discipulonakapajj Olivos qollut sarjjasajj Jerusalenaruw kuttʼapjjäna. Ukanjja kunjamtï mä altus utan tantachasipjjerïkäna orasipjjerïkäna ukhamwa lurapjjäna. Jesusajj jupanakar kamsanisa ukwa suyapjjarakïna.