Biblian yatichäwinakapa

¿Kunjams Jesusan jiwäwipajj amtasiñapa?

Aka yatichäwejja, kawkïr jisktʼanaktï jumajj jisktʼasirïta ukwa pachpa Bibliamampi yatjjatañ yanaptʼätam. Jumatï munstajja, Jehová Diosan Qhanañchirinakapampiw aka jisktʼanakat yatjjatasma.

1. ¿Jesusajj jiwäwejj kunjam amtapjjäta sänsa?

Mä Santa Cenapiw jiwäwijat amtapjjäta, ukanjj tʼantʼampi, vinompiw utjañapa sasaw discipulonakapar Jesusajj säna. Tʼantʼajj Criston jañchipa sañ muni ukat vinosti wilapa sañ munaraki. (Lucas 22:19, 20 liytʼäta.)

Jesusajj jan levaduran tʼantʼwa discipulokapamp manqʼapjjäna. Uka tʼantʼajj Jesusan jan juchan jañchipa sañ munaraki, Biblianjja levadurajj juchampi, jan wali luräwinakampi sasiwa. Moisesajj Ley katoqkäna ukarjamajja, animalanak sacrificiot loqtapjjañapäna, ukat Jesusan loqtasïwipajja ukanak chhaqtayäna (Hebreos 10:5, 9, 10). Ukat vinosti Jesusan wali wakiskir wilapampi sasiwa. Uka wilap toqew juchanakasat perdonatätanjja. (1 Pedro 1:19; 2:24, ukat 3:18 liytʼäta.)

2. ¿Kunapachas Jesusan jiwäwip amtañasa?

Jesusajj judionakan Pascua fiestap 14 nisan phajjsinwa jiwatayna. judionakajj inti jalsut inti jalantkamaw mä uru jakhupjjerïna. Jesusajja 14 Nisan phajjsinwa apostolonakapamp Pascua fiest amtapjjäna. Uka qhepatwa jiwäwip amtapjjañapatakejj Santa Cena uttʼayäna. (Lucas 22:14, 15 liytʼäta.)

Jehová Diosan jichha tiempo loqtirinakapajja, Jesusan jiwäwip amtapjjapuniwa, kunatejj uka toqew taqe jaqenakar juchampita, jiwañampit qhesphiyañatak thak jistʼarawayi (Éxodo 12:5-7, 13, 17). Pascua fiestjja, judionakajj maran mä kutikiw amtapjjerïna, ukhamarakiw Jesusan jiwäwip maran mä kuti inti ­jalantjjaru 14 nisan phajjsin judionakan calendarioparjam amtasiñapa. (Juan 1:29 liytʼäta.)

3. ¿Khithinakas tʼantʼa manqʼañapa ukat vinsa umañapa?

Jesusajj discipulonakapar vino pasaykäna ukhajja, akham sänwa: “Aka copajj jichhajj machaq arustʼäwiwa” sasa (1 Corintios 11:25). Uka machaq arustʼäwejja, Diosajj Moisés toqe israelitanakar Ley churkäna uka lantëjjewa. ¿Kunjamäns uka arustʼäwejja? Nayar taqe kunan istʼapjjetäta ukhajja, markajäpjjätawa sasaw Jehová Diosajj israelitanakar säna (Éxodo 19:5, 6). Ukampis janiw phoqhapkänti ukatwa machaq arustʼawejj wakisïna. (Jeremías 31:31 liytʼäta.)

Uka machaq arustʼäwjja, 144.000 jaqenakampiw Diosajj luri. Jupanak toqew Diosajj walja bendicionanak jaqenakar churaraki. Ukat uka machaq arustʼäwi toqejja,millón millón jaqenakaw wiñay jakañ katoqasajj wali kusisita aka Oraqen jakapjjani. Ukat 144.000 Diosan sirvirinakapatjja, yaqhepajj aka Oraqenwa Diosar loqtasipki. Jupanakakiw tʼantʼsa maqʼapjjañapa ukat vinsa umapjjañapa, kunattejj jupanakakiw machaq arustʼäwinkapjje. Jesusan wila wartasiwïpaw uka arustʼäwejj walikïskatap uñachtʼayi. (Lucas 12:32 ukat Apocalipsis 14:1, 3 liytʼäta.)

4. ¿Jesusan jiwäwip amtañatak tantachäwir sarasajj kuna askinaksa jikjjatsna?

Jesusan jiwäwip sapa mar amtañajja, qhawqsa Jehová Diosajj munasistu uk amuyañatakiw yanaptʼistu. Munasitapatwa yoqaps aka oraqer khithanïna, ukhamat juchas layku jiwañapataki. Jesusan jiwäwip amtaskani ukhajja, qhawqha wakiskiris jiwasanakatakejj Jesusan jiwäwipajj uka toqet wal lupʼiñasawa ukat kunjamatsa juparus ukat Jehová Diosarus yuspäratas uñachtʼaysna ukatakiw chʼamachasiñasa. (Juan 3:16 ukat 2 Corintios 5:14, 15 liytʼäta.)

Jukʼamp yatjjatañatakejja, ¿Kunsa Bibliax chiqpachapuni yatichi? aka libron 206 janat 208 janakam uñjjattʼäta, ukajj Jehová Diosan Qhanañchirinakapan luratawa.