BIBLIA TOQET JISKTʼANAKA
¿Kunatsa Jesusan jiwäwip amtañasa?
Jesusan jiwatap laykojj ¿kuna suma suytʼäwinïtansa? (Isaías 25: 8; 33:24)
Jesusan jiwäwipajj wali wakiskiripuniwa. Ukïpanwa jaqenakajj kuntï aptʼasiwayki ukanak wasitat jikjjatapjjaspa. Jaqejj janiw jan walinak lurañapatakisa, usuntañatakisa ni jiwañatakis luratäkänti (Génesis 1:31). Ukampis Adán nayrïr chacha toqew juchajj mantawayi. Jesusaw jiwasar juchata, jiwañata qhespiyañatakejj jakäwip loqtasiwayi. (Mateo 20:28 ukat Romanos 6:23 liytʼäta.)
Jehová Diosajj Yoqap aka Oraqer jiwas layku jiwañapataki khitanisaw munasitap uñachtʼäwayistu (1 Juan 4:9, 10). Jesusajj arkirinakaparuw tantachtʼasisin jiwäwip amtapjjañapataki ewjjtʼawayäna, ukanjj mä jukʼa tʼantʼas vinosa utjañaparakïnwa. Uk sapa mara amtasajja, qawqsa Jehová Diosarusa, Yoqaparus yuspärtan ukwa uñachtʼaytanjja. (Lucas 22:19, 20 liytʼäta.)
¿Khitinakas tʼantʼa manqʼapjjani vinsa umapjjani?
Jesusajj jiwäwip amtañatak arkirinakapar nayrïr kuti siskäna ukhajja, mä arustʼäwitwa jan ukajj mä amtäwitwa parläna (Mateo 26:26-28). Uka arustʼäwiw jupanakatakisa ukat yaqhanakatakis alajjpachan reyinakjama, sacerdotenakjama apnaqanipjjañapatak mä thaki jistʼarawayi. Walja millón millón jaqenakajj Jesusan jiwäwip amtapkani ukanakatjja, uka arustʼäwinkirinakakiw tʼantʼsa manqʼapjjani vinsa umapjjani. (Apocalipsis 5:10 liytʼäta.)
Diosajj khitinakas Yoqapampi reyjam apnaqapjjani ukjja, niya pä waranq maranakaw ajlljje (Lucas 12:32). Aka Oraqen wiñay jakapkani ukanakat sipanjja, jupanakajj jukʼanikïpjjewa. (Apocalipsis 7:4, 9, 17 liytʼäta.)