Diosan markapan utjir escuelanaka: uka toqew Jehová Diosajj munasiñap uñachtʼayistu

JEHOVÁ DIOSAW Suma Yatichirisajja (Isa. 30:20). Munasiñatwa Jupajj yatichistu ukat wakichtʼarakistu. Ukat munasiñapatarakwa Jesusarojj “kunanaktejj lurki” ukanak uñjayi (Juan 5:20). Ukat munasiñatwa Qhanañchiripäpktan ukat Jupar jachʼañchañataki ukhamarak jaqe masisar yanaptʼañataki chʼamachasktan ukanakarojj ‘suma arunak chuymachañasataki’ churistu (Isa. 50:4).

Jehová Diosat yateqasisaw Oraqpachan Jilïr Irpirinakat Yatichañ toqet Uñjirinakäpki ukanakajj tunka escuelanak toqejj khitinakatï munapki ukat sarirjamäpki ukanakarojj wakichtʼi. ¿Jehová Diosajj uka escuelanakampi munasiñ uñachtʼayatap jumajj amuytati?

Jichhürunakan utji uka escuelanakajj kunjamas apasi ukat ukar saririnakajj kamsapjjesa uk liytʼañamatakiw invittʼapjjsma. Ukat akham jisktʼasirakim: “¿Uka escuelanakar sarasajj kuna askinaksa jikjjatiristjja?” sasa.

DIOSAMP YATICHATÄSAJJ KUNA ASKINAKSA JIKJJATSNA

“Munasir” Jehová Diosajj wakichtʼkistu ukajja, kusisit jakasiñataki, jan waltʼäwinakar saykatañataki ukat arunakap yatiyasas kusisitäñatakiw yanaptʼistu (2 Cor. 13:11). Jesusan nayrïr arkirinakapjamarakiw jiwasajj taqe kuntejj jupajj yatichawaykistu ukanak yatiyañatakejj wakichtʼatätanjja (Mat. 28:20).

Janis taqpach escuelanakar sarkchiñänejja, mayas yanaptʼapunistaniwa. Ukhamarus kuntï Bibliat yateqawayktan ukarjamaw luraraksna. Ukat uka escuelanakar saririnakampi yatiyir mistuñänejja, yatiyañatakejj jukʼampi wakichtʼatäñäniwa.

Sapa mayniw akham jisktʼasiñasa: “¿Uka escuelanakat mayarus jan ukajj payarus sarirjamäskti?”.

Jehová Diosan yupaychirinakapatakejja, uka escuelanakan apasiñapatak yanaptʼañasa ukat ukan yatichatäñas wali kusiskañapuniwa. Kuna yatichäwinakatï uka escuelanakan katoqkäta ukanakajj Diosar jukʼampi jakʼachasiñamataki ukat kuna luräwinakatï markapan utjki uk sum phoqhañatak yanaptʼiristam ukat jukʼampis Diosan arunakap yatiyañatak yanaptʼiristam ukwa munapjjta.

[13-17 jananakan recuadropa]

ESCUELANAKAT QHANAÑCHTʼÄWI

Diosan Arunakap Yatiyañatak Escuela

Kunatakisa: Yatiyirinakan Bibliat sum yatiyapjjañapataki ukat yatichapjjañapatak yanaptʼañatakiwa.

Qhawqha tiemposa: Sapa semana.

Kawkinsa apasi: Tantachasiñ Utanakana.

Khitinakas sarapjjaspa: Khitinakatï taqpach tantachäwinakar sarapki ukat Biblian yatichäwinakapar iyawsapki ukat ukarjam sarnaqapki ukanakaw uka escuelar sarapjjaspa.

Ukankañatakejj khitimpis parlasiñapa: Diosan Arunakap Yatiyañatak Escuela sat tantachäwi sarayir jilatampi.

Sharon kullakajj esclerosis lateral amiotrófica sat usuniwa, cuerpopat chikatajj janiw onjjtkiti, jupajj akham siwa: “Diosan Arunakap Yatiyañatak Escuelajj sum yatjjatañataki ukat wali amuykaña qhanañchtʼañatakiw yanaptʼawayitu. Ukat nä pachpat sinti llakisiñat sipansa, kunjamsa mayninakarojj Diosar yupaychañ toqet yanaptʼirista uk amuytʼañatakiw yanaptʼawayitu”.

Arniejj tamanak tumptʼir wali experienciani jilatawa, jupajj akham sarakiwa: “Jiskʼäkayäta ukhajja, khaktʼasaw parlirïyäta ukat jaqenakar uñkatas parlañajj wali chʼamänwa. Ukampis Jehová Diosan yanaptʼapampiw jan pächasis parlañsa ukat nä pachpa munasiñsa, sum parlañatak samsuñsa ukat amuytʼasiñsa aka escuelan yateqawayta. Tamana ukat yatiyir sarkasin Jehová Diosar jachʼañchañatak ukham yatichatapat walpun yuspärta”.

Machaq Betelitanakatak Escuela

Kunatakisa: Machaq betelitanakar wali askirjam irnaqtʼapjjañapatak yanaptʼañatakiwa.

Qhawqha tiemposa: Tunka sojjtani semananaka ukat sapa semanajj 45 minutonakaw apasi.

Kawkinsa apasi: Betel Utana.

Khitinakas sarapjjaspa: Machaq betelitanaka jan ukajj khitinakatï mä marataki jan ukajj jilpacha tiempotak invittʼatäpki ukanaka.

Ukankañatakejj khitimpis parlasiñapa: Khitinakas sarapjjani uk sucursalaw amti.

Demetrius jilatajj 1980 maranakanwa uka escuelar saratayna, ukat akham siwa: “Ukanwa Bibliat jukʼamp sum yatjjatañ yateqawayta, ukat Betelan walja tiempo serviñatak yanaptʼawayitu. Yatichirinakatsa, yatichäwinakatsa ukat ewjjtʼanakatsa, Jehová Diosajj qhawqsa munasitu ukat Betelan sum serviñatak yanaptʼañ munatapsa amuyawayta”.

Kaitlyn kullakajj siwa: “Kunanakatï jukʼampi wakiskirïki uk nayrar uchañatakiw yanaptʼawayitu, mä arunjja, Dios chuymäñatakiw yanaptʼawayitu. Aka escuelajja, Jehová Diosaru, utaparu ukat markapar sum uñtʼañatakiw yanaptʼawayitu”.

Irpir Chuymaninakataki ukat Yanapirinakapatak Escuela

Kunatakisa: Tamanak tumptʼirinakaru, irpir chuymaninakaru ukat awisajj yanapirinakaparu Diosan markapan luräwinakap sum phoqhapjjañapataki ukat tamar sum uñjapjjañapatak yanaptʼañatakiwa (Hech. 20:28). Ukanjja, kuna jan waltʼäwinakas taman utji jan ukajj kunanak askichañasa ukat kunan yanaptʼañas wakisi uka toqenakat yatjjatapjje. Kuna maransa apasini ukjja Oraqpachan Jilïr Irpirinakaw amtapjje.

Qhawqha tiemposa: Aka qhepa maranakanjja, tamanak tumptʼirinakatakejj pä uru jan ukajj pä uru chikataw apasiwayi, irpir chuymaninakatakejj mä uru chikatani ukat yanapirinakapatakejj mä uru.

Kawkinsa apasi: Jila partejj Tantachasiñ Utana jan ukajj Jachʼa Tantachasiñ Utana.

Khitinakas sarapjjaspa: Tamanak tumptʼirinaka, irpir chuymaninaka ukat yanapirinakapa.

Ukankañatakejj khitimpis parlasiñapa: Tamanak tumptʼirinakaw irpir chuymaninakarusa ukat yanapirinakaparus invittʼi, tamanak tumptʼirinakarusti sucursalaraki.

“Mä qhawqha urunakanaksa walja yatichäwinak yatjjataskchejja, kusisitäñataki ukat Bibliarjamajj Diosar chachjam serviskakiñatakiw irpir chuymaninakar yanaptʼi. Machaqanakasa ukat wali experiencianinakasa tama sum uñjaña ukat ‘mä sapa amtanïñwa’ yateqapjje.” (Quinn, aynachana.)

“Uka escuelajja, kunanakas Diosar yupaychañ toqet aynachtʼayistaspa, kuna jan walinakas taman utjaspa ukat kunjamsa sum uñjsna uk amuytʼañatakiw yanaptʼi. Khuyaptʼayasiñapatwa Jehová Diosajj ukham yanaptʼistu.” (Michael.)

Precursoranakatak Escuela

Kunatakisa: Precursor jilat kullakanakar Bibliat yatiyapjjañapatak yanaptʼañatakiwa (2 Tim. 4:5).

Qhawqha tiemposa: Pä semana.

Kawkinsa apasi: Sucursalaw amti, jila partejj Tantachasiñ Utana.

Khitinakas sarapjjaspa: Precursor regularjam mä mara jan ukajj jukʼamp tiempo servirinaka.a

Ukankañatakejj khitimpis parlasiñapa: Mayitanak phoqher precursoranakajj qellqatäjjapjjewa, ukat tamanak tumptʼir jilataw invittʼi.

Lily (kupi) kullakajj siwa: “Kuna jan waltʼäwinakatï jakäwinsa ukat Diosan arunakap yatiykasas utjki ukanakar saykatañatakiw yanaptʼawayitu. Bibliat sum yatjjatañsa, yatichañsa ukat Biblia apnaqañsa sum yateqawayta. Jaqe masijaru, irpir chuymaninakaru ukat taman jiltañapatak yanaptʼañatakis jukʼamp wakichtʼatätwa”.

Uka escuelar pä kuti sarir Brendajj siwa: “Diosar jukʼamp sum yupaychañataki, suma conciencianïñataki ukat jaqenakar taqe chuyma yanaptʼañatakiw wakichtʼawayitu. ¡Jehová Diosajj wali khuyaptʼayasiripuniwa!”.

[Qhanañchäwi]

Irpir Chuymaninakatak Escuela

Kunatakisa: Taman lurañanakap sum phoqhapjjañapataki ukat Diosajj kunsa jupanakar mayi uk sum amuyapjjañapatakiwa.

Qhawqha tiemposa: Phesqa uru.

Kawkinsa apasi: Sucursalaw uk amtjje, ukampis jila partejj Tantachasiñ Utana jan ukajj Jachʼa Tantachasiñ Utana.

Khitinakas sarapjjaspa: Irpir chuymaninaka.

Ukankañatakejj khitimpis parlasiñapa: Sucursalaw invittʼi.

Estados Unidos markan 92 yatichäwir saririnakajj kamsapjjesa uk amuytʼañäni:

“Uka escuelajja, nä pachpa amuykiptʼasiña ukat kunjamsa Jehová Diosan uwijanakap sum uñjirista uk amuytʼañatakiw wal yanaptʼawayitu.”

“Jichhapï chuymar purtʼkir textonakampejj mayninakar jukʼamp sum yanaptʼäjja.”

“Kuntï yateqawaykta ukajj jiwañajkamaw yanaptʼitani.”

Tamanak Tumptʼirinakataki ukat Warminakapampitak Escuela

Kunatakisa: Tamanak tumptʼirinakaru ukat uka jilatanakar uñjirinakaru yanaptʼañatakiwa, ukhamat tamanakar jukʼamp sum yanaptʼapjjañapataki. Uka jilatanakaw “Diosan arunakap” jukʼampi ‘parlañataki, ukhamarak yatichañataki’ wal chʼamachasipjje (1 Tim. 5:17; 1 Ped. 5:2, 3).

Qhawqha tiemposa: Pä phajjsi.

Kawkinsa apasi: Sucursalaw amti.

Khitinakas sarapjjaspa: Tamanak tumptʼirinaka jan ukajj tamanak tumptʼirinakan uñjirinakapa.

Ukankañatakejj khitimpis parlasiñapa: Tamanak tumptʼirinakarus warminakaparus sucursalaw invittʼi.

“Jesusajj taman pʼeqtʼaskatap jukʼamp askitwa uñj-jjapjjta. Jilat kullakanakar chʼamañchtʼañasa ukat tamanakar jukʼamp mayachtʼatäpjjañapataki yanaptʼañasa kunja wakiskirisa uk sum amuyapjjta. Tamanak tumptʼirejj ewjjtʼkchisa ukat awisajj cheqañchkchisa, Jehová Diosajj kunjsa jilat kullakanakar munasi uk jan armapjjañapatakiw yanaptʼapjjañapa, uk amtapjjapuntwa.” (Joel, nayrïr yatichäwi, 1999.)

Soltero Jilatanakan Bibliat Yatjjatapjjañapatak Escuela

Kunatakisa: Soltero irpir chuymaninakaru ukat yanapirinakaparu Jehová Diosan markapan kuna luräwtï katoqapki uk sum phoqhapjjañapatak yanaptʼañatakiwa. Uka escuelat misturinakarojja, kawkhantï jukʼamp yatiyirinakajj munaski uka cheqanakaruw markapan khithasi. Yaqha markar sarirjamäpki ukanakajj khitatäpjjaspawa. Yaqhepasti, yatiyirinakajj jan utjki uka jaya cheqaruw mä qhawqha tiempotak precursor especialjam sarapjjaspa.

Qhawqha tiemposa: Pä phajjsi.

Kawkinsa apasi: Sucursalaw amti, jila partejj Tantachasiñ Utana jan ukajj Jachʼa Tantachasiñ Utana.

Khitinakas sarapjjaspa: Solteronaka, 23 maranit 62 marankama. Kʼumaräñapawa ukat yanapajj jukʼamp munaski uka cheqar sarañatak jankʼakïñapawa (Mar. 10:29, 30). Pä maraw precursor regularjam irnaqtʼañapa ukat irpir chuymanjama jan ukajj yanapiripjamajj pä maraw jan jaytas irnaqtʼañaparaki.

Ukankañatakejj khitimpis parlasiñapa: Sarañ munirinakarojja, pä uru jachʼa tantachäwinwa jukʼamp qhanañchtʼañatakejj mä tantachäwir jawsasi.

Estados Unidos markan 23 yatichäwir sarir Rick jilatajj siwa: “Aka escuelar chuym churatajatjja, Jehová Diosan qollan ajuyupajj wal yanaptʼawayitu, janiw nayrjamäjjti. Taman mä luräwi katoqktan ukhajj Diosaw phoqhañ yanaptʼistu. Munañaj lurañat sipansa Diosan munañap nayraqat luräjja, Jupaw chʼam churitani”.

Alemania markan serviri Andreas jilatajj siwa: “Jehová Diosan markapajj kunjam uttʼayatas ukajj mä milagrjamawa. Yateqawaykta ukajj kuna lurañanakatï utjki uk phoqañatakiw yanaptʼawayitu. Ukat jilat kullakanakar yanaptʼasa ukat Jehová Diosar servisakiw kusisit jikjjatassna, ukwa Biblian utjki uka sarnaqäwinakat yateqawayta”.

Cristiano Matrimonionakan Bibliat Yatjjatapjjañapatak Escuela

Kunatakisa: Matrimonionakan suma wakichtʼatäpjjañapatak yanaptʼañatakiwa, ukhamat Jehová Diosan markapar jukʼamp yanaptʼapjjañapataki. Uka escuelat misturinakarojja, markapan kawkhantï jukʼamp yatiyirinakajj munaski ukaruw khithasi. Yaqha markar sarirjamäpki ukanakajj khitatäpjjaspawa. Yaqhepajja, yatiyirinakajj jan utjki uka jaya cheqaruw mä qhawqha tiempotak precursor especialjam sarapjjaspa.

Qhawqha tiemposa: Pä phajjsi.

Kawkinsa apasi: Estados Unidos markana, ukat septiembre 2012 maratjja yaqha markanakan apasirakiniwa. Jila partejj Tantachasiñ Utana jan ukajj Jachʼa Tantachasiñ Utana.

Khitinakas sarapjjaspa: 25 maranit 50 marankama, kʼumaräpjjañapawa ukat yatiyirinakajj munaski uka cheqanakarus sarirjamäpjjañapawa. Isaías profetjamaw akham sapjjañapa: “Akankasktwa nayajj, nayar khitasita” sasa (Isa. 6:8). Pä mara casadöpjjañapawa ukat panpachanejj pä maraw jan jaytas Diosatak sapürunjam irnaqtʼapjjañapa. Chachajja, irpir chuymanjama jan ukajj yanapiripjamaw pä mara jan jaytas irnaqtʼañaparaki.

Ukankañatakejj khitimpis parlasiñapa: Kimsa uru jachʼa tantachäwinwa uka escuelar sarañ munirinakatak mä tantachäwejj utji, ukanwa jukʼamp qhanañchasi. Ukampis markamantï uka tantachäwejj jan utjkchi ukat jumajj uka escuelar sarañ munarakstajja, sucursalaruw qellqasma.

“Kimsaqallqo semananjja, ¡Jehová Diosar jukʼamp serviñ munapki uka chacha warminakarojj wal yanaptʼi! Nänakajja, kunatï wakiski ukampik jakasiña ukat tiempo jan ina chʼusar aptʼañwa amtapjjta.” (Eric ukat Corina [aynacha], nayrïr yatichäwi, 2011.)

Misioneronakan Bibliat Yatjjatapjjañapatak Galaad Escuela

Kunatakisa: Ukanjja, walja jaqenak utjki uka cheqanakar misionerot sarapjjañapatakiw wakichasi, ukhamat tamanak tumptʼirjama jan ukajj betelitjam servipjjañapataki. Cheqas Diosan arunakap jukʼamp yatiyasiñapataki ukat sucursalanakar chʼamañchtʼañatakiw sarapjje.

Qhawqha tiemposa: Phesqa phajjsi.

Kawkinsa apasi: Centro Educativo de la Watchtower, Patterson (Nueva York, Estados Unidos).

Khitinakas sarapjjaspa: Kawkïr casadonakatï Galaad escuelar jan sarasin misioneröpki, precursor especialäpki, tamanak tumptʼirïpki jan ukajj betelitäpki ukanaka. Ukampis kimsa maraw Diosarojj ukham servipjjañapa. Ukat inglés aru parlañsa, liytʼañsa, qellqtʼañsa yatipjjañapawa.

Ukankañatakejj khitimpis parlasiñapa: Sucursal Sarayirinakaw matrimonionakarojj solicitud phoqhantapjjañapatak invittʼi.

Estados Unidos markat jutiri Lade ukat Moniquejj África markanwa servisipki. Lade jilatajj siwa: “Galaad Escuelajj wakiski uka cheqanakar sarañatakiw wakichtʼawayapjjetu, ukhamarak jilat kullakanakamp taqe chuyma irnaqtʼañataki”.

Monique kullakajj sarakiwa: “Bibliat yateqatarjam sarnaqañaw khithapkitu ukan kusisit jikjjatasiñatak yanaptʼitu. Cheqas Jehová Diosan munasiñapatwa kusisitätjja” sasa.

Sucursal Sarayirinakataki ukat Warminakapampitak Escuela

Kunatakisa: Sucursal sarayirinakar Betel Utan luräwinak jukʼamp sum uñjapjjañapatak yanaptʼañatakiwa. Ukat kunjamsa tamanakasa, tamanak tumptʼirinakasa ukat tamanak tumptʼirinakar uñjiripasa irnaqtʼasipki uk uñjapjjañapataki, ukatsti Bibliat apstʼat qellqatanakajj yaqha arur jaqokipasiski, qellqatanak lurasiski ukat qellqatanak apayasiski ukanak sum uñjapjjañapataki.

Qhawqha tiemposa: Pä phajjsi.

Kawkinsa apasi: Centro Educativo de la Watchtower, Patterson (Nueva York, Estados Unidos).

Khitinakas sarapjjaspa: Jilatajj Sucursal Sarayiri jan ukajj Comité de País jan ukajj ukan irnaqtʼañatak uttʼayatäñapawa.

Ukankañatakejj khitimpis parlasiñapa: Jupanakarojj Oraqpachan Jilïr Irpirinakaw invittʼi.

25 yatichäwit misturi Lowell jilatampi ukat Cara kullakampejja, Nigeria markanwa Jehová Diosar servisipki. Jilatajj siwa: “Jan tiemponïkasasa, kun luram satasa, Jehová Diosar kusisiyañatakejj kunjam lurañassa Jupajj muni ukarjamaw phoqhañasa. Ukat kunjamtï Diosajj servirinakapar munaski ukham munasiñajj kunja wakiskirisa ukwa amtayawayitu”.

Kullakajj sarakiwa: “Jankʼak jan qhanañchirjamäkstajja, maynir yatichir janïr sarkasaw yatjjatañama sapkitäna uk amtasipuntwa”.