¿Kunanaktï Jehová Diosax markap tuqi wakichki ukanakat askinak apsusktanti?

1. Yupaychirinakapan wakichtʼatäpxañap tuqitxa, ¿kunsa Jehová Diosax amuyi?

¹ Suma Yatichiri Jehová Diosatakixa, yupaychirinakapan wali suma wakichtʼatäpxañapax wali wakiskiripuniwa (Isa. 30:20). Yuqapar inuqäna ukhatpachaw Jupax yatichañ qalltäna (Juan 8:28). Ukat Adanan juchachasitap qhipatxa, Jehová Diosax pantjasir jaqinakarux wali munasiñamp wakichtʼaskakïnwa (Isa. 48:17, 18; 2 Tim. 3:14, 15).

2. ¿Kuna aski yatichäwis Uraqpachan apasiski?

² Jichhürunakanxa, Jehová Diosaw uraqpachan yatichasiñapatak pʼiqtʼaski. Kunjamtï Isaías profetax siskänxa, waranq waranqa jaqinakaw Jehová Diosan markapar mantasipki (Isa. 2:2). ¿Kunatakis mantasipki? Diosan yatichäwinakapat yatiqapxañapataki, jïsa, Jehová Diosamp yatichatäñataki (Isa. 2:3). 2009 agosto phaxsit 2010 septiembre phaxsikamaxa, Jehová Diosan Qhanañchirinakapax 1.600 millón millón jila horanakwa yatiyawayapxi ukat Bibliat jaqinakar yatichawayapxaraki. Ukhamarusa, sapa semanaw Diosan yatichäwinakapax 105.000 jila tamanakan yatichasiski, ukat Amuyasiri Chiqapa Uywatax 500 jila arunakaruw Bibliat apstʼat qillqatanak apsuraki.

3. Jehová Diosax churki uka yatichäwixa, ¿kunjamsa jumar yanaptʼawaytamxa?

³ Suma wakichtʼatätanwa. ¡Diosan yatichäwipax wal yanaptʼawayistu! Ukatwa Diosan sutipsa ukat Jupax jiwasat llakisitapsa yattanxa (Sal. 83:18, NM; 1 Ped. 5:6, 7). Ukatsti wali wakiskir aka jisktʼanakan qhanañchäwipsa yatxataraktanwa: ¿Kunatsa tʼaqhistan ukat jiwtan? ¿Kunjamsa chiqpach kusisiñ jikxatsna? ¿Kunatakis aka uraqiru jutpachätanxa? Ukampis janiw ukakïkiti, Jehová Diosax sum sarnaqañwa yaticharakistu ukaw sum jakasiñatakix yanaptʼistu (Jos. 1:8).

4. ¿Kuna aski yatichäwinaksa katuqsna, ukat kunatsa ukanakat askinak apsuñataki chʼamachasiñasa?

⁴ Jehová Diosaxa, servirinakapan jukʼamp suma wakichtʼatäpxañapatakix walja suma yanaptʼanakwa waktʼayi. Ukanakatxa, 4-6 jananakanwa mä lista jikxatäta, ukat inas jumax ukanakar sararakchisma. Ukampisa, jumatï jan ukar sarirjamäksta ukhaxa, kuna yatichäwinaktï katuqirjamäkta ukataki ¿janit chʼamachaskasma? ¿Ukat wayn tawaqunakat kamsasirakispasa? Yatichirinakasa ukat yaqha jaqinakasa jachʼa yatiqañ utar sarapxañapatakiw jila partex wiytapxi. Ukar sarapxañapatak chʼamañchañat sipansa, ¿Diosar jukʼamp yupaychapxañapataki ukat Jupan wakichäwinakap katuqapxañapatakit chʼamañchasktanxa? Uka yatichäwinakattï askinak apsuñatak chʼamachasiñäni ukhaxa, wali sumaw jichhürunakansa ukat jutïrinsa jakasiñäni (Sal. 119:105; Juan 17:3).

Jehová Diosaw markap tuqi servirinakapar wakichtʼi, mä qhawqha wakichäwinakax akanakawa

Liyiñ Qillqaña Yatiqañataki

• Kunatakisa: Aka wakichäwir sarapkani jupanakan liyiñ qillqaña yatiqapxañapataki, ukhamat Bibliat yatxatapxañapataki ukat yaqhanakar yatichapxañapataki.

• Qhawqha tiemposa: Qhawqha tiempoy wakischini ukarjamawa.

• Kawkinsa apasi: Tantachasiñ Utana.

• Khitinakas sarapxaspa: Khiti jilat kullakasa jan ukax yatiqañ munirinakas sararakispawa.

• Ukankañatakix khitimpis parlasiñapa: Wakisirjamäki ukarjamaw taman irpir chuymaninakax wakichapxi, ukat taqi munirinakaruw invittʼapxi.

Diosan Arunakap Yatiyañatak Escuela

• Kunatakisa: Yatiyirinakax Diosan arunakap sum yatiyapxañapataki ukat sum yatichapxañapatak yanaptʼañatakiwa.

• Qhawqha tiemposa: Sapa semana.

• Kawkinsa apasi: Tantachasiñ Utana.

• Khitinakas sarapxaspa: Taqi jilat kullakanaka. Ukat khitinakatï taqi tantachäwinakar jutapki ukat Biblian yatichäwinakapar iyawsapki ukat ukarjam sarnaqapxi jupanakarus invittʼasirakiwa.

• Ukankañatakix khitimpis parlasiñapa: Diosan Arunakap Yatiyañatak Escuela sat tantachäw sarayir jilatampi.

Yaqha aru Yatiqañataki

• Kunatakisa: Jilat kullakanakax yaqha aru yatiqasin Bibliat yatiyapxañapataki.

• Qhawqha tiemposa: Pusi jan ukax phisqa phaxsi. Ukat jila partex sábado alwanakaw maya jan ukax pä hora yatichasi.

• Kawkinsa apasi: Jila partex Tantachasiñ Utana.

• Khitinakas sarapxaspa: Suma sarnaqirit uñtʼata ukat yaqha arut yatiyañ munir jilat kullakanaka.

• Ukankañatakix khitimpis parlasiñapa: Sucursalaw wakisitarjam wakichtʼi.

Tantachasiñ Utanak lurañataki

• Kunatakisa: Tantachasiñ Utanak lurañataki ukat askichañataki. Janis ukan yatichäwinak katuqapkchixa, khitinakatï ukar sarapki jupanakax kunayman lurañanakwa yatiqapxi, ukhamat Tantachasiñ Utanak lurañ yanaptʼapxañapataki.

• Qhawqha tiemposa: Kunjamxay maynix yatiqchini ukarjamawa.

• Kawkinsa apasi: Comité Regional de Construcción ukax kawkha chiqanxay Tantachasiñ Uta lurañapächi uka chiqankiwa. Ukat uraq khathatinakasa ukat yaqha ukham jan waltʼäwinakas utjki ukhaw uka chiqar yanaptʼir sarapxañapatak jupanakarux jawsasiraki.

• Kun phuqañas wakisi: Khitinakatï ukar sarañ munapxi jupanakaxa, bautisat jilat kullakanakäpxañapawa ukat ukar sarañapatakix irpir chuymaninakaw iyaw sapxañaparaki. Experiencianïpas janisa walikïskiwa.

• Ukankañatakix khitimpis parlasiñapa: Tamamankir Irpir chuymaninakaruw Cuestionario para trabajadores voluntarios en Salones del Reino (S-82) sat formulario mayiñama ukat qillqantañama.

Precursoranakatak Escuela

• Kunatakisa: Precursor jilat kullakanakan Diosan arunakapat yatiyañatak suma wakichtʼatäpxañapataki (2 Tim. 4:5).

• Qhawqha tiemposa: Pä semana.

• Kawkinsa apasi: Sucursalaw uk amti, ukat jila partex Tantachasiñ Utana.

• Kun phuqañas wakisi: Mä marakis precursor regularjamaw irnaqtʼañapa.

• Ukankañatakix khitimpis parlasiñapa: Khitinakas sarapxañapa ukax qillqantatäxiwa ukat tamanak tumptʼir jilataw jupanakar awisaraki.

Machaq Betelitanakatak Escuela

• Kunatakisa: Aka escuelaxa, Betelar jichhak mantirinakar Betelan irnaqtʼapxañapatak yanaptʼañatakiwa.

• Qhawqha tiemposa: Tunka suxtani semananaka ukat sapa semanax mä hora.

• Kawkinsa apasi: Betel Utana.

• Kun phuqañas wakisi: Betelitäñapawa jan ukax jaya tiempow Betelan yanaptʼxañapa (mä mara jan ukax jilpacha).

• Ukankañatakix khitimpis parlasiñapa: Khitinakas sarapxani uk sucursalaw amti.

Irpir Chuymaninakataki ukat Yanapirinakapatak Escuela

• Kunatakisa: Irpir chuymaninakaru ukat yanapirinakaparu taman luräwinakap sum phuqapxañapatak yanaptʼañatakiwa, ukhamat tamar sum uñjañatak wakichtʼatäpxañapataki (Hech. 20:28). Uka escuelax kuna maransa apasini ukx Uraqpachan Jilïr Irpirinakaw amtapxi.

• Qhawqha tiemposa: Aka qhipa maranakanxa, irpir chuymaninakatakix mä uru chikataw apasi, ukat yanapirinakapatakix mä uru.

• Kawkinsa apasi: Jila partex Tantachasiñ Utana jan ukax Jachʼa Tantachasiñ Utana.

• Kun phuqañas wakisi: Irpir chuymanïñapawa jan ukax irpir chuymaninakan yanapiripa.

• Ukankañatakix khitimpis parlasiñapa: Khitinakas sarapxani jupanakarux tamanak tumptʼir jilataw invittʼi.

Irpir Chuymaninakatak Escuelaa

• Kunatakisa: Irpir chuymaninakar taman luräwinakap sum phuqapxañapatak yanaptʼañatakiwa.

• Qhawqha tiemposa: Phisqa uru.

• Kawkinsa apasi: Sucursalaw uk amti, jila partex Tantachasiñ Utana jan ukax Jachʼa Tantachasiñ Utana.

• Kun phuqañas wakisi: Irpir chuymanïñapawa.

• Ukankañatakix khitimpis parlasiñapa: Ukar sarapxañapatakix sucursalaw invittʼi.

Tamanak Tumptʼirinakataki ukat Warminakapampitak Escuelab

• Kunatakisa: Tamanak tumptʼirinakaru ukat uka jilatanakar uñjirinakaparu tamanak jukʼamp sum uñjapxañapataki, “Diosan arunakap” jukʼamp ‘parlapxañapataki, ukhamarak yatichapxañapataki’ ukat khitinakatï jupar katuyatäpki jupanakar sum uñjapxañapataki yanaptʼañatakiwa (1 Tim. 5:17; 1 Ped. 5:2, 3).

• Qhawqha tiemposa: Pä phaxsi.

• Kawkinsa apasi: Sucursalaw uk amti.

• Kun phuqañas wakisi: Tamanaka tumptʼiri jan ukax tamanakan tumptʼir jilatanakan uñjiripäñapawa.

• Ukankañatakix khitimpis parlasiñapa: Uka jilatanakaru ukat warminakapampirux sucursalaw invittʼi.

Soltero Jilatanakan Bibliat Yatxatapxañapatak Escuelac

• Kunatakisa: Soltero irpir chuymaninakaru ukat irpir chuymaninakan yanapirinakapax solterüsipki jupanakaruw kuna luräwtï taman katuqapkani uk sum phuqapxañapatak yanaptʼañatakiwa. Uka escuelat mistupki jupanakaruxa, markapan kawkhantï jukʼamp yatiyirinakax munaski uka chiqanakaruw khitasi. Yaqhipax yaqha markar khitatäpxarakispawa, jupanakatï sarirjamäpxchi ukhaxa.

• Qhawqha tiemposa: Pä phaxsi.

• Kawkinsa apasi: Sucursalaw uk amti, jila partex Tantachasiñ Utana jan ukax Jachʼa Tantachasiñ Utana.

• Kun phuqañas wakisi: Soltero jilatäñapawa ukat 23 maranit 62 maranakanïñapawa, jañchi tuqit kʼumaräñapawa ukat kawkhantï Diosan arunakapa yatiyasiñapatak yanaptʼax munaski uka chiqar sarañatakisa jilat kullakanakar yanaptʼañatakis jankʼakïñapawa (Mar. 10:29, 30). Irpir chuymanjama jan ukax yanapiripjamax pä maraw jan jaytas irnaqtʼañapa.

• Ukankañatakix khitimpis parlasiñapa: Sarañ munirinakaruxa, yaqhip chiqanakanx pä uru jachʼa tantachäwinwa jupanakamp tantachasiñatakix jawsasi, ukanwa jukʼamp qhanañchasi.

Cristiano Matrimonionakan Bibliat Yatxatapxañapatak Escuelad

• Kunatakisa: Cristiano matrimonionakar suma wakichtʼatäpxañapatak yanaptʼañatakiwa, ukhamat Jehová Diosata ukat markapat kuna luräwtï katuqapki uk sum phuqhapxañapataki. Uka escuelat mistupki jupanakaruxa, markapan kawkhantï jukʼamp yatiyirinakax munaski uka chiqanakaruw khitasi. Yaqhipax yaqha markar khitatarakispawa, jupanakatï sarirjamäpxchi ukhaxa.

• Qhawqha tiemposa: Pä phaxsi.

• Kawkinsa apasi: Centro Educativo de la Watchtower ukanwa yatichañax qalltasiwayi, Patterson (Nueva York) markana. Tiempompixa, yaqha chiqanakanwa apasini, kawkhantï sucursalax siskani uka chiqana, inas Tantachasiñ Utana jan ukax Jachʼa Tantachasiñ Utana.

• Kun phuqañas wakisi: Panpachaniw 25 maranit 50 maranakanïpxañapa, jañchi tuqit kʼumaräpxañapawa, panpachanix pä maraw jan jaytas Diosatak sapürutjam irnaqtʼxapxañapa ukat Isaías profetjam amuyunïpxañapawa, jupax akham sänwa: “Akankasktwa nayax, nayar khitasita” sasa (Isa. 6:8). Ukatsti pä mara jaqichatäxapxañapawa ukat kawkhantï yatiyirinakax munaski uka chiqanakarus sarirjamäpxañaparakiwa.

• Ukankañatakix khitimpis parlasiñapa: Yaqhip chiqanakanxa, mä uru jachʼa tantachäwinwa uka escuelar sarañ munirinakarux mä tantachäwitak jawsasi ukat ukanwa jukʼamp qhanañchasi.

Escuela Bíblica de Galaad de la Watchtower

• Kunatakisa: Precursoranakaru ukat Diosatak sapürutjam irnaqtʼir yaqha jilat kullakanakaruw misionerüpxañapatak wakichasi.

• Qhawqha tiemposa: Phisqa phaxsi.

• Kawkinsa apasi: Centro Educativo de la Watchtower, Patterson (Nueva York) markana.

• Kun phuqañas wakisi: Jaqichatanakakiw sarapxaspa. Kunapachatï ukar sarañatak solicitud phuqantapxani ukhaxa, panpachanix pä maraw jan jaytas Diosatak sapürutjam irnaqtʼxapxañapa, kimsa maraw bautisatäxapxañapa, pä maraw jaqichatäxapxañapa ukat 21 maranit 38 maranakanïpxañapawa. Inglés aru yatipxañapawa ukat kʼumaräpxañaparakiwa. Taqi ukanaktï phuqapxchixa, khitinakatï precursorjam yaqha markan irnaqtʼasipkta (khitinakatï Gaalad Escuelar jan sarasin misionerjam irnaqtʼasipki ukanakasa), tamanak tumptʼirinakasa, Betelan irnaqtʼasipki ukanakasa, Soltero Jilatanakan Bibliat Yatxatapxañapatak Escuelata jan ukax Escuela de Entrenamiento Ministerial ukat misturinakasa ukat Cristiano Matrimonionakan Bibliat Yatxatapxañapatak Escuelat misturinakas ukar sarañatak qillqayasipxaspawa.

• Ukankañatakix khitimpis parlasiñapa: Yaqhip markanakanxa, kimsa uru jachʼa tantachäwinwa uka escuelar sarañ munirinakarux mä tantachäwitak jawsasi ukat ukanwa jukʼamp qhanañchasi. Ukampis markamantï jan utjchi ukat jumax uka escuelar sarañ munchisma ukhaxa, kawkïr markantï jumax irnaqtʼaskta uka markx kawkïr sucursalas uñji ukaruw jukʼamp yatxatañatak qillqasma.

Sucursal Sarayirinakataki ukat Warminakapampitak Escuela

• Kunatakisa: Sucursalanakan sarayapki jupanakar yanaptʼañatakiwa, ukhamat Betel Utan luräwinak jukʼamp sum uñjapxañapataki. Ukat kunjamsa tamanakasa, tamanak tumptʼirinakasa ukat tamanak tumptʼirinakar uñjiripasa irnaqtʼasipki uk uñjapxañapataki, ukatsti Bibliat apstʼat qillqatanakax yaqha arur jaqukipasiski, qillqatanak lurasiski, tamanakar uka qillqatanak apayasiski ukat yaqha ukham luräwinak sum uñjapxañapatakiraki (Luc. 12:48).

• Qhawqha tiemposa: Pä phaxsi.

• Kawkinsa apasi: Centro Educativo de la Watchtower, Patterson (Nueva York) markana.

• Kun phuqañas wakisi: Sucursal Sarayiri jan ukax Comité de País jan ukax ukan irnaqtʼañatak uttʼayatäñapawa.

• Ukankañatakix khitimpis parlasiñapa: Uka jilatanakaru ukat warminakapampirux Uraqpachan Jilïr Irpirinakaw invittʼi.

[Qhanañchäwinaka]